自學水彩 - 顏料篇

話說自從今年7月迷上咗水彩之後, 我而家最鍾意就係上網睇水彩用品 -- 邊隻專家級的水彩顏料的評價最好? 邊個牌子的水彩紙最多人用? 用人造纖維筆抑或貂鼠毛筆好? 勁鍾意行美術用品公司, 睇吓都好開心! (通常都忍唔住買少少嘢!)

8月尾買咗盒Van Gogh學生級水彩, 我同自己講, 如果畫得好, 一年後就買盒金屬盒的專家用水彩奬勵一吓自己啦! 上網睇咗好多Comments, 最多人講的專家級牌子分別有: 英國的Winsor & Newton, 德國的Schmincke, 荷蘭的Rembrandt, 仲有美國的Daniel Smith同日本的Holbein。不過, 水彩始終係歐洲嘢, 幾時輪到美國、日本丫? 所以都係揀返歐洲牌子, Winsor & Newton一D都唔平, 但唔肯定係唔係Made in China, 有D擔心! Schmincke 貴到嘔, 已經唔駛考慮! 惟一可以考慮的就係Rembrandt (佢同Van Gogh都係Royal Talens, Rembrandt係專家級, 而Van Gogh就係學生級), 價錢合理, 質素又有保証!

由於老公實在對我太好, 佢話好支持我畫水彩, 仲鼓勵我買D質量好D的水彩用品俾自己, 唔好慳! 既然老公咁講, 咁我唔客氣喇! 其實...... 我......係Amazon UK睇中咗一盒水彩, 就係Rembrandt Watercolour Metal Deluxe 48 Half Pans Set, 原價195英鎊, 特價95英鎊 (超過50% OFF呀!), 即係大約港幣$1,000咋, 好平呀! 我係中南廣場睇過, 一盒36色要over $1,600, 而家48色唔駛$1,000 (仲要內附一支6號的Red Sable筆, 我係中南睇過支筆都要200幾蚊一支), 今次真係平到你唔信呀!

於是, 老公好快就幫我上Amazon UK買咗! 多謝老公!

幾日前, 盒Rembrandt終於到咗我手上喇!

立即開箱:

 能夠擁有一盒精美的金屬盒專家級水彩,

相信係每一個水彩愛好者的夢想!

 勁似一粒粒朱古力

 真係靚到唔捨得拆開嚟用!

 孖寶又嚟幫媽媽拆"朱古力紙"

好有心機, Good Boys!

 其實望落去同Van Gogh冇乜分別, err......

其實48色係略嫌太多, 不過, 因為24色賣緊75英磅,
48色只係多20英磅, 無理由唔係買48色der~ (精打細算的我!)