時間過得好快, 孖寶兄弟開學已經6星期了!
孖寶兄弟似乎適應得好快, Update一下佢哋的情況:
(1) 學業方面
哥哥同細佬的功課量差不多(小一時係哥哥班多D功課), 不過, 明明每朝早千叮萬囑佢哋要係爸 媽放工返來之前, 盡量做晒D功課, 哥哥硬係做得一兩樣, 仲有大量功課未做, 有時仲要溫默書測驗, 真係好想爆佢: 你究竟成個下晝做咗D乜? 成日掛住玩?! 反而細佬通常都做晒大部份功課, 佢話係學校功輔堂已經做咗好多, Good Boy!
至於成績方面, 兩個中英文默書都有90分以上, 只係錯一兩個字, 唔錯! 不過, 第一次英文同數學測驗, 哥哥都係得28分(總分40分), 而細佬就有34同37分(我哋一向都唔擔心細佬), 不過, 兩個的成績都係爸媽預期之內, 哥哥總算合格, 爸爸每次都鼓勵哥哥繼續努力, 佢可以做得更好的! (俾著以前, 我阿媽已經鬧到我九彩, 明明幫佢溫咗書, 都係錯嗰D嘢!)
(2) 音樂方面
今年安排佢兩個繼續參加學校的口琴班(哥哥)同小提琴班(細佬), 上咗第一堂之後, 先至知道口琴班又係從新學起, 同音樂科老師反映過之後, 佢話導師會就返哥哥的程度, 教D新嘢, 不過, 老師話然然實在吹得太好, 超晒班, 所以同佢同一Level的同學已經去咗口琴隊, 再同哥哥講, 佢都係好抗拒參加口琴隊, 佢話驚好難, 同埋要成日練習, 佢只係想當一個興趣嚟學口琴, 爸爸話, 哥哥其實係一個有責任的表現, 佢知道應承咗就唔可以中途放棄, 但佢真係驚應付唔到, 所以唔想參加口琴隊, 我哋尊重然然的選擇! 所以俾佢繼續返口琴班 (預咗嘥錢!)
不過, 我同爸爸都認為, 口琴始終都係難登大雅之堂 (雖然音樂無分貴賤), 同埋就算學上去都唔會有乜嘢發展空間, 所以我哋決定安排然然學鋼琴, 佢其實好唔想學琴, 可能係唔想練琴, 佢成日覺得練琴就冇晒時間玩! 上星期六下午, 終於帶咗然然去學咗第一堂鋼琴, 佢入課室前已經表現到冇晒心機, 態度惡劣, 我好擔心佢會發脾氣或者唔睬老師, 30分鐘過去, 老師話佢OK喎! 好精靈! 而然然的態度亦有180度的轉變, 佢竟然嚷著要快D返屋企做鋼琴功課同埋練琴, 爸爸為咗鼓勵佢, 批准佢有「特權」可以自己開鋼琴練習! hoho......
至於細佬, 佢換咗個小提琴老師(因為舊老師轉咗時間, 夾唔到!) 我問佢新老師惡唔惡? 佢話唔算惡! (佢個舊老師超級惡!) 回想起一年前, 佢初初學小提琴, 每次返學前都喊咗半粒鐘, 佢話老師好惡, 成日好大力撳佢D手指, 好痛, 好唔想學小提琴, 好想放棄! 爸爸媽媽每次都要鼓勵佢, 爸爸教佢, 每當老師好惡鬧人時, 就當佢唱歌, 而佢上完堂, 媽媽就買雪糕俾佢食, 氹佢開心! 半推半就, 過咗半年, 佢開始見慣惡人, 就冇再喊住去學小提琴, 仲好積極練琴, 睇住佢進步得好快, 爸媽都老懷安慰!
細佬見到哥哥有得學鋼琴, 眼濕濕話自己都好想學, 佢覺得好唔公平! 不過, 當我哋同佢解釋, 要同時學兩種樂器, 要練兩次琴, 對佢嚟講會好吃力, 好辛苦, 又冇咗時間玩, 佢就話: 咁都係唔好喇! hoho......
(3) 運動方面
爸爸終於開竅, 唔再阻止我俾孖寶學運動。其實一直以嚟, 我都好想俾孖寶學游水, 因為身邊好多朋友, 安排個仔去學游水, 個仔變得好大隻! 孖寶咁細粒, 希望學游水可以幫佢哋變得大隻D。不過, 爸爸反對咗好多年, 佢既argument係: (1)佢個人經驗話游水唔駛學, (2)我估佢應該係唔放心, 驚孖寶學游水時出意外, (3)佢話一個星期學一次, 唔會有幫助! (我心諗: 已經好過一星期都冇一次運動啦!) 天呀! 我到而家都理解唔到佢點解咁反對孖寶學游水! 求高人指教! Anyway, 唔學游水, 咁學其他嘢得唔得呀? 踢吓波, 打吓藍球都好丫! 我真係想孖寶可以pick up一個運動, 強身健體啫! 最近, 爸爸好似突然間諗通咗, 佢話, 星期六日呢D黃金時間, 唔應該掛住去玩, 應該要嚟學吓嘢, 最後, 佢同意俾孖寶學足球! 真係謝主隆恩!
就係9月最尾個星期日, 爸爸帶咗孖寶去試堂, 每堂1.5小時, 其實都幾長時間, 加上踢足球都幾消耗體力, 媽媽都幾擔心孖寶發癲, 尤其是細佬仔, 名符其實的宅男一名, 要佢去做D咁體力勞動的活動, 佢一定怨死你! 孖寶返到屋企, 媽媽第一時間問佢地攰唔攰呀? 細佬竟然搶先回答: 唔攰! 充滿力量呀! (我冇聽錯, 亦冇認錯, 佢係細佬仔嚟!) 至於哥哥, 佢話: 好攰! 問佢好唔好玩: err...... (佢答唔到!) 爸爸話哥哥的體力係差D! 之後, 細佬不停嚷著要訂球衣(爸爸話佢兩個已經揀咗號碼, 嘩! 咁快?!) 我問細佬: 點解你咁鍾意踢足球既? 佢答我: 因為我覺得好有型囉! (一個未夠7歲的小朋友, 竟然知道咩叫做有型唔有型, 而家D小朋友真係好早熟!) 我同佢講: 其實我覺得識拉小提琴的男仔都好有型架! (我見到細佬個咀角微微翹起!)
(4) 社交方面
唔能夠親眼見到, 只係聽佢哋講, 似乎大家係班裏面已經識到幾個同學仔, 細佬成日同D同學玩交換筆蓋, 佢話自己已經儲咗20幾個筆蓋, 估計應該唔止得一兩個同學同佢交換! 至於哥哥, 佢話有一次小息, 佢地三個同學一齊分享食物, 佢將佢個豆沙包搣開, 分俾另外兩個同學食, 同學又分享食物俾佢食, 大家都好開心! 加上, 佢哋今年同細佬一個同班女同學一齊搭校巴, 我見等校巴時, 個女同學經常好主動同孖寶玩, 估計佢地係學校的人緣都唔會太差!
後記@2019.11.07
上星期五係學校家長日, 我同爸爸一齊去見老師, 以下係老師的描述:
哥哥 - 好可愛, 好sweet, 同學仔都好鍾意佢, 叫佢做小松鼠
細佬 - 好友愛, 好樂於助人同分享, 同同學相處好融洽, 仲會拖住女仔隻手
今個星期二係孖寶的學校旅行, 爸爸做家長義工(本來以為可以帶返自己小朋友, 原來唔係!), 不過, 爸爸都有機會見到孖寶, 以下係爸爸的觀察:
兩個同同學仔相處融洽, 唔孤單, 有朋友同佢地玩, 細佬買咗架飛機, 又借俾同學玩, 仲教人點玩, 好疏爽! (又唔見佢對哥哥咁好?!)
