北海道親子之旅2019 - Day 8

2019.08.03 (星期六)

今日仍然係陽光普照!

今日會搭下午4:20的飛機返香港, 所以仲有大半日的時間, 我安排咗去千歲機場附近的Northern Horse Park, 可以租單車踩, 另外有小馬表演, 可以輕鬆消磨一個早上。

今日又係係房入面食早餐, 有飯團, 壽司, 我仲特登買咗甜方包, 要嚟搽細佬尋日整的牛油, 仲有1公升特選4.0牛乳, 孖寶好鍾意飲奶! Good Boys! 飲多D奶, 吸收多D鈣質, 打破小矮人家族的宿命!

呢3個小朋友既靈魂俾部電視機吸走咗!

早上9:30 Check out, 出發去Horse Park喇! 早上10點到咗公園停車場入口, 大人收費800円, 小學生400円, 個職員又係收咗我哋2個大人+1個小童, 又慳咗400円喇! 泊低架車, 去搵單車租, 原來呢度都有Golf車租, 不過孖寶想踩單車, 結果, 租咗兩架2人車 (其實老公想租一架4人車, 但5歲以上小童唔坐得)。10:30租咗車, 先至發覺原來小馬表演係早上11點, 咁即係踩得半個鐘, 蝕咗俾佢添!

我同細佬一架車, 爸爸同哥哥一架, 細佬好瘋狂咁踩, 要同哥哥鬥快, 結果, 佢話唔舒服, 落咗車, 即嘔! 呢個情況, 我幾年前都試過, 突然間做太劇烈運動(我當年又係踩單車), 結果, D血上唔到個腦, 好頭暈, 然後嘔! 細佬嘔完之後好返好多, 真係唔可以踩得咁快架! 下次唔好咁喇!

差不多早上11點, 泊低架車, 去睇小馬表演喇! 原來個場一早坐滿晒人, 孖寶細細粒, 可以攝埋去前排D位度, 我同老公就坐後排D凳仔。表演場地係室內, 但竟然冇冷氣架! 老公不停話好熱好熱, 有冇搞錯?! (老公以前明明係好捱得, 點解突然變成投訴大王?! 呢個景點係我安排既, 佢咁樣講, 好似埋怨緊我囉!) 小馬表演唔算好精彩, 但都幾得意, 啱小朋友, 其中一個環節係小馬走埋嚟, 只要你遞起隻手板, 佢就會用個鼻鼻磨你隻手板, 好痕, 好得意!

中午12點, 離開公園, 去油站入油, 還車, 搭Shuttle去機場。下午1:40左右到咗機場, 要自己拖住D行李行好遠去返國際線離境大堂, 原來仲未開Counter, 要等20分鐘, 根據上年係宮崎機場的經驗, 而家等20分鐘, 好過去咗食嘢先, 返嚟要等超過一個鐘, 老公竟然主動話佢排隊等, 叫我帶孖寶去行吓, 睇吓嘢先。啊! 咁我唔客氣喇!

 架機Short咗, 要向職員求救

堅係抄牌!

同孖寶去睇咗一陣玩具, 然後去睇吓Doraemon主題館冇咩睇, 原來個遊戲區、Cafe同埋Souvenir Shop都唔係係收費區入面, 而收費區其實只係有D Doraemon場景提供俾你影相, 仲要排隊添! 加上仲未食Lunch, 可能唔夠時間。老公Call我, D Counter開咗, 但原來要一家四口Check in, 於是, 三母子飛奔返去Counter。搞掂咗之後, 去Doraemon Cafe門口等位, 突然間有一班人衝咗入去Cafe坐低咗, 我同老公對住個待應大叫: 思咪媽些! 喂! 我地等先架! 點解班人唔駛排隊直衝入嚟, 你都唔理, 照樣召乎佢架? 歧視中國人呀? (似乎係, 因為北海道已經俾D大劣人淪陷咗, 尋晚個待應黑口黑面, 今日又係咁樣, 唔想召呼中國人... 唉! 已經再唔係我哋以前的北海道喇! 睇怕以後都唔會再嚟北海道!)

下午2:20都未有嘢食, 我就嚟餓死喇! 原來個Cafe要自己出去排隊買嘢食, 由於係我話肚餓, 所以又係我出去排隊買嘢食。加上俾前面一家日本人(初頭仲以為係冇文化的大劣人)打咗尖, 所以排咗好耐隊先買到嘢食! 叫咗個兒童餐配蘋果汁俾細佬, 哥哥就鍾意食烏冬, 另外叫咗個三文治(原來得半份, 唔夠食, 要買多個燒餅), 另外叫咗1杯Iced Chocolate同1杯Ice Coffee, 價錢唔貴喎, 都幾好食!

食完飯, 已經冇時間去參觀Doraemon館, 我叫孖寶去免費遊戲區玩一陣, 佢哋都OK! 老公好想再食多一次北菓樓的雪糕, 我話好呀! 我都想食! 老公去買! 原來北菓樓要行好遠, 老公冇去到, 去咗買其他雪糕, 中伏! 得D雪, 冇糕既!

下午3:15, 排隊入閘喇! 好多人! 入咗閘, 衝去Duty Free買手信, 竟然有Sugar Sand Tree, 自從上次係東京台場買過嚟食, 簡直覺得係人間極品呀! 於是隨手拎咗4盒, 另外買咗4盒北海道薯條同2盒Royce。

原來只係得一間Duty Free賣手信, 冇其他嘢睇/行, 我想買箱桃(2年前去名古屋, 係機場買咗一箱, 超甜, 唔貴!) 冇! 好失望!

下午4:20, 上機喇! 今次都係坐中間四人位, 一家人排排坐, 方便照顧孖寶!

百厭的孖寶!

香港時間晚上差不多9點, 返到香港喇! 拎埋行李, 晚上9:45搭機場快線去青衣站, 攞車, 返屋企!

Day 8 完

 今次旅行的戰利品, 收穫大減!

 每日都係食瓜...瓜...瓜...!

 孖寶的開學用品

 阿Nick的零食

我既戰利品, 俾阿Nick還少!

北海道親子之旅2019 - Day 7

2019.08.02 (星期五)

今日竟然萬里無雲, 陽光普照! (尋日去睇花田咁既天氣咪好囉, 影相靚好多)

早上8:15落去1樓食早餐, 好似冇人理咁, 隨便搵張枱坐, 早餐係自助型式, 有日式有西式, 選擇唔多, 都預咗, 睇尋晚晚飯的質素就知! 不過, 呢間旅館的入住率唔低喎, 好多住客, 真係唔明, 唔通D日本人就係鍾意呢D旅館? 貪佢有風味?!  最近呢幾次住的溫泉旅館都唔多掂, 和歌山、白濱、河口湖、山中湖、箱根, 冇間掂! 最正都係2年前湯布院嗰間! 似乎以後去旅行都可以放棄book溫泉酒店, 慳返D錢!

早上9:20, 出發去日之出公園, 途中經過7-11, 老公話去買Coffee, 孖寶話想買珍寶珠。

哥哥個頭同個Head Rest完美地結合, 變咗方頭人! wakaka......

早上10點, 到咗日之出公園喇! 冇旅遊巴, 只有幾架車泊咗係停車場, YEAH! 我哋當年嚟北海道, 咪就係咁架囉! 不過, 點解D薰衣草灰色, 唔係紫色既? 似乎我哋嚟遲咗喇! D薰衣草已經謝咗, 不過, 空氣中仍然有好香的薰衣草味。由於萬里無雲, 好曬, 超級熱, 都唔可以逗留太耐。細佬仔幫爸爸媽媽係個花鐘下面影咗幾幅相 (當年冇人架! 同老公set個腳架, 擺埋影婚紗相D動作, 係咁影!)

唔該晒細佬仔幫我地影返當年幅相

下一站係去蜜瓜農場 (富田農場隔離, 超級唔想去富田農場, 因為一定係超級多人, 仲要係大劣人!) 原來蜜瓜農場冇得泊車, 要泊係富田農場, 冇辦法! 老公話順便行吓啦! 啊! 果然係超超超......超級多人! 求其搵個位影吓花田, 點知有幾個韓國大媽攝埋嚟, 喂! 個位我哋企先架! 真係好冇禮貌, 仲衰過D大劣人! 佢哋D祖先應該係同種架!

由於實在太熱, 要行入室內, 順便睇吓有咩手信, 買咗乾花俾阿媽, 一支精油俾奶奶, 一盒香薰蠟蠋俾我哋自己der~ 走喇! 真係多人過旺角女人街, 行過去隔離蜜瓜農場食蜜瓜雪糕喇!

其實蜜瓜農場都係屬於富田農場, 整色整水做多盤生意, 賺多D人民幣咁解! 所以呢度都係超級多人! 原來要食蜜瓜雪糕, 先要你玩排隊遊戲, 首先, 去右邊個counter排隊買半個蜜瓜, 然後再去左邊個counter排隊買雪糕(個雪糕直接畢落你半個蜜瓜度), 真係超級白痴! 係唔係要嚟懲罰人架?! 或者想阻嚇嗰D要食蜜瓜雪糕既人! 個場好少枱, 好辛苦先至搵到一張, 不過, 只要你唔小心企咗起身或者坐得唔夠正中, 就會有其他人"攝"埋嚟!

雖然雪糕同蜜瓜都好好味(個蜜瓜好甜, 冇天那水味架!), 但係真係食得好折墮! 呢個時候, 哥哥突然話要poo poo, 吓? 又係你? 點解你D poo poo永遠都係唔適合的時候釋放出黎架? 目測呢度冇廁所既物體喎! 冇理由行返過去富田農場, 好遠喎! 惟有行上去最上面座建築物睇吓啦! 真係見到有個廁所標誌。我同哥哥即刻飛跑上去, 上到去, 係天堂呀! 冇乜人! 有冷氣! 重點係 -- 呢度都有蜜瓜雪糕, 仲要唔駛排2次隊, 仲要係 -- 佢呢度賣得平D添呀!!!!!! 我想喊! 但要收返D眼淚先, 因為哥哥趕住要去poo poo, 個廁所好細, 女廁排晒長龍, 我惟有叫哥哥自己去男廁, 自己搞掂! 好在佢最後都平安無事行返出嚟!

之後, 我緊係即刻返去向老公匯報軍情啦! 然後, 一家四口嗱嗱林, 拎埋個食到一半的蜜瓜, 衝上去上面間餐廳, 由地獄上咗天堂呀! 孖寶嚷著要飲水, 吓? 買支水, 不如買杯蜜瓜汁飲吓仲好啦! 順便問待應拎過支鐵匙更畢蜜瓜 (頭先樓下俾支膠更我哋, 個蜜瓜咁硬, 點畢呀! 玩嘢咩?!) 原來唔係蜜瓜汁, 係蜜瓜沙冰, 所以孖寶唔可以飲咁多, 太凍喇! 會咳架!

係天堂享受完, 老公話佢自己一個行返去攞車, 揸過嚟接我地, 吓? 天氣咁熱, 咁辛苦你喇, 老公!  中午12:25, 出發去紅酒廠, 車程15分鐘, 酒廠冇咩睇, 仲冇咗試飲提子汁, 參觀咗10分鐘, 走人喇!

去超市買蜜瓜返香港。既然要買蜜瓜, 緊係要買靚嘢, 起碼都要"秀"級啦! 係超市見到一箱2個, 寫住"至高XXXX", 應該係好嘢嚟! 因為2個要成5,378円 (比起4,000円可以買5個"優"級, 呢箱真係好貴喎!) 同老公考慮咗一陣, 我諗住係買2個架咋, 貴精不貴多, 豪一次囉! 睇怕都唔會再嚟北海道架喇!  老公話佢想買2支粟米返去, 吓? 咁搞笑! 當年紫色蓋玻璃樽北海道牛乳好出名, 所以今次要買返支嚟飲吓, 回味吓佢既味道!

下午1:40, 老公話想去返Homac隔離個餐廳食飯, 去到Homac, 又忍唔住入去行吓(當年就係呢度買大量零食俾Nick Nick, 仲話要買個大衞營for將來住村屋個天台用, hoho! 呢度好多回憶!) 今次見唔到大衞營, 但就買咗2包大零食俾Nick Nick), 門口仲有好多超強勁花火(No! 堅係煙花, 要插係地面度放, 仲要即刻撒退到5米範圍之外) 爸爸同孖寶對D火力強勁花火好有興趣! hoho...

好多回憶!

下午2:10, 睇怕要食麥當當, 因為我尋日用email book咗今日下晝3:15參加芝士工房的牛油班同雪糕班, 唔可以遲到。孖寶有得食麥當當, 好興奮! 叫咗2個兒童餐, 有玩具, 我散叫咗一個包, 老公叫咗個set, 本來想加大個餐飲, 但雞同鴨講, 結果, 原來叫多咗個大薯條, 同埋多咗杯ice tea, 算啦! D薯條多到好似座山咁, 唔好食晒呀! 好熱氣! 下午2:55食完嘢, 出發去芝士工房。

下午3:10到咗芝士工房, 泊低架車, 搵唔到個入口啊! 我唔想跟住D參觀既人, 我唔係要嚟參觀呀! 體驗工房係邊呀? 後嚟, 去返停車場, 睇到個牌指住體驗工房個入口, 入到去, 仲要上返樓上Counter俾錢先。好在預先Book咗, 我用個電話show俾佢睇個Booking Confirmation, 話咁快就搞掂!

由於孖寶玩嘢, 細佬話要參加牛油班, 哥哥要參加雪糕班, 所以爸爸陪細佬, 我就陪哥哥, 大家去唔同的班房。我同哥哥入咗班房, 坐咗一陣, 導師就叫我地入去入面個廚房, 安排咗我地去其中一張枱, 有日本人, 有唔知大劣抑或台灣人。導師首先講解有咩材料, 同埋一陣要點做, 導師識講簡單英文, 所以都明白, 而且步驟唔難, 就係將D材料溝埋一齊, 搞吓佢。我幫哥哥拍Video, 導師見哥哥搞唔掂, 出手幫佢, 最後仲抱起佢, 等佢可以將D材料倒落去部雪糕機入面, 仲俾佢撳Start掣。之後, 就係用蛋漿整個窩夫底, 要嚟裝雪糕, 導師搵然然一齊合作示範一次, 然後輪到我同然然整, 一個輪住一個, 10分鐘後, 雪糕整好喇! 由一位日本女孩幫大家畢雪糕, 然後即場享用! 呢個時候, 爸爸帶埋細佬仔落嚟, 佢哋都整完牛油喇!

幫孖寶影咗幾幅扮搾牛奶的相, 落返去玩吓架農夫車, 要走喇! 細佬舊牛油就嚟融喇! 下午4:10, 揸車返千歲市, 孖寶一上車就瞓著咗, 途中經過路邊賣蜜瓜的攤檔, 我同老公落車睇吓, 同阿婆雞同鴨講咗一大輪, 終於用4,500円買咗2個好似係"秀"級的蜜瓜 (堅係唔平喎! 網上D人話路邊賣得平D, 以後千期唔好再相信網上講既嘢! 中伏咗N次!)

路邊攤檔賣的蜜瓜一D都唔平

原來要揸成3個鐘頭車先至返到酒店, 本來諗住去酒店附近食嘢先, 點知去到間餐廳, 個帶位待應態度超級差, 個副乞人憎咀臉, 喂! 我而家嚟幫趁, 仲要睇佢面色受佢氣, 呢餐我真係食唔落, 即刻走人! 然後, 老公去泊車, 我帶孖寶去7-11買杯麵, 熱狗腸, 返上酒店房食!

夜晚9點, 終於有嘢食喇! 就嚟餓死孖寶同孖寶媽喇!

之前係Amazon買咗D嘢都送咗嚟呢間酒店喇! 包括孖寶的保溫飯壼(佢哋新學年開始帶飯), 孖寶一人一個JR造型的筆袋, 我買咗1條裙同1件衫, 仲有老公D模型。 我今個行程又係乜嘢都買唔到(好似2年前去名古屋嗰次咁), 好在出發前係Amazon買咗衫咋! 唔係今次真係一無所有喇!

今晚係最後一晚喇! 聽日就要返香港!

Day 7 完

北海道親子之旅2019 - Day 6

2019.08.01 (星期四)

今日天陰陰, 超多雲。是日早餐係三文治(細佬最愛腿蛋治)、飯團(哥哥至愛)、杯麵、牛油夾心提子包、十勝牛乳、蘋果汁, 好豐富啊!

早上9:20 Check out, 出發去美瑛的千代田牧場喇! 1個鐘後, 終於見到美瑛町個牌, 馬路兩邊都係一遍鄉郊景色, 我回憶中的北海道, 返番嚟喇! 我就係想去呢D地方, 唔係要去大城市啊!

 好多雲, 今日仲要去花田, 睇怕影D相都唔慌靚!

途中見到小山坡上面有個亭, 我同老公講: 咁似當年我地買壽司上去食嗰個亭咁既?! 於是泊低架車, 同孖寶去行吓, 周圍D風景好靚啊! 睇返Google Map, 原來我地所在地叫做三愛之丘展望公園。

早上10:50終於到咗千代田牧場喇! 我去洗手間先, 嘩! 好臭呀! 出返嚟就見到孖寶鬧交, 原來佢哋爭玩千秋, 哥哥例牌頭dup dup, 好似生無可戀咁款, 我惟有安慰佢, 叫佢去另一邊睇馬仔, 個牧場, 比我想像中差好遠, 之前去過九州的阿蘇牧場好有規模, 呢個跟本唔可以叫做牧場, 只係得幾個圍欄圍住D山羊, 綿羊, 老公教孖寶摘D草餵羊仔(買飼料的錢都慳返!)

再行入D, 有馬仔騎, 老公問我騎唔騎? 我, err...... 老公話佢騎, 咁是但啦! 我都騎啦! 一家四口, 盛惠3,000円。睇落個圈都幾大, 但原來只係半個圈, 老公話唔抵, 但已經俾晒錢, 中伏!

騎完馬仔, 已經冇嘢行, 冇嘢睇, 感覺係超級中伏! 去到停車場, 見到對面間屋仔有牛乳賣, 一場嚟到, 飲吓牧場新鮮出產既牛乳啦! 由於孖寶舊年去阿蘇牧場話D奶淡茂茂, 唔肯飲, 我叫老公買支細, 試吓算喇! 點知... 細佬見到我同爸爸飲, 佢話睇嚟幾好味喎, 想試吓, 結果, 支牛乳俾孖寶飲晒, 我好似飲咗2啖咋!

之後, 見到個牧場隔離個山上有個塔, 咁似我地當年去嗰個, 於是揸車上去睇吓, 車! 原來唔係, 咁細個, 又冇view, 完全唔係嗰回事, 不過, 一場嚟到, 影幅相到此一遊啦! 細佬唔想影, 冇落車, 我同哥哥影, 就係影完相上返車一秒後, 突然落狗屎! 好在上車上得快咋!

今日天陰陰行花田, 影出嚟D相一定灰濛濛唔靚! 而家仲落埋雨添! 天呀!!! 老公話, 你唔記得我哋當年去北海道都係咁咩? 無啦啦落一陣雨, 跟住就好天返! 希望係咁啦!

中午12:20, 到咗四季彩之丘, 個停車場泊咗幾架旅遊巴, 好很多人! 當年我地嚟北海道, 冇人架喎! 我本來係想搵個冇咁出名的花田參觀(希望冇咁多人), 但老公話呢個花田好出名, 仲有得租Golf車, 自己揸車遊花田。雖然已經停雨, 但唔知會唔會再落, 老公話唔駛帶遮啦! 咁麻煩! 啊! 由於頭先落過雨, 花田個泥地變咗泥漿池, 我對新買既Adidas啊! 冇喇!

租Golf車係2,000円15分鐘, 之後每10分鐘500円, 原來租Golf車係要國際牌架! 排我地後面的香港人冇國際牌, 租唔到啊! 俾咗錢, 就去攞車, 阿伯同老公講解點揸, 好似話冇後波der~ 唔好嘥時間喇(好似計緊時), 出發喇! 揸Golf車睇花田好爽, 去到邊, 停到邊, 落車影完相就上返車, 唔駛行到腳軟! 孖寶有車坐, 超級興奮!

玩多咗10分鐘, 俾多500円, 老公話抵玩過划鴨仔。由於實在太多人, 都係盡快離開喇! 出返市中心搵嘢食, 老公Google有間餐廳好出名, 經過門口, 的確係好多人排隊, 唔知等到幾時! 算吧啦! 下午1:30, 去車站隔離間飯堂啦! 都要等位, 叫做冇咁多人! 等咗10分鐘左右, 有位喇! 要坐地下, 孖寶最like! 我叫咗咖喱湯烏冬, 送一杯北海道牛乳(又係俾孖寶飲晒), 爸爸叫咗蛋包飯, 另外叫咗一碗拉麵, 孖寶仲係等嘢食期間, 同屋企的工人姐姐玩視像。食飯期間, 又落大雨!

食完飯, 係車站附近行吓, 我當年揸車嚟到呢個車站架! 係車站對面間士多買咗包花火(今晚住十勝岳溫泉旅館可以再玩多次)。

下午2:35, 出發去青池(當年唔知點解冇去過), 車程約30分鐘, 去到停車場, 嘩! 又係好多旅遊巴, 我以為自己返咗大陸D咩風景開發區。泊低架車, 行過對面馬路, 跟住D人群行, 嘩! 原來青池唔係好大, 不過, 的確係好特別的landscape, 類似九寨溝咁樣! 不過, 真係超多人, 加上一滴風都冇, 好熱, 孖寶係咁拖我哋行快D, 我哋想靜靜地欣賞吓風景都唔得, 唉! 一家四口影咗幾張自拍照, 走喇! 走喇!

 其實真係幾靚, 可惜太多人!

下一個景點係白鬚瀑布, 係青池的源頭, 呢個景點終於冇旅遊巴喇! 所以, 人都少咗好多! 孖寶對個瀑布好有興趣, 企咗係條橋上面睇咗好耐。

下午4點, 去今日行程的最後一個景點 -- 十勝岳望岳台。呢次堅係冇乜人喇! 好似我同老公當年去北海道咁。不過, 其實就冇咩嘢睇, 得D亂石堆, 孖寶話要行上去, 係個石碑(好似一堆屎屎咁)前面影咗幾幅相, 再去行吓停車場隔離個防風避難所, 去吓廁所, 冇野睇, 走人喇!

出咗停車場, 正當準備搵吓邊條路去酒店之際, 路上突然間出現一隻孤狸仔, 我地即刻停低架車, 隻孤狸仔竟然主動走埋嚟, 仲係司機位附近坐低咗, 好乖呀! 不如俾D嘢佢食啦! 我哋有麵包! 老公揻咗幾啖包, 掉俾孤狸仔食, 佢食完就乖乖咁走咗喇! 唔...... 應該係俾人餵慣咗!

下午4:55, 到咗十勝岳温泉　カミホロ荘, 點解外觀融融爛爛既??? 如果睇到張相係咁既, 我一定唔會叫老公Book! Jalan評分仲超過4.0架喎! 點解會咁? 中伏感覺好重! 頭先經過嗰間溫泉酒店靚好多囉!

如果之前係網上睇到呢張相, 一定唔會Book呢間

泊好架車, 自己拎埋D行李行入去旅館, 原來要除鞋, 真係好家庭式經營。等咗好耐, 因為前面啱啱有個家庭早我地一秒入嚟, 唔知搞乜搞咗好耐。我地check in 完, 有阿叔幫我地拎行李上房(冇lift, 要行樓梯), 入到房, 都幾殘, 再講一次, 如果上網睇到D相係咁既, 我一定唔會Book!!! 原來未有最差, 只有更差 -- 間房係冇冷氣der~(只有一個噴暖氣的機器係窗邊) OMG! 今晚點瞓呀? 雖然話係山區, 天氣清涼D, 但始終係大熱天時, 唉! 冇眼睇!

由於未到食飯時間, 去浸吓溫泉先啦! 我自己一個去浸, 老公就帶孖寶去浸, 呢度惟一好處係冇乜人(唔似得早幾日洞爺湖萬世閣咁), 我一個人享受個露天風呂, 不過, 冇景, 同埋好多昆蟲飛飛吓, 唉! 浸咗一陣就走人喇!

黃昏6:30落返一樓食飯, 所謂宴會場, 好似安置地震災民的學校課室咁, 一張張矮枱排晒係地下, 我地跟返房間編號坐, 今晚的晚餐係幾片魚生, 燒肉配料有幾片豬肉, 少量蔬菜, 有飯、有湯, 睇落唔係好食得飽, 好在原來外面仲有自助餐區, 可以自己夾D前菜、配菜之類。

食完飯, 返上房hea咗一陣, 晚上8:10, 去旅館的停車場玩花火! Book呢間山區旅館, 本來係諗住可以睇到星星, 不過, 今日多雲又落雨, 唔係好睇到, 加上旅館有光, 望上天空, 都唔係好睇到D星星! 玩完火花, 買雪糕食, 返上房。夜晚天氣涼返少少, 開大個窗, 加上開大把風扇, 叫做勉強瞓到覺...

ANA酒店覆返email, 話搵唔到我條裙! 有冇搞錯呀??? 執房點會見唔到個衣櫃入面掛住條裙呀???  一定俾執房條友掉咗...... 嗚嗚......

Day 6 完