大嶼山自駕遊

抽咗好多個月, 後補再後補, 終於抽到大嶼山自駕遊的「許可証」!

早上10點出發, 11點半左右經過水口球場, 見到有4隻牛牛係度食草, 於是就停低架車, 一家四口落車睇牛牛...

孖寶第一次咁近距離睇牛牛

Bye Bye牛牛, 我地繼續揸車去昂平, 途經山頂個亭, 係度可以欣賞石壁水塘全景, 好靚! 

繼續揸車去昂平, 停車場要收費, 泊低架車, 行去昂平市集(好似去咗海洋公園個集古村咁!) 再行去睇吓個Big佛, 封咗唔俾人行上去, 哥哥見到沿途有幾間山水豆腐花, 佢話想試吓(細佬話好污糟, 唔想入去!), 最後入咗其中一間, 叫咗2碗凍豆花, 盛惠$36, 老公話同樓下街市賣D豆花冇分別, 冇錯! 惟一分別只係個價錢!

之後去返市集D舖頭行吓, 入咗其中一間, 買咗包椰子糖(媽媽話細個時新年必食, 細佬話好想試吓!)

下午1:10離開昂平, 出發去大澳, 成個停車場Full晒(平日都淪陷!), 好在最後都搵到個位泊車! 入去搵嘢食, 搵咗間茶餐廳, 由於孖寶從來都未去過茶餐廳(平日都係去酒樓、日本餐廳、西餐廳...), 細佬好大打擊, 完全接受唔到咁「惡劣」的環境, 不停埋怨... 不停埋怨... 哥哥反而冇乜所謂, 仲話個肉醬意粉幾好味!

食完飯, 當然要食埋飯後甜品, 於是去對面沙翁舖買咗4個沙翁, D沙翁啱啱炸出嚟, 新鮮熱辣, 蛋香撲鼻, 好好味! 好幸福啊!

然後, 孖寶就俾街上面D貓咪深深吸引住, 前進速度異常緩慢......

拜會晒成條街上的貓咪...... 先至去到睇棚屋

再行去參觀大澳文物酒店...... 然後行返出去停車場, 揸車去水口, 今日的重點節目 -- 挖蜆!  老公一早準備咗幾公升水擺係車尾, 仲有自備挖蜆三寶 -- 水桶 + 膠鏟 + 凳仔!

 原來最想挖蜆嗰個係 -- 媽媽! 足足挖咗2粒鐘, 不過, 收鑊少得可憐......

大部份都係Baby蜆, 所以全數放生了!

臨離開的時候, 哥哥同細佬玩擲貝殼, 細佬突然執起一舊生滿蠔殼的石頭, 結果D手指仔當場血流如注, 慘慘豬啊! 要用大量紙巾按壓傷口, 拿拿林返車用水沖洗, 可憐的逸逸, 左手有4隻手指受傷, 右手都有一隻手指受傷, 最慘係...... 佢暫時唔可以學／練小提琴, 嗚嗚!!!

孖寶升小五

 由於時間關係, 孖寶已經升小五了......

哥哥最近好似...... 開始發育...... 佢仲未夠10歲......會唔會太早?! 

哥哥的身高已經追到同細佬差不多, 最近多咗街坊問: 「E! 佢地係唔係孖架?」好耐冇俾人咁樣懷疑過喇! 之前D人通常問: 「係唔係相差一年?」

LV Vavin 鏈帶錢包 開箱

 掙扎咗一陣...... 黑色...... 奶茶色...... 兩隻色都好靚啊!!!

Chloe Alphabet Card Holder 開箱

 一直很想找一個粉色的小錢包!

在這兩個包款之間掙扎了好幾天!

最後帶回家的是......

簡約的包裝深得我心

布質的防塵袋

Cement Pink色較上一代的Blush Nude色淺, 也很美啊!

很可愛的Size

沒有加配字母, 就是喜歡簡約的小錢包

考慮到我沒有太多卡, 也很少零錢, 這個正好配合我的使用習慣

背面也有一個卡位

個心好累!

 心很累, 眼淚也流乾了..........

現在每日提醒自己 :

不要再對佢有要求!!!
不要再說出自己內心感受!!!
不要再買習作!!!
不要再提醒溫習!!!
不要再教仔!!!

佢教仔時不要再出聲!!!

自學水彩2022

 Hea 咗半年......

今年第一幅作品, 終於係3月完成喇!

5月的作品...... 挑戰透明水杯

6月的作品...... D花好快就畫完, 但D葉畫咗好耐好耐......

自家餸

由於疫情嚴峻, 都係唔好出街食飯, 以免中招!

早午晚三餐都要係屋企食......

早餐

(爸爸)規定要一人一隻蛋, 通常配煎魚／腸仔／火腿／焗豆（都係蛋白質）, 再配麵包／出前一丁／pancake（碳水化合物）, 餐飲就係鮮奶(孖寶)／豆奶(媽媽)。

晚餐

食咗幾年都係同一樣的菜式：

星期一     番茄牛肉餅 + 菜 + 蒸魚

星期二     節瓜炒雞粒 + 菜 + 斬料

星期三     彩椒炒雞粒 + 菜 + 蒸魚

星期四     煎雞翼 + 蝦仁炒蛋 + 菜  

星期五     肉碎茄子/青瓜 + 菜 + 煎魚

真係食到好悶, 加上阿姐煮餸唔好食, 曾經同老公呻過, 但係只係落得被人鬧的下場, 每次呻悶/呻唔好食, 佢就一句得埋嚟: 咁你諗丫! 你諗丫!  唔好只係識話有問題, 你諗方法解決囉!!!

唉! 次次呻下都俾人串到上太空! 我已經唔敢再出聲! 唔想悶? 唔想難食到嘔? 惟有自己搞掂......

我一向煮嘢食都唔叻（因為由細到大都冇食過好嘢! 我阿媽都係煮嘢食唔叻! 唉! 家門不幸!），但為咗我自己同孖寶（可以不用理會我老公，未結婚前，佢一袋生命麵包食4日，蒸一大兜排骨／雞翼擺冰格，食足一個星期，所以佢唔覺得幾年都係食同一樣的菜式，有咩問題？），我都會上吓網睇吓有咩簡單食譜，又美味又有營養der~ 然後試煮! 最近WFH, 所以每日的午餐都係我負責!

午餐

午餐(1)  肉醬意粉

午餐(2)  炒飯

午餐(3)  炒麵

午餐(4)  日式豚肉生薑燒

使用自家製燒汁, 甜甜地, 孖寶好like!

午餐(5)  日式咖喱雞肉飯

使用日本咖喱磚, 配料有甘筍同薯仔

午餐(6)  日式咖喱漢堡飯

配埋日式凍豆腐, 正!

午餐(7)  蛋包飯

正確名稱係「小丑蛋包飯」

午餐(7)  蕎麥麵

孖寶食慣拉麵, 所以唔like

同場加映：

哥哥至愛der~......磨菇忌廉湯

都係哥哥至愛der~......焗大啡菇

夏日限定：

細佬至愛der~......中華涼麵

家中第五波「逆」情

香港第五波疫情係2021年12月尾爆發, 1月14日學校停止面授課堂, 1月25日公務員開始WFH。

孖寶又嚟上網課的日子，之前已經講過，上網課＝冇上課，加上孖寶間學校，由４年級開始，轉用電子書（但中文又有２本實體書喎！做功課就一時實體，一時電子），係冇實體書的情況下，媽媽完全唔知道佢地學咗乜嘢（尤其英文），亦唔知道佢地o既學習進度！

孖寶上網課初期，媽媽公司遲遲未有WFH安排，每日都要返工，然後放工返到嚟，見到哥哥仍然仲有好多功課未做晒（但佢聲稱自己做晒，佢好似理解／分析唔到點樣為之做晒／未做晒功課）。再然後，媽媽就全晚坐係佢隔離篤佢做功課，根本就係懲罰緊我！！！天呀！我做錯乜嘢？係唔係做人阿媽，就規定放工返嚟唔准休息？ 

1月尾，我同老公終於都有得WFH, 我地部門規定每日要有30%人手要返工，即係10日之中要返3日（今個星期返1日，下星期就返2日，再下星期又返1日......如此類推）老公個部門就要每星期返2日，不過已經好過每日要返工，增加感染風險。

農曆新年假期之後，香港每日的確診數字不斷爆升，最初每日100 --> 300 --> 600 --> 1000 --> 3000 --> 7000 --> 12000 --> 30000 --> 50000, 呢幾日就大概每日30000, 似乎冇再爆上去喇!

今個星期一, 孖寶開始放暑假, 冇錯! 政府宣佈提早放暑假, 放到復活節假完結! 媽呀! 好亂呀! 點解暑假會係復活節假之前? Anyway, 無啦啦突然停課, 孖寶開始荒廢光陰, 雖然已經叫咗佢地整個時間表, 每日跟返時間表做人, 但實際上, 佢地完全冇理過個時間表, 細佬由朝到晚呻好悶, 哥哥就全情投入自己的世界, 媽媽唔想佢地浪費光陰, 想俾D習作佢地做, 佢地即面黑 + 怨聲載道!

至於WFH的媽媽...... 就嚟崩潰!!!

係孖寶停課前, 就要一邊做公司嘢, 一邊催促哥哥做功課, 仲要教功課 + 對功課 + 幫佢地溫習! 加上哥哥成日漏交功課 + 測驗唔合格, 老師就會打電話搵我(唔會搵爸爸), 我又要立刻處理! 

係孖寶停課後, 就要一邊做公司嘢, 一邊處理佢兩個D無謂糾紛, 仲要俾習作孖寶做(以免佢地浪費光陰) + 教佢地英文! 

政府之前無啦啦突然宣佈停課, 為咗做全民強檢, 而家又話唔做, 咁停課嚟做乜? 之前上網課, 都叫做有老師負責教佢地（佢地吸收到幾多就另計啦！）但而家，冇咗網課，媽媽要做埋老師嗰份，WFH要打兩份工！人都癲！

為咗趁呢個「暑假」幫孖寶惡補英文, 媽媽今日又去咗書局買英文補充練習, 同場仲有3個媽媽, 同我一樣, 企咗好耐, 搵咗好耐, 揀咗好耐, 苦惱咗好耐! 唉! 點解永遠都係做人阿媽最慘??? 

孖寶兄弟語錄 (2022)

好耐冇寫喇! 因為孖寶講D嘢實在太搞笑, 不能盡錄!

前晚臨瞓, 細佬仔遞咗隻手埋嚟俾我睇

細佬: 媽媽, 你睇吓! 我隻手甩皮呀!

媽媽: 吓! 咁快D搽返D cream啦! 乾燥呀!

細佬: 唔關事! 搽cream都冇用! 係退皮!

媽媽: 你估你係蛇咩? 退皮?

細佬: (叫我拎隻手出嚟同佢度下相差幾遠), 我隻手就嚟同你差唔多喇! 我隻手變大得太快, 所以要退皮, 然後再生返新既皮出嚟!

媽媽: .............

2022.03.28（星期一）

孖寶停課期間, 媽媽唔想佢地荒廢學業, 所以會俾D英文閱讀理解同Grammar練習佢地做!

今日媽媽WFH, 同孖寶一齊食早餐, 突然間, 細佬仔話......

細佬: 災難警報呀!!! 習作海嘯呀!!! 將於2個鐘後嚟到!!!

哥哥: 大家快D逃走呀!!!

細佬: 不過, 呢度將會有2個小朋友犠牲!

媽媽: ............. (唉! 都唔知好嬲定好笑!)

2022.11.06（星期日）

話說媽媽係廚房準備晚餐, 哥哥走入嚟搵我......

哥哥: 媽媽! 我想測試一吓你有冇肌肉, 請你收緊手臂!

媽媽收緊手臂, 哥哥搣咗媽媽手臂一吓

哥哥: 唔! OK! 而家請你收緊大腿肌肉!

媽媽收緊大腿, 哥哥搣咗媽媽大腿一吓

哥哥: 唔! 最後測試埋你面部肌肉...... umm......不過, 媽媽你平時都會突然變臉, 那緊晒塊面D肌肉, 唔駛測試喇!

媽媽: ...... 咁其實你係唔係想話我呢? (心諗都唔知好嬲定好笑)

小確幸(續)

話說媽媽好錫孖寶, 所以孖寶都好錫媽媽!

媽媽有一份絶世好工, 好少OT, 尋日5pm, 老細突然call我入房, 佢話今朝早有份嘢, 唔記得叫我做, 大老細話今日要搞掂! (頂你! 今朝既嘢, 你而家先叫我做, 仲咁老實同我講, 你唔記得, 真係無言!)

結果, 媽媽要OT了!

孖寶見媽媽咁夜都未返屋企, 好擔心!

首先係哥哥：

然後係細佬：

雖然呢個OT真係開得好冤枉, 但收到孖寶的窩心短訊, 真係好Sweet!

返到屋企門口, 佢地即刻開門俾我, 仲兩個走晒過嚟迎接我! 我好幸福喔!