沖繩親子之旅2018 - Day 2

2018.01.02 (星期二)

早上8點起身, 今日氣溫最高19度, 陽光普照, GOOD!

8:45落去食早餐, 食早餐的地方好靚, 有人帶位(老公話呢間堅係酒店, over HKD1000一晚, 唔係東橫INN黎架!) 小童早餐免費, 原來個自助早餐先至係呢間酒店的賣點, 有煙三文魚, 凍蝦, 魚子, 廚師即場煮意粉, 煎和牛夾包, 甜品係cheesecake, tiramisu, chocolate fountain! 太強勁喇! 老公話早知呢5晚都住呢間酒店啦!

細佬好鍾意食早餐的凍蛋(係雪到凍冰冰的scramble egg), 哥哥今次有進步, 食多咗少少野, 又肯飲鮮奶, 兩個食完早餐就走咗去個playground度玩, 我同老公可以享受5分鐘的撐枱腳時間, 同埋幻想一吓兩口子去旅行的甜蜜!

 尋日係西松屋買的夾棉褸, 好有型呀!

早上10:15離開酒店, 出發去海軍壕公園。本來想去瀡長滑梯, 點知行錯路, 上咗山頂, 老公話都去參觀戰壕啦! 孖寶都話想睇, 於是就去咗山洞入面睇戰壕喇!

睇完出返黎, 去咗山頂上面個亭, 老公帶咗望遠鏡俾孖寶睇風景! 山頂好大風, 但有陽光, 所以唔算好凍, 唔駛著褸。

睇完風景, 去玩瀡滑梯, 一家四口試玩, 原來一D都唔滑, 要用腳輔助先至瀡到落去, 唔好玩! 媽媽同細佬放棄, 去玩另一條短D的滑梯, 哥哥堅持要玩多次長D果條滑梯, 爸爸陪佢! 孖寶玩得好開心, 但接近中午時間, 烈日當空, 應該有22度, 好熱好熱! 細佬玩到流晒汗, 佢話唔玩喇! (媽媽仲著咗厚打底, 堅係熱到阿媽都唔認得, 上車後要除咗件打底)。

好好天, 好曬, 好熱!

中午12:15離開, 出發去玉泉洞(車程約30分鐘), 自從上次去名古屋, 老公買咗袋朱古力包擺係車入面, 以備不時之需, 我地今次都買定D包, 孖寶一上車, 就話要食包, 食完包冇幾耐就瞓著咗, 喂! 好快就到! 唔好瞓呀!

下午1點到達玉泉洞, 由於媽媽今朝狂隊包(暫時未肚餓), 孖寶頭先食咗包(為咗叫醒佢地, 又俾佢地食咗芝士條), 爸爸話今朝飲咗coffee, 而家個胃頂住, 一家四口冇人肚餓, 所以決定行咗玉泉洞先。

由於係日本人過新年, 王國村入口有個太鼓, 俾每個人打一下, 細佬初頭驚驚, 唔想打, 但見到媽媽打得咁開心, 佢又打, 哥哥就更加係破壞王, 超級大力打落個鼓度。一家四口打完鼓, 就直接行去玉泉洞的入口。原來個洞唔係陰風陣陣果種, 仲有D熱氣攻上黎, 落到去個洞, 孖寶兩個都話唔驚, D石尖尖地, 有D水滴落黎, 雖然個洞好長, 但兩個都冇扭計, 冇嗌攰, 好努力咁跟爸爸媽媽行, GOOD BOYS!

行咗超過30分鐘, 終於出返黎喇! 但仲要經過王國村(其實只係一條商店街, 但好長好長, 想出返停車場攞車都唔容易)。

有街頭表演, 細佬話怕醜, 唔想一齊影相

又行咗20分鐘, 終於都差不多可以離開喇! 因為我地到咗終極賣手信的舖頭 (由於回程當日係早機, 媽媽恐防到時又係裙拉褲甩咁衝去登機, 仲點會有時間係機場禁區入面D免稅店買手信, 所以決定係度買晒佢), 買手信盛惠4,500円, 快D走喇! 要趕住去shopping呀!

本來行程安排今晚去國際通, 但由於尋晚間商場的boutiques實在太吸引(媽媽)喇, 加上原來1月1-3日係日本的新年假期, 周圍都大減價, 所以決定去返Naha Main Place, 老公話佢睇住孖寶, 叫我放心去買衫啦! (老公, 你對我實在太好喇!)

下午3:30左右到達商場, 媽媽即刻展開血拼行動 -- (1) 香港都有的品牌 -- 唔睇! 緊係睇D香港冇的boutiques啦! (2) 重質不重量, 唔好貪平! (3) 其實都有目標, 一直想搵一件白色針織, 要黎襯裙, 另外, 想買條可以襯唔同衫的頸巾, 仲有causal褸, 最重要係唔好再買黑色/深藍色衫, 因為成個衣櫃都係, 加上"後生女", 應該要著D淺色/鮮色D衫! (4) 每間都睇吓先, 再決定去邊間買! 但原來個商場實在太大, 我只係睇咗其中一part已經用咗好多時間, 由於時間無多, 所以決定揀2間, D衫的質料摸上手都唔錯, 試上身唔拮肉! 結果成功買咗一件白色針織(2,950円), 一件淺紫色針織(1,750円), 兩件都冇晒新, 因為做緊大減價, 算啦! 都OK!

無啦啦經過一間boutique, 見到裏面有件長款的軍綠色棉樓, 原價14,800円, 而家50%OFF, 影張相問吓老公, 佢話OK! 但個心1516, 香港好多人著, 好似著校褸咁喎, 同埋都興咗6-7年, 會唔會已經OUT咗架?! 都係唔好買! 正想離開, 俾我見到有條粉紅+灰白色的頸巾呀! 我搵咗你好多年喇! 係你喇! 1,500円咋! 軟綿綿, 好滑, 唔拮頸架! 跟住見到隔離個架掛住件灰色毛毛袖遮pat pat衞衣, 毛毛袖今年日本好興, 加上遲D三月去東京8日, 唔夠衞衣, 啱晒喇! 1,990円, 雖然冇折, 但只係HKD140, 質料摸落都唔太差, 係大件咗少少, 衞衣鬆身D冇所謂啦! 買啦!

下午5點, 我覺得自己實在太過份(雖然老公話孖寶瞓到而家), 都係去停車場同老公會合咗先!

第一次同孖寶旅行都可以自己一個去行街買衫, 好興奮!

孖寶啱啱瞓醒, 就帶佢地去商場二樓的遊戲機舖玩Mario賽車, 又坐火車仔, 又睇人夾公仔。

下午5:50, 好肚餓呀! 下晝都冇食過野, 媽媽不行了! 於是游說爸爸去食晚飯(冇錯! 係要游說der~ 因為爸爸成日都唔肚餓, 佢唔肚餓唔駛食, 就以為人地都唔需要食飯!), 孖寶話想去返尋晚間餐廳坐地下(日式座位), 好啦! 由於時間尚早, 唔駛等位!

食飽飽, 媽媽對頭先件夾棉褸仍然念念不忘, 爸爸話唔好諗咁多喇! 買啦! 三仔爺一齊陪我入返間舖頭買褸(7,400円), 原來M碼已經係最細, 但對我黎講就大件咗少少囉! 之後, 老公話想去睇鞋! 我話: 老公你去啦! 輪到你行架喇! 放心, 慢慢睇! 我帶孖寶去睇玩具! 結果, 老公都成功買咗2對斯文款的休閒返工鞋(盛惠20,000円)!

之後, 我話想去睇絲襪(冇錯! 日本製絲襪都係今次的目標, 因為香港賣得好貴, 一對要HKD100, 日本平一半, 買得幾對都慳幾百蚊架喇!), 搵唔到Gunze絲襪, 只有另一隻牌子Atsugi, 未著過, 但寫住Made in Japan, 最重要係唔貴, 70周年限定版, 110針, 2對裝, 700円 (即大約HKD26一對) 仲要係日本製喎! 唔好諗咁多喇! 買2包啦!

之後去超級市場買D野, 晚上8:30返酒店。

我今日的戰績 -- 1件夾棉褸 + 2件針織 + 1件衞衣 + 1條頸巾 + 2包絲襪 = 18,349円(連稅) (即係大約HKD1,300)

老公今日的戰績 -- 2對鞋 = 21,168円(連稅) (即大約HKD1,500)

今晚可以11:30瞓, 早咗架喇! 不過, 仍然係好似尋晚的情況一樣, 我同老公都瞓得好差!

Day 2 完