K.3觀課日

上星期四(2018.03.08), 我同老公去學校觀課。孖寶今年K.3, 雖然觀咗2年, 都大概知道佢地上堂的情況, 但今年最後一年, 唔觀就以後都冇得觀喇! 緊係要去啦! 至於爸爸, 佢覺得去唔去觀都冇所謂, 不過, 既然我去, 佢就陪埋我去咁囉!

早上8:50送咗孖寶返學, 第一節的觀課時間係9:15, 老公話唔想企係學校門口等大半個鐘, 去行吓商場先。9:10返番學校, 聽主任老師講解觀課的注意事項, 然後見到佢地全班同學排隊入禮堂, 我地就被安排同另外幾位家長行入禮堂, 睇佢地上唱遊堂。

由老師播音樂, 小朋友跟住跳舞, 男女同學分開兩行企, 然然逸逸仍然係全班最矮(都預咗!) 佢兩個都冇跟住音樂跳舞, 又唔投入, 呆晒, 好似發緊夢咁! (可能係有爸爸媽媽睇住, 細佬好緊張! 哥哥就一向都係遊雲der~) 跳完一round, 老師點名叫小朋友出黎做代表, 分別帶男仔同女仔跳舞, 哥哥被老師叫咗出去, 帶男仔跳"踢躂舞", er......睇落哥哥好似"亂咁舞"囉!  之後, 老師邀請家長出去一齊做"毛巾操", 問各位同學想邀請邊位家長, 佢地有個女同學(識得我, 係圖書館見過幾次)大叫: 卓然卓逸媽咪!  結果, 我就被邀請出去一齊跳咗一part"白痴舞"。

玩咗大概20分鐘, 呢一節觀課完畢, 家長先離開禮堂, 出去大堂坐一陣, 等下一節觀課, 係「主題教學」。老師邀請我地先入課室, 然後小朋友入黎, 全部自動波咁分組, 有D自己拎功課出黎做, 有D就走去課室另一邊, 坐低, 準備上堂! 原來今個學期, 孖寶唔同組, 細佬先去上堂, 哥哥就拎D功課出黎做, 我坐係課室中間, 可以睇晒佢兩個, hoho!

然然寫字好明顯冇隔離個女同學咁快, 人地高佢成個頭, 做得佢家姐, 而且, 寫字好似對佢冇難度咁, 個女同學仲好照顧然然, 幫佢揭去要寫字嗰頁! 至於細佬, 佢坐咗係前排地墊最左邊, 老師呢個星期教標誌, 拎咗唔同的標誌(平時係商場或搭地鐵會見到的標誌)問小朋友知唔知係咩意思, 之後2個小朋友一組, 相量一下拎到的標誌係代表咩?  (除咗發表自己見, 亦要學習聆聽別人意見, good!) 之後,老師邀請小朋友出黎講, 唔單止講自己意見, 仲要講埋同組個小朋友的意見。老公話細佬都有出去講, 但好細聲!

過咗15分鐘, 輪到哥哥果組上堂, 細佬果組做功課, 我去睇哥哥, 爸爸睇細佬。老師拎咗個大X活快餐店的標誌出黎, 個個小朋友都係大叫: 大X活! 然然就呆咗, 然後老師邀請然然答, 然然唔識, 老師望一望我, 問: 冇去過? 我話: 係呀! 然後老師又拎咗個7-Eleven的標誌出黎, 個個小朋友又大叫: Seven! 7仔!  然然仍然係...... 呆晒! 之後, 又係2個小朋友一組, 老師都有邀請然然出黎講野, 佢講到一舊舊咁 (不過, 原來其他小朋友出到黎講野, 都係講到一舊舊, 好在啫! 然然係正常der~)

主題教學完結, 老師要執課室, 準備下一節的「自選活動」。老師安排孖寶畫畫, 叫佢地自己去拎+著圍裙, 用油彩係畫紙上畫今個月的主題 -- 野生動物 (K.2觀課好似都係畫野生動物), 爸爸陪哥哥, 我陪細佬, 哥哥揀咗畫大象, 細佬揀咗畫馬騮, 好明顯, 兩個都係抽象派大師。由於當日天氣都幾凍, 係室外畫畫都幾凍, 畫咗10分鐘就"完成", 返課室繼續其他自選活動。老師見佢兩兄弟成日都砌積木, 於是邀請哥哥出去大堂砌大海綿積木, 細佬冇理到老師, 繼續自己一個玩(佢冇入角同其他小朋友玩)。之後, 老師叫小朋友要轉組, 細佬收拾積木期間, 倒瀉咗, 佢二話不說咁瞓身落地, 伸隻手入櫃底執, 媽媽都幫佢執, 老師見到都讚佢: 呢D咪就係叫做有責任心囉! 好多小朋友倒瀉咗就咁走咗去架!  細佬之後去玩點讀筆, 玩咗5分鐘, 老師宣佈自選活動時間結束, 小朋友要收拾, 準備上英文堂喇! 家長觀課時間完畢!

總括黎講, 孖寶都好習慣幼稚園的學習模式同程序, 不過, 可能始終係細B, 全班最細, 所以反應都係比其他同學冇咁醒, 但佢地的學習同理解能力都唔算差! 至於開唔開心, 真係好睇小朋友的性格, 我見有D小朋友好投入, 玩得好開心, 細佬可能有少少社交障礙(好驚多人的環境), 的確, 課室的環境談不上令佢好開心! 老師我同地講: 佢地今日調轉咗呀! 平時唔係咁架! 細佬多野講D, 哥哥靜D! (吓?! 係咩? 之前K1同K2, 都係哥哥活躍D喎!)

戒片 (4)

「戒片」呢個題目, 原來之前已經發表過3篇文章, 最後一次係2016年3月, 即係2年前。吓? 兩年後仍然仲講緊? 冇錯! 孖寶而家5歲3個月(今年9月就升讀小學), 但仍然係未戒到夜晚條片, 佢地係要著片瞓覺!

之前睇D咩育兒書, 話如果幼兒朝早起身, 條片冇濕的話, 就係時候可以幫佢地戒片喇! Sorry! 阿專家! 我對孖寶, 到而家, 每朝起身, 條片仲係超多尿, 超濕, 超重, 差D漏出黎, 係唔係即是話, 佢地未係時候戒片呢? 咁仲要等到幾時呢? (媽媽深信: 我未見過有人40歲都仲要著片瞓覺! 就係呢份信念, 媽媽仍然有希望 -- 孖寶遲早都可以戒到片der~)

說話家中的姐姐之前去過中東打工, 佢話佢照顧果對中東的小朋友(都係孖仔), 都係佢幫對小朋友戒片, 所以姐姐好有信心, 可以幫到孖寶戒片! 姐姐仲提意, 由佢(姐姐自己)一晚起3次身(姐姐話會校鬧鐘), 兜孖寶去廁所! 吓? 咁辛苦? 我聽朋友講, 幫小朋友戒片, 晚晚都起幾次身, 冇覺好瞓! 而家難得姐姐咁有heart, 自告奮勇, 唔駛我自己(同老公)起身, 咁........ err .........辛苦你喇姐姐!

於是, 2月最尾個星期開始, 夜晚唔著片, 著學習褲(咪即係片)瞓覺! 經過一星期(姐姐)的努力, 哥哥係7晚裏只有1晚屙濕咗條學習褲, 好叻叻呀! 至於細佬, 戒片第一晚己經屙濕咗條學習褲(姐姐話細佬跟本唔肯起身去廁所), 第二朝仲要爆喊, 發脾氣話唔戒片, 埋恐我地做乜迫佢做D佢做唔到既野?! 真係趟著也中槍, 爸媽已經冇鬧/話佢屙濕條學習褲(俾著以前個年代, 賴尿? 打鑊金然後趕出門口罰企啦!), 仲要不停安慰佢, 慢慢黎啦! 唔想戒可以唔戒住喎, 遲D夏天先至戒囉!

由於哥哥真係好叻仔! 爸爸為咗鼓勵佢繼續努力, 送咗架係日本買的Tomy車仔俾哥哥! 哥哥好開心, 話會繼續努力! 爸爸應承佢, 如果哥哥可以成功戒到片一個月, 3月尾去完旅行返黎, 就會送盒LEGO俾佢!

 哥哥, 你要繼續努力啊!

至於細佬, 咁耐以黎, 未試過有一晚唔屙濕條學習褲/尿片, 但佢見到哥哥有禮物, 佢又爆喊, 又話唔開心, 雖然已經解釋咗: 哥哥努力戒片, 所以有禮物, 你戒唔到, 如果都有禮物, 你覺得公平嗎? 細佬當然心知唔公平, 但佢仍然爆喊, 要爸爸都送架車俾佢! 結果, 爸爸話送俾佢, 但如果屙濕片就收返! (咁佢之後當然都係屙濕啦!)

哥哥經過3星期的努力, 可以做到半夜唔駛去廁所, 天光未夠7點去一次, 但通常會拍門走入黎爸媽間房, 去完廁所就瞓唔返! 至於細佬, 雖然姐姐半夜叫醒過佢2次去廁所(佢都屙到少少), 但第二朝條片仍然係濕咗! 真係冇辦法! 細佬亦唔知自己幾時屙咗落條學習褲度! (細佬太好瞓喇!)

後記@2018.3.4

哥哥去旅行期間真係完全冇失手, 就算好夜瞓, 勁眼瞓, 都識得半夜起身叫醒我地同佢去廁所, 或者忍到第二朝早起身去! 好叻叻呀!

戒片成功的禮物 -- 忍術練習場LEGO(哥哥自己揀的)

後記@2018.5.16

由於哥哥已經有2個幾月, 夜晚冇屙濕條學習褲, 加上天氣開始熱, 哥哥都想夜晚著底褲(唔係學習褲)瞓覺, 爸媽都覺得可以俾哥哥一試(就係2日前開始), 哥哥呢兩晚瞓覺都冇屙濕條底褲。媽媽正式宣佈: 哥哥戒片成功喇!

由於細佬見到哥哥可以夜晚著底褲瞓覺咁爽, 佢尋日竟然主動同爸爸講, 你送咗盒忍術練習場LEGO俾我先, 我即晚就開始試戒片(著學習褲), 其實媽媽都好驚, 佢聽朝發現屙濕咗, 又會埋怨我地迫佢戒片。尋晚臨瞓, 我同細佬講 --

媽媽: 媽媽好欣賞你主動話要戒片, 你肯去嘗試, 已經好好! 就算真係唔小心屙濕咗, 都唔緊要架! 來特兄弟發明飛機, 都唔係一次就成功啦! 你記唔記得佢地失敗咗幾多次? 

細佬: 咁即係如果我試10次先至唔屙濕, 我都叻過佢地? 

媽媽: 係呀!

到咗今朝早, 細佬走入黎我地間房, 好自豪咁同我地講 --

細佬: 我冇屙濕條學習褲呀!

媽媽: 嘩! 咁犀利!

細佬: 我係唔係叻過來特兄弟?

媽媽: 緊係!

今朝工人姐姐同我講, 尋晚叫醒咗細佬起身去咗廁所3次 (辛苦晒姐姐同細佬喇!)

後記@2018.5.31

經過2星期的努力, 細佬已經冇賴濕條學習褲喇! (初頭幾晚, 爸爸同姐姐都有半夜叫佢起身去廁所, 但佢唔肯起身去, 賴濕咗!) 由每晚叫醒三次, 之後兩次, 到最近幾日, 每晚一次, 已經好大進步! 細佬問可以著得底褲瞓未? 我地話遲D先啦! 驚佢失手, 哥哥都用咗學習褲2個月, 冇賴濕到, 先至轉為著底褲瞓覺。

後記@2018.06.20

經過1個月的努力, 細佬已經有好多晚冇賴濕條學習褲喇! 細佬呢幾晚都可以忍到朝早5點, 然後佢自己叫醒姐姐, 同佢去廁所! 希望到7月的時候, 細佬都可以唔用學習褲, 就咁著底褲瞓覺!

後記@2018.09.20

其實孖寶係8月去旅行之前, 已經成功戒片, 唔駛著學習褲, 只係著底褲+面褲瞓覺 (細佬有一晚突然失手, 賴濕咗, 好在有舖床墊, 床褥冇事!) 據姐姐的描述, 佢地有時半夜會去廁所(有時可以忍成晚, 到第二朝早先至去), 哥哥要叫醒姐姐陪佢, 至於細佬, 佢同姐姐講, 佢自己去得架喇! 唔駛姐姐陪! (勁!) 爸爸係走廊同廁所都裝咗自動感應燈, 等孖寶半夜去廁所唔駛驚黑!

佢地而家成日問, 咁幾時可以"戒床墊"呀?

吓? 床墊都要戒? 唔駛啦! 都影響唔到你瞓覺!

後記@2019.12.20

過咗1年半, 哥哥上個月開始唔用床墊喇! 細佬就因為曾經賴濕過1-2次, 所以仍然要用床墊。最近同佢地講返, 佢地上年仲要著尿片瞓覺, 只係上小學前先至戒咗咋! 佢哋竟然唔記得晒, 仲好驚訝: 吓??? (好大聲) 佢哋唔信自己咁大個都仲要著尿片瞓覺!

理財概念

我們家的理財概念只有一個字 : 慳!

由於我同老公細個時候屋企都唔係富裕, 所以大家自小就被屋企人灌輸, 乜都要慳住駛, 雖然大個出黎做野, 有收入, 駛錢可以自己話是, 但由於一向慳慣, 所以同老公拍拖以至婚後, 都係好慳der (連結婚駛錢都係慳住慳住, 所以pre-wedding photo 影得唔靚, 婚禮當日個化妝麻麻, 件婚妙唔夠閃, 個場唔夠Grand, 就連去渡蜜月都係慳住駛, 住平價酒店, 搭車火, 冇乜浪漫過!)

作為一個女人同人妻, 我敢講, 我真係好慳! 我慳到 -- 一世人都冇去過做facial, 結婚10年都冇買過護膚品, 冇買過名牌手袋&名貴首飾, 生仔去政府醫院, 坐月冇請陪月, 冇食過咩補品, 冇要求過要收生日/情人節禮物, 每日返工帶飯, 同老公出街食飯好多時都係去茶餐廳, 冇乜點買野俾自己(氹吓自己開心)。

至於老公, 佢係雙重標準! 佢係食同衣著方面真係好慳! 基本上, 佢對食冇要求(佢最like茶餐廳/快餐店), 貪佢夠平, 佢對衣著都冇要求, 竟然係淘寶買衫褲鞋襪 (希望佢可以頂得順D致癌物啦!), 佢對我都好慳(佢當然話唔係啦! 算啦! 呢D都無謂講喇! 不過, 近年, 佢好似對我同兩個仔闊綽咗, 冇以前咁孤寒!) 但另一方面, 佢對自己、部車、音響、相機、手提電話、佢D無限興趣, 就可以駛錢駛到面不改容! (佢話佢已經好慳, 冇買最top個型號, 真係委屈咗佢囉!)

由於我唔想孖寶太市儈同對金錢太計較 (我好反感我細佬對金錢斤斤計較, 吓吓都要計到盡搵著數, 佢都係咁樣教自己個仔), 所以我一直都避免係孖寶面前講個錢字, 所以佢地對金錢的概念 -- 係冇既! 不過, 孖寶5歲喇! 今年9月就升小學, 到時去小食部買吓零食都要掛, 冇理由連俾幾多錢, 找返幾多錢都唔識掛! 於是, 媽媽有時都會同佢對講吓D錢要點駛!

上個月係農曆新年, 孖寶收到好多利是錢, 媽媽覺得可以藉呢個機會, 教佢地理財的概念, 所以提意孖寶用自己的利是錢買LEGO俾自己。於是, 爸爸同孖寶講, 佢地每人有$120利是, 可以用黎買LEGO。去到LEGO舖頭, 孖寶就睇吓有邊盒LEGO係$120或以下。本來, 大家都睇緊around $120的LEGO, 然然突然間話: 都係唔好喇! 我唔想買咁貴, 好嘥錢, 我都係睇返$70幾蚊果D算喇! 果刻, 爸媽都呆咗! (好滾動!) 就連企係隔離揀緊LEGO的姨姨都忍唔住同我地講: 真係好生性呀佢! 係! 然然, 爸爸媽媽都覺得你好生性啊!

就係咁, 然然揀咗一盒$75, 細佬揀咗一盒$70 (佢話留返D錢遲D讀小學時去買零食, hoho)。其實, 爸媽並無教過佢地要儲起D錢, 唔好駛晒佢, 但孖寶竟然咁生性, 爸媽真係老懷安慰!

後記@2018.05.06

回應返上文提到「孖寶今年9月就升小學, 到時去小食部買吓零食都要掛, 冇理由連俾幾多錢, 找返幾多錢都唔識掛!」, 於是我提意同孖寶玩「小食部」遊戲, 我拎D零食出黎, 每人俾10蚊佢地, 我做小食部姨姨, 孖寶買零食, 要自己計吓應該俾幾多錢/找返幾多錢, 同埋記得記得拎返買咗的零食(唔好找完錢就走咗去!), 佢地玩得好開心!