沖繩親子之旅(2019-2020) - Day 6

2020.01.03 (星期五)

今日都係好好天, 陽光普照, 萬里無雲。

早上9:20帶埋所有行李落酒店大堂, Check out, 出發去西崎親水公園, 有長長的滾軸滑梯, 孖寶應該會好鍾意玩。

早上10點到咗公園停車場泊車, 原來條長長滑梯係山坡上面, 孖寶嚷著要媽媽陪佢地玩, OMG! 我唔想行上個斜坡, 好攞命! 唉! 算啦! 陪玩一次咋!

爸爸你行上斜坡啦!

原來公園對面有西松屋, 爸爸, 我內急, 去西松屋借個洗手間, 順便行吓(應該係去行吓, 順便借個洗手間囉! hoho...) 間西松屋冇乜人, 好好行, 加上D陽光由落地大玻璃透入室內, 好舒服, 好想移民嚟沖繩!  西松屋D衫質素唔係咁好, 所以近幾年都冇買, 只係想睇吓有冇其他accessories買俾孖寶(其實Day 3已經係另一間係西松屋買咗2套厚睡衣同2條棉質斜褲俾孖寶), 行行吓俾我發現呢度竟然有長袖底衫賣(仲以為日本D小朋友唔著長袖底衫), 拿拿林買咗2包(1包有3件)。

返去公園睇吓孖寶玩成點, 原來玩到唔捨得走, 西松屋冇嘢睇, 附近又冇嘢行, 惟有係公園搵個亭坐低篤機(順便用埋D數據), 篤咗好耐機, 孖寶都係唔肯走。玩咗超過1個鐘, 走喇! 爸爸媽媽想去機場附近的Outlet Shopping, 最後衝刺!

泊咗架車係Outlet 對面, 有書店同埋電器舖, 我同老公講, 我想去書店睇吓有冇教人畫水彩的書, 佢就帶孖寶去睇電器, 好大間書店, 但水彩書就係得10本左右, 我想搵專教畫花的, 冇! 老公Whatsapp我, 原來佢睇中咗個按腳機, 吓? 又嚟? 按腳機係我家最經常換的電器, 呢幾年, 老公應該換咗超過3個按腳機, 雖然部機唔係貴(老公話最新款要40,000, 佢睇中部舊款有特價),但咁很大個按腳機, 點運返香港呀? 同埋, 咁屋企而家部按腳機點呀? 掉咗佢? 佢話孖寶都好鍾意按腳, 佢兩個試過都話正! 唉! 是但你! 無眼睇!

係佢三父子試機同買機期間, 我就去咗對面Outlet血拼, 有我最鍾意的森林家族, 仲係新款(唔係出面舖頭賣剩D貨尾擺係度賣), 唔好諗咁多, 納咗幾盒, 即刻俾錢走人! 呢度仲有好多賣衫的舖頭(D衫就真係貨尾, 唔係新款), 今次嚟沖繩的買衫目標係買Causal去街款(唔係Elegant返工衫), 尤其係去街半截長裙款, 最好長到落腳眼, 俾我係as know as搵到條燈芯絨半截長裙, 雖然唔係大路顏色(豆沙紫色), 但試著感覺都OK, 唔好諗咁多喇! 買咗先! 對面三條友仔買緊部幾萬円的按腳機! 本來仲想行, 但已經係下午1:30, 仲未食Lunch, 又未入油還車, 拿拿林去咗附近油站入油, 還車, 坐Shuttle去機場Check in。

而家的沖繩機場大咗好多, 多咗好多食肆同商舖, 不過, 由於時間關係, 我哋選擇咗去M記食快餐。食完嘢, 下午3:15入閘, 已經冇乜時間剩, 要快D去免稅店買手信, 我自己一個衝入去, 老公就睇住孖寶, 拿拿林執咗2盒Royce加幾盒手信(冇Anessa有色防晒防水粉底, 有D失望), 算喇! 俾錢走人! 下午3:45, 要上機喇!

黃昏6點返到香港, 6:45搭機場快線去青衣站攞車, 揸車返屋企。

 今次的戰績唔錯!

買咗5件衫, 好滿足!

-   沖繩之旅完結   -

沖繩親子之旅(2019-2020) - Day 5

2020.01.02 (星期四)

今日好好天, 藍天白雲, 陽光普照, 去郊遊一流!

尋晚去超市買早餐, 細佬嚷著要食杯麵做早餐(學埋爸爸D衰嘢, 好唔健康, 唉! 算啦! 只此一次, 下不違例喔!) 另外, 尋晚超市特價, 老公買咗一打腐皮壽司(雖然我鍾意食, 但咁多, 點食得晒呀?!)

食完早餐, 早上10:30過對面停車場攞車, 出發去殘岥岬(今日的行程同Day 3對調咗)。早上11:45到咗殘岥岬停車場, 好多車啊! 仲有旅遊巴, 我哋10幾年前嚟沖繩, 呢度冇乜人嚟架喎!  買飛(大人200円)上去個塔(以前好似唔駛錢架喎?!) 孖寶行得好快, 一支箭衝咗上去個塔頂, 今日天氣真係好好, 個景好靚! 孖寶望住個大海, 睇到唔捨得走。兜咗個圈, 影咗幾張相, 行返落去喇!

孖寶話呢個係雷神鎚

停車場隔離有個兒童廣場(以前冇的, 好似係一年前落成), 當然要帶孖寶去玩吓啦! (今次行程每日都去一個公園玩, 因為香港D公園唔好玩, 香港的小朋友好可憐!)就係孖寶玩的期間, 哥哥突然因為細佬唔等埋佢, 發脾氣(掉咗細佬個水壺落地下), 爆喊, 佢下場當然係......俾爸爸鬧咗鑊金啦(爸爸仲好似話唔要佢, 留佢係日本, 呢句對白每次旅行都會出現)!

擾嚷咗大半個鐘, 爸爸同哥哥終於"和好如初", 爸爸仲幫佢地(托住佢哋pat pat)爬上去石獅子度影相。

下午1點, 好喇! 去食飯喇! 爸爸之前上網搵咗一間食海鮮的食堂, Comments好似幾好, 尤其必食推介「黃油魚」(用鐵板上, 香味四溢咁喎!) 即管去試吓, 好在上網google過佢門口, 因為睇門口真係完全唔知裏面有嘢食, 我哋冇Book位, 但都有位, 食堂的格局好似睇日劇嗰D咁, 真係只可以叫做食堂, 唔係餐廳, 而且應該有返咁上下歷史 (牆上面的Poster黃晒), 我叫咗個中size黃油魚(2,300円), 老公叫咗個原隻燒龍蝦(4,500円), 另外叫咗個兒童餐(700円)俾孖寶, 老實講, 今餐係中伏der~! 先講我個黃油魚, 條魚唔算細條, 但炸到樹皮咁, 跟本冇乜肉食, 至於老公個原隻燒龍蝦, 「梅」既! 頂! 我係香港D酒樓食個$188上湯龍蝦好過佢! (感覺D鬼佬同日本人都唔識整龍蝦, 次次食親都唔係爽口彈牙, 而係「梅」既!) 今餐盛惠7,500円(約HKD550), 唔算平, 但質素並非網上Comments講得咁好, 千祈千祈唔好再信網上Comments, D人一係打手嚟, 一係就冇味覺既!

下午2:30, 出發去Bios之丘(去咗咁多次沖繩都唔知有個咁既地方), 其實係一個農莊, 有得餵羊咩咩, 坐船仔之類, 仲有水牛車坐(感覺好殘忍!) 之前係道之駅買咗入場飛+坐船套票, 係停車場泊好車, 行去農莊入口, 入口種咗好多花, 好靚, 要搭Lift落去(成個農莊好似係個山谷入面), 都幾多人, 可能因為係日本新年假期, 入到去, 有個大草地, 有用樹幹做的翹翹板同平衡木, 有DIY風箏攤位, 有騎水牛體驗, 有餵羊咩咩同拖住羊咩咩散步(爸爸同孖寶好like, 玩咗好耐, 最重要係免費的!) 我不停幫佢地拍video, 佢三父子就霸住隻羊, 我都冇玩過!!!

由於時候唔早, 我地都係去坐船仔先! 有工作人員沿途講解河邊的植物, 但我哋唔識聽日文, 去到一個位置, 架船停咗, D人走晒去船頭聞棵植物, 有個好心的本人(唔知係唔係)用英文同我哋講: It smell like chocolate! 於是我地都去聞吓, 孖寶話佢哋都聞到喎! 坐船期間, 見到好多一家大細划獨木舟(我哋仲同人家揮手), 孖寶話好想玩(其實佢地未玩過), 但由於收咗太陽, 好快天黑同凍, 爸爸話唔玩喇! (孖寶有D失望)。又去返玩拖羊咩咩, 孖寶玩到唔捨得走!

下午差不多5點, 走喇!  下一站去Parco City, 號稱全沖繩最大的購物商場(去年剛落成), 其實我唔係太想去咁大個商場, 一定行餐死都買唔到衫, 結果, 如我所料, 乜都買唔到! 老公帶住孖寶, 冇地方去, 去咗Lego Shop, 我同老公都覺得個商場太大, 唔好行! 晚上7點, 都係走人, 唔好再嘥時間!

去返國際通食晚, 孖寶好想再食多一次博多拉麵, 吓? 又去? 食咗3晚喇! 個老闆應該認得我哋! 唉! 算啦! 短期內都應該唔會再嚟沖繩(下次帶孖寶去九州食正宗博多拉麵)。可能係日本新年, 臨走時, 老闆送咗2支原子筆俾孖寶留念。食飽飽, 當然要去對面的Calbee買雪糕食, 由於上次買咗一支甜筒實在唔夠食, 今次買2支, 好好味! 好Creamy啊!

返酒店, 執行李, 明天要返香港了!

Day 5 完

沖繩親子之旅(2019-2020) - Day 4

2020.01.01 (星期三)

新年快樂!

今早8點起身, 爸爸落去買蒸包做早餐, 哥哥話想食麵杯, 老公買咗2個豬肉包(正常)同1個Pizza包(中式蒸包配Pizza餡料, 恕我唔識欣賞!)

食完早餐, 落到樓下大堂, 原來酒店安排咗舞師表演, 日本人的舞師係白色, 亦唔係打鑼打鼓, 但最特別係 -- 要將小朋友個頭塞入去個獅口入面, 好似係為佢祈福咁意思! 我叫孖寶都去俾隻獅子「咬一吓個頭」啦! 孖寶唔制, 俾隻獅子追住, 兩個係咁走嚟走去!

要將小朋友個頭塞入隻獅子個口

玩完一大輪, 10:00出發去平和祈念公園的兒童遊戲區。今日仍然天陰, 仲係好大風! 不過, 其實冇落雨已經好感恩, 因為Book咗今日下晝去玩越野車。

去對面停車場拎車

上午10:40到達公園, 有個大繩網, 唔只孖寶玩得好開心, 連爸爸都覺得好好玩, 媽媽又被(孖寶)寵幸了! 被報名參加孖寶搞的"忍者修行", 又要爬高爬低, 又話唔准快過佢地, 要跟住後面, 玩咗幾次, 媽媽不行了! 爸爸, 輪到你被寵幸喇! 快D啦! 爸爸提議孖寶去玩跳彈床, 因為爸爸可以坐埋一邊篤機!

之後, 又去埋隔離個遊戲區玩, 好羨慕人哋D公園咁大, 人就得少少! 好舒服! 放假帶小朋友去公園玩吓, 跑吓草地, 放吓風箏, 簡簡單單, 咁就一日喇! 呢D先至係生活! 唉! 來生不要做香港人啊!

老公話一場嚟到, 想去埋參觀墓碑, 啊! 個紀念花園環境好優靜, 俾人一種好詳和的感覺! 墓碑上全部都係二次大戰死者的名字, 戰爭真係好可怕, 死得最多的永遠係平民百姓。

參觀完紀念花園, 原來已經中午12:45, 我地Book咗下午2:20去玩越野車, 仲未食飯喎! 嗱嗱林上車走人, 搵吓附近有冇嘢食, 有個飯堂, 但睇見已經唔開胃。Google話附近有間Joyful, 15分鐘車程左右, 老公話去囉!

下午1:05去到Joyful, 叫咗一個鐵板漢堡, 一個蛋包飯, 一個Carbonara。出事喇! 個Carbonara都唔同上次嗰間Jolly Pasta, 有陣怪味! 好難食! 惟有問個待應俾支芝士粉, 用大量的芝士粉掩蓋陣怪味, 免強食咗一半, 老公的鐵板漢堡, 同細佬的蛋包飯就正常, 佢2個仲食到津津有味, 可憐我同哥哥...... 就好似私家車入錯咗柴油咁!

佢2個食到津津有味

算啦! 而家唔係品嚐美食的時候, 我哋要2點去到越野車場, 車程要25分鐘架!

下午2:05到咗越野車場的停車場, 泊低架車, 行去Counter, 周圍好似荒廢咗咁, 究竟我地有冇去錯地方架? 跟住牆上面個指示牌, 兜過幅牆, 有個大草地, 草地隔籬有間屋仔, 行去睇吓, 係玩越嘢車的counter, 俾張網上報名print out個職員睇, 佢叫我地填咗張Form先(生死狀), 俾埋錢, 等咗一陣, 就跟職員出去著雨褸同水靴, 仲要戴埋頭盔, 好樣衰! 然後, 老公同哥哥一架車, 我就同細佬一架車, 先係練習場練習一下點樣操控架車(其實唔太難, 俾油就去囉, 收油就慢囉), 不過, 要駛過D泥漿, D泥漿會彈到成身都係(好在著咗雨褸)。過咗一陣, 就正式出發去叢林, 蔭蔭森森的叢林好有冒險感覺, 加上有時要加速衝過D泥沼, 孖寶好興奮, 大概20分鐘, 我地就落車休息, 係叢林中間有幾棵大樹, 車公司預備咗凍茶俾我地飲, 之後, 上返車, 輪到哥哥跟我, 細佬跟爸爸, 出咗叢林, 去返練習場泊低架車, Finished! 老公話都幾好玩, 幾過癮, 孖寶話如果可以自己揸車就好喇!

 換好裝備

係大草地玩咗一陣, 影吓相, 差不多下午4點, 要走lu, 下一站去玉泉洞, 車程約20分鐘。孖寶兩年前已經嚟過, 今次又係日本新年嚟, 所以又可以打太鼓, 係入口影咗幾張相, 就行入去個洞喇! 今次都有影紀念相, 可能已經係第二次嚟, 冇乜新鮮感, 孖寶行咗一陣, 已經話好悶, 仲要行幾耐? 係孖寶的埋怨聲之中, 媽媽同佢地講, 千祈唔好俾上面D水滴到個頭呀! 唔係會係個頭頂生條石柱出嚟架喇! (呢個笑話係當年去桂林, 老豆同我講過, 而家輪到我做人媽媽, 又同孖寶講返同一個笑話!) 佢兩個聽到我咁講, 即刻除咗件褸包住個頭, 好似兩個村姑咁, wakaka...

最近通常都會買返一家四口的紀念相

參觀完玉泉洞, 今日的行程結束, 可以去期待已久的Naha Main Place 盡情shopping喇! 今次老公都係係門口放低我 (佢自己同孖寶去泊車), 我就直接衝入商場, 過年期間, 好多舖頭大減價啊! 不過, 唔算多人, GOOD! 由於太多舖頭, 所以唔可以每一間都睇好耐, 惟有每間Have a quick look先, 有D 一睇就知唔啱我Style, 可以直接跳過, 我今次的目標係休閒去街衫(唔係斯文返工衫), 行咗2.5個鐘, 我覺得自己好過份, 都係收手喇! 買咗3件衫, 2件遮pat pat冷衫 (可以4月時去名古屋著), 1件Dirty Pink針織(好鐘意隻色同個衫袖設計), 3件衫Total都唔駛6,500円, 好抵啊! 香港買唔到囉!

晚上8點, 要食飯喇! 去咗食拉麵, 孖寶最like, 又最穩陣, 但竟然......中伏! 個拉麵好咸, 餃子亦唔好食! 孖寶話同國際通嗰間博多拉麵相差好遠, 完全冇得比, 連小朋友都食得出!

晚上9點, 食完嘢, 去超市買早餐, 返酒店, 沖涼, 休息!

是日戰利品, 我終於都買到衫喇! YEAH!

Day 4 完

沖繩親子之旅(2019-2020) - Day 3

2019.12.31 (星期二)

今早8點起身, 老公負責落樓下7-Eleven買早餐: 壽司, 飯團, 三文治

今日冇落雨, 但超級大風, 感覺好凍! 本來Plan咗今日去殘波岬個燈塔, 咁既天氣去海邊, 唔凍死, 都俾風吹死, 所以決定調一調D行程, 今日去咗Day 5的地方先。

早上10:20出發, 第一個行程係去中城公園, 只要唔好落雨就應該可以玩到跳彈床, 大概早上11點去到公園, 唔算多人, 不過, 成個公園同停車場周圍D人都係講廣東話, 唉! 做香港的小朋友真係好慘! 香港D公園基本上唔係For小朋友玩, 搞到大家過到嚟日本, 一窩蜂帶小朋友去玩人地D公園!

由於真係好大風, 好凍, 媽媽頭暈, 要返上車休息吓! 由爸爸睇住孖寶, 不過, 唔夠30分鐘, 爸爸同孖寶都上返車, 爸爸話: 唔得! 真係好凍!

好啦! 咁去埋另一個公園玩啦! 沖繩県総合運動公園, 車程約15分鐘。中午12:15到咗公園停車場, 泊車, 帶埋瀡滑板去。呢度都係超級大風, 超凍, 不過, 好似有少少陽光, 感覺冇頭先咁凍! 孖寶玩玩吓仲有D熱, 要除咗件外套掉落嚟俾爸爸接住, 哥哥件外套係半空卡住咗, 好在最後都跌返落地面。呢度都有唔少香港人, 孖寶仲識咗一對兄弟, 玩玩吓, 突然聽到細佬大喊, 原來佢上樓梯時踢到'上5寸下5寸', 好痛, 仲損咗流血, 哥哥見到細佬喊, 佢又喊, 佢話佢頭先都整親, 好痛, 但冇人理佢! 由於孖寶兄弟喊到收唔到聲, 爸爸話: 咁唔好再玩喇! 走喇! 但其實哥哥仲好想玩, 於是佢"忍痛"再玩多一次瀡滑梯(爸爸陪佢), 然後又玩多一陣, 不過, 原來已經下晝1:15喇! 要食飯喇! 走喇! 臨走的時候, 嗰對兄弟的媽媽仲想請孖寶飲粟米湯氹吓佢地, 又問佢地仲痛唔痛? 叫佢地唔好喊!

下午1:40, 見到路邊有和風亭, 媽媽最鍾意食日本嘢, 就入去食Lunch啦! 冇乜人, 唔駛等位, 有榻榻米雅座, 孖寶最Like!

享受完一頓豐富的午餐, 就出發去爸爸的四驅車模型店YONKUDO(其實都係附近), 途中見到有西松屋同Daiso, 爸爸, 我要去西松屋幫孖寶買2套厚絨睡衣呀! 爸爸都要去Daiso, 孖寶唔想落車, 於是, 孖寶留係車箱入面(日本好安全, 唔駛驚! hoho!), 我同爸爸各自去Shopping! 終於都買咗2件睡衣俾孖寶, 另外買咗2條斜褲(斜褲冇牛仔褲咁硬, 孖寶著得舒服D!) 爸爸都好似買到嘢, 又係膠盒, 佢話要嚟擺模型。

下午3:10, 終於到咗四驅車模型舖, 我都落去睇吓有冇D砌屋仔的模型先, err... 係冇既! 只有飛機大炮, 車, 機械人, 簡直就係男人天堂, 女人地獄! 我都係返上車先! 不過, 老公最後都買唔到嘢, 空手而回!

下午4點, 到咗勝連城蹟對面個停車場, 我同孖寶都瞓到如火如荼, 起唔到身! 其實有咩睇架? 係唔係得幅成牆架咋? 就咁係度睇得唔得呀? 不過, 老公話一場嚟到, 落車行過去睇吓啦! 啊!

叫醒咗孖寶(怨聲載道!), 一齊落車過馬路睇吓! 其實都唔只係得幅牆既! 仲可以行上去個"城堡"上面, 孖寶好鍾意行樓梯, 一馬當先跑咗上去, 原來上面的風景好靚, 同埋仲可以再上, 不過, 都幾凍! 我同細佬都唔想再行, 於是, 爸爸同哥哥再上去, 我同細佬就行返落山, 係停車場見到汽水機有賣粟米湯, 我同細佬講: 不如買一罐試吓粟米湯咩味? 天氣咁凍, 飲D熱嘢會好舒服! 細佬話: 好啊! (因為今朝個姨姨想請佢地飲, 我地話唔駛喇!) 我同細佬返上車, 開罐粟米湯嚟飲, 細佬話: 超好味啊! 於是, 我同細佬就好溫馨咁一罐粟米湯兩份飲喇! 爸爸同哥哥都返嚟, 我話買多罐粟米湯, 哥哥話唔想飲, 佢想飲果汁!

今日最後一個行程係去海之文化館, 但就嚟5點, 去到應該已經閉館! 不過, 一場嚟到, 去遊吓車河啦! 於是就揸車去宮城島對面一個唔記得咩島, 仲落咗海邊同D岩石影相, 不過, 真係好凍, 都係快D返上車!

好喇! 期待已久的AEON MALL, 我地而家嚟喇! 爸爸自動波帶孖寶去睇嘢, 我就緊係去Shopping啦! 日本新年期間, 好多賣衫的舖頭都有大減價, 但可惜睇咗好多間都睇唔啱! (我今次的目標係休閒去街衫, 唔係靚靚返工衫啊!)

買唔到嘢, 晚上7點Whatsapp老公, 原來佢哋都冇嘢睇, 去咗餐廳搵位, 次次嚟呢間AEON, 一定會去5樓嗰間「五穀」食飯, 今次都係! 原來爸爸又買咗玩具俾孖寶, 係陀錶頸鍊(扭蛋玩具), 真係廿四孝爸爸!

食飯期間, 見返今朝係総合公園認識的一家四口(仲坐係我地隔離枱), 真係相逢唔駛曾相識! 叔叔問孖寶隻腳仲痛唔痛呀?! 臨走時仲互祝大家新年快樂!

由AEON返酒店要40分鐘車程, 今晚唔駛買聽朝早餐, 因為爸爸話樓下7-Eleven有熱辣辣蒸豬肉包賣, 好啊! 好想早餐可以食D熱嘢, 個人都舒服D!

今晚9點左右返到酒店, 算係最早的一晚了!

是日戰利品, 我自己買唔到衫, 嗚嗚......

Day 3 完

沖繩親子之旅(2019-2020) - Day 2

2019.12.30 (星期一)

今日真係落雨, 日本氣象廳真係好準!

今朝大家都瞓到9點先起身(今個旅程全程都冇校鬧鐘, 一家四口每朝都係瞓到自然醒der~!)

係房食早餐, 有麵包, 三文治, 壽司, 鮮奶。

早上10:30, 出發! 落到酒店大堂, 見到有手信舖, 忍唔住入去睇吓先, 原來有龍貓UNO同龍貓散紙包, 好靚啊! 今晚要返嚟買啊! 老公話要去7-Eleven買咖啡 (因為揸車好眼瞓, 要提吓神!) 見到有即沖咖啡機, 試吓啦! 應該好飲過罐裝! 老公去Counter買咗杯冰, 然後撕開杯蓋, 擺入架咖啡機入面, 撳制, 得咗! 老公話好好飲! 正啊! 我飲咗一啖! 係喎! (但我唔可以飲咖啡, 因為飲咗夜晚會瞓唔著!)

飲完咖啡, 等咗一陣, D雨細咗, 老公話佢去對面拎車, 駛過嚟接我地, 辛苦晒喇!

早上11點, 正式出發! 今日第一個行程係去美術用品文具舖 (車程約30分鐘), 由於尋晚哥哥揀唔到旅行禮物, 我應承哥哥, 今日去美術用品舖買D美術用品俾佢 (佢勁鍾意畫畫), 佢話係唔係畫筆套裝呀? OK! 其實, 細佬都好鍾意睇文具, 佢成日係學校同同學仔交換文具, 換晒人哋D靚文具返嚟!

途中經過上上上次間Yamada (2015年10月同嫲嫲姑媽嚟, 係呢間Yamada買咗包尿片), 老公話其實Yamada同Bic Camera差不多, 可能會有玩具, 哥哥話想同爸爸一齊去睇, 但細佬話唔想去, 要媽媽留係車入面陪佢, err...... 咁算啦! 我陪細佬! 細佬爬咗過嚟前座, 同我一齊坐, 睇佢帶嚟嗰本漫話。之後, 爸爸同哥哥落返嚟, 原來哥哥都買咗隻藍色爆丸!

已經中午12點, 但我地今日的第一個行程仲未開始!

去到美術用品舖, 仲係落緊毛毛雨, 我同孖寶衝入去先, 爸爸泊完車入嚟! 間舖頭比我想像中細, 但畫水彩的用品多過中南廣場, 我今次主要嚟買水彩筆, 因為香港冇乜選擇, 又貴, 日本水彩名牌Holbein有出畫筆, 呢度都有得賣, 但型號唔多, 尤其我想買4號同6號畫筆, 好多型號都冇貨, 不過, 佢既貂鼠毛筆唔貴喎, 2,000円左右, 仲要Made in Germany, 香港買唔到囉! 另外, 想幫細佬搵一支儲水的水彩筆, 搵咗好多, 終於搵到! 本來聖誕禮物想送一盒Outline筆俾哥哥, 但買唔到, 呢度有, 好啦! 送俾哥哥啦! 另外買咗2支擦膠筆同替換芯俾孖寶, 爸爸都買到D界刀片for砌模型用。

買完嘢已經下午1點, 好肚餓啊! 上高速公路之前搵咗間路邊餐廳Jolly Pasta食飯, 有驚喜! 個Pizza同Carbonara意粉好好味啊!

下午2:30出發去許田道之駅買飛 (由於落雨, 本來去宜野灣道之駅兒童遊戲區, 要取消, 直接去許田)。下午3:05到咗許田道之駅, 超級多車, 泊唔到, 惟有我落車行去買飛, 個道之駅好舊, 入到去搵咗好耐先搵到買飛的地方, 我地要買Dino Park, Bios之丘同玉泉洞, 水族館4pm後入場平D, 諗住去到先至買飛, 但原來係度買埋, 到時可以去Counter Refund返每人380円, 所以都係平D, 咁買埋啦! 一家四口盛惠14,320円! (已經平過正價!)

下午3:45, 終於到咗Dino Park喇! 停咗雨, 不過, 都係帶定遮入去行好D, 同埋, 好似涼咗, 都係著返件外套好D! 孖寶最近睇咗好多恐龍書, 佢兩個入到去, 即刻化身成為古生物學家, 嘩! 呢隻係肉食性, 呢隻係草食性, 係白惡紀, 係中生代...... 其實佢地兩年前已經嚟過, 當年細佬仲俾條恐龍尾kick低咗, 爆喊!

 兩位古生物學家

細佬2年前就係俾呢條恐龍尾kick低咗

參觀完公園, 經過手信舖, 一家四口瘋狂試食, 最後只係買咗一盒黑糖餅, hoho! 下午5點, 出發去水族館喇! (好在聖誕至新年期間, 水族館延長營業時間至晚上9點, 如果好似平時咁收6點, 而家已經去唔到lu!)

Tea Time...上車即刻開咗盒黑糖餅嚟食

下午5:30到咗水族館, 嚟咗4次, 已經熟晒地形! 由於之前落雨, 門口個繩網封咗冇得玩! 孖寶好失望! 惟有行去水族館, 媽媽即刻去售票處Refund, 可以退返1,020円, 爸爸話: 嘩! Refund咗成碗拉麵俾你呀!

入到館, 經過小水池, 例牌又要叉隻手入去玩吓D海洋生物 (哥哥搞到2隻衫袖濕晒! 仲搞到條海參痴住咗隻海星, 分唔開, 好慘啊!)。然後續個魚缸睇吓, 孖寶今次俾以前有耐性, 睇咗好耐, 經過演講廳, 開咗門, 有凳坐! Good! 媽媽對腳好攰啊! 演講廳前面有塊玻璃, 可以睇住D魚游嚟游去! 抖咗一陣之後, 行出去大廳, 見到好多人坐咗係地下, 原來水族館擺咗好多吹氣Sofa同Cushions係個大玻璃前面, D人攤晒係度睇魚, 我地無啦啦搵到張Sofa, 一家四口坐, 睇住D魚游嚟游去, 好療癒啊! 真係唔捨得走! (老公話香港就做唔到, 因為一定俾D大劣人霸住晒!)

 條海參痴實咗隻海星

晚上7點參觀完水族館出返嚟, 原來成條樓梯都有燈飾, 好好好靚啊!!! 今年聖誕冇係香港睇燈飾, 而家嚟沖繩睇返!

現場睇好靚

由水族館返那霸要2個鐘車程, 所以冇可能去AEON行街, 直接Set GPS返酒店, 沿途搵嘢食啦!

水族館附近開咗個新商場, 好靚, 有嘢食, 不過, 都係返咗那霸先穏陣D, 唔想搞到咁夜! 不過, 之後沿途就一直冇嘢食lu! (惟有食住零食先!) 原來返酒店會經過國際通, 咁不如去國際通搵嘢食啦! 孖寶話想食返尋晚間拉麵, 吓? 又食拉麵? 媽媽想食吓沖繩地道料理啊! 我見國際通好多! 不過, 由於哥哥呢排成日話個喉嚨頂住頂住, 食唔落嘢 (但拉麵就多多都食得落), 咁算啦! 食拉麵啦! 咁夜唔好再周圍搵喇! 爸爸泊咗係拉麵店條巷, 停車場錢都慳返!

今次叫咗2碗拉麵 (爸爸話試吓黑醬油), 另外10隻餃子, 由於爸爸同孖寶都好肚餓, 2碗拉麵唔夠食, 媽媽買多碗Mini拉麵俾自己。

晚上9點食完麵, 本來想過對面馬路Calbee食個雪糕做飯後甜品, 點知細佬話: Calbee好似收緊檔咁既? Err... 係喎! 落咗閘喎! 我個黑糖雪糕啊! 嗚嗚......

返酒店前, 去Supermarket買嘢飲, 另外買咗一大盒急凍泡芙(係補償返我冇得食黑榶雪糕der~) 老公係凍櫃買咗杯Blue Seal雪糕, 我話唔係嗰回事嚟!

晚上9:50返到酒店, 係樓下買埋今早睇中咗的龍貓UNO同散紙包! 本來想去7-Eleven買埋聽朝早餐, 點知所有三文治同壽司都被掃光, 老公話佢聽朝落嚟買!

是日戰利品

今晚都係搞到好夜, 孖寶11:30先至瞓!

Day 2 完