沖繩親子之旅2018 - Day 6

2018.01.06 (星期六)

今朝7點起身, 因為要坐早上11:25的飛機返香港。

今日天朗氣清, 同尋日相差好遠, 如果可以調一調, 尋日咁好天咪好囉! 不過, 做人都唔可以太貪心, 黎咗沖繩6日, 只有1日係落雨, 執到喇! 同埋今日好天都好架! 出機場, 推行李, 如果落雨就好麻煩!

早上7:30落去食早餐, 食完早餐, 返上房, 執埋行李, 仲要食埋哥哥支雪糕(由於食早餐已經食到好飽, 加上佢兩個都病病地, 支雪糕咬兩啖算喇! 食唔晒都冇辦法, 掉咗佢啦! Sorry呀! 哥哥!)

早上8:30 check-out, 揸車出機場, 交通都幾暢順, 9:30到達OTS還車, 由於時間尚早, 冇乜人, OTS特登開架旅遊巴載我地一家四口去機場。冇乜人排隊寄倉行李, 好快就搞掂, 拎到boarding pass。

早上10:10, 爸爸話: 快D入閘喇! 媽媽仲要去血拼呀! 我只係去幫你地買Royce朱古力薯片咋! D手信我驚買唔切, 早幾日已經買晒啦!

入咗閘, 係候機大堂搵咗個窗口位, 擺低D hand carry, 孖寶就交俾爸爸你睇住喇! (其實爸爸只係篤機) 我去買野喇! 免稅店有Royce石垣島限定朱古力薯片, 720円一盒(香港Citysuper賣緊over HKD100一盒囉!) 唔好諗, 買4盒啦! 另外想買Shiseido, 冇!

行咗去候機大堂的另一邊, 終於搵到Shiseido, 個Sales識講國語, 我同佢講想買Concealer, 要黎遮黑眼圈, 我初頭試上手, blend開後兩隻色好似冇乜分別咁, 佢之後用手指幫我試上眼(其實唔係咁衞生, 應該都唔好試)。原來支Concealer要3000円(即HKD210, 咁咪同係香港買一樣價錢囉?! 不過, 算啦! 試咗唔買, 唔係幾好意思!) 佢問我要唔要買唇膏, 我話可以睇吓(其實我真係好少搽唇膏), 佢俾咗幾隻色我試(Pink同Rose色系), 我話隻Rose色睇落都OK, 佢話幫我試上個咀唇(今次係用即棄唇彩掃, 衞生好多), 隻色都OK, 唔太誇張, 都carry到, 同埋唔貴, 2300円(即HKD160), 不過睇真D, 原來係Macquillage(之前香港個Sales同我講, Macquillage條line唔再出), 咁即係清埋D舊貨, 唔怪之得咁平啦! 原來Shiseido除咗Macquillage條line之外, 其他產品都同香港一樣價錢, 咁下次去日本可以唔駛再搵Shiseido買喇!

買完已經差不多11點, final call喇! 上咗機, 都多人, 但唔算full。老公同空姐講, 想取消2個兒童餐(凍冰冰吞拿魚包), 要返大人餐。今次個飛機餐包係肉碎木耳包(咁大個人, 第一次食咁既餡料做包, 似乎係用中菜的廚餘做der~), anyway, 由於唔食就冇得食, 惟有照食! 之後, 老公就拎佢碗麵出黎, 問空姐有冇熱水, 空姐話拎去廚房幫佢沖(備註: 聽聞飛機上面D熱水同沖廁水係同一個源頭, 老公! 希望你吉人天相啦!) 老公沾沾自喜咁享受佢個獨一無二、佢有人冇的"飛機餐", 真係羨慕死隔離!

細佬堅持唔瞓覺, 哥哥臨落機前半個鐘瞓著咗, 下午2點落機, 我同老公講, 不如一陣去到青衣, 去食個Tea先, 因為頭先食咗一個包咋, 好肚餓! 行去過關(入境處職員話孖寶好似樣, 你話佢係邊個都得啦! 我話唔同既! 係兩個樣黎!) 拎埋行李, 搭機場快線去青衣機鐵站。老公已經忘記咗我提意食Tea一事, 二話不說已經去咗停車場攞車, 揸車返屋企去IKEA, 因為去旅行之前買咗張飯枱, 佢心入面只有張飯枱, 佢只係想第一時間去IKEA拎飯枱, 老婆話肚餓! 聽唔到喎! (加上佢頭先食晒成碗麵, 完全冇問過我食唔食, 佢自己就食到飽晒, 老婆同兩個仔就超級肚餓! 但佢冇理我地!

由於我真係好肚餓(加上佢明明應承咗我話係青衣城食Tea先, 竟然扮晒冇咗件事咁!), 佢一開車, 我就不斷咁話: 好肚餓! 我要返去樓下食Tea! 都係唔得! 頂唔順! 等唔切! 我要去IKEA買D小食先! (我係車上不停咁用說話去轟炸佢! 咁抵死丫嗱! 情願急急腳去IKEA攞枱都唔同我去食野先!)

下午3:20去到IKEA, 我真係餓到手震, 孖寶都話好肚餓, 泊低架車, 我即刻衝入去IKEA買咗兜肉丸同雞肉卷, 孖寶好like個肉丸, 唔夠食, 我要再入去買多兜肉丸同脆皮腸, 某人唔肚餓, 唔駛俾佢食, 我地三母子食晒佢, 唔好俾佢食! (某人仲要寸我, 你去後面餵佢地啦! 快D食啦! 得30分鐘免費泊車咋!)

下午4:30, 終於返到屋企樓下停車場, 叫姐姐落黎幫手拎行李, 今晚終於唔駛周圍搵飯食, 可以食住家飯, 飲住家湯, GOOD!

 我的戰利品
(係補償返我上次去名古屋連一粒糖都買唔到俾自己的慘痛經歷)

 有史以來最多戰利品的一次
(大部份都係老公D藥, 孖寶的用品, 送俾人的手信)

哥哥個姿勢同隻ET好麻吉!

Day 6 完

沖繩親子之旅2018 - Day 5

2018.01.05 (星期五)

本來校咗鬧鐘今朝8:30起身, 但未夠8點, 一家四口已經起晒身, 因為細佬尋晚不停咳, 哥哥仍然係鼻塞。

今日果然係落雨, 日本氣象廳好準!

落到煙雨凄迷咁, 邊度都唔駛去!

早上8:45落去食早餐, 今日的麵包同熱食有少少唔同(有腸仔同焗薯角), 不過, 媽媽仍然係最like日本豆腐, hoho... 加上擔心又冇得食午餐, 媽媽繼續狂隊包!

食完早餐, 返上房, hea吓hea吓, D雨時大時細, 決定去AEON MALL行街 (希望搵到手推車俾孖寶啦!)

早上11:00去到AEON MALL, 唔算多人(今日唔係日本假期), 但仍然係搵唔到手推車, 爸媽不停左撲右撲, 氣來氣喘, 終於俾爸爸搵到一架手推車, 兩兄弟輪流坐, 爸爸叫媽媽去睇野, 佢睇住孖寶, 咁......我唔客氣喇! 我去幫孖寶睇長袖底衫呀!

爸爸好辛苦先至搵到一架手推車, 

細佬要同哥哥輪流坐, 佢唔係太開心!

原來沖繩小朋友係唔著長袖底衫架! 就算冬天都只有短袖底衫賣, 我放棄喇! 見到有底褲仔, 得返2包100碼, 買啦! (佢兩個都係小團團!)

然後, 就係睇絲襪, 上次搵唔到Gunze的絲襪, 原來AEON都冇, 只係得佢自家品牌的絲襪, 仲要係中國製, 我放棄喇!

難得老公睇住孖寶, 緊係爭取時間睇自己衫啦! 好多, 好平, 好日本呀! (雖然都係中國製)。同老公溝通錯誤, 以為佢帶孖寶去咗機舖, 原來佢去咗Aeon Style入面間機舖, 搞到我行咗好多冤枉路, 經過Sanrio, 買咗個福袋(係5對男孩子襪), 又經過間舖頭叫Forest Heart, 之前係Naha Main Place行過, 好鍾意佢有件荷花袖針織, 原價2,900円, 而家1,900, 不過冇晒白色, 得返灰色, OK啦! 總之唔係黑色就得啦! 再睇吓D格仔裙(周街D日本妹都著), 好抵呀! 減價 -- 1,500円咋! (即係大約HKD100一條, 香港買件打底都99蚊啦!) 由於唔想老公等咁耐, 所以冇試到, 揀咗條灰格前短後長枱布裙。

終於同老公會合, 哥哥爆喊, 原來佢同細佬對打咗3舖Mario賽車都輸, 發緊癲! 媽媽惟有安慰佢: 我見到哥哥輸咗, 好唔開心喎! 媽媽仲差過你, 媽媽直頭唔識玩, 不如你教我玩啦! 媽媽俾個錢你, 你幫我入落部機度, 我負責踩油, 你幫我控制個軚盤丫! ...... 贏咗喇! 哥哥你贏咗呀! 好犀利呀! ...... 但我仲係有D唔開心! (x N次)

媽媽帶哥哥去反斗城同爸爸細佬會合, 但哥哥仍然係好唔開心, 斷斷續續咁喊 (媽媽EQ有限, 開始頂唔順), 媽媽帶孖寶去廁所, 哥哥仍然係沿途不斷話自己好唔開心, 我好唔開心! (N次), 媽媽終於忍唔住話佢: 哥哥! 媽媽知你唔開心! 想氹返你! 所以同你玩多一舖, 等你贏返! 但你仲係咁唔開心! 我真係唔知可以點做! 不如你話俾我聽, 媽媽仲可以做D乜? 玩遊戲緊係有輸有贏架啦! 唔通要全世界輸晒, 得你一個贏呀? 你咁唔輸得, 咁你唔好玩!

爸爸係玩具斗城又買咗一堆Tomica車仔, 中午12:30, 爸爸話唔想再行AEON MALL, 佢發覺呢度一D都唔好行, 太大, 行到腳軟, 佢鍾意行Naha Main Place或者Convention City細D的商場。D雨好似細咗, 我地決定去美國村食午餐同埋玩摩天輪。

下午1:15到達美國村, 去爸媽當年食過的"咩咩咩太郎"食飯(成間餐廳都係食吉列炸野), 我叫咗個吉列海鮮, 老公叫咗個吉列蝦+吉列酸菜卷, 孖寶見到有炸蝦食, 好興奮!

 兩個好認真地磨碎D芝麻

食飽飽, 揸車去摩天輪對面個停車場, 泊低架車, 行過去搭摩天輪, 停咗雨, 唔駛擔遮, GOOD! 摩天輪一圈15分鐘, 玩完摩天輪, 孖寶嚷著要玩入錢的兒童遊戲機, 玩咗一陣! 走喇!

落到地面, 見到有間"激安"(其實上次都行過), 老公話睇吓有冇葛根湯(老公成個旅程不停咁搵唔同款式的葛根湯, 佢係日本Amazon買但趕唔切運黎沖繩酒店果樣野, 原來都係葛根湯, 葛根湯對老公黎講 = 救命湯!!!) 由於買滿5,000円可以免稅, 所以我同老公不停搵吓仲有咩買, 終於俾我搵到Gunze絲襪(880円一對, 但計返要HKD60一對, 我係香港買都係120蚊2對, 車! 唔抵買喎, 差D中伏!), 老公見到有乳酸菌, 日本Amazon賣緊over 2,000円, 呢度1,800円, 老公話好平呀! 買! (但屋企有3樽未開), 我見到有平時用開隻Mask (570円, 即HKD40咋喎, 萬寧特價都要HKD69.9一盒喎) 買咗2盒! 排隊俾錢, 見到兒童DHA, 黎咗咁多次日本, 係西松屋搵咗好耐都搵唔到, 今次終於俾我見到喇! 1,278円一包 (唔知貴定平), 是但啦! 買2包!

排咗好耐隊, 因為前面堆大劣女人買咗5萬円野, 又同個收銀員嘰嘰呱呱咗好耐, 又要分袋, 我諗我等咗20分鐘, 終於輪到我, 免稅要出示passport同埋未離開日本都唔可以拆開個包裝袋, 吓? 我買咗盒飛滋貼諗住即刻用, 咁點呀? 咁買lotion唔可以hand carry, 要入喼, 都唔可以拆袋呀? 點pack入個喼呀?!

老公都等咗我好耐, 佢帶住兩個仔去攞返架車, 仲揸咗架車去門口等我!

停晒雨喇! 但已經冇咩地方好去, 不如返去酒店附近行街, 有Shoe Plaza, Mac-House, Uniqlo, Aeon Big。孖寶瞓咗, 我叫老公落車睇吓, 佢去Shoe Plaza, 見到有對防水Timberland, 好想買, 但佢冇買到! 又見到Jelly Beans, 好平, 但係過氣款式。佢睇咗一陣返上車, 佢話啱我睇多D, 叫我去睇, um...... 咁...... 我唔客氣喇! 我衝咗入去間好似賣童裝的舖頭 (原來有女裝賣), 俾我見到有Gunze絲襪呀! 搵咗5日, 終於搵到喇! 好滾動呀! 不過, 睇真D, 原來有D係中國製! 差D中伏, 最後, 買咗2對日本製Tuche 80針(佢聲稱密度等同110針), 580円咋(即HKD44左右, 我係香港買過Tuche條line, 要100蚊1對呀!) 另外, 買咗兩條內刷毛褲俾孖寶(YEAH! 又係搵咗好耐, 搵過西松屋同Mac-House, 都搵唔到, 買黎俾孖寶3月去東京著架!), 不過, 得返1條100碼, 好在後尾又俾我搵多1條110碼, 是但啦! 橫掂細佬高哥哥少少, 細佬著110摺腳都OK!

由於今個旅程我買野實在買得太過份(因為要補償返上次名古屋連一粒糖都買唔到俾自己), 所以買完野, 都唔敢再行其他舖頭, 加上老公全日不停咁話: 留低咗罐Coffee係酒店, 好眼瞓! 好攰! 要返去拎! 所以, 我都唔敢再行喇!

返到酒店, 老公上房拎Coffee, 我同孖寶留係車度等佢, 孖寶呢個時候醒咗, 時間啱啱好!

老公飲完Coffee, 揸車去Convention City隔離個Sports Centre玩揸火車, 原來好難揸, 又唔知佢D日文講乜, 玩咗一舖, 放棄! 見到有Star Wars玩, 好似好好玩喎! 不過, 原來好暈, 爸爸同孖寶各自玩咗一舖, 爸爸不行了! 好欣賞日本的遊戲機中心, 全部都係100円1舖, 唔似香港的冒險樂園咁, 搶錢!!!

晚上6點幾, 媽媽唔想再食和風亭, 提意買D野返酒店房食(因為房間有微波爐可以叮返熱D野食), 最後買咗pizza, 壽司, 照燒雞扒, 老公堅持買多1個急凍沖繩碗麵(根本冇可能食得晒!)

晚上7點返酒店 (第一次咁早返酒店, 可以好好咁"享受"間酒店房, hoho!) 孖寶好like腐皮壽司同pizza, 個照燒雞叮返熱都幾好味, 大家都食到好飽, 食埋生果, 已經食唔落哥哥支雪糕(惟有聽日食完早餐返上黎食), 至於老公碗麵, 我叫佢聽朝唔好落去食早餐, 留係房食麵啦! 或者聽日拎上飛機, 問吓空姐可唔可以俾D滾水你沖麵食! (老公話: 好喎! 一於咁話啦! 佢得個包做飛機餐, 我唔夠飽, 自備杯麵! 我話: 我驚到時其他乘客不停問空姐, 點解你有麵食, 佢地冇囉!)

由於今次實在買得太瘋狂, 今次執喼好難執! 唔只係我買得多野, 老公都買咗2對鞋, 個鞋盒鬼死咁大, 又無啦啦係Daiso買咗2個膠盒, 香港12蚊店都有, 呢度買100円 = HKD7, 2個膠盒合共只係平咗10蚊, 但就好大個, 塞咗落喼, 搞到擺唔到其他野, 我真係好想掉咗佢, 返香港再買過, 老公惟有死死地氣話: 咁等我hand carry囉, 掉埋2個鞋盒喇!  (我之前去旅行, 係可以執到兩個喼去, 一個喼返der!) 今次堅係爆喼, 個細喼差D拉唔到拉鍊!

尋日係Mac-House買的兩件衞衣, 

同埋今日買的兩條內刷毛暖暖褲

今晚終於可以早少少瞓, 同埋, 係瞓得最好的一晚!

Day 5 完

沖繩親子之旅2018 - Day 4

2018.01.04 (星期四)

今朝都係8點左右起身, 日本氣象廳話今日多雲, 打開窗簾睇吓, 果然係天陰陰, 但最高溫度都有21度。

早上9點, 落去食早餐, 小童免費。自助式早餐, 選擇都算多,有沙律吧, 生果, 炒蛋, 腸仔, 豆腐(媽媽最like日本豆腐, 好有豆味, 又滑, 質感似燉蛋), 麵包同飲品的種類都算多, 不過, 比起之前果間酒店(有凍蝦&三文魚), 呢間就比下去! 老公話over HKD2000一晚, 唔值! (好在係佢book, 唔係又俾佢怨死我!)

由於聽日肯定會落雨, 原定聽日去嘉手納道之駅的展望台睇戰機, 改為今朝早去, 至於海鹽製作同殘波岬燈塔, 放棄! 早上10:30出發, 車程約30分鐘。

早上約11點, 到達道之駅, 個停車場好好好多車呀! 仲有架旅遊巴, 大鑊! (明明今日已經唔係日本的新年假期), 乜原來睇戰機都係跟團的節目之一? 泊車期間, 聽到D戰機超大聲咁係頭頂飛過, 好震撼呀! 希望哥哥唔好驚啦! (佢好驚大聲) 行樓梯上天台, 好好好多(大劣)人呀! 好在, 我地一家四口都搵到個位企吓, 老公帶埋望遠鏡睇戰機, 不過, 頭先好震撼的戰機起飛已經冇晒, 只係得返D運輸機&直升機, 睇咗15分鐘, 仍然係冇戰機, 算吧啦! 走喇! 今日行程好緊密, 仲要去萬座毛, Dino Park, 海之美水族館。

原來係嘉手納揸車去萬座毛要1個鐘, 老公好眼瞓, 要去汽水機買罐Coffee提神, 佢大讚日本的汽水機, 入錢落去會播音樂, 買野飲都買得開心過人!

上車後, 媽媽同孖寶講, 我地而家去睇一舊石, 你地估吓舊石似邊一種動物? 細佬估係Dinosaur, 哥哥估係大笨象!

中午12:30到達萬座毛, 媽媽醒起要上航空公司的網頁做網上check in, 搞咗一大輪, 輸入一大堆資料, 終於搞掂, mark咗前後2排窗口位。

行到出海邊, 孖寶終於見到舊石, 哥哥估啱咗, 係大笨象呀! 雖然係海邊, 但無我預期咁凍同大風, 著咗前日買的軍綠色棉褸, 有D熱, 一家人自拍, 孖寶坐係欄杆上面睇風景, 睇咗好耐! 之後行咗一個圈, 出返停車場, 走人!

下一個景點係Dino Park, 其實係御果子殿場的一個吸引遊客設施。由於已經接近下午1:30, 加上黎咗沖繩幾日都冇食過午餐（冇錯！日日下午都係車上捱麵包）, 我堅持要搵地方食午餐, 老公竟然寸我: 咁睇吓你黎旅行, 係至在食, 抑或旅行囉! 條!!! (Sorry! 我心入面真係講緊粗口), 下午1:30, 正常食飯時間, 加上肚餓, 想搵間餐廳食野, 好正常! 好合理！我唔覺得我的要求好過份！ 但竟然俾人寸我，話我黎旅行至在食！於是, 我忍唔住反駁：我唔係至在食, 我又唔係要食好野, 只係肚餓, 又到正常食飯時間, 想搵間餐廳食吓野啫! 等於你尿急都想搵個廁所去啦! 我係正常生理需要, 唔係至在食囉! (果刻我真係嬲爆, 乜我下午1:30要求食午餐好過份咩??? 你自己唔肚餓, 就覺得人地都唔應該肚餓，唔應該食野，你咩邏輯黎? 咁係唔係要絕食先至叫做去旅行呀？）

我太肚餓，已經冇力再反駁落去，我選擇唔出聲，只係希望可以快d搵到餐廳食飯，細佬嚷著要食包，我話我地搵緊餐廳架喇，你食飽咗，一陣食唔落飯，但細佬堅持要食，連個仔都要激我！

下午1:45, 終於係路邊搵到一間似樣d的餐廳, 我叫咗兩個餐, 我再一次同老公講: 我唔係至在食! 但我肚餓, 要食野, 你睇我都只係叫咗兩個餐一家四口share。

好快咁食完餐飯, 下午2:20繼續上路, 去Dino Park。下午2:45左右去到Dino Park, 個公園比我想像中"有誠意", D恐龍雖然都係好膠, 但識郁同有聲, 公園入面亦特登種D好似原始森林的蕨類植物, 好有侏羅紀feel。孖寶唔驚, 玩得好開心, 只係細佬俾條恐龍尾kick親, 仆低咗! 行咗大約30分鐘, 出咗公園, 又係賣手信的舖頭, 媽媽又買咗少少。

 細佬就係俾呢條恐龍條尾kick親

下午3:30離開, 去海之美水族館, 大約4點到達, 泊好架車係多層停車場(仲以為接近收館時間會少人D, 都係咁多車(可能因為下午4點後入場有折扣)。孖寶記得之前玩過繩網, 二話不說已經爬咗上去, 媽媽係地面追住佢, 差D都追唔切 (爸爸不停篤手機, 黑面, 好似生意失敗咁, 佢話佢之前係日本Amazon買咗D野, 有阻帶, 要1月6日先至送到酒店, 吓? 1月6日我地飛返香港喇喎!) 原來個繩網陣好大好大, 蔓延成個山頭, 孖寶爬吓爬吓, 已經去咗另一邊。

下午4:40, 入去參觀水族館喇! 成人每位1,290円, 6歲以下小童免費, 孖寶今次終於都有"意識"睇魚喇! (上次黎係2歲10個月), 一入館就係一個水池, 可以俾人伸手入水裏面摸吓D海星同海參, 孖寶好開心! 然後就係去魚缸睇魚, 哥哥不停拉住我隻手, 快D行啦! 我要睇鯨鯊! 反而細佬好有耐性, 每個魚缸都睇吓!

行到去大魚缸喇! 鯨鯊呀! 終於見到喇! 接近下午5點, 係餵魚表演時間, 所以超多人, 我地搵咗個有利位置企, 睇餵魚, 成條鯨鯊差不多垂直係水度, 食水面D魚餌, 好壯觀呀!  睇完餵魚, 排隊搭lift上魚缸頂 (好多人, 但條隊都郁得快!) 睇完魚缸頂, 搭lift落返黎, 已經係收館時間, 黃昏好靚, 影咗幾張相, 走喇!

黃昏6:30離開, 回程要1.5小時, 去返Convention City搵餐廳食晚飯, 原來又係有和風亭, 仲有中華拉麵同Joyfull, 由於唔想食中國野同西餐, 冇得揀, 又係食返和風亭, 又係日式座位, 我同老公又係叫返Day1夜晚食的套餐, 另外叫咗兩碗細烏冬俾孖寶。

食完飯, 去藥房買咗支Vicks VapoRub俾哥哥 (買唔到小童噴鼻通鼻水, 原來日本小朋友鼻塞唔會噴鼻, 只係搽薄荷膏, 算啦! 希望都幫到少少哥哥, 等佢冇咁鼻塞!) 返酒店, 孖寶又浸"溫泉", 仲一邊浸, 一邊食蕉, 好C服啊! 跟住輪到媽媽入去浸, 爸爸換過D熱水, 今次真係有浸溫泉feel, 好正!

仲有尋晚係Blue Seal整的雪糕未食, 不過, 由於太夜, 食得太飽好唔健康, 食住一支先啦! 拎咗細佬支雪條食!

晚上11點, 快D瞓喇! 晚晚都搞到咁夜! (不過, 由於媽媽安排的所有行程已經去晒, 加上聽日落雨, 都唔知可以去邊, 所以聽朝唔駛早起身, 今晚夜少少瞓都冇所謂!)

Day 4 完

沖繩親子之旅2018 - Day 3

2018.01.03 (星期三)

早上8點起身, 今日氣溫最高20度, 仍然係陽光普照, YEAH!

今日即著尋日買的毛毛袖衞衣, 好Kawaii啊!

早上8:45落去食早餐, 今朝明顯冇尋日咁多人, 可能因為今日係日本新年假期的最後一日。今朝可以輕鬆揀食物(唔駛同人迫), 仍然係食廚師即場煎的和牛夾包, 仲有煙三文魚, 凍蝦 (尋日俾人夾晒)。

食完早餐, 返上房執埋行李, check out, 今晚開始住靚靚酒店!

早上10:30出發, 由於日本氣象廳話星期五會落雨, 本來安排咗星期五去中城公園跳彈床, 改為今朝去咗先! 車程約20分鐘。

早上10:50到達中城公園, 周圍都荒蕪一片, 冇揸車都唔知點黎! 好多小朋友(因為今日仍然係日本的新年假期), 有2個彈床, 一個for 2-6歲, 另一個for 6歲以上, 我驚孖寶俾人撞(細佬有2次跳彈床俾人撞飛的童年陰影), 所以叫佢地玩2-6歲個彈床, 孖寶上去跳咗幾吓, 都唔好玩既! 唔刺激! 吓? 你想點刺激呀? 咁你過去隔離俾人撞到飛起, 夠唔夠刺激呀? 爸爸都支持孖寶過隔離玩......

隔離個彈床大好多, 而且有2個塔, 俾小朋友爬落去玩彈床下面的繩網, 孖寶玩得好開心, 尤其哥哥, 好快就走咗去, 搵唔到佢! 至於細佬, 本來好好地, 玩玩吓, 突然爆喊! 我唔想除鞋, 點解要除鞋, 好麻煩! 我以為佢驚除鞋玩整污糟對襪, 仲安慰佢, 唔緊要啦! 冇著鞋都可以照行過去, 對襪整污糟咗都唔緊要架! 反正對襪著完都掉架喇! 但細佬越喊越大聲, 仲鬧埋我, 我其實係唔想黎沖繩, 點解媽媽你要帶我黎沖繩, 媽媽你好衰! 呢一刻, 我真係忍唔住要爆! 明明玩得好地地, 好開心, 無啦啦變臉爆喊, 你係唔係精神分裂呀? 呢個時候, 爸爸都黎到, 佢好有耐性咁安慰細佬, 咁我行開一陣, 我要冷靜一下!

由於細佬唔想玩彈床, 搞到哥哥都冇得玩, 要一齊離開, 行去公園的另一邊, 玩滾軸滑梯, 哥哥照舊玩到好開心, 細佬就木無表情咁玩 (其實, 我諗返起, 細佬好似我細個的時候, 我又係試過唔只一次, 係公園同成班表兄弟姊妹玩玩吓, 唔知點解無啦啦爆喊, 搞到大家都冇晒癮! 老公話細佬驚多人的地方, 頭先咁多小朋友, 細佬一開始已經唔係好想去玩! (可能係咁啦!)

中午12:15離開中城公園, 由於已接近食飯時間, 媽媽提意去AEON MALL行一陣街 (其實最重要係食午餐, 同埋搵手推車俾孖寶坐)。到咗AEON MALL, 好好好很多人呀! (孖寶的手推車凍過水!) 細佬不停話要坐手推車, 仲一邊行, 一邊數住見到有幾多個小朋友有手推車坐, 爸媽不停搵, 行到氣來氣喘, 都係冇既...... 想食飯? 唔駛諗, 多人到咁, 媽媽放棄喇! 返上車食包, 或者睇吓下一個景點 -- 兒童王國入面有冇野食啦!

AEON MALL過幾個街口就係兒童王國喇! 媽媽同孖寶係車上狂隊包, 爸爸冇出聲, 即係唔肚餓啦! 可以Ignore佢!  第三次黎沖繩, 終於去到兒童王國(第一次因為冇時間, 放棄咗! 第二次因為落雨, 去到門口都入唔到!)

入咗去, 孖寶見到有架真的直升機, 上去玩咗好耐(媽媽仍然好肚餓, 好想去搵野食!) 玩咗10分鐘, 落返黎, 爸爸同孖寶去廁所, 媽媽見到有小食亭, 有小丸子賣, 提意不如買黎食, 爸爸話好, 仲話買多條珍寶腸。哥哥好鍾意食小丸子(估佢唔到), 我見佢三父子搶食一條珍寶腸, 提意買多條, 但爸爸話唔駛啦! (咁你三父子食晒, 我食咗一啖咋喎!)

食咗少少野, 體力+精神+心情都好返好多, 可以正式入去參觀喇! 動物園的部份係山坡上面, 同香港的動植物公園差不多, 加上孖寶唔like動物(雖然屋企有養狗), 好快就睇完, 行返落山, 見到有得騎大象(媽媽以為只有泰國同大陸先至有D咁野!) 哥哥話好想騎, 細佬話可以一試, 因為見佢有坐位, 有圍欄, 安全D! (佢之前驚騎馬, 佢話驚跌落黎!)

媽媽同孖寶一齊騎大象(一圈盛惠2,000円), 爸爸負責影相, 今次, 輪到媽媽最驚, 因為坐上去真係幾高(over 2米), 萬一隻大象發爛, 跌落黎, 都唔知抱/救邊個先?

騎完大象, 一家四口坐小火車, 然後去玩電動車(100円2分鐘, 孖寶玩咗4次, 爸媽都可以坐隔離/後面一齊玩)。下午4:30, 離開兒童王國。

爸爸話想去附近的汽車零件舖睇野, 媽媽見隔離有間Mac-House, 就去睇衫, 買咗2件白色長袖保暖底衫 + 2件厚棉衞衣俾孖寶, 我自己買咗件內刷毛厚打底。下午5點, 要走喇! Book咗今晚6點去Blue Seal"整"雪糕。

出返大路, 大鑊! 大塞車! (因為仲係假期), 本來25分鐘車程, 行咗50分鐘, 下午5:50, 終於都到咗Blue Seal Ice Park, 但孖寶瞓到如火如荼, 爸媽又要冒著生命危險叫醒佢地, 唉! 搞咗一大輪, 又氹又鬧, 終於落咗車, 入去Counter報到同俾錢(每位小朋友盛惠1,000円)。

我地張枱係Chocolate, 最近門口, 首先, 要係紙上畫低要設計的雪糕式樣(即係媽媽畫啦!), 揀雪糕味, 醬汁的顏色, 裝飾(可揀5款), 然後, 每張枱輪流出去拎材料, 我地張枱係最後 (但同枱的香港人擅自出去拎材料, 影衰晒我地D香港人)。拎完材料, 返埋張枱, 有5分鐘時間裝飾(枱上有計時器), 過程都幾好玩, 不過, 孖寶太細, 大部份都係爸爸媽媽做(用醬汁做膠水, 痴D裝飾上去)。5分鐘喇! 夠鐘喇! 職員指示用膠盒入住支雪條, 再擺落紙盒, 再擺落個冰袋入面, 上面擺一包乾冰, 等1個鐘, 就可以食得喇!)

之後, 就係零下20度雪櫃體驗, 孖寶話唔凍呀! 冇野呀! hoho...

最後, 仲可以每人自己唧一杯雪糕食(爸媽都有得食), 孖寶食到lam lam脷, 細佬食咗一半話飽, 食唔落(第一次聽佢講食雪糕會飽), 不過, 一陣要去食晚飯, 都係唔好食咁多喇!

晚上7點離開Blue Seal, 揸車去追風丸食拉麵。又係有得坐地下(日式座位), 孖寶好興奮, 叫咗3碗麵(都等咗幾耐, 可能要用心製作!), 碗麵賣相唔錯, 個湯底好濃(老公話似餸汁多D), 重點係, 媽媽上網搵呢間拉麵, 佢係北海道拉麵, 唔係沖繩拉麵(沖繩拉麵好難食, D麵似我地中國人的油麵, 加幾塊五花腩, 個湯底只係鹽+水!) 由於冇食午餐, 媽媽好很肚餓, 食得太快, 咬親個咀。

食完麵, 去酒店隔離的Convention City個超市, 買生果, 飲品, 返酒店!

酒店門口有兩個職員, 負責幫我地開車門, 拎行李, 帶我地去Front Desk (over HKD2000一晚, 當然要有呢D service啦!), 老公去泊車。

職員幫我地推埋D行李上房, 我地間房係9樓(因為老公request high floor), 經過長長的露天走廊, 我覺得似香港以前D徒置區七層大廈, 走廊盡頭, 就係我地間房喇! 職員幫我地開門入去, 搬埋行李入房, 略略介紹一下房間的設備, 有微波爐, Front Desk有電飯煲, 食具等等借出。

間房都幾大, 但比我想像中/網上睇舊, 爸爸話個浴缸可以俾孖寶玩水(去旅行之前已經同孖寶講咗, 仲帶定水槍黎玩), 孖寶有得浸"溫泉", 好開心! 浸到唔捨得出返黎!

媽媽沖完涼都浸吓, D水都唔熱! 同溫泉係兩回事黎, 放棄!

由於食完生果已經好飽, 食唔落係Blue Seal整的雪榚, 惟有擺係雪櫃冰格, 留返聽晚食! 下午係Mac-House買D衫, 漏咗係車上, 冇得影戰利品。

今晚張床大少少, 可以瞓得鬆動少少, 不過, 哥哥仍然鼻塞(爸爸仲發現倒瀉咗支通鼻水, OMG!) 細佬就仍然係成晚踢開張被, 不過, 媽媽今晚算做瞓得好咗! 爸爸病病地, 要飲葛根湯。

Day 3 完