媽媽陪我!

早排上網睇到一篇育兒的文章, 作者係一個爸爸, 佢話自己都算早放工, 但每日陪伴小朋友的時間就只有「短短的4小時」。我計一計, 每朝早6:30起身至7:30送孖寶搭校車, 只有1小時, 放工返到屋企6:30至夜晚9:30孖寶上床瞓覺, 只有3小時, 原來我每日見到孖寶的時間都只係得「短短的4小時」。間中試過約朋友放工後食晚飯, 返到屋企已經夜晚10點, 孖寶已經瞓咗, 然後就要等到第二朝6:30起身先至見到孖寶, 即係有24小時冇見過孖寶啊! OMG! 所以平日夜晚我都好少約朋友出街, 就算去做瑜珈或者上興趣班, 都盡量夜晚9點返到屋企, 務求趕得切係孖寶瞓著之前佢地一面! (呢D都算係雙職媽媽的辛酸!)

平日放工返到屋企, 真係好攰, 好想抖吓, 但就不停有人叫: 媽媽! 媽媽! 媽媽! 老公有時都會忍唔住笑我: 一返嚟就「媽」爆你! 每當有人呼喚我, 我就會同老公講: 我又被「寵幸」喇! (笑+滴汗emoji表情一個)

不過, 諗深一層, 其實要好好珍惜呢段仍然被需要的日子! 孖寶好想媽媽可以參與佢哋的遊戲, 好想同媽媽分享每一件佢地覺得有趣的玩具/畫作/事情, 好想媽媽聽佢哋訴說一天的所見所聞, 孖寶就係如此的單純地愛著媽媽!  愛一個人, 就係好想成日見到佢, 好想成日同佢一齊, 好想同佢分享嘛!  多年前一個電視廣告, 個爸爸話: 「今日, 你係佢既全世界! 他日, 你再走不進佢既世界!」Sad but true! 所以, 我同自己講: 要好好珍惜今日我仍然係孖寶既世界入面!

尋晚, 爸爸帶哥哥落街睇醫生, 細佬即刻走埋黎, 攬住我條腰, 個頭仔挨落去我肚腩度, 然後好嗲咁同我講: 媽媽, 我想你陪我玩LEGO! 佢話我好耐冇同佢玩過! (乜係咩? 好似尋日先至同你玩咗, 你仲叫我唔准掂, 咁點玩呀?!) 原來佢話係好耐之前有一次, 我同佢係茶几度一齊砌LEGO, 一齊諗要砌D乜嘢, 佢嗰次好開心, 記到而家!

阿仔呀! 其實媽媽都有成日都陪你哋玩架! 煮飯仔、伏匿匿、紅綠燈、飛行棋、波子棋、幫幫遊樂場、魔力橋、畫水彩畫、砌LEGO、Star Wars格劍、Cooking Mama、釣魚Game...... (多到唔記得) 仲有陪瞓、陪睇卡通片、陪練琴、陪溫書添!