(我)考完試了!

11月23至26日係孖寶上學期考試, 亦即係媽媽考試!

每次考試, 媽媽都盡晒力! (註: 仲慘過自己考試!)

今次考試, 媽媽將數學科外判咗俾爸爸, 所以輕鬆咗少少! 不過, 媽媽仍然要準備中文科同英文科旳模擬試卷, 冇錯! 媽媽撈埋出版商, 用咗成個星期時間出試卷! 又同孖寶溫習(由於媽媽把聲經常俾孖寶的傾計聲蓋過, 爸爸特登淘咗一個小型擴音器, 有掛耳咪 (冇錯, 好似老師上堂用嗰款)! 孖寶都好努力溫習同做練習, 欣賞佢地!

考完試當日, 媽媽實在要奬勵一下自己 -- 請咗一日假! 早上同老公食早餐, 睇戲, 中午去Icon酒店嘆Lunch, 下午回家, 一家四口踩單車, 晚上去海運食拉麵, 之後坐船仔去中環, 玩摩天輪+旋轉木馬! YEAH!

老師好快就派返考試卷, 細佬仔英文有80分! 讚! 都不枉我用咗成個星期出卷, 又咁用心同佢溫英文!  不過, 哥哥英文竟然唔合格!!! 佢好驚, 喊晒咁問我係唔係好嬲? 我話: 媽媽唔係嬲你! 我只係好震驚啫! 唉.......... (睇住佢份卷, 我手都震埋!)

至於外判咗俾爸爸的數學科(孖寶上次測驗雙雙唔合格), 今次考試竟然好高分: 細佬100分, 哥哥都有90幾分! 真係要讚一吓爸爸!

至於中文科, 孖寶都係得60幾分, 叫做合格, 唔強求喇!

至於一直冇同佢地溫書的常識科, 細佬都係60幾, 哥哥就唔合格!!! 原來佢有2頁冇做, 天呀! 點解咁架? 咁都可以睇漏咗? 抑或唔夠時間做呀? 細佬突然爆咗一句: 咁佢漏咗2頁, 都有50幾分, 算係咁喇!!! (細佬, 多謝你安慰我!) (苦笑emoji一個)

終於都崩潰了!

 開學第63日, 我終於都崩潰了!

每日放工返到屋企, 哥哥都係未做完功課, 其實話佢未做完, 已經好仁慈, 因為事實上, 佢跟本就冇做功課, 部份做咗係因為佢係學校做, 佢放學返到嚟屋企, 根本就係 -- 冇 -- 做 -- 功 -- 課!!!

鬧又鬧過, 罰又罰過, 問又問過, 鼓勵都鼓勵過, 甚至連喊都喊過(我講我!), 佢都係唔做功課! 然後, 佢唔做功課的結果就係: 懲罰我全晚坐係佢隔離篤住佢做, 我想講: 我放工返嚟都好攰, 我都好想休息吓, 坐係梳化睇吓新聞, 篤吓機, 係唔係做人阿媽就冇資格休息? 係唔係做人阿媽就咩都By Default? 由9月開學到而家, 足足Chur咗2個月, 尋晚, 我終於崩潰了!

我崩潰, 但我冇發癲, 我冇鬧爆哥哥, 我冇放棄佢, 我仍然堅持教埋佢, 直至佢做晒D功課! 但我尋晚半夜, 喊醒咗兩次, 第一次飲泣, 第二次放聲大哭, 我意識到自己已經崩潰了!

哥哥唔做功課 -- 對我嚟講, 係一個死症! 仲要係每晚返屋企都要面對的困局, 我見唔到曙光! 我見唔到出路! 我甚至因為恐懼面對呢個困局, 我有無數次, 放工返到屋企樓下, 係商場漫無目的兜圈, 我唔敢返屋企, 我好想逃避, 我唔想面對!

我唔知我仲要捱幾耐? 亦唔知我仲可以捱幾耐?

可能要食藥嗰個 -- 係我!!!

16th Anniversary + My Birthday

 今年結婚周年 + 我生日, 去咗Spa + Tea, 好悠閒好舒服的一天啊!

朝早9:30去Cordis Hotel check-in, 立即享受一頓豐富又悠閒的早餐! 然後返上房休息, 浸吓浴, hea吓hea吓, 12點就去做Spa, 老公Book咗Deep Tissue Massage, 好痛但又好似舒緩咗我個緊晒的膊頭!

下午3:15, 轉場去Ritz Carlton食Tea, 不過, 由於個早餐仍然未消化, 都唔係好食得落個Tea, 加上D 甜點超級甜, 食到最後, 我都已經分唔出係咩味喇! 連我最愛的creme brulee 都只係食咗兩啖, 投降喇! 甜到想嘔!

返到屋企, 食完晚飯(只係食咗2條菜), 就到咗切蛋糕時間喇! 多謝老公送的花花同壽司屋DIY模型套裝! 

後記 :

老公仲送咗個Chloe Mini Marcie手袋同龍貓記事簿(大會指定生日禮物)俾我! 多謝老公! 今年收鑊好豐富啊! hoho......

自學水彩2021

自從去年8月陷入咗黏土花的世界, 停咗好幾個月冇畫到水彩, 去年年尾草草了事咗一幅!

2021年第一幅作品係向日葵

2021年3月的作品

2021年5月的作品

2021年9月的作品

孖寶升小四

時間真係過得太快, 孖寶今年已經升小四喇! (再過3年就升中一, 然後青春期, 滿面暗瘡 + 變咗老牛聲 + 成日呢埋係房打機 + 唔睬我, etc. 我唔敢再諗落去喇!)

剛過去的暑假冇得去旅行(已經第二年冇得去喇! 睇怕呢個疫情仲要搞多10年8年, 唉!) 今年只係幫孖寶報咗一個暑期興趣班(整電動機械人), 而暑假期間, 只係去咗1次Staycation, 1次科學館, 1次海灘, 1次去戲院睇戲, 1次上山頂睇日落, that's all! 其餘時間都係係屋企Hea, 同埋做媽媽買俾佢哋的習作! (孖寶好可憐啊!)

9月1日開學,  今年唔搭校巴, 爸爸每朝車佢地返學, 然後由姐姐接放學, 由於疫情關係, 只係返半日 (8:00am - 12:45pm), 媽媽覺得返半日真係Very Good! 希望可以長期Keep住返半日就好喇!

返半日的好處:

(1) 佢地可以返屋企食飯, 唔駛食學校D飯盒(超級難食!)

(2) 小朋友冇咁辛苦, 中午放學後, 返到屋企食埋飯, 仲有成個下晝做功課, 休息, 玩Lego, 睇書, 練琴(孖寶的琴技係呢2年內進步得好快, 都係因為疫情關係)

不過, 孖寶Back to School, 亦即代表媽媽的"暑假"結束, 又要每晚同佢地對功課, 溫書, 搏鬥, etc.

Staycation 2021@Ritz-Carlton - Day 2

 2021.06.12 (星期六)

朝早瞓到濛濛鬆鬆期間, 突然聽到細佬仔叫爸爸, 原來佢賴咗尿, 底面褲都濕晒, 幫佢搞咗一輪, 連哥哥都醒埋, 全家都醒晒, 不過, 由於時間尚早, 未夠7點, 大家都係繼續瞓啦!

早上大約8:45, 哥哥叫大家起身喇! 然後, 刷牙, 洗面, 換衫, 落去103/F食早餐!

食早餐的地方就係我同老公上次去食Lunch Buffet的餐廳 (老公話: 咁駛乜咁辛苦要排隊嚟食呀?!), 雖然冇窗口位, 但我哋個位都可以望到窗口, 今日天氣麻麻地, 灰灰濛濛咁!

我哋同孖寶一齊出去攞嘢食, 有廚師即場煎奄列, 孖寶話想食薯餅(未Refill), 廚師話一陣拎過嚟俾我哋...... 嘩! 好好服務呀! 然後, 個廚師仲過嚟同我地傾計。之後, 細佬話佢都想食奄列, 我叫佢出去同個廚師講, 哥哥陪細佬出去, 然後細佬兩手空空咁返嚟, 佢話個廚師會拎過嚟 (真係唔好意思, 麻煩晒喇!) 我估因為而家唔係旺季, 所以冇乜人, 個廚師先至咁得閒拎埋過嚟, hoho!

早上10:30食完早餐又返上房Hea, 孖寶又浸熱水, 我都浸吓, 老公仲沖咗杯Coffee俾我一邊浸浴, 一邊嘆Coffee, 爽!

Hea到12點, 要Check out喇! 哥哥突然爆喊, 話點解住咁少日? 點解咁快走? 唔夠呀! 仲有好多嘢未做呀! 下次要住一個星期呀! (我同爸爸勸極佢都係爆喊, 算喇! 放棄佢喇!)

之後, 去Elements攞車, 有9小時泊車優惠, 盛惠$286, OK啦!

今次Staycation完全冇安排其他任何酒店以外的活動, 全程係酒店入面Hea!

兩日一夜的Staycation完結!

Staycation 2021@Ritz-Carlton - Day 1

話說今年4月, 我哋一家四口終於忍唔住, 去咗一次Staycation! (一來係慶祝孖寶考完試, 二來係冇得去旅行的心靈慰藉!)

自此之後, 孖寶就愛上咗Staycation, 仲要求酒店要高級過Cordis (都仲未識搵錢就咁講究享受, "港童"就係咁樣煉成的...... 唉!)

爸爸話佢都想住吓D靚酒店, 上網見到Ritz-Carlton有個父親節Staycation優惠($2,990), 諗住豪一次! 後來, 發現有半價Voucher, 原價$2,800的Bed & Breakfast Package, 變成半價, 連埋10% Service Charge都唔駛$1,800可以住一晚Ritz-Carlton, 抵呀!

2021.06.11 (星期五)

孖寶最後一日考試, 中午返屋企食麥當當, 之後就出發去酒店喇!

下午3點左右到達Elements泊車, 搭穿梭Lift去103/F酒店Lobby Check in, 我地間房係107/F, 雖然唔算高樓層, 但已經高過晒周圍的建築物, 可以望到大嶼山! (本來Book咗City View, 職員話Upgrade咗海景房俾我哋!)

間房好大, 有2張Queen Size Beds, 足夠一個大人同一個小朋友瞓, 我照例同細佬仔孖舖(安睡組合), 爸爸同哥哥孖舖(鼻鼾組合), hoho!

酒店有免費Kid Set(男孩子), 包括藍色浴袍, 毛巾, 拖鞋, 牙刷, 牙膏, 沐浴套裝(但等咗1個鐘先至送上嚟房間)。另外, 酒店仲Room Service咗2個Welcome甜品(芒果布丁), 一兜糖果, 2個蘋果俾我哋!

張床都幾細, 今晚瞓得辛苦D

由於老公Book咗黃昏6點去酒店泳池游水, 所以冇出去行街, 一家四口係房入面Hea到5:50, 就上去頂樓(118/F)的室內泳池, 要讚吓呢個預約制度, 好過排隊, 好過要Waiting List, 目測呢節大概有20人, 唔算多人, 孖寶好Like個LED大銀幕, 同埋泳池側邉的石壆(可以瞓上去, 又可以狂奔踢水花), 今次亦係我人生第一次係咁高的地方游水, 感覺好尊貴喔! 不過, 無啦啦掛一號風球, 又落大雨, 搞到我欣賞唔到個維港景!

由於D冷氣好凍, 加上D泳池水超多漂白水(搞到皮膚好唔舒服) 我哋未夠7點就離開!

晚上8點, 我地去Elements商場覓食, 哥哥想食日本嘢(超多人等位, Sorry呀! 哥哥, 雖 然媽媽都好想食日本嘢, 但咁多人等, 都係放棄喇!), 細佬想食Pizza意粉(冇乜人等), 好快就有Sofa位, 細佬話要食Carbonara同水牛芝士Pizza, 另外叫咗個小食(蟹餅+炸番薯條), 哥哥等食期間已經體力不支...... 挨係爸爸個膊頭度瞓著咗!  食物味道OK, 但份量少得可憐!

食完飯後, 我哋去咗Supermarket買生果同雪糕, 返上房繼續食, hoho! 孖寶話要浸多次熱水, 我同爸爸沖完涼後, 都浸吓, 仲落埋酒店提供的香香浴鹽, 好C服啊!

今晚差不多11點瞓, 聽朝要瞓晏D先起身啊!

Day 1 完

痘痘大作戰(上)

話說, 青春時期的我, 雖然有生暗瘡, 但唔算好嚴重...

再話說, 讀大學時期的我, 額頭的粉刺比較嚴重, 但唔算好困擾...

再再話說, 讀碩士時期的我, 唔知係唔係讀書壓力, 暗瘡大爆發(即同一時間面上超過5粒暗瘡), 係又紅又腫, 超級痛的大毒瘡, 由於事態嚴重, 一定要去睇皮膚科醫生!

於是, 展開咗長達廿年的痘痘大作戰!

睇皮膚科醫生, 佢會開水楊酸潔面露 + Benzoyl Peroxide (日間搽) + Retin A (臨瞓搽), 如果你對Skincare成份有研究的話, 就會知道呢個Combination會有咩後果 -- 就係變咗燒豬! 冇錯! 好似燒傷咗咁成塊面紅晒, 然後開始甩皮, 成塊面乾到龜裂, 好似發Mo麵包咁, 全完冇顏面出街, 呢個過程簡直就係「置之死地而後復生」!

經過大半年後, 暗瘡開始減少, 由於皮膚已經適應咗, 所以唔再甩皮, 變得光滑, 暗瘡印都好快退, 不過, 我發覺成塊面黑晒, 就好似曬黑咗咁, 膚色深咗10度, 不過, 冇再暗瘡大爆發, 實在感恩! 之後每2-3個月覆診一次, Keep住冇再爆發喇!

結婚後, 由於有食Pills, 可以幫助調節Hormones, 所以塊面一直都維持住「良好」狀態, 通常每年會生一粒大暗瘡, 平時間中有暗粒, 但唔會演變成暗瘡, 所以我都開始放鬆落嚟! 呢個狀態維持咗10幾年, (除咗懷孕期間, 大爆發都唔可以搽藥膏, 驚影響BBs, 到懷孕後期有好轉, 但生完BBs坐月期間又爆過, 之後都係食返Pills)。

直至去年11月開始, 每個月都會生一粒暗瘡(額頭同下巴), 我開始意識到「唔對路」, 唔知咩事! 我懷疑係因為我轉用咗M.A.C的粉底 (嚇到我即刻唔敢用, 用返Shiseido), 但係暗瘡仍然係冇停過, 仍然係每月一粒, 今年4月, 我右邊面無啦啦爆咗粒瘡, 由於已經進入咗我的Concern Area, 嚇到我即刻進入作戰狀態, 滿以為痘痘大作戰只係一場過咗去的惡夢, 竟然, 呢一刻, 我又要再披甲上陣!

廿年後的今日, 資訊同醫學都發達咗, 我日以繼夜, 夜以繼日上網搵資料, 我知道醫暗瘡的第一線藥物一定係用Retinoid, 但我真係唔想再一次經歷「置之死地而後復生」, 加上冷靜落嚟, 我知道每月生一粒暗瘡唔算好嚴重, 所以應該要用比較溫和的方法, 所以我第一時間買咗Benzoyl Peroxide 2.5%

Benzoyl Peroxide 2.5% 的主要功效: 殺滅暗瘡細菌, 控油

每晚卸妝潔面完, 等塊面乾咗, 搽係T字位, 然後2小時後沖洗, 再加強保濕, 不過好似冇乜效果, 仍然係每月生一粒暗瘡, 就算搽落去啱啱起瘡的位置, 都冇幫助, 粒瘡繼續變大同出膿頭, 加上之後開始搽埋兩邊面, 搞到一撻撻紅咗, 好乾, 上唔到粉底!  由於BPO冇料到, 仲搞到我變咗沙漠肌, 我惟有再試吓其他成份...... (後來, 我發現我應該係對BPO過敏, 因為一搽係T字位以外的地方, 第二朝皮膚就會紅咗一撻 + 腫起 + 痕 + 甩皮, 但我用咗4個月仍然係咁, 所以應該唔係皮膚未適應, 而係過敏!)

藍色圈圈就係搽咗BPO後過敏, 一撻撻紅腫咗

Salicylic Acid 2% 的主要功效: 溶解油脂, 疏通毛孔, 消炎, 控油

除咗暗瘡, 我左邊面有一粒困擾咗我大半年的油脂粒(去診所用CO2 Burn完仲係屹立不倒), 加上4月頭用咗一星期Anessa BB防曬後, 兩邊鼻樑起晒粒粒!  我4月中開始用, 晚上卸妝潔面後用一塊水楊酸棉片抺面 (我初頭幾次只係抹T字位同敷粒油脂粒), 每隔3日用一次, 奇蹟發生呀! 粒油脂粒竟然縮細咗(睇住佢消失), 變返平滑 (早知唔好用CO2 Burn佢啦! 搞到甩咗焦之後有個紅印, 嗚嗚嗚......) 兩邊鼻樑的粒粒都有減少, 洗面時候明顯感覺到變得平滑! 今個月暫時冇再爆瘡!

經過幾個月的爆發, 面上留下咗好多戰績, 加上年紀大, 新陳代謝慢咗, D瘡印退得好慢, 於是, 我又上網尋覓有效的退印成份, 其實, 要退印, 就一定要加速皮膚新陳代謝, 所以一定係用Retinoid, 不過, 正如上面講過, 我真係唔想再變燒豬, 所以我唔會揀Retinoid, 至於AHA都有好多種, 最有效係Glycolic Acid, 不過, 又係有機會變燒豬, 原來台灣近十年八年興用Mandelic Acid (杏仁酸), 佢聲稱係比較溫和的AHA 。

Mandelic Acid 10%的主要功效: 煥膚, 美白, 去印, 收毛孔, 減淡細紋 (講到好似萬能咁囉!)

暫時只係用咗1次T字位, 1次兩邊面, 未見到任何效果, 不過, 感覺都幾油吓, 仲話要之後加強保濕, 我真係好難說服自己, 係塊油面上面再搽保濕, 加上咁油吓, 真係好驚爆粒粒! 唉!

尋日去診所做1064, 治療師話我個額頭好乾, 驚打完laser之後會爆粒粒, 仲叫我不如約過另一日先做, 吓??? 咁大鑊! 最後, 治療師幫我調低個laser度數照打, 同埋叫我之後一星期要加強保濕! (希望唔好爆粒粒啦!!!)

後記@2021.05.31

上星期五去沙灘, 再俾多次機會Anessa BB防曬, 結果額頭同兩邊面即晚已經起晒粒粒, 其中係面頰有3粒超大, 好似會演變成暗瘡咁! 我真係好驚! 我分唔到究竟係敏感? 還是真係暗瘡? 但係我又唔敢即晚用水楊酸, 因為By Common Sense, 始終曬過, 唔可以再用酸類刺激D皮膚, 惟有即晚厚敷保濕Gel, 過咗2日, 3粒超大仲係度, 似乎唔係敏感, 堅係生瘡! 今晚惟有試吓用水楊酸, 睇吓救唔救到! (好想喊!!!)

一個星期過去, 3粒瘡其中一粒變大變紅咗, 好憤怒!!! 即刻掉晒所有Anessa BB防曬!  然後不停上網搵「唔爆瘡防曬」, 又要唔油, 又要唔笠, 又要度數高, 又要唔晒黑, 又要防水防汗, 又要調色, 又要不致敏 etc. 我仲未搵到...... (喊!)

後後記@2021.07.07

自從4月中開始用水楊酸, 5月中開始用杏仁酸, 我的方法係:

1. 星期一、三、五用水楊酸; 星期二、四、六用杏仁酸, 星期日休息或

2. 星期一、四用水楊酸; 星期二、三、五、六用杏仁酸, 星期日休息

今個星期開始, 終於見到有少少效果, 鼻樑上的粉刺減少咗, 整體面色均勻咗, 透白咗(只限洗完面後幾分鐘未出油未暗沉之前), 暗瘡印(仲有之前用CO2 Burn咗粒油脂粒個紅印)都有淡咗! YEAH!

不過, 其實係未見到呢D效果之前(即早1-2星期前), 膚況係超級差, 成面塊起咗好多粒粒/粉刺, 色斑都好似多咗咁, 應該係因為酸類加速咗皮膚新陳代謝, 令到底層的粉刺+色斑一次過浮晒上嚟, 只要繼續Keep住搽, 應該好快就會代謝晒D粉刺同瘡印。不過, 尋日又發現咗另一個問題, 我左手掌同右手中指甩皮(應該係因為我用杏仁酸時, 係先滴幾滴係左手掌, 再用右手中指搽上面), 但我有即時洗手, 都係甩皮, 好在塊面冇甩皮啫! 

Staycation 2021- Day 2

 2021.04.09 (星期五)

今朝7:30, 一家四口已經醒咗!

今日天陰陰, 有D毛毛雨, 本來諗住今日入去大澳, 孖寶突然話唔想, 惟有改去科學館(其實幾日前先至去過!)

早上8:30, 一家四口落去食早餐(酒店包早餐, 12歲以下小童免費), 早餐係自助餐形式, 有廚師即場煎奄列, 哥哥好like佢個菇菇芝士奄列, 好快就食晒!

食飽飽, 返上房, 孖寶話唔想咁快Check out, 想Hea耐D! 於是又開一缸熱水, 俾孖寶玩水(佢地今次話要分開浸+玩水!)

細佬仔好識享受!

Hea到差不多12點, Check out, 去科學館! 由於有入場人數限制, 所以要係門口排隊拎籌(要等30分鐘, 孖寶話想等, 其實只係媽媽負責排隊, 佢兩個走咗去玩囉!) 12:45pm, 爸爸去咗泊車, 我地入場先, 之後再去門口接返爸爸入嚟。

次次去親科學館, 都係出唔返嚟, 今次又係玩咗好耐, 爸媽不停問: 走未呀? 玩完未呀? 下午2:30, 爸爸去攞車先, 媽媽同孖寶係Souvenir Shop睇嘢, 期間哥哥搵唔到我同細佬, 走咗出去, 好在最後都見到我哋, 不過, 佢已經忍唔住爆喊, 媽媽即時緊抱處理!

媽媽最鍾意呢個花花世界展覽

哥哥近來對植物都好有研究

由於未食午餐, 又唔知附近邊度好食, 最後決定返屋企樓下食Tea。下午4點返到屋企。

兩日一夜的Staycation完結!

Staycation 2021 - Day 1

原來, 每年可以去3次日本, 唔係必然!

疫情係2019年尾爆發, 我哋就係2019年尾去咗沖繩過年, 亦係我哋最後一次去日本! 

已經超過一年冇搭過飛機, 冇去過旅行 (一直以嚟, 有得去旅行, 就係我返工的原動力, 而家冇得去旅行, 唔知為乜要返工!), 之前仲同老公講, 如果泰國放寛唔駛檢疫, 泰國都照殺! (不過近幾個星期, 泰國疫情又爆過!)

之前睇新聞, D人因為冇得去旅行, 就瘋狂Staycation, 迫爆酒店, 排2個鐘隊check in, 酒店泳池要waiting list, 食早餐好似等派飯咁, etc. 不過, 由於真係太耐冇去旅行, 為咗安慰一下自己的負面情緒, 我哋終於都屈服, 係復活節假期同孖寶去咗一次Staycation.

2021.04.08 (星期四)

下午3點左右到達酒店, 有代客泊車, 上去Lobby Check in, 冇乜人, 唔駛排2個鐘, GOOD! 酒店送咗2袋Welcome Gift俾孖寶, 裏面有日用品, 畫簿, 顔色筆。我地Book咗相連套房, 每間房有一張King Size Bed, 爸爸同哥哥孖舖(鼻鼾組合), 我同細佬仔孖舖(安睡組合)!

其中一間房

有浴缸, 孖寶最鍾意玩水!

入門口間房有個小小的Pantry

上到房間, 換咗家居服, 門鐘突然間響, 原來有專人送上Welcome Drink 同 Snack 俾小朋友, 點解大人冇既?! 

細佬超鍾意著浴袍

(哥哥都好鍾意著, 仲指定要媽媽幫佢著)

開咗一缸水俾孖寶玩水, 然後我同老公都浸吓熱水, Relax吓, Hea咗一輪, 下午5:50揸車離開酒店, 出發去海港城食温野菜, 由於時間尚早, 唔駛等位, 我哋叫咗個二人餐, HSBC信用咭有7折, 連埋加一大概$740, 唔算好多嘢食, 不過, D肥牛好正! 孖寶都好like!

食完飯, 晚上7點搭船去中環, 玩摩天輪+旋轉木馬(套票成人$40, 小童$30), 一家四口盛惠$140, 好抵呀! 我地先去玩旋轉木馬(自從冇去廸廸尼, 已經好耐冇玩喇!), 轉咗都有5個圈, 算係抵玩喇! 之後就去玩摩天輪, 由於限聚令, 每個車廂最多坐4人, 我地一家四口包咗廂, YEAH! 玩摩天輪期間, 見到隔離有個露天電影院, 播緊Titanic, 好正, 好有Feel! (原來要$800一個包廂, 另外仲有加一服務費, 好貴啊!)

今晚天色好清, 睇夜景一流!

晚上9點, 回程返酒店, 唔係返屋企, 好有旅行Feel, 所以特別興奮, hoho......! 由於頭先餐飯唔算食得飽, 加上平時去旅行必定會食雪糕或買嘢返酒店繼續食, 所以媽媽不停嚷著要食雪糕, 不過, 因為泊車就嚟過時, 惟有先離開海港城, 孖寶仍然係情緒高漲, 返酒店期間係車入面大唱Yuu......

返到酒店停車場入口, 媽媽見到有7-11, 即時落車睇吓有冇雪糕賣, 竟然 -- 冇! 惟有去附近超級市場買, 買咗2支Dryers朱古力甜筒!

返到酒店房, 沖涼, 食雪條, 最後搞到11:30先瞓! 同去旅行的情況一樣! (雖然張床好大瞓得好舒服, 但始終瞓唔慣, 成晚瞓吓醒吓咁, 原來爸爸都係!)

 Day 1 完

孖寶兄弟語錄 (2021)

話說經過爸爸多年嚟對孖寶的性教育, 孖寶大概已經知道BB係點嚟既! 

尋晚食飯, 爸爸見到個碟入面有D西蘭花碎, 佢覺得好似精子, 於是, 佢就同孖寶講......

爸爸: 嗱! 精子就係咁樣架喇! 不過, 緊係細好多啦! 要用顯微鏡先睇到!

媽媽: (夾咗2粒蓮子入去隻碟入面) 嗱! 呢2粒就係媽媽的卵子喇!

爸爸: 只有1粒精子可以成功游去同卵子結合! 

然後, 細佬突然好似有所頓悟咁......

細佬: 噢! 原來我地都係一粒精子!

媽媽: 唔! 冇錯! 細佬, 估唔到你只得8歲, 就已經參透人生喇!

再然後, 細佬突然大叫......

細佬: 吖! 好嘔心呀! 原來我地係阿爸條JJ出嚟架! 吖! 好嘔心! (N次)

我同爸爸已經笑到出唔到聲!

再再再然後, 哥哥突然好詭異的眼神, 壓低聲音嚟講......

哥哥: 正確嚟講, 係睪丸! 原來我地曾經住係阿爸個睪丸入面! 唉! (佢個樣簡直係懷疑人生!)

一家四口已經笑到停唔到!!!

平民級粉底 Vs 貴婦級粉底

我人生第一支粉底係Shiseido, 曾經試過歐美牌子......中伏! 始終都係日本粉底適合亞洲人, 而Shiseido係出名的日本牌子, 品質有保証!

話說用咗冇十年都有八載的MAQuillAGE, 香港幾年前唔再賣, 所以每次去親日本必定入貨, 不過, 自從2020年頭爆疫, 冇得去日本入貨! 惟有死死地氣係香港Shiseido買! 入到舖頭, 個BA同我講, 佢哋只係得一隻粉底, 就係 SYNCHRO SKIN 感肌同步持久粉底 SPF35 PA++++, 是但啦! 反正都係搽D嘢上塊面, 等塊面睇落膚色均勻D啫!

一直對粉底冇乜要求的我, 突然覺醒: 一支粉底$360, 我大概可以用一年, 一支卸妝油$120, 大概2個月用一支,  一年就要$720, 卸妝竟然貴過化妝, 係唔係有D本末倒置呢?  既然一年先至用得一支粉底, 係唔係可以俾多少少錢, 買支靚D呢? 諗到呢度, 我就開始積極上網睇D貴價粉底喇! 講到貴價粉底, 日本貴婦級品牌Cle de Peau Beaute肯定係其中之一, 佢係Shiseido旗下的品牌, 所以係我首選!

爭扎咗一星期, 終於係CPB的官網買咗佢地去年7月推出的鑽光柔霧修護粉底液 SPF20 PA+++, 盛惠$1,050, 係我人生中最貴的粉底!

入正題喇! 究竟平民級粉底($360)同貴婦級粉底($1,050), 有冇分別呢? 我真係好想知道, 俾貴咗3倍價錢, 我係唔係就會升級做貴婦呢? 所以我今日做咗個唔專業的「一天實測」......

我最近的皮膚狀況: 本身係混合偏油, 但2個月前開始用Benzoyl Peroxide 2.5%清暗瘡同粉刺, 所以最近洗完面之後都係好乾, 尤其兩邊面頰(仲有毛孔粗大, 黑眼圈, T字位出油, etc......, 係一堆死症嚟!)

今日氣溫20度左右, 唔凍唔熱, 濕度65-70%左右, 有D偏低。今早同平時一樣, 用Cetaphil洗完面, 搽咗Shiseido的免疫力精華, 再搽Laura Mercier Perfecting Primer(只有少少保濕, 冇控油), 好簡單! 我係右邊面上Shiseido, 左邊面上CPB。

外觀:

一睇就知平民同貴婦的分別! wakaka......

質感: 

Shiseido比較cream狀, CPB就比較liquid狀

顏色: 

Shiseido係140, CPB係O10, 兩隻都屬於自然偏白, 目測Shiseido偏灰白, CPB就偏粉橙

氣味: 

兩隻都冇乜氣味, 起碼冇酒棈味! CPB有少少香味, 但只係好少好少!

易推度: 

我用Koyudo(晃佑堂)的粉底掃上, 雖然Shiseido比較cream狀, 但算易推, 冇啜住, 至於CPB, 由於佢係liquid狀, 所以推開完全冇難度, 不過, 少少感覺佢好易乾, 要快D手

即時妝感:

兩支粉底都係Matt Finish, Shiseido的粉感好明顯, 總之就係好明顯撻咗D嘢上塊面咁! 至於CPB, 我終於明白乜嘢係Second Skin, 望落唔覺得有搽嘢, 但就係膚色均勻咗! 勁! 其實我覺得兩支粉底的Coverage差唔多, 只係屬於中等(CPB中等偏低), 黑眼圈只係遮到4成, 兩邊面的紅印/斑都唔係好遮得到, 所以我再用少少粉底, 重點印係有紅印/斑的位置, 兩支粉底都可以build up到多少少coverage, 但都遮唔晒, 不過, CPB就算搽咗兩層都唔覺厚粉, 但Shiseido就有少少變咗白面!

觸感: 

兩邊面即時都有少少黏黏地(CPB嗰邊冇咁黏), 但兩邊都唔算笠, 畫完眼眉(即大概5分鐘後), CPB嗰邊已經唔黏, 但Shiseido嗰邊仍然有少少黏!

耐磨度: 

兩邊面都有上Laura Mercier的柔光蜜粉嚟定妝。(疫情備註: 明明好俾心機化妝, 化到美美咁出街, 但偏偏要戴住個口罩, 不斷咁磨甩個妝佢, 超級無奈!!!) 以下係今朝返到公司的狀態(上妝2個鐘後), 可以見到口罩入面張紙巾左右有少少的分別: 右邊(Shiseido)甩粉比較多(深色D), 左邊(CPB)都有輕微甩粉(好淺色)。

CPB明顯冇啱啱完妝時咁白, 透返皮膚本身的顏色出嚟, 

感覺粉底同皮膚比之前更加融合, 妝感好自然

相同的光線之下, Shiseido仍然係粉感好重, 

明顯白面!

氧化程度: 

我覺得係我自己面色容易暗沉, 唔關人事! 睇到上面幅圖的Shiseido仍然係白面, 就知佢抗氧化幾強啦! wakaka...... (後來我發覺CPB中午過後就暗沉晒, 有一日試吓唔抺走手背上用剩咗的粉底, 過咗15分鐘, 揤新鮮粉底出嚟對比, 嘩! 嚇咗我一跳, CPB氧化得好嚴重, 直情係變咗橙色, 唔怪之得每日中午過後, 塊面望落去都好似俾太陽曬紅咗咁! 妖!)

到咗中午(上妝5個鐘後), 塊面開始出油, 變咗奶油肌, 遠睇兩邊都差不多, 冇乜分別! 不過, 近睇兩邊面頰就...... Shiseido開始浮粉, 起白點點(其實今朝11點已經發覺起白點點)! 然後, 面上D紅印/斑好似冇咗粉底遮住, 原形畢露咁! CPB近睇都有少少浮粉, 都開始見到透咗面上D紅印/斑, 但冇起到白點點! 冇白點點喔! 好開心!

下午3點(上妝8個鐘後), 雖然無論遠睇+近睇, 兩邊面的額頭, 下爬, 腮位都冇乜明顯分別, 但我發現, Shiseido嗰邊面出油明顯較多! 係閃令令, 油光滿面咁款! 摸落係黏笠笠的感覺! 啜手der~! 至於CPB嗰邊, 雖然都有出油, 但只係柔光(唔係油光), 好似皮膚本身好有光澤咁! 摸落仍然係爽滑der~! 仲有一個更加嚴重的問題 -- Shiseido嗰邊, 頭先D白點點更加明顯, 而且, 法令紋(近鼻位)嚴重甩粉, 出紋, 明顯見到D粉卡咗係D紋度, OMG! 但CPB嗰邊, 雖然都有少少甩粉, 但冇一撻撻!

下午5點(上妝10個鐘後), 係冇吸油+冇補妝的情況下, 兩邊面都變咗閃令令, 油光滿面喇! CPB嗰邊都淪陷咗, 面頰浮粉, 起晒白點點! 至於Shiseido嗰邊, 簡直係慘不忍睹, 可以見到面頰的粉底已經甩到所餘無幾, 斑駁! 白點點變得更大更明顯! 到咗呢個時候, 個口罩就變得好有用喇! hoho......

總結:

平民級粉底 Vs 貴婦級粉底, 確實係有分別der~! (但只限於上妝後8個鐘內), 至於值唔值得俾3倍價錢, 去買呢8個鐘的分別, 就見仁見智喇! 

如果你只係想搽D嘢上塊面, 係正常社交距離望落膚色均勻D的話 à Shiseido

如果你對底妝有要求, 鍾意成日近距離照鏡的話 à CPB

補充: CPB聲稱佢所有粉底都有護膚成份, 化妝同時護膚, 所以咁貴!

後記:

呢兩個星期都係用CPB, 我發覺就算妝前保濕做得足夠, 同埋lunch過後用紙巾輕輕印走D面油, 個妝到咗下午3點左右, 都係會開始浮粉, 起白點點! (似乎用貴婦粉底都冇用, 係我自己膚質問題!) 

不過, 無可否認, CPB真係好透薄, 化咗妝10幾年, 而家先至知道乜嘢叫做Second Skin, 每朝早用Sponge上粉底, 都好懷疑D粉底係唔係俾個Sponge吸晒, 因為真係完全睇唔到有搽過粉, 但塊面的確係膚色均勻咗, 就好似係你本身皮膚咁樣, but much better! (亦因為佢咁透薄, 所以面上的瑕疵可以話係完全遮唔到der~) 

其實買咗CPB粉底一星期後, 我就忍唔住買埋佢個妝前+碎粉組合($1,400), 妝前我揀咗Correcting Cream Veil, 唔覺得佢保濕, 亦唔控油, 只係調色(但好容易重手變白面!), 同埋有SPF25防曬, 網上D人話佢好用, 平時放假可以只係搽佢+碎粉就出到街。至於盒碎粉, 真係幾大盒, 除返開每gram平過Shiseido, 網上D人話佢粉質超級幼細(但我覺得NARS的裸光蜜粉仲幼細過佢喎!) 用的時候又係"一縷輕煙"咁, 要閉氣(好驚吸咗入個肺度), 但佢完全冇遮瑕, 保濕或控油效果, 個妝亦唔見得精緻咗囉!