孖寶兄弟語錄(10)

話說尋晚食飯的時候, 哥哥俾啖菜哽到, 狂咳, 仲好似嘔唔返D菜出黎, 就黎窒息咁樣, 爸爸媽媽大為緊張, 爸爸狂拍哥哥個背脊...

細佬: 嘩! 好驚呀! 嚇死我!
媽媽: 係啦! 嚇死人, 好在哥哥冇事!
細佬: 嚇到我差D喊! (雙眼通紅, 眼有淚光)
媽媽: (走埋去攬實細佬) 細佬! 你好錫哥哥啊!
細佬: 係呀! 我好錫哥哥架! 我比起你兩個更加錫哥哥!
哥哥: 我都係最錫細佬! 媽媽, 你聽我解釋先... (心諗佢又講返上次表哥拎咗細佬個氣球, 佢走去幫拖單野!)
哥哥: 上次, 希希表哥黎我地屋企... (下刪100字廢話)
細佬: 佢下次再搶我個氣球, 我地用針吉佢
哥哥: 我地用鉗鉗住佢隻腳, 鉗爆佢, 等佢流血
媽媽: 喂! 夠喇! 我地唔可以傷害人!

哥哥&細佬繼續滔滔不絶咁商量復仇大計

不過, 見到佢兩兄弟咁錫對方, 爸爸媽媽都老懷安慰!

其實諗返轉頭, 生咗一對孖仔唔單止係對父母的雙倍祝福, 其實對佢兩個, 都係一個好大的祝福, 因為能夠有一個人, 同你一齊係媽媽個肚長大, 一齊出世, 一齊學轉身, 一齊學坐, 一齊學企, 一齊學行, 一齊返K1, 一齊喊, 一齊笑, 一齊病, 一齊經歷人生每一個階段, 實在係好美好美的安排!

感謝神!

快樂的童年

讓孖寶有一個快樂的童年, 係我同老公的共識!

老公的父母係佢好細個的時候已經離婚, 佢阿媽自動放棄兩個仔女的撫養權, 老公係單親家庭長大(佢爸爸好快就再婚), 但老公的童年都算快樂!(佢聲稱)

至於我的童年, 有父母, 有一個細佬一齊長大, 但我的年童, 講唔上快樂:

1.  阿媽成日毒打我, 只要佢一覺得我唔乖或者唔順佢意, 就會用籐條或者雞毛掃打我, 簡直就係搵我黎發洩, 搞到我成身都係火車痕, 連佢D麻雀腳上到黎開枱, 見到我俾佢打成咁, 都"鄧"我可憐, 拎埋藥膏俾我搽! 所以由細到大都好曾阿媽, 最曾人話我似佢, 我好肯定唔係佢親生!

2.  小學的時候, 我年年考第一, 老豆冇讚過我一句, 佢同我講, 讀書讀得好係你應份, 讀到書將來搵份好工係你自己架! 阿媽有朋友叫佢帶我去買份禮物, 奬勵吓我, 結果阿媽呃我話原來間野冇禮物賣o既

3.  細個好想好想學彈琴同做女童軍, 但老豆呃我話屋企冇錢, 彈琴係有錢人玩意(我長大後發現原來佢有1000萬HSBC股票同兩層樓, 冇錢?) 至於女童軍, 佢話女仔做女童軍會變成男人婆, 唔夠斯文, 唔准我做, 咁你又鼓勵細佬去做童軍? 大細超! 重男輕女!

4.  細個好想一家人一齊食飯, 但現實就係好似父母雙亡咁, 每日只有阿嫲同我同細佬食飯! 老豆朝早10點出去油麻地士多開舖, 夜晚12點先至返, 阿媽聲稱要幫手一齊睇檔(實情係去咗朋友度打麻雀), 屋企只係剩低個行動不便的老人家同兩個細路, 我同細佬冇學壞, 仲要Master畢業, 簡直係我父母幾生修到!

5.  星期日一家四口共享天倫之樂, 我從來未感受過, 阿媽每逢星期日就唔見咗人, 最記得佢話咩"地moon"日, 即係佢要放假(實情係返外家睇人打麻雀), 我老豆就好似單親咁, 一個人帶住我同細佬去尖東玩踫踫車, 然後睇住佢一個人食晒成份大家樂鐵板燒(註: 我同細佬只可選擇焗豬扒飯share)

6.  為咗做阿爸阿媽心目中的乖乖女, 不停咁強迫自己讀書(但我跟本唔鐘意讀書)。屋企好少玩具, 行過玩具舖, 為咗俾阿媽讚我, 會掩住良心話唔想買玩具, 因為爸爸搵錢好辛苦

我的童年, 冇開心過...

未試過父母擁我入懷的溫暖及安全感...

未試過被父母肯定、讚賞、認同的成功感...

未試過收到父母送贈玩具/禮物的興奮...

未試過童年願望得到實現的滿足感...

由於我的童年係死讀書中度過, 唔准有興趣, 唔准有課外活動, 唔准有夢想, 所以我唔想孖寶經歷我的傷痛, 所以我話俾自己聽, 一定要俾孖寶一個快樂的童年!

1) 佢地鍾意的玩具, 我通常都忍不住買俾佢地, 只係為咗見到佢地收到禮物果刻開心的笑容

2) 我同老公經常都抱/攬/錫孖寶, 同佢地有好多身體接觸, 只係想佢地能夠感受到父母的愛

3) 放工返屋企, 星期六, 日及公眾假期, 我同老公一定會陪孖寶, 從來唔會係自己放假的時候, 仲要假手於人或者叫工人帶佢地去會所玩, 只係因為珍惜每分每秒的親子時光, 讓孖寶知道爸媽係陪住佢地一齊成長

4) 盡量讚賞佢地, 只希望佢地知道爸媽認同/肯定佢地, 從小建立自信心

5) 鼓勵佢地嘗試不同的活動/興趣班 (但絶不強迫佢地)

分房瞓 VS 同房瞓

好多育兒書都話小朋友最好盡快同父母分房瞓, 越細個開始越好, 至於有咩好處? 好似話係訓練小朋友獨立, 同埋分房瞓對爸爸媽媽方便D喎(要XX果陣)... hoho

不過, 講真, 香港地有邊個間屋可以咁大, 俾小朋友自己一個一間房呀? 加上初生真係要24小時全天候照顧, 我都認為由初生至一歲, 父母同BB一間房瞓會方便D!

初生至一歲

由於孖寶實在太細粒, 太脆弱, 加上爸爸媽媽太緊張, 所以孖寶由初生至一歲, 都係同爸爸媽媽一間房瞓, 佢地每人瞓返自己張床仔, 半夜餵夜奶, 換片, 掃風, 暗瞓覺, 全部都係爸爸媽媽搞掂! 雖然後來我地請多咗一個工人, 即屋企有兩個工人, 但我地實在對果兩個工人太好喇, 佢兩個做工人竟然可以一覺瞓天光, 我同老公就晚晚冇覺好瞓, 第二朝仲要返工, 真係覺得當時我兩公婆好"ON"居, 點解唔係工人負責同兩個B瞓, 半夜起身照顧BB???

一歲至兩歲
雖然孖寶6個月左右戒咗夜奶, 但其實我同老公半夜仍然係要不停起身, 包括半夜爆喊要安撫, 抱抱, 執奶咀, 塞紗巾, 我試過同老公一人睇一個, 總之邊個B喊, 就邊個起身, 只係希望唔駛一齊起身, 隔離果個可以繼續瞓 (註: 我兩公婆 + 孖寶 + 兩隻狗 = 6隻野, 要迫埋同一間房, 但兩個工人就可以share一間房, 究竟而家邊個先至係工人?) 長此落去, 我同老公都會精神衰歇, 加上孖寶開始長大, 爸爸媽媽冇初生時咁緊張 (媽媽試過半夜起身睇吓佢地仲有冇呼吸, 又因為佢地一歲前都有濕疹, 媽媽試過半夜每隔兩個鐘起身幫佢地搽cream, 冬天驚佢地凍, 夏天開冷氣都係驚佢地凍, 所以成晚起身幫佢地蓋被)。為咗要善用屋企有兩個工人的優勢, 於是決定每星期輪流將一張BB床推去中房, 叫兩個工人每星期輪流同一個B瞓, 於是, 爸爸媽媽每晚只係要照顧一個B, 其中一個工人就照顧另一個B, 雖然爸媽仍然係每晚都冇瞓好覺, 但叫做辛苦1個, 已經冇辛苦x2咁攞命!

兩歲至四歲
由於搬咗屋, 間屋只有兩間房, 爸爸媽媽一間房, 工人(得返一個)就同孖寶一間房, 不過, 半夜爆喊, 孖寶病咗要照顧, 爸爸媽媽仍然係會第一時間衝過隔離房抱抱, 安撫, etc. 而每次過到去孖寶房, 我家上一個工人姐姐都係瞓到死豬咁, 究竟真係好瞓到聽唔到有人喊? 抑或諗住我地實會衝過黎所以都懶得起身呢? 不過, 有時就算工人起身抱, 都係唔掂, 因為孖寶指定要我抱(爸爸成日鬧爆佢地, 所以孖寶都唔鍾意爸爸抱)

>四歲三個月
由於孖寶自從三歲八個月左右開始, 已經冇再半夜無啦啦起身爆喊(唔舒服鼻塞, 無啦啦半夜嘔, etc. 除外), 工人姐姐亦都話孖寶大部份時間都可以一覺瞓天光, 係有時會發開口夢(咁好笑? 我都想聽吓), 或者要飲水(半夜飲水?! OMG!)。另一方面, 由於換咗兩張單人床俾孖寶, 佢地間房已經擺唔落工人張碌架床, 於是就順理成章, 將工人姐姐送咗過隔離雜物房 (當初裝修時已經整咗張上格床俾工人, 下面擺雜物), 孖寶就由上星期日(3月26日)開始, 兩個人自己瞓一間房。其實之前, 爸爸都有問過佢兩個, 冇姐姐陪, 得你兩個, OK嗎? 得唔得? 半夜醒咗會唔會喊架? 識唔識得自己瞓返? (絶口不提個"驚"字) 佢兩個一知道姐姐瞓隔離, 佢兩個可以獨佔間房, 都話好呀! 唔想同姐姐瞓!

於是, 好順利, 爸爸媽媽就同孖寶分房瞓 (其實兩歲已經開始咗), 同埋佢兩個可以獨立係同一間房瞓, 唔駛人陪, YEAH!

記錄一吓孖寶由初生至現在的床仔:

孖寶出院返屋企, 由於佢地太細粒, 加上初生B郁動幅度有限, 基本上可以兩個B瞓一張BB床, 用一張被... 孖寶大咗D, 個身好似長咗少少, 一張床打橫瞓兩個B好似有D迫, 於是孖寶一人瞓一張BB床仔...

真係好細粒, 又黑, 好似兩舊炭咁

媽媽間中會抱哥哥過去探細佬, wakaka......

孖寶22個月, 雖然孖寶係俾同年紀的小朋友細粒, 但BB床對於22個月大的孖寶黎講, 已經有D窄, 於是爸爸媽媽買咗兩張IKEA兒童床俾佢地, 但因為間房太細, 爸爸要剧短兩張兒童床, 先至放得入...

孖寶4歲3個月, 雖然孖寶的身高增長得好慢, 張床基本上仲啱瞓, 但剧短咗的兒童床, 擺唔到新買的單人被, 於是爸爸媽媽又去IKEA買咗兩張單人床, 今次係成人size, 應該可以瞓到讀中學喇掛...

K.2觀課日

孖寶學校安排咗爸媽係上星期五(3月24日)到學校觀課。

由於今年孖寶同班, 所以媽媽其實可以一個睇晒兩個, 加上學校容許家長選揀兩節時段(即「小組教學」、「自選活動」同「體能活動」三個時段, 三選二), 所以基本上媽媽可以由睇頭睇到尾, 不過, 爸爸聲稱佢都想去睇, 於是爸爸都請咗假。

「小組教學」的觀課時間係早上9:20-10:10, 由於爸爸想整吓屋企野, 所以媽媽去觀課先。

有四位家長(包括我)觀課, 小朋友見到叔叔同姨姨企咗係課室門口, 老師就叫全體同學起立, 同叔叔姨姨講早晨, 然後我被安排坐埋一邊, 睇佢地做堂課。原來全班28個小朋友會分成兩組 -- A組同B組。「小組教學」先由A組小朋友聽老師就今個月的主題 -- 我想養小狗的教學, 當日係教小朋友認識寵物同野生動物的分別。至於B組的小朋友(即哥哥同細佬), 就會由另外兩位老師睇住, 自己做堂課, 包括寫字同畫畫。媽媽見孖寶寫字都幾專心, 好快就寫好(其實只係寫幾個字, 留返三份二返屋企寫), 然後就好純熟咁擺返D功課落書包, 再張個書包放入書包櫃。然後老師派俾每人一本畫薄, 佢地就自動波拎D顏色筆黎畫畫。哥哥間中會同隔離位的小朋友有互動, 而細佬就全程自己搞掂, 同同組的小朋友零交流。

大概30分鐘後, 到B組的小朋友聽老師講書喇! 孖寶自動波搵位坐, 搵唔到位會識得自己走去拎凳仔, 但佢兩個又唔會特登要坐埋一齊, 結果佢兩個一人坐一邊, 一頭一尾! 老師邀請小朋友舉手答問題, 佢兩個都冇舉(媽媽都預咗係咁!) 哥哥全程好似遊緊雲咁, 至於細佬, 佢就會好似一早已經識晒D答案咁, 都費是答你, 有時就特登係個位度大聲講個錯的答案出黎 (老師話佢平時好乖! 唔係咁!)

「自選活動」時段由10:15至10:50, 出到課室門外, 已經見到爸爸了! 老師特別安排有家長觀課的小朋友參加「美勞角」, 今次係玩油畫, 老師幫孖寶著咗水彩袍, 孖寶首先揀一隻小動物的相片, 然後自動波搵返有自己個名的畫架, 對住相片畫返隻小動物出黎。老師話佢兩個平時係用色方面都係好有主見(哥哥一定要藍色, 細佬一定要紅色, 無論畫咩), 佢地畫緊畫唔鍾意人地問佢地野, 會唔睬你! 爸爸媽媽見佢兩個畫畫真係好好笑, 都唔知畫乜, 至於其餘的家長, 會好落力咁幫佢地小朋友畫, 只有我同爸爸係撓埋雙, 任由佢地兩個自由發揮。畫完畫, 老師幫家長同小朋友係幅畫前面合照, 兩兄弟又自動波咁飛奔去廁所洗手, 原來孖寶的校園生活都幾free, hoho!

之後, 佢地按住自己之前揀咗的「自選活動」計劃, 返入課室, 去其他的「角」玩, 爸爸陪細佬玩「音樂角」, 有另一個小朋友同細佬一齊玩唔同的樂器, jam歌! 至於哥哥, 就由媽媽陪佢玩「扮演角」, 哥哥一入到去就攞咗遊戲的主導權, 著起件醫生袍扮獸醫, 其他兩位小朋友就扮寵物主人帶小狗去睇醫生。鐘聲响起, 「自選活動」時間結束, 哥哥自動波收拾晒D玩具(係屋企唔見佢咁敏捷囉!)

下一節係「體能活動」, 由11:25至11:50, 爸爸話想返去整屋企野, 於是又係由媽媽觀課, 媽媽見仲有半個鐘, 所以出去商場行吓, 11:25返到黎, 佢地已經出咗花園玩體能活動喇! 「體能活動」都係分兩組, A組跟下午班的老師去禮堂玩遊戲, B組就留係花園度, 跟班主任玩運送豆袋的障礙賽遊戲:

1) 老師將豆袋放係小朋友的頭頂, 小朋友張開雙手, 行去滑梯
2) 小朋友拎住豆袋玩瀡滑梯
3) 小朋友係圈入面單腳跳4吓
4) 走過平衡木
5) 最後將豆袋掟入吊環內
6) 完成, 返到起點排隊再玩過

媽媽見到孖寶玩得好開心, 哥哥玩到忘晒形, 細佬都算投入, 識得笑! 過咗15分鐘, 輪到B組跟下午班老師入禮堂玩遊戲, 每位小朋友獲派一條絲帶做尾巴, 然後分成兩組, 玩搶人家尾巴的遊戲。首先係細佬果組玩先, 咁多個小朋友, 只有細佬會用手撳住自己條尾巴, 其他小朋友只顧搶人地尾巴(反映出細佬係一個自我保護意識好強的小朋友), 不過細佬好快就俾人扯甩咗尾巴, 要返埋位坐低。之後輪到哥哥果組, 哥哥見到頭先細佬撳住自己條尾巴, 所以有樣學樣, 老師見到哥哥撳住自己條尾巴, 以為佢已經俾人扯甩咗, 叫佢返埋位坐低, 哥哥叉住條腰, 同媽媽講: 我好嬲呀! 我已經跑得好快, 都輸! (媽媽見佢差D想喊出黎, 但佢忍住咗! 係屋企應該已經"lur"緊地)

「體能活動」完結, 小朋友同叔叔姨姨講再見。 媽媽行返出學校門口, 等接放學。

總括:

1) 原來孖寶的校園生活都幾開心, 同埋佢地已經好習慣學校的教學同活動流程

2) 哥哥同同學仔相處愉快, 有唔少朋友

3) 細佬的情況都唔係想像中咁差, 其實佢比上年鬆咗, 釋放咗, 起碼佢會夠膽係個位度嗌個錯的答案出黎, 玩得開心時都會笑(佢上年係唔敢笑)

孖寶愛上砌LEGO

自從去年12月, 孖寶係生日會上收到3份LEGO, 包括爸媽送的礦場四驅車、旅行車, 同埋舅父送的消防車(明明係有兩個人生日, 但只送一份玩具), 孖寶就愛上咗砌LEGO(以前買落的DUPLO(即BB版LEGO)已經冇人吼!)

孖寶愛上砌LEGO其實都係一件好事, 值得鼓勵! 因為:

1) LEGO細細粒, 可以訓練小肌肉;

2) 孖寶哥一向專注力好弱, 又冇耐性, 砌LEGO可以訓練孖寶哥的專注力同耐性(媽媽一廂情願咁諗!);

3) 因為要睇住說明書去砌, 可以訓練看圖理解的能力, 又可以訓練手眼協調;

4) 由零開始, 一粒一粒咁砌, 最後見到自己的製成品, 發現原來自己咁難都砌到, 能夠為小朋友帶來極大的滿足感同自我肯定; 以及

5) 用咗大部份時間去砌LEGO, 少咗時間睇youtube同打機(媽媽覺得very good!)

一向超級錫孖寶的廿四孝孖寶爸, 見到孖寶咁鍾意砌LEGO, 觸動到佢童年冇得砌LEGO的遺憾, 於是瘋狂咁買LEGO...... 俾佢自己, 盒盒LEGO都過千蚊, 係兩個月內大大話話駛咗$7000-$8000(媽媽買森林家族, 每盒$400-$500都諗咗成個月)。

孖寶見到爸爸買咗咁多盒LEGO"俾佢地", 當然係超級興奮啦! 經常嚷著要爸爸俾LEGO佢地砌, 爸爸亦順理成章, 將「可以有幾多版LEGO砌」成為對孖寶的奬勵, 當然, 扭計、唔聽話、爆喊、發癲, 就會扣LEGO版數, 孖寶亦好緊張呢個全新的奬罰制度(以前係儲貼紙換禮物), 不過, 實際上, 佢地係唔會因為想砌多幾版LEGO而做乖孩子, 而哥哥就仍然會扭計、爆喊同發癲, 然後當你話扣佢LEGO時, 佢就會更加癲!

孖寶越級挑戰for 8+的礦場直升機

 從來未見過哥哥能夠坐定定, 咁認真去做一件事!

砌LEGO可以俾到小朋友滿足感同自我肯定, 睇吓哥哥面上的笑容!

 再越級挑戰for 12-16的超級挖泥機

細佬做乜(包括玩)都係好認真!

結果, 孖寶爸本來諗住買俾自己玩的LEGO, 好似只係有一晚夜闌人靜時自己砌過, 其餘全部都係孖寶砌晒! 

......可憐的孖寶爸!

後記@2017.08.14

至今孖寶已經成功挑戰咗以下的型號:

孖寶哥的鬥雞眼

話說哥哥由細到大, 都俾人話佢有鬥雞眼, 爸媽睇落都覺得好似係, 所以都有少少擔心!

哥哥23個月大時, 撞到眼角流血要入急症, 之後要去眼科覆診, 爸媽就乘機問吓眼科醫生, 醫生話應該唔係鬥雞眼!

哥哥4歲, 要返健康院做視力檢查, 爸媽又乘機問吓醫生: 佢係唔係鬥雞眼? 醫生話唔係, 仲用兩隻手指"鍊"住哥哥個鼻樑, 扯開佢兩隻眼皮, 教我地睇佢係唔係鬥雞...

不過, 仍然有人話哥哥係鬥雞眼, 包括學校老師, 於是媽媽又唔放心, 提意不如搵專業視光師再檢查一吓。

3月25日, 由媽媽帶哥哥去驗眼(爸爸看車, 細佬係車上瞓著咗), 由於要用專業儀器影眼底, 驗度數, 用電筒照眼, 媽媽初時都好擔心哥哥會唔合作同發癲, 點知佢竟然係超級合作, 叫佢望入去D儀器度, 要將個下爬仔"浪"係個托度, 佢都一一照做。

影完眼底相(冇放大瞳孔, 驚佢滴眼水同睇野濛查查會發癲), 視光師叫佢入房, 由媽媽抱住佢坐係張驗眼凳, 熄咗房燈, 再問佢前面見到D乜, 睇唔睇到係咩數目字, 佢都答得好快(平時唔見佢答我D問題答得咁快), 可能個視光師都識得氹小朋友, 哥哥係非常合作, 成個驗眼過程要30分鐘, 佢都冇扭計, 好抵錫!

驗完眼, 視光師開返房燈, 再同媽媽解釋返哥哥的情況, 佢話哥哥左右眼各有125至150度遠視, 所有同年齡小朋友都有遠視, 而且度數唔深, 冇問題, 唔駛戴眼鏡! 至於鬥雞眼的問題, 視光師話哥哥冇內斜視(鬥雞眼的正確學名), 佢話通常內斜視都係一隻眼, 唔會兩隻眼, 加上左右眼的遠視度數差不多(有內斜視通常只用一隻眼睇野, 所以其中一隻眼的度數會好深)。至於點解佢會俾人有錯覺, 覺得佢係鬥雞眼, 有兩個原因:

1. 哥哥的頭比較細, 面型都比較窄, 所以有錯覺兩隻眼生得好埋; 以及

2. 小朋友眼部周圍的皮膚比較多, 摺位亦比較多, 所以俾人感覺兩隻眼生得好埋。當小朋友個頭仔漸漸長大, 兩隻眼就會向外扯返開 (大概係咁o既意思啦!)

視光師亦發現哥哥的眼睫毛比較長, 同埋因為眼皮摺位比較多, 導致下眼睫毛有時會吉住眼睛的情況, 所以建議媽媽得閒可以用手指幫佢掃返D下眼睫毛落黎, 唔好吉住對眼仔, 搞到成日眼痕要捽眼。佢亦留意到哥哥右眼周圍D皮膚有少少濕疹, 建議多揸保濕, 至於醫生開的濕疹膏就要小心D揸, 唔好揸到眼仔。

視光師亦問媽媽有冇早產, 原來早產BB的視力發展通常都會有問題! 我話佢唔算早產。視光師仲話小朋友呢個階段的視力發展已經接近成人(約成人的9成), 由於爸媽都有近視(爸爸 -7.XX, 媽媽 -5.XX), 佢反而會擔心哥哥日後的近視問題, 由於小朋友的視力一年內都可以有好大變化, 建議每年驗眼一次!

總括:
哥哥的視力發展正常, 雙眼仍然好健康, 最重要係: 原來哥哥係冇鬥雞眼架! 媽媽都放心好多喇!

親子外攝2017@廸欣湖

又係我們家一年一度的盛事 —— 去影全家福！

自從孖寶出世, 我地每年都會去一次影樓：

孖寶6個月大，第一次帶佢地去Studio，因為有親戚送咗張coupon俾我地，可以免費去影相，當然，㨂多咗相或者要晒全部相底就另計啦！由於唔駛錢，所以冇乜要求，完全冇諗過要著咩衫去(求其一件), 加上孖寶太細，又未識企，影咗30分鐘已經開始扭計，影樓又冇提供道具, 成輯相都係得個白色背景，仲有D相係out-focus, 結果只係㨂多咗2張相，盛惠$200。

孖寶1歲4個月, 第二次帶佢地去Studio, 今次係爸爸安排, 上網團購package, 由於孖寶已經識行識走, 所以大部份時間都用咗黎捉雞仔, 尤其係媽媽要經常捉佢地返埋位影相, 所以媽媽大部份時間都係畫面上消失, 只有爸爸同其中一個仔的合照, 不過, 輯相都影得唔錯, 結果爸爸俾咗$1200買晒成輯相, yeah!

孖寶2歲4個月, 第三次去Studio, 今次係媽媽上網團購package, 由於係我同老公結婚十周年, 見到身邊好多朋友結婚十周年都會同D仔女去影多次緍紗相, 所以就揀咗個緍紗相package, 連孖寶都有禮服著, 仲包埋媽媽化妝添。去到Studio, 由於用咗大部份時間同媽媽化妝, 結果孖寶1個鐘後就開始扭計(媽媽1個鐘後先至化完妝), 爸爸仲拖咗細佬出走廊狂鬧, 結果影出黎的相, 一係就冇咗爸爸同細佬, 一係就冇咗媽媽, 只有幾張一家四口的相, 但睇得出細佬係強顏歡笑 (2歲已經識得強顏歡笑, 勁!)

孖寶3歲5個月, 第四次去Studio, 今年係爸爸上網搵團購package, 由於經過上年的慘痛教訓, 媽媽決定唔好搞咁多野, 上到Studio即埋位影相, 其實今次都係搵返第一年果間Studio, 但地區唔同, 今次Studio間房有自然光, 又有好多好多道具, 不同的背景顏色, 爸爸、媽媽同孖寶各帶多一套衫去換, 所以有2個造型, 加上孖寶大個仔喇, 聽得明攝影師叫佢地做咩動作, 又好合作咁擺Post同玩, 所以影出黎的相好自然, 睇得出孖寶玩得好開心, 一家四口的合照好溫馨, 結果爸爸二話不說, 用$3800買晒所有相底連video, 多謝爸爸!

孖寶4歲3個月, 第5次去影全家福喇! 由於近年好流行親子外攝, 加上孖寶大個仔同埋上年去Studio影相都好合作, 媽媽一直都好想試吓外攝, 所以舊年年尾已經上網搵定資料, 大部份都要Over $2000至$3000不等, 後尾搵到一間$1999, 價錢very ok喎! 睇埋佢之前幫人影D相, 都唔錯喎, 同其他公司質素差不多, 不外乎都係低角度影埋去、超大光圈、超勁景深(後面濛晒), 咁你咪覺得d相好靚囉! 等到今年2月孖寶學校出咗下學期時間表, 就拿拿林約時間影相。

因為外攝, 驚冬天會凍, 所以想3至4月回暖先至出去影, 3月20日, 4月18日同埋5月2日都係孖寶學校假期(因為要去公園, 平日影相冇咁多人), 同攝影公司聯絡咗, 因為要揀埋地點, 外攝通常都有草地，有草地就會有蚊, 但細佬唔可以俾蚊針到(要入急症), 所以唔可以太熱去影, 沙灘少d蚊，但4月去沙灘落水會凍, 馬灣個沙灘都好多蠓(咁係唔係唔應該外攝?) 結果決定3月20日去廸欣湖影, 要落訂$200, 尾數影相當日俾現金。

不過，踏入3月，原來氣溫同2月差不多，而且由3月第一個星期日起，天氣都冇好過: 天陰、大霧、落雨, 已經有2星期都冇見過陽光，每日個天都係灰灰濛濛咁，同我心情一樣，每日就係留意住天文台個logo, 睇住3月20號會唔會落雨，又要睇吓咩氣溫，究竟要著長袖定短袖，當然仲有每日祈禱，希望唔好落雨，最好仲有少少陽光啦，因為我見人地d相，有陽光係樹上滲落黎，好靚！

睇住天文台個logo, 由落雨, 變成多雲, 再變成有三份之一個太陽, 再變成有薄霧, 而氣溫就由最低18度變成最高23度, 心情就好似坐過山車一樣！

 3月20號會落雨, 係唔係要改期?

冇落雨喇! 不過天文台個logo成日轉, 都唔知信唔信佢好?!

到咗外攝前一日, 簡直係可以用煙雨凄迷黎形容, 全日落住毛毛雨, 又濕又凍, 大鑊！聽日點出去影相呀? 但已經請咗假, 惟有寄望神蹟出現！到夜晚再睇多次天文台個logo, 聽日早晚薄霧, 仲話短暫時間有陽光, 真唔真呀？

到咗外攝當日, 起身第一時間睇吓外面的天色, 終於冇落雨喇！但真係有霧, 個天都係灰嘅, 同我心情一樣! 同攝影公司聯絡，由於天氣唔穏定, 佢地話可以改下晝, 不過天文台話中午會有少少陽光，所以我地提意改11點。

早上10:15, 出發去廸欣湖, 老公睇咗各區天氣即時快拍, 外面天氣好好喎，仲有陽光(只係將軍澳天氣差咋喎)。出到市區, 真係陽光普照喎！YEAH！一路揸車上公路, 沿途都係陽光, 再望吓個天, 少咗好多雲, 仲見到藍天(雖然係灰藍色的)! 太感動喇!

11:00準時去到, 攝影師Brian哥哥同佢助手(即佢老婆)已經等緊我地, 佢兩個好nice(全完冇商業味道), 仲請孖寶食糖, 哥哥一向鍾意同人玩, 所以好快就進入狀態影靚相, 細佬就唔係太合作, 要不停氹佢, 由於實在太好天, 陽光普照, 越影越熱, 加上要錫錫爸媽、坐樹底、跑草地、起飛等一連串動作, 孖寶熱到流晒汗, 真係估佢唔到咁好天! (天文台又話只係短暫時間有陽光, 呃人!)

之後, 孖寶換過件短袖衫(好在媽媽醒目, 長、短袖衫都有帶), 拎埋架平衡車出黎繼續玩, 攝影師就不停幫佢地影相, 好欣賞佢, 好專業! 扒地下, 瞓草地, 仲俾孖寶踩咗兩腳, 搞到成身泥都唔介意, 全程機不離手, 就算影完, 行返去廸欣湖入口期間, 佢仲影緊, 孖寶炒車跌低咗, 佢都影到兩兄弟手足情深的相, 勁! 之後, 孖寶見到有噴水池, 玩到全身濕晒, 攝影師繼續影, 我地同佢老婆傾緊計, 佢就繼續影孖寶, 全完冇趕住收工的感覺, 本來話影2個鐘, 結果搞咗差不多3個鐘, 真係唔好意思!

值得一讚係孖寶哥, 全程笑容滿面, 非常合作, 至於細佬仔, 都要一讚, 雖然開始的時候同臨尾都有D扭計, 唔想影相! 咁耐架! 影完未? 但對於細佬仔黎講, 要影兩個鐘已經係佢的極限, 加上當日天氣真係好熱, 細佬仔一向都好大汗, 又惹蚊, 要佢係草地奔跑, 係烈日當空下踩平衡車, 真係辛苦晒佢喇!

攝影公司話需要3至4星期時間執相, 執完相會upload低清version上網俾我地睇咗先, 揀1張相做水晶相架, 再等多3至4星期, 就會搞掂埋隻DVD, 連同水晶相架, 用速遞send俾我地! 好期待啊!

閒談之間, 佢地話影寵物唔駛加錢, 媽媽又心郁郁, 想今年冬天帶埋阿Nick去影相, 話晒阿Nick今年都已經11歲喇! 唔知仲有幾耐日子, 希望留低美好的「親子」回憶!

後記@2017.04.21

終於有相睇喇! 好靚啊!

孖寶兄弟四歲三個月零六日!

零至三歲係小朋友發展最快的階段!

三歲前孖寶的發展, 可以講, 每日都在變, 以前我家工人姐姐有一句名言: They change every month! 初頭聽只係覺得好搞笑, 但細味之下, 的確係真! 甚至覺得They change every day!

初生

轉身 - 3個月

識坐 - 6個月

識爬 - 8個月

識企 - 10個月

識行 - 12個月

說單字 - 18個月

說單句 - 24個月

滔滔不絶 - 30個月

自從孖寶踏入3歲, 發展已經冇以前咁, 每個月都有明顯變化, 但3歲的小人兒, 已經發展出自己獨特的個性, 喜好, 興趣, etc.

Update一吓孖寶的近況:

哥哥

身高: 96cm, 體重: 30.6lbs (比一年前高咗6cm, 重咗2.6lbs, 哥哥的增長比較少)

個性: 

單純, 善良, 天真無邪, 性格外向, 平易近人, 很愛家人(好錫細佬), 充滿好奇心, 愛挑戰自己及爸媽, 好勝心強, 成日都要爭第一。粗枝大葉, 粗心大意, 唔理自己D野。

情緒: 

仍然係極度不穏定, 非常易喊/動怒/發癲

喜好: 

喜歡同人相處/互動, 鍾意親密擁抱

興趣: 

戶外/動態活動, 踩平衡車, 玩車, 砌Lego, 去兒童遊戲室/Playhouse, 去沙灘堆沙

心智發展:

仍然係感覺主導, 對別人說話的理解力很弱, 或者跟本無意去理解別人的說話, 只顧發洩自己的感受。不愛/難遵從指令, 少許固執, 堅持自己的做法。遇到困難仍然會第一時間大喊, 期望別人代勞。但有時又會有一點成熟的表現, e.g. (1) 係公園野餐完畢, 佢話要幫手收拾, 情願唔去玩! (2) 細佬係度玩緊, 有人蝦細佬, 佢會保護細佬! (3) 佢唔小心踢親媽媽, 媽媽話好痛啊! 佢會即時講N次對唔住, 表情充滿歉意! 

社交:

好鍾意同人玩, 係公園遇到唔識的小朋友, 都可以即刻同人地玩埋一堆, 有傾有講, 係公園有陌生婆婆同佢傾計, 佢可以話跟人返屋企玩(媽媽明明教過佢唔可以跟陌生人走)。係學校都識到好多朋友仔, 同學都好鍾意同佢玩! 由於佢好鍾意同人玩, 所以比較唔介意借自己D玩具俾人玩, 比較願意分享。

學習:
很多時都係精神散渙, 心不在絃, 對學習冇興趣, 上課時經常遊魂, 有時仲會釣魚。係屋企都係唔想拎D功課出黎做, 寫生字, 寫完一個字, 然後魂遊象外一分鐘, 再寫另一個字, 所以做功課做好耐。

細佬

身高: 98cm, 體重: 34lbs (比一年前高咗7cm, 重咗4lbs, 細佬的增長合理D)

個性: 

謹慎, 做事好小心(連玩都好小心咁玩), 好緊張自己D野, 性格內向, 喜歡自己一個人玩, 慢熱(都會同人玩, 但需要時間warm up)。

情緒:
穏定, 但有時都會突然間好忟憎, 你點樣安撫佢都唔得。

喜好:
喜歡觀察事物同思考, 好鍾意序述事情經過。

興趣:
靜態/室內活動(踩平衡車例外), 畫畫, 做手工, 寫字, 睇書, 玩車, 砌Lego, 去兒童遊戲室/Playhouse, 去沙灘堆沙。

心智發展:
明白事理, 懂事, 聽話, 服從指令, 但有時會過份克制自己的情緒, 開心唔敢笑, 輸咗唔開心講反話, 話自己鍾意輸, etc.  好緊張自己D野, 份人好均真, 係佢就係佢, 唔係佢, 佢唔會拎/貪。因為哥哥成日都爭第一, 唔讓佢, 佢屈屈埋埋係個心入面, 好唔開心, 好委屈! (媽媽睇住細佬, 就好似睇返自己細個果時咁!)

社交:

社交十分被動, 被臨床心理學家評為懷疑社交障礙, 對陌生小朋友有少許敵意, 自我保護意識好強(迎面有小朋友行埋黎已經覺得人地想搶佢D野), 係公園唔會同陌生小朋友玩, 甚至會鬧人, 人地唔小心掂到佢, 佢會批踭人, 報復心態好強。由於佢不善社交, 係學校冇乜朋友, 有時會痴住哥哥D朋友玩。

學習:
非常專心, 認真, 上堂唔敢郁, 唔敢出聲, 唔敢舉手答問題, 但佢好留心老師每句說話, 用心記住。老師話佢的成績係屬於中上。係屋企會自動拎D功課出黎做, 通常都好快做完。

後記@2018.03.16

剛剛一年後, 孖寶5歲3個月, 除咗身高&體重, 其他方面都冇乜變化。

哥哥: 身高103.5cm, 體重34.2 lbs (比一年前高咗7.5cm, 重咗3.6 lbs, 過去一年增長唔錯!)

細佬: 身高106cm, 體重37.4 lbs (比一年前高咗8cm, 重咗3.4 lbs, 過去一年高度增長唔錯, 但體重增長較少, 但唔知點解每次抱細佬, 都覺得佢又重咗!)

媽媽, 我唔想你返工!

所有在職媽媽都聽過呢句說話...

相信呢句說話亦曾經令過無數在職媽媽, 包括我, 諗過辭職, 不過, 又有幾多媽媽真係可以咁瀟洒? 辭咗份工, 老公份人工夠用嗎? 仍然能夠維持而家的生活水準嗎? 仲請唔請得起工人姐姐? 冇咗工人, 要照顧兩隻化骨龍, 仲要做晒D家頭細務, 自己一個人真係得嗎?

諗到呢到... 辭職返屋企湊仔只係一個夢想, 尤其當你係公司受到一肚氣, 就會同自己講, 大不了辭職返屋企湊仔! 然後當自己冷靜落黎, 就會覺得只係幻想, 甚至係妄想!

我家大少同二少都成日同我講: 媽媽, 我唔想你返工! (尤其星期一朝早)

育兒書教, 當媽媽聽到佢地咁講, 就要同佢地講, 每人都要有責任, 媽媽的責任就係要返工, 你地的責任就係返學囉! 媽媽要咁樣講, 佢地先至會學識第二時大個做人要有責任感!

我想講, 寫育兒書的人, 多數係無兒女! 試問4歲小朋友點會明白咩叫做責任? 「責任」係咩黎? 食唔食得? 4歲小朋友只會知道「責任」搶走我媽媽! 「責任」叫我媽媽要返工, 唔可以成日陪住我! 我的「責任」係返學? 我以為返學係玩架喎!

我初頭都會咁講, 但講講吓, 發覺佢地跟本唔明, 我就會同佢地講, 爸爸返工賺錢錢返黎養我地, 但爸爸一個返工賺錢錢唔夠, 要媽媽都一齊返工賺錢錢先至得, 你去街入錢錢落去玩果D, 騎馬仔, 郁吓郁吓果D呢, 就係要用錢錢囉! 佢地聽到媽媽咁講, 好似有少少明。

不過, 講講吓, 媽媽都覺得有少少問題, 長遠落去驚佢地以為D錢好緊要(雖然呢個都係事實), 但小朋友, 都係俾佢地活係一個唔係咁現實的世界好D(因為唔現實的世界最開心), 所以媽媽都唔可以吓吓講錢, 於是媽媽又改咗個說法...

孖寶: 媽媽, 我唔想你返工!

媽媽: 我知道呀! 你唔想媽媽返工! 你想媽媽陪你! 你好唔捨得媽媽!
          其實媽媽都好唔捨得你架!

孖寶: 咁不如你唔好返工啦!

媽媽: 咁又唔得! 你知道嗎? 媽媽細個的時候想做XXX, 媽媽而家終於都做到喇! 所以媽媽要返工囉! 你唔係講過你想做XXX? XXX都係一份工作黎架! 到你大個咗, 你做到的時候, 你都要返工架!

孖寶: 啊!

呢個說法似乎都幾完滿, 4歲小朋友都會明白! 因為佢兩個成日話自己第二時大個要做警察／消防員／工程師／飛機師, etc. 所以佢兩個會比較容易代入我個角色, 啊! 原來媽媽細個果時想做XXX, 媽媽而家做到喇! 佢地都會"鄧"我高興, 同埋唔會再阻止我返工!

當然, 明白還明白, 佢地感受上仍然都係好想爸爸媽媽每日陪住佢地, 所以佢地成日都會問, 今日星期幾? 你地聽日要唔要返工? 當佢地知道爸爸媽媽聽日唔駛返工, 佢地都會好興奮!

至於當爸爸媽媽要返工的早上, 尤其星期一, 因為經歷星期六、日兩日爸爸媽媽全天候全程陪玩, 實在太開心, 佢地都會出現「星期一症候群」,包括:

1.  情緒不穏, 易喊, 易動怒, 一觸即發
2.  煩躁不安, 心情惡劣, 不耐煩
3.  說話帶挑釁性, 語氣極不客氣
4.  別人做咩／講咩都唔合佢心意

每逢星期一朝早, 媽媽都好驚, 真係好驚, 好大壓力, 因為屋企裏面有兩個計時炸彈, 無顯示分鐘, 隨時會自爆, 或在不知情的情況下被引爆, 而爸爸通常係未進入危險狀態之前就已經輕鬆走人, 留低媽媽一個面對 (媽媽都有Blue Monday症候群, 媽媽都好想盡快離開現場!)

不過, 都會有窩心時刻, 通常係哥哥, 當你就走的時候, 佢會叫你等埋佢, 然後走過黎, 攬實你條頸, 好實好實, 同你講: 「我唔想你走! 你要快D返黎!」 又或者扯住你D手指, 扯返你入屋, 然後同你講: 「我唔俾你返工!」真係Sweet到爆, 果刻, 媽媽腦海中就會出現一句說話: 不如辭職返屋企湊仔?!

不過, 清醒過後, 工...還是要返的!

兒童發展評估

話說哥哥自細就情緒非常波動, 好易爆喊, 少少唔啱佢心意就爆喊, 仲喊到歇斯底里 (試過喊到癲咗撞埋床頭, 撞傷眼角流血淚要入急症), 而且佢成日唔睬人, 同佢講野冇反應, 我同爸爸都擔心佢有事, 可能係自閉之類。

2歲半的時候, 政府健康院安排醫生同哥哥做咗個初步的評估, 結果係: 哥哥係一個正常小朋友!

由於醫生話佢正常, 所以爸爸媽媽都冇再跟進, 至於佢的情緒問題, 爸爸媽媽惟有同自己講, 男孩子係咁掛! (但又唔見細佬係咁?) 所以我地開始諗吓, 係唔係細佬唔正常? 因為細佬好乖, 情緒好穏定 (甚至有時會壓抑自己情緒, 當然有時都會大喊, 但好快(30秒)即收聲), 而且細佬好明白事理, 甚至比同年齡小朋友更懂事, 似乎係細佬有問題喎!

去年升K.1, 佢兩個要學習同一大班小朋友相處, 見到哥哥好鍾意同小朋友玩, 識咗好多朋友仔, 冇錯! 哥哥肯定唔係自閉, 佢好social! 不過, 哥哥有一個幾嚴重的問題, 上堂瞓覺, 可能返下午班, 哥哥實在捱唔住, 試過連續三星期, 每日上堂都瞓著咗, 老師惟有抱佢埋一邊, 由得佢瞓, 有時瞓到放學!

至於細佬的問題都開始浮現, 細佬返到學校變得好拘謹, 開心都唔敢笑, 見到哥哥同小朋友玩, 會唔開心, 扯開哥哥, 或者阻止哥哥同小朋友玩, 好驚小朋友搶佢的玩具, 見到迎面有小朋友行埋黎, 會自動進入自我保護模式!

起初, 媽媽覺得可能係性格問題, 細佬比較內向, 怕醜, 被動, 其實媽媽細個(中學開始)都係咁! 今年升K.2, 由於哥哥同細佬調咗去上午班, 要重新適應全新的同學, 哥哥好快已經識到朋友仔, 但細佬... 不止一次向媽媽哭訴: 冇人同我玩, 冇人同我傾計, 我一個朋友都冇!

至於哥哥, 雖然返上午班已經冇上堂瞓覺, 但老師話佢好唔專心, 成日唔知自己做緊乜／想做乜, 媽媽驚佢第二時升小一, 上堂時遊魂, 考試考第尾會被學校勸退。

由於事態都頗嚴重(哥哥專注力好弱, 似乎弱過同年齡的小朋友, 而細佬的社交亦出現問題, 應該中學先至出現的情況, 細佬竟然幼稚園階段已經出現), 所以有必要請教老師, 班主任很好, 知道細佬情況後, 主動幫細佬係班裏面搵朋友, 後來, 另一位老師(細佬K.1的班主任)知道哥哥同細佬的情況, 主動聯絡媽媽, 轉戒私人機構做兒童發展評估。

爸爸竟然唔反對, 仲一齊請假, 帶孖寶去(仲以為爸爸會話媽媽只係杞人憂天!)

2月28日去咗灣仔一間兒童發展中心做評估, 由媽媽陪細佬, 爸爸陪哥哥, 過程大概30分鐘, 房間入面有2個姑娘, 一個姑娘幫小朋友做測試 -- 疊積木, 填顏色, 剪紙, 講故事咭, 考記憶, 認知之類的遊戲, 另一個姑娘就同爸爸媽媽傾計, 瞭解小朋友的問題, 平日係學校同屋企的表現之類!

評估結果:

哥哥 - 睇唔出有咩問題, 所有發展都符合同齡小朋友的標準

細佬 - 發展完全冇問題, 好專心, 甚至超越同齡小朋友, 但社交十分被動, 全程冇望過姑娘一眼, 同人冇眼神接觸, 有迫切需要處理

不過, 最欣慰的係 -- 已排除佢兩個係自閉譜系小朋友! 估計有關情況只係普遍的感覺統合(感統)問題。

評估完畢, 由註冊臨床心理學家寫咗兩封轉介信 (其實哥哥冇野, 不過我地話哥哥有情緒問題同專注力弱), 我地可以拎住轉介信去政府兒童發展中心, 排期(至少一年)由醫生作進一步評估。

另外, 兒童發展中心都建議孖寶可以一進做職業治療評估(我同爸爸一直都以為職業治療係for成年人, 治療職業病之類), 加埋接受感統訓練, 姑娘話情況應該唔難改善。

就係咁, 一直最難搞的哥哥, 竟然係冇事! 但一直最乖的細佬仔, 原來係最需要接受治療啊!