來自外星的你!

開始明白同BBS相處就好似同外星生物打交道咁...

當你希望釋出善意, 盡可能以和平非暴力的方式同外星生物講道理的時候, 佢地就會即時坐穿梭機, 經過黑洞返咗自己個星球, 你會發現你同佢地其實係有一百萬光年咁遠的距離, 當佢地大吵大鬧, 喪喊的時候, 由於大家相隔成一百萬光年, 你講既野, 都唔知要等幾耐先至傳送到去佢個星球, 而佢地亦唔明白你地D地球話, 更加冇心機去估你地D地球人講咩! 所以你繼續用地球話同一百萬光年以外的外星生物溝通, 就算你重複講N次, 跟本就係嘥氣!

外星生物唔會明白你地地球有幾危險, 最鍾意拍窗, 玩電制, 玩門鉸, 玩鉸剪, 玩刀, 同埋挑釁你地地球人的寵物狗! 無論你點樣形容俾佢地聽, 玩呢D野有幾危險, 都係廢話, 因為你地地球人D野, 佢個星球冇既, 對佢地黎講所有野都係未見過, 好新奇, 好想玩!

外星生物唔會明白你地地球人D咩規舉, 因為係佢地個星球上面跟本冇規舉可言, 佢地係外星霸主!

外星生物亦唔會輕易食你地地球人的野, 因為佢地個星球入面只有水同空氣, 當你嘔心瀝血煮餐飯出黎, 佢地只會食兩啖應酬吓你, 如果要佢地食晒D野, 非要你D地球人悲恭屈膝不可! 我最近發現, 其實外星生物只要有水同空氣就可以生存, 因為試過夜晚唔食飯都可以捱到第二朝早, 外星生物跟本未試過肚餓的感覺!

當外星生物玩到興高彩烈或睇電視去到忘我境界時, 你同佢地講要食飯或者熄機瞓覺, 就等於要摧毀佢地個星球一樣, 佢地會同你死過!

當你好聲好氣同佢地講: "夜喇! 小朋友要上床瞓覺", 由於佢地個星球同地球係有時差的關係, 佢地只會眼光光, 玩, 笑, 講埋D無謂野, 唔會乖乖就範, 你只好駛出地球人的殺手鐧 -- 靠惡!  佢地雖然唔明白地球話, 但因為你夠惡, 佢地都可能會瞓低先, 等你走咗睇吓形勢點, 再趁機東山再起!

不過, 兩小兄弟應該係來自同一個星球, 因為佢地兩個用外星話溝通時, 有講有笑, 我呢個地球人當然聽唔明佢地講乜, 笑乜啦!

後記@18.11.2015
外星生物好似唔係好適應到地球D氣候同水土, 經常無啦啦發燒, 流鼻水, 敏感(鼻, 皮膚, 食物), 搞到口腫, 眼腫, 面腫, 又成日肚屙, 嘔, 肚痛......等等

幼稚園註冊日... 唔見咗2000蚊

話說由於過往太多家長一人霸佔多個學位, 導致有人冇書讀, 有書冇人讀, 結果教育局今年安排新生每人只可以到一間幼稚園註冊, 註冊時須交出學券, 如要取回學券到第二間幼稚園註冊, 即當放棄學位, 沒收每人970蚊註冊費。

話說孖寶兄弟係超細細B, 所以心儀的學校唔收佢, 雖然嫲嫲有朋友話可以幫手"疏通"一下, 但由於到註冊日(2015年1月22至24日為註冊日) 仲未有消息, 媽媽於是係23號上午為孖寶兄弟到另一間冇咁心儀(但係基督教學校)的幼稚園註冊, 每人盛惠970蚊, 合共1940蚊!

同日下午, 正當媽媽係髮型屋做緊負離子之際, 突然收到心儀學校的電話, 話可以offer孖寶兄弟入讀下午班, 當然緊係讀上午班好啦! 但由於媽媽鍾意學校夠近屋企, 又唔駛BBS經過三五九流的公屋, 於是在心亂如麻的情況下, 以及同爸爸'商量'後, 決定取回學券, 第二朝早到心儀的幼稚園註冊!

結果就這樣, $970 x 2 = 泡湯了!

提子乾杯子蛋糕(麵包機版)

材料 (3個直徑7cm杯子的份量):

1. 牛油60g
2. 雞蛋1隻
3. 牛奶50ml
4. 糖50g
5. 低筋麵粉120g
6. 泡打粉(Baking Powder) 5g
7. 提子乾40g
8. 雲尼拿香油幾滴 (可省略)

做法:

1. 先將材料1, 2, 3, 4倒入麵包機
2. 再將材料5, 6隔篩篩入, 啟動麵包機的"揉麵"模式
3. "揉麵"完成後, 加入提子乾
4. 將麵漿倒入杯子(約8成滿)
5. 預熱焗爐180c, 焗約20分鐘待蛋糕脹起, 表層變成啡色即可

孖寶兄弟性格大不同

雖然係孖生兄弟, 但哥哥同細佬的性格真係好唔同, 所以我可以肯定, 性格真係天生!

哥哥:

1.  勇敢, 充滿好奇心, 鍾意探索新事物
換句話講即係百厭, 鍾意搞呢樣搞果搞, e.g. 用腳踩甩個插穌, 走入去浴屏入面開水喉, 玩風筒, 玩趟門, 所以經常仆到流血, 夾親手指, etc.

2.  大情大性
有少少不滿即發脾氣, 大吵大鬧, 喊到歇斯底里; 但忽然間又會好開心, 尤其同細佬追追續續時, 會大笑同笑得好大聲

3.  專注力弱但有時又好專注
呢個形容好似好矛盾, 但佢確實如此, 每次媽媽教佢, 同佢講野(已經踎低, 同佢同一個level, 對住佢講) 佢唔知係聽唔明, 定係跟本冇心機聽我講野, 專注力似乎好弱; 但另一方面, 佢又好專注係自己世界入面, e.g. 好專注咁搞呢樣搞果樣, 好專注咁睇電視

4.  唔聽話, 反叛
唔知應唔應該咁樣"評價"佢, 可能佢跟本聽唔明我講野, 唔代表佢唔聽話, 不過, 可能我同爸爸真係太锡兩個仔, 好少鬧佢地, 所以鬧咗佢, 佢都唔知, 仲嬉皮笑臉, 直到爸爸發晒火, 顛咗咁鬧佢, 又困佢入黑房, 佢先至識驚! 唉...

細佬仔:

1. 安全意識高
換句話講可以話佢怕事, 細膽, 細佬好少主動搞D未見過既新事物, 因為佢會話驚驚, 但佢見到哥哥搞, 佢就會搞埋一份, 不過, 由於細佬唔會主動搞(通常只係跟哥哥), 所以細佬好少受傷

2.  聽話, 守規舉, 容易氹
可能細佬的理解能力比哥哥強, 所以感覺細佬比較聽話, 通常叫細佬做A, 佢唔會做咗B (哥哥剛好相反), 細佬比較少挑戰我同爸爸的'權威' (感覺上哥哥則經常試探我地的底線), 由於細佬聽話(聽得明我地講野, 大家溝通到), 所以比較容易氹, 雖然細佬都有扭計的時候, 但通常氹佢兩句就好快收聲

3.  情緒穩定
細佬情緒比哥哥穏定, 好少聽到細佬大笑, 就算玩得好開心, 佢都只係微笑(間中都會笑出聲, e.g. 爸爸同佢玩騎膊馬), 細佬就算眼瞓都好少扭計(發顛, 喊, etc.)

4.  理解力高, 注專力強, 記憶力好, 開始有自理能力
基本上, 媽媽同細佬講野, 佢聽得明9成(從佢的反應就知道), 細佬好留意/記得一D細微事物或動作(認得邊件衫係自己, 邊件係哥哥, 邊個燈制開邊盞燈) 最近, 媽媽發覺細佬有好多野可以自己做, e.g. 食飯, 除拖鞋, 刷牙仔, 沖涼時挖鼻屎, 洗面面 (起碼細佬會嘗試自己去做, 而唔係坐係度, 垂低手, 等人幫佢做)

趁早!

最近有80後朋友結婚, 邀請我地一家四口出席星期日下午的Cocktail Wedding Party, 朋友搞Cocktail一來因為早已在加拿大註冊結婚, 二來想慳錢, 令我諗起曾經聽過一句說話: 「除咗死之外, 幾時都係趁早好! 包括買樓, 結婚, 生仔!」

我好早就做咗頭兩樣, 2004年買樓, 當時層居屋只係114.8萬, 對當時一搬打工仔黎講, 每月供4000-5000蚊, 係綽綽有餘, 老公仲有閒錢去買架日本車仔玩吓, 當然, 住居屋絶對唔係我杯茶 (因為由細到大都住居屋, 仲要係同一個屋苑, 結咗婚都住返係呢度, 即係冇進步過!) 跟住我地就每隔幾年換一次樓, 2007年, 2008年, 2010年, 2014年, 換到而家, 已經擁有2層樓, 自己住果層樓買果時768萬(現值超過800萬), 另外仲有一層價值580萬的2房單位收緊租。

所以真係講得冇錯, 買樓要趁早!

2005年結緍, 當時同老公一齊儲咗大概20萬, 結完婚好似仲有少少錢剩, 當年去逸東酒店(唔算咩靚酒店, 但已高級過酒樓)擺酒, 擺咗16圍左右(因為男女家分開擺, 我老豆要擺傳統中式酒樓), 每圍$5,999包酒水未計加一, 當年人情公價係500, 好朋友會做600, 一圍12人基本上可以打和, 或只係補多少少, 埋單都只係10萬左右, 唔似得而家下下都話minimum charge 要20萬。

所以真係講得冇錯, 結婚要趁早!

我惟一只係生仔冇趁早 (結咗婚7年, 2012年先至生仔, 仲要打孖黎, 救命!) 當年算係早結婚 (係我班朋友堆當中), 似住自己年輕, 想過吓二人世界先 (唔似得有D中學同學中二已經拍拖, 到結婚時已經過咗N年二人世界, 所以佢地一結即生), 同埋一直都諗唔到咩原因要生仔, 但就有一百個理由唔生仔 (我地唔鍾意小朋友, 呢個世界太污染, 香港社會競爭太大之類...) 不過, 眼見身邊越黎越多朋友生仔 (係Facebook一面倒post D BB相, 大晒幸福, 但就冇人講過湊仔有幾咁辛苦!) 於是又傻更更學人生仔 (仲要無啦啦整對孖, 可能係天譴!) 年紀大陀仔好辛苦(我仲要打孖黎), 生仔因為開刀, 唔辛苦, 但係餵夜奶, 換片, 沖涼, 抱抱, 暗瞓覺, 餵粥, 餵飯, 到而家要陪佢地玩, 處理佢地的情緒, 教佢地咩生字詞語句子, 教佢地基本自理能力, 教佢地要有禮貌, 手足之情, etc. 真係成日挑戰緊我EQ同體能的極限!

所以真係講得冇錯, 生仔要趁早!

不過, 諗返如果我當日趁早生仔, 又未必有今時今日的環境俾2個仔, 因為當時我份工又唔穏定, 又辛苦, 靠老公一個人份正苦工撐起一頭家, 仲要無啦啦多2件, 睇怕會打返原形住居屋囉!

孖寶兄弟25個月零9日喇!

又update一下孖寶兄弟的近況 --

哥哥:

1) 家人關係
哥哥變得好痴媽媽, 可能因為佢知道媽媽錫佢, 又肯抱抱, 又唔捨得鬧佢 (因為佢之前唔太痴我, 如果仲鬧佢, 佢唔理我, 所以媽媽甚少鬧然然的!), 加上媽媽係屋企的時間(即星期一至五晚, 星期六,日)都用黎陪晒佢兩個, 付出幾多, 佢地係知道的! 哥哥尋晚開始唔俾爸爸暗瞓覺, 要媽媽暗, 叫爸爸bye bye! hoho... 然然都係好錫細佬, 有野一定俾埋細佬玩, 佢跟媽媽入房, 見細佬未入黎, 都會叫細佬come!

2) 說話能力
呢幾晚開始, 臨瞓前俾晒佢2個上黎, 同我係床度一齊睇相相(以前係細佬的專利), 睇相相時, 媽媽會問好多問題, 亦會教佢地講詞語, 句子, 日常知識, 親戚關係, BB點黎等等... 經過幾日, 哥哥講野好似叻咗, 都開始識講句子 (e.g. 爸爸揸車車, 媽媽整蛋糕), 除咗句子外, 哥哥好鍾意講完中文再講英文 (e.g. 爛咗broken, 車車car, 魚魚fish, 水水water, 洗手手wash hands) 超級可愛喔!

3) 身體及心智發展
然然體重約24.5 lbs, 身高85cm, 哥哥呢排少咗流口水(可能係口腔肌肉發展成熟喇!) 但係仍然好論盡, 行行吓會跌低, 同埋專注力真係好弱(惟一專注係睇電視), 同理心都係比較弱, 同佢講細佬瞓咗覺, 講野要細聲D, 佢都仲係好大聲咁講埋D無謂野, 有幾次真係想車爆佢, 好驚佢嘈醒細佬! (真係唔知佢係冇同理心定係跟本唔明我講咩!)

4) 人際關係
出街唔係咁鐘意同陌生人打招呼, 唔肯望人, 去playgroup或者返教會親子崇拜, 佢都係自己坐埋一邊玩玩具, 好少同其他小朋友有互動(爭玩具)

細佬仔:

1) 家人關係
細佬仲係好痴媽媽, 爸爸多咗同佢玩(臨瞓前), 食飯又坐爸爸隔離(有時爸爸會同佢鬥快食), 所以佢痴多咗爸爸, 尋日返教會, 爸爸去完廁所返黎, 佢見到爸爸係門外行返入黎, 即時爆喊! 細佬仍然最鍾意搶哥哥手上的玩具, 不過, 有時媽媽鬧佢, 佢會肯俾返哥哥, 叫佢拖住哥哥, 佢都肯拖

2) 說話能力
細佬的語言能力繼續進步, 開始識講長少少的句子, e.g. 爸爸整琴琴俾鎷媽。上星期佢仲識得點阿嫲去拉埋晒個廳D窗簾布, 開燈 (估計佢應該係話: 曬曬... 拉窗簾... 黑蚊蚊... 開燈) 細佬對說話的理解能力都好強, e.g. 哥哥瞓咗覺, 佢識得講野要細細聲; 媽媽同佢講大個仔唔再用片片, 要自己去廁所, 佢會強烈表達不滿

3) 身體及心智發展
逸逸體重約24 lbs, 身高85cm (但又好似俾哥哥矮少少, 可能哥哥頭髮厚啫!) 細佬通常都可以食晒D飯, 但仍然係瘦奀豬, 佢好鍾意整齊, 佢會拎晒D Thomas火車出黎, 一架跟住一架排晒係地下, 佢安全意識好高, 冇把握佢唔會做, 所以好少跌親或整傷自己。逸逸心智發展俾哥哥成熟, 明白別人的意思, 就算扭緊計, 你同佢講吓道理, 佢都有機會收聲, 唔再扭計(但哥哥就係扭到歇斯底里!)

4) 人際關係
細佬出街肯同陌生人打招呼(當然係爸爸媽媽要求佢咁做啦!), say hello, bye bye, 通通照做。去playgroup或者返教會親子崇拜, 唔知點解, 佢都係俾人搶玩具 (當然即時爆喊啦!)

又想通了...多一點...

今日諗通咗 --> 都係唔好咁慳, 如果慳咗會令自己日後耿耿於懷的話, 就唔好慳, 好似以前咁:

1) 為咗慳錢, 唔捨得去外地影結婚相/搵過另一間攝影公司影過另一輯結婚相, 而家每次睇返D結婚相都耿耿於懷, 真係影得好差

2) 為咗慳錢, 唔捨得請陪月員坐月, 結果好似冇坐過月咁, 到而家都耿耿於懷坐月期間冇得到適當的照顧, 搞到而家身體都好差(老公話係因為我冇做運動啫!)

3)  為咗慳錢, 今次換樓買唔到高層單位, 只買到中層, 日日返工放工都耿耿於懷, 所有同我一齊入lift的人都住得高過我 (俾老公知我有呢個諗法一定又話我short short地!)

4) 成日為咗慳錢, 耿耿於懷老公走去買貴野(換車, 音響, 相機, 電話, etc.), 耿耿於懷好似只有自己一個係度慳錢

5) 為咗慳錢, 到而家30幾歲人都冇去過做facial(其實都因為驚俾人sell package), 成日都耿耿於懷自己連女人最基本的福利(去美容)都冇!

想通了, 不如唔好慳喇! 想買就買, 費是慳咗錢, 眼紅隔離條友唔幫我慳, 埋怨佢咪仲唔好!

2014年過去了... 想通了!

2014年過去了, 老實講, 2014年實在過得唔係太開心, 應該係話, 唔開心多過開心, 怨氣太深(對老公), 連佢都feel到, 一切都源於我覺得佢冇陪我一齊湊對仔, 同埋冇好似其他人老公咁樣, 欣賞老婆為自己生仔!

但係呢幾日, 我好似諗通咗少少, 因為我諗返起其實我老公一直都唔鍾意細路(其實我自己都係), 要求/期望一個唔鍾意細路的人, 陪我一齊湊仔(仲要係打孖黎), 同埋好似其他人老公咁樣, 欣賞老婆為自己生仔, 我呢個要求/期望似乎真係好唔現實, 好唔合邏輯!

諗通咗我對老公的要求/期望原來係完全唔跟劇情的時候, 我對佢的怨氣好似突然消失咗, 尋晚佢主動幫個仔沖涼(其實佢以前都成日幫晒2個仔沖涼, 因為我對手痛, 筋膜炎), 同埋佢半夜三更聽到細佬仔喊, 走去隔離房抱住個仔, 暗返佢瞓, 我見到佢咁做, 反而覺得好唔好意思, 麻煩到佢! (係真呀! 以前只有心裏暗地怨佢唔幫手, 我三更半夜走去氹個仔, 佢就倒頭大睡!)

諗通咗我對老公的要求/期望原來就等同我唔鍾意食梳槤, 佢辛辛苦苦托個梳槤返黎同我分享, 仲期望我好欣賞佢做既野一樣! 我開始諗吓我老公其實都有好多野值得我去欣賞:

1)  唔煙、唔酒、唔玩女人 (佢最憎人食煙噴到佢, 飲少少酒都面紅, 同埋以佢的身高好難有女人埋到佢身, hoho...)

2)  顧家 - 佢放工一定係返屋企, 有時仲要佢去買餸 (佢知我唔鍾意行街市又濕又迫, 怕我辛苦, 所以佢去)

3)  肯做家務 - 未生仔前屋企冇工人, 全部家務都係佢做 (因為佢話我做家務的方法唔啱佢心意)

4)  成份糧俾晒我 - 聯名戶口出糧 (所以我都係成份糧俾晒佢), 屋企的水電煤供樓管理上網雜費, 全部都係佢搞掂, 連我D信用咭數, 交稅, 電話join咩plan, 都係佢幫我搞埋, 基本上我咩都唔駛煩

5)  我鍾意的野佢通常都會買俾我 - 講真, 我鍾意的野唔多, 亦好少"扭"佢買野, 但當佢知道我鍾意某樣野, 尤其係貴野, 連我自己都唔捨得買時, 佢通常都買俾我/鼓勵我買 (e.g. agnes b返工袋, mysty woman 大褸, panasonic麵包機, totoro龍貓記事簿, yamaha數碼鋼琴, ikea梳妝枱, rasonic電焗爐)

6)  錫老婆 - 都算就我, 通常小事都就我, 我承認自己有時都小姐脾氣(但唔算勁, 我覺得!), 佢唔鍾意細路都就我生仔; 成日都唔想我辛苦(寧願佢自己辛苦埋佢) e.g. 去街市買餸、煮飯、去快餐店食飯, 佢一定幫我買埋拎埋俾我、如果男人可以陀仔, 佢應該都會幫我陀對仔, 唔駛我咁辛苦; 佢仲成日敎2個仔對住我講: 媽媽, 我愛你!

7)  肯幫手湊仔 - 大前提係佢唔鍾意細路都幫我湊, 我放產假時, 佢斷斷續續請咗一個月假陪我, 又煲住劇捱到12點幾1點餵夜奶, 冇叫醒我幫手, 曾經試過有段時間冇工人, 佢都同我並肩作戰咗2個月

8)  好錫2個仔 - 雖然佢唔鍾意細路, 但佢好錫2個仔, 肯陪佢地玩, 做埋D白痴表情; 哥哥有2次要入急症室, 佢都好緊張; BBS要去健康院, 佢次次都陪我地去; 我冇時間幫2個仔搵幼稚園, 佢就填晒D表格, 仲請假親身去交埋表

9)  一手包辦屋企所有hardware的維修 - 大至搬新屋要裝修, 小至BB玩具要換電蕊, 當然包括埋佢自己架車, 唔係壞咗都要得閒落去整下先至安樂

10)  都唔算大駛 - 佢平時都好少買衫褲鞋襪手錶之類, 好少用錢, 對食方面更加係慳到冇朋友 (但佢知我對食都有少少要求, 有時都會陪我去食吓貴野, 氹吓我開心), 佢只係每年換一次手提電話 (我怕執輸, 通常都一齊換埋, 其實跟本冇需要換), 換車(生咗BBS後換咗架七人車, 補咗10萬蚊, 一年後嫌架七人車唔夠馬力, 換咗另一架, 補多1萬), 買相機同鏡頭 (生咗BBS後話要每個月影BB相, 結果影咗初頭幾個月, 之後就封塵)

諗到呢度, 我開始明白, 老公唔係唔幫手湊仔, 只係我地分咗工, 佢係會計部+採購部+機電工程部, 我就係湊仔事務部, 負責照顧2個仔的起居飲食同情緒 (計落我仲少野做D喎!)。

2015年第一篇blog, 提醒我要感恩, 欣賞我老公, 記住以後唔開心, 同老公鬧交之後就開黎睇吓喇!!!