點解會揀呢個老公?

最近, 成日諗住呢個問題, 原因並唔係覺得自己揀錯老公, 或者婚姻出現咩問題。剛剛過去的10月, 係我地結婚13周年, 13年轉眼過去, 感恩仍然能夠維持美滿婚姻! 身邊有朋友悄悄離婚, 有朋友經常被老公無理取鬧, 亦有同齡女性朋友仍然係名花無主......

雖說婚姻美滿, 但唔代表我地成日都好甜蜜, 老實講, 拍拖時的熱戀同初婚時的糖痴豆已經不再, 而家的情況係平淡但幸福, 係親人, 亦係朋友!

老公係我第三個男朋友......

第一個男朋友, 係大學一年級下學期認識的, 佢唔靚仔, 仲滿面暗瘡, 但勝在夠高(170cm), 我自知生得矮, 所以期望搵個高D的男朋友/老公。佢雖然家住豪宅, 又成日借佢老豆架車車我一齊返學放學, 但其實佢冇錢(又話唔想問老豆攞錢), 結果拍拖之後, 食飯、睇戲都係我俾錢, 感覺自己貼緊錢俾條仔, 好cheap, 加上佢成日都想食我隻"豬"(識佢都未夠一個月), 又嫌我矮, 自己都知道同呢個人唔可以亦唔可能繼續落去, 最後, 竟然係佢提出分手, 雖然果刻真係好似被判死刑咁, 但而家諗返, 好在走得快, 唔係就人財兩失!

第二個男朋友, 係啱啱失戀返教會識, 佢唔靚仔, 唔高大, 肥肥地, 仲欠落一大筆Grant Loan數, 經濟拮据, 行街食飯好多時都AA制, 成日一個早餐兩份食, 我永遠都食唔飽, 而且佢唔細心, 唔體貼, 唔識氹我, 只係識同佢班friend玩(差D連情人節都係要同佢班friend一齊過), 次次去完街要佢送我返屋企, 就好似迫佢服毒咁。拍拖3年, 一開始自己已經唔睇好呢段感情, 成日都諗住會同佢分手, 結果, 真係出現第三者...... 我第三個男朋友, 亦係我老公!

未講老公之前, 先講講我自從入咗大學, 身邊不乏追求者, 而我亦來者不拒, 可能因為中學時期饑餓咗好耐, 眼見身邊好多女同學都有拖拍, 雖然我老豆講到明唔俾我讀書時拍拖, 但我睬佢都傻, 我發誓入大學之後, 一定要拍拖!!! 不過, 雖然不乏追求者, 但正常的男仔唔多, 我唔需要靚仔, 但身邊出現的都係"騎呢"樣(其中一個俾我阿媽話佢似ET), 同埋全部都唔高(矮過170cm), 性格方面亦唔係好夾, 溝通唔到, 完全唔過電! 加上全部都係師兄, 大我一年, 啱啱出黎社會做野, Grant Loan都唔知要還到何年何月!

講返老公, 佢絶對唔係我由細到大心目中幻想果類型, 我其實係希望, 我將來個老公好似妙手仁心入面個吳啟華咁樣, 高大、唔駛靚仔(因為阿媽教落 -- 靚仔花心!)、斯斯文文、戴金絲框眼鏡、專業人士(咁又唔駛一定係醫生既!) 可惜, 咁樣條件的男仔, 係我生命中從來都冇出現過, 惟有認命! 而當年, 係我身邊出現過的眾多追求者當中, 老公已經係條件最好的一個 :

(1) 出咗黎做野幾年, 公務員, 工作同收入都算穩定, 行街、睇戲、食飯都係佢俾錢, 好有被照顧的感覺!

(2) 有層樓 (唔好意思! 我真係好現實, 有層樓係會加多D分, 雖然係居屋, 但真係佢自己名, 自己供, 後來先知道佢借咗佢阿媽20萬, 係要還既!)

(3) 有車 (佢架車仲要係當年出晒名的溝女車Civic, 我承認係死係佢架車的手上, 因為有車接送, 半夜去淺水灣海灘同中環碼頭傾計, 一句Please Wait, 然後20分鐘之後就係你宿舍樓下出現, 係女都死啦! 仲要我當年係無痴少女黎! 不過, 當追到手, 佢就賣走咗架車囉!)

(4) 好細心, 好體貼, 絶對係有異性冇人性果種, 唔理幾夜一定送我返屋企(搞到尾班車都走埋, 要同陌生人一齊搭泥鯭的), 又識氹我, 又同我傾心事, 好似好明白我咁樣, 隨傳隨到, 幾時都可以搵到佢, 幾夜都一定覆我電話, 仲好浪漫 (不過, 原來只係扮出黎, 婚後就冇晒lu)

不過, 老公有一樣野, 係中正我死穴, 亦係我最介意的 -- 就係矮! 佢唔止係唔高咁簡單, 而係矮, 仲要係好矮, 佢係我識咁多個男仔入面, 最矮果個, 天呀! 你係唔係玩野呀? 係未同老公開始之前, 我諗咗一段時間, 因為我唔想傷害佢, 如果真係冇心同佢發展, 甚至將來結婚(我知佢係想搵結婚對象), 就唔好玩人地! 但我真係一心諗住搵個老公係要高既, 就算唔高, 都唔好太矮啦!  不過, 我覺得如果佢樣樣都乎合我的擇偶條件, 只係身高達唔到要求, 如果我咁介意佢身高, 我會唔會太過膚淺呢? 如果我失去呢個同我咁夾的人, 會唔會以後都搵唔返呢?  同埋佢真係好錫我, 我唔想佢去錫另一個女仔呀! 阿媽話: 要咁高做咩? 咁又係, 老豆都好矮, 但老豆好錫阿媽! 最後, 我決定唔再介意佢身高, 正式同佢開始拍拖!

拍拖3年, 結婚13年, 老公仍然係好錫我, 事實証明我冇揀錯老公! 佢亦係一個好爸爸, 我有一個由細識到大的閏密, 佢有一次同我講, 我終於知道你點解揀呢個老公喇! 因為佢見過我老公湊仔湊到面容憔悴, 眼圈黑晒, 出街見到佢都認唔出係我老公! 佢仲大讚我老公湊住兩個仔時超有愛心!

孖寶升小一(11月Update)

自9月開學, 孖寶已經做咗小學雞2個月了!

小學雞已經慢慢適應小學的生活, 孖寶唔算太多講學校發生的事, 媽媽問佢地今日學校有冇特別/開心的事發生, 細佬通常都話冇乜特別, 冇野開心, 哥哥就直頭話唔記得咗!

媽媽只能夠從孖寶零碎的口供尋找到少許線索, 從而猜測孖寶近來係校內的情況!

哥哥:

- 開學的時候, 佢好憎佢個班主任陳老師, 佢話老師好惡, 成日鬧佢, 又罰佢出黎企黑板, 但最近再問返佢, 佢竟然話好鍾意陳老師, 陳老師好錫佢......

- 學習方面, 哥哥雖然容易分心, 但絶對唔係有學習障礙或者蠢的小朋友, 相反, 其實, 哥哥係醒醒地, 自從9月尾開始有中英文默書, 10月中開始有測驗, 哥哥的中英文默書一D都唔差(仲高分過細佬), 但2次數學測驗就唔合格, 其實佢係識計D數既, 佢只係理解唔到條題目問乜野啫。

- 課外活動方面, 開學的時候, 爸媽幫孖寶報咗2個興趣班, 星期一放學後打羽毛球, 同埋星期六上午學樂器(哥哥自己揀咗口琴), 佢好鍾意打羽毛球同吹口琴, 係屋企會邀請媽媽同佢打羽毛球(爸爸一聽到佢話要係屋企入面打羽毛球, 就好驚, 即刻話唔好!), 佢又會主動練口琴, 佢只係練習咗幾次, 就可以記到個譜, 唔駛睇譜吹, 加上口琴的do, re, me唔係琴譜上的1, 2, 3, 真係有D難度! 哥哥都幾有音樂天份! 媽媽希望佢能夠係艱辛的小學生活中尋找到一點的樂趣同滿足感!

- 社交方面, 哥哥似乎都識咗幾個朋友仔, 跟據哥哥過往係幼稚園的情況, 哥哥通常都比較受女仔歡迎, 加上哥哥的性格好友善, 唔計較, 樣貌又討好, 所以識朋友, 應該冇乜難道, 媽媽亦唔太擔心!

- 功課方面, 哥哥班超多功課, 每日都有7-8樣, 寫滿晒手冊, 加上哥哥寫字都幾靚(所以寫得好慢), 同埋佢主動性比較低, 又心散, 加上冇得午睡, 佢每晚6:30左右就開始遊雲, 甚至發眼瞓癲, 所以佢每晚都要用好多時間做功課, 真係好吃力, 爸媽都教得好辛苦!

細佬:

- 開學的時候, 細佬都試過有一次俾老師罰, 佢又哭訴體育科老師(即訓導主任)好惡, 返學好多野做, 又要成日坐定定, 唔俾郁, 唔俾出聲, 所以佢好唔想返學。但2個月過去, 細佬再冇哭訴俾老師鬧/罰, 佢仲好開心, 成日俾我睇佢D加油券(老師奬勵同學的貼紙, 儲滿一頁有小食, 儲滿400個有銅章), 細佬有一次同我地講, 其實學校都有D開心野既, 有一次, 老師讚佢係一個好榜樣, 另外, 細佬話老師揀咗佢做視藝科的科長, 要幫手拎全班同學的視藝作品去教員室俾老師, 希望藉住呢D一點點的美好的經歷, 細佬能夠享受到返學的樂趣同滿足感啦!

- 學習方面, 細佬一向都好專心上堂(幼稚園的時候己經係咁, 上堂郁都唔郁, 坐定定), 加上佢理解力非常好, 所以媽媽完全唔擔心, 佢學習上一定跟得上老師的進度。細佬2次數學測驗都有唔錯的成績, 細佬思路清晰, 理解力強, 數學係佢強項。至於中英默同英文測驗呢類要死記硬背的科目, 細佬都比較弱, 但都合格。

- 課外活動方面, 開學的時候, 爸媽幫細佬報咗羽毛球, 等佢同哥哥可以一齊玩, 另外幫佢報咗小提琴, 其實細佬對學樂器冇乜興趣, 但為咗培養佢對音樂的興趣, 我地鼓勵佢學小提琴, 希望佢唔駛同哥哥比較, 大家學唔同的樂器, 各自係自己的領域, 尋找到滿足感! 不過, 原來學弦樂係非常之難(我覺得仲難過學鋼琴), 加上老師好惡, 對小朋友唔太有愛心, 細佬好抗拒返小提琴班同練琴, 每次都喊+發脾氣。不過, 最近, 細佬好似諗通咗, 佢為咗D加油券, 好努力咁練琴, 雖然返小提琴班前都係會發脾氣, 但最終都肯返。

- 社交方面, 係媽媽一向最擔心的環節, 因為細佬有少少社交障礙, 不善交際, 唔鍾意幫人, 亦唔需要人幫, 我行我素。不過, 細佬似乎都識到一、兩個朋友仔, 佢話會同一位朋友, 食完飯大息一齊落去操場玩。幾個星期前有一晚, 媽媽講故事, 細佬話, 識朋友要鼓起勇氣, 我係學校就係咁囉! 媽媽聽到, 真係感覺老懷安慰! 不過, 最近學校有一份功課, 係要小朋友去訪問2位同學, 細佬話佢搵唔到, 爆喊, 媽媽惟有幫佢寫張字條俾老師, 請老師幫忙, 最後細佬終於鼓起勇氣, 成功訪問咗2位同學, 細佬, 你要繼續努力呀!

- 功課方面, 細佬班明顯較哥哥班少好多功課, 好多時都係4-5樣, 細佬做功課比較快, 可能因為佢專心, 寫字又比較快(但唔靚, 打風咁), 佢都算自動自覺, 識得自己拎功課出黎做, 不過, 佢有時都會哭訴, 話工人姐姐/嫲嫲迫佢做功課, 又話成日都要做功課, 搞到冇時間玩, 好唔開心!

其實孖寶已經好幸福, 有爸媽教做功課, 又陪佢地溫書, 媽媽仲化身中英數老師, 出模擬試卷俾佢地做。雖然讀書真係好辛苦(毫無樂趣可言), 但希望爸媽的陪伴、支持、鼓勵, 能夠為孖寶打打氣, 係學習的路上繼續堅毅往前。

孖寶兄弟, 奸爸爹!

孖寶兄弟語錄(18)

自從孖寶9月升小一，爸媽每晚都會關心一下孖寶在校的情況，有冇特別或者開心的事情發生？大息做咗d乜？有冇落去玩？

話說上星期有一晚食飯的時候......

媽媽 : 細佬，你今日大息做咗d咩呀？
細佬 : 落操場睇人踢波。
媽媽 : 多唔多人睇呀？
細佬 : 好多人企晒係度，圍住睇，然後，有班人拎d藍色既, 好似西蘭花咁既野出黎，係咁揈!

媽媽同爸爸聽到，即刻忍唔住爆笑，差d噴飯！細佬的想像力好豐富, 形容亦相當有創意, 不過, 真係第一次聽人形容"啦啦球"好似西蘭花咁, 諗落又真係幾似!

細佬講既野, 成日都係咁出人意表, 笑到噴飯, 真係要俾10個like佢!