「見飯眼瞓」的魔咒

話說哥哥由6個月轉食固體食物開始, 食親飯都會中途瞓著!

BB的時候, 餵餵吓粥仔, 佢就釣魚, 一邊食, 一邊瞓, 當時覺得佢好可愛, 好搞笑, 仲拍咗好多佢食飯瞓覺的video。

本來以為BB先至係咁, 但隨著佢長大, 見飯眼瞓的情況一直都冇改善! 明明食飯前好地地, 好精神, 玩得好開心, 一埋到張飯枱, 對住碗飯, 幾分鐘後, 佢就會自動進入Sleeping Mode!

我成日都講, 哥哥可能中咗魔咒, 呢個魔咒好厲害, 會叫人見到飯就瞓著, 搞到人冇飯食, 最後慢慢餓死, 好可怕啊!

有時, 我地會叫哥哥離開飯枱一陣, 係屋企入面行吓, 之前甚至俾佢打機, 希望佢可以精神返, 但好多時, 佢都係攤係Sofa度瞓... 唉! 食飯瞓覺的結果就係 -- 食得好少嘢, 唔長肉, 個人又瘦又矮, 出到街, 個個都認為細佬大佢一年呀! (已經冇人再懷疑佢地係孖仔! 死未?! 今次去日本, 買入場券, 職員問我佢地幾多歲, 我話6歲, 佢自動當哥哥細一年, 唔收佢錢, 次次都係俾一個小童錢咋!)

見飯眼瞓原來不限年齡, 不限地方, 不限時間, 不限款式:

1. 由BB到而家6歲半, 都係見飯眼瞓
2. 無論係屋企食飯, 抑或出街食飯, 都係見飯眼瞓, 食食吓飯係餐廳入面瞓著咗
3. 無論係香港, 抑或去外地旅行, 都係見飯眼瞓
4. 無論係Lunch Time, 抑或晚飯, 都係見飯眼瞓
5. 仲以為佢見到飯先至會眼瞓, 而家已經進化到見到飛機餐都瞓著, 結果要掉咗個飛機餐, 等佢瞓醒後, 再問空少俾過另一個餐佢

我好肯定哥哥係中咗魔咒, 因為佢見飯眼瞓, 但見床就精神, 晚晚都走出黎, 話自己瞓唔著, 爸爸講笑話: 啱喇! 當佢瞓唔著時, 就擺碗飯上枱, 等佢望住碗飯, 咁就自自然然會瞓著!

究竟有咩方法先至可以解除哥哥「見飯眼瞓」的魔咒呢?