孖寶期待咗好耐(每日都倒數), 終於到咗出發當日喇!
媽媽太興奮, 未夠7點已經彈咗起身, 原來孖寶都係!
爸爸尋日買咗麵包做早餐, 一家四口食完早餐, 叫工人姐姐幫我地影埋張全家福, 早上8:20出發!
交通好暢順, 早上9點已經泊好車係青衣機鐵站, 然後搭機場快線去機場。由於近期的社會事件, 機場保安嚴密, 落車後要出示機票或者Boarding Pass (我地只有旅行社print嗰張Itinerary), 去HK Airlines櫃位Check in, 由於老公之前打咗去mark位, 所以唔駛早2日再做網上check in, 今次寄倉行李冇發生任何事故 (之前搭呢間航空公司有多次不愉快經歷! 不過, 今次係最後一次, 以後都唔會再搭呢間嘢, 因為呢間嘢成日話執笠, 買咗佢機票次次都提心吊膽, 好辛苦!)
由於時間尚早, 機場D舖頭又唔吸引, 老公提議去麥當當食多個早餐, 嘩! 叫咗一個兒童餐, 我同細佬Share, 另外老公叫咗個早晨全餐自己食, 哥哥絶食 (佢由11月中開始, 每日都話自己個喉嚨有D嘢頂住, 吞唔到嘢, 食唔到嘢, 試過1日只係食咗2啖飯+幾粒通粉, 好在佢Still alive!)
食完早餐, 過關, 搭無人架駛, 去到閘口已經10:55 Final Call, 一家四口自拍埋張例牌打咭相, 上機lu...
今次都係排排坐係中間的四人位, 有兩邊走廊方便孖寶出入, 飛機大概11:30起飛, 都算準時! 機長廣播去沖繩的機程大約2小時 (Good! 時間好快過啫!), 由於呢間嘢同簾航冇分別(但機票價錢絶對唔簾囉!) 加上就嚟執笠, 個幾月前已經Cut咗機上娛樂設旅, 面前個芒只係不停顯示飛機航道, 我索性瞓覺! 大概一個鐘後, 開始派包(冇錯! 只係得個包!) 今次係翻叮隔夜腸仔包 (上次係中菜廚餘 -- 木耳肉碎包) 好在上機前食咗D嘢, 不過, 以防萬一之後會冇嘢食, 都係...有得食就好食喇! ←呢個係我呢幾年去旅行得出嚟的結論!
哥哥永遠都係古靈精怪!
過咗Immigration, 打電話Call租車公司過嚟Pick up我哋 (老公今次冇去OTS租車, 去咗一間叫Enjoy租車, 佢話租咗架明星保姆車, 36,000円, 好抵呀!) 原來出咗客運大樓, 要行到去好前等, 等咗15分鐘左右, 終於有車嚟接我地。呢間租車公司冇OTS咁遠, 好快就到咗租車的地方, 2樓係Office, 又係我上去辦手續, 俾錢, 然後落返地下Check車。
以前只會租小型四人車, 而家已經揸不回了
下午4點, 出發去Bic Camera 買玩具喇! 原來呢間Bic Camera好少玩具, 爸爸好失望! 但細佬話佢搵到想要的玩具喇! 就係 -- 爆丸! (媽媽其實唔知係乜嚟!) 細佬話佢係香港見過同學有, 佢揀咗隻紅色怪獸, 我哋叫哥哥都揀一隻藍色啦! 但諗諗吓, 哥哥話都係唔買喇! 去第二度再睇吓先!
細佬仔買到旅行禮物, 好開心
之後, 媽媽想去西松屋買嘢俾孖寶, 順便睇吓哥哥會唔會揀到玩具, 結果, 都係好失望! 兩手空空返返出嚟! (返到酒店, 我先至醒起去西松屋其實係要幫孖寶買兩套厚絨睡衣, 但我竟然全完唔記得, 冇睇到就走咗!)
算喇! 放棄喇! 去國際通啦! 老公之前上網搵到有間模型舖係國際通, 於是, 老公泊低架車係後巷, 自己行去睇, 我同孖寶留係車上, 孖寶瞓咗, 我就狂隊麵包(好肚餓呀! 今日Lunch只係食咗個隔夜腸仔包咋!)
晚上6:30左右, 泊低架車係國際通附近的停車場, 行去國際通搵嘢食, 之前話最近開咗條食街, 原來係之前間百貨公司執咗笠, 地下做咗食街, 但入到去, 好大油煙味, 又有人食煙, 嘩! 咁既環境, 邊啱小朋友嚟食架? 嗱嗱林走人!
由於我真係太肚餓, 我話見到前面路口個牌指住入面條街有博多拉麵, 不如食拉麵啦! 因為孖寶都鍾意食! 入到去, 要係門口買咗飛先, 我地叫咗2碗拉麵, 5隻煎餃, 1碟炒飯, 然後搵個位坐, 侍應會走埋嚟問你個湯底要濃D定普通? D麵要軟D、硬D定適中?
可能師傅要精心製作, 加上我好很肚餓, 感覺等咗好耐, 終於有嘢食喇! 個湯底係豬骨湯, 杰到好似餸汁咁, 孖寶話好好味! 原來D煎餃好細隻(係一口餃! 早知叫10隻啦! 10隻抵D!)
食飽飽, 爸爸話唔好咁早返酒店, 要行一陣國際通! 我見到對面馬路有Calbee, 提議去睇吓, 有試食, 孖寶話好好食, 咁買一盒返去自己食啦! 俾錢期間, 老公見到有雪糕食, 斷估Calbee雪糕應該唔會差得去邊掛, 試吓啦! 要一支黑糖味甜筒! (一家四口Share食, 係呀! 我地減肥!) 原來個雪糕好好味啊! 好滑! 好Creamy! 孖寶又嚟排隊隊輪流食雪糕, 爸爸話每次旅行都有呢個指定動作, 笑死人! (爸爸負責餵雪糕, 媽媽拍Video, 喂! 唔准食晒, 留返D俾我呀!)
之後, 爸爸提議行吓商店街, 孖寶不停話好悶呀! 幾時返酒店?! 商店街前少少就係驚安喇! 爸爸, 你睇住孖寶先, 我要買D嘢! 其實今次係要搵:
(1) Gel狀面膜(唔想再用紙狀面膜, 次次拎出嚟都滴晒汁, 搞到周圍係, 對手痴笠笠, 好唔方便!)
(2) 日本製衞生棉條(因為HK只係得一隻美國牌子, 冇選擇!)
(3) 兒童潤唇膏(香港都有, 不過睇吓日本會唔會平D啫!)
(4) Shiseido粉底(已經好多年冇係香港專櫃買, 之前係日本買的就嚟用晒!)
結果, 只係買咗支面膜同一盒棉條, 另外買咗潤唇膏俾老公。我排隊俾錢, 老公就帶孖寶去攞車, 駛過嚟驚安門口接返我。晚上8:30返酒店, 途中經過超市, 買生果, 牛奶, 芝士, 益力多, 麵包, 三文台, 壽司, 杯麵, 零食...... (因為今個旅程5晚都住同一間酒店, 唔駛搬, 可以買多D嘢擺係酒店房/雪櫃慢慢食, hoho!)
晚上9:45左右返到酒店, Check in, 老公見到酒店對面有停車場, 700円一日, 平過酒店好多(酒店泊車要1,800円一晚), Check in 完, 我順便問佢拎埋之前Amazon寄嚟的3箱包裹, 有服務生幫我地推行李上房。間房同上網睇差不多, 空間都算大, 兩張床泊埋一齊都夠一家四口瞓, 有露台, 望碼頭(not exactly海景), 個浴室都係同上網睇既一樣(睇見都唔開胃! 仲有D渠味, 孖寶唔可以係浴缸玩水lu...)
老公幫孖寶沖涼, 佢地去旅行太興奮, 瞓唔著, 細佬仔話瞓唔著, 喊! 要爸爸緊抱處理! 零晨12點, 我頂唔順喇! 好眼瞓!
Day 1 完
沒有留言:
張貼留言