帶住孖寶去旅行@2017 (行程規劃篇)

鑑於去年10月去大阪搞到孖寶同爸媽身心俱疲, 汲取咗上次的教訓, 媽媽得出以下結論:

1.  有10歲以下兒童同行的家庭千萬不要搭簾航 (除非你的小孩很會等候, 即Delay至少3小時以上都不會扭計, 不會肚餓/口渴, 不需要玩遊戲, 乖乖的在座位上靜靜的坐/睡到落機, 然後晚上12時還沒有睡覺, 不用抱/不用推車, 自己乖乖的跟你行去酒店check-in);

2.  去程及回程時間很重要, 最好不要太晚, 所以早上11點左右起飛(去程), 回程抵港時間晚上7點左右最適合。而且機程不能太長, 3.5至4小時已經係孖寶的極限;

3.  每日安排1至2個景點已經足夠 (唔好貪心, 去唔晒下次再去), 因為要預留時間應付經常會發生的突發狀況, 包括搵廁所去, 拎漏咗野, 有人扭計, 情緒疏導, 午睡安排, 意外處理等等;

4.  到埗第一晚選擇距離機場較近的酒店, 因為經過一日的折騰, 到達當地機場已經疲憊不堪, 如果仲要搭1小時以上的火車先至到達酒店, 孖寶一定發癲;

5.  避免去大城市(最多只停留一晚, 即第一晚), 因為大城市任何時間都會塞車, 說好了半小時的車程會變成1.5小時;

6.  盡量安排午飯後有一段時間讓孖寶在車內午睡, 例如較長途的車程可安排在午飯後;

7.  晚上逛商場千萬不要行得太夜, 日間大部份時間都是為孖寶而設的景點/活動, 難得晚上可以行商場, 爸媽總會樂而忘返, 結果搞到太夜返酒店, 孖寶太夜瞓, 結果第二朝好難起身, 然後又係惡性循環。

有見及此, 媽媽今次係安排行程規劃上都花咗唔少心思:

首先, 要搵個市區比較近機場的城市, 爸爸提意去福岡, 因為由機場去博多, 只係5分鐘, 另外, 唔搭簾航, 爸爸今次買咗CX, 抵讚! 由於提早半年買機票, 所以復活節去旅行都唔算太貴, 一家四口機票大概$12,xxx(已計附加費), 去程起飛時間早上11:15, 回程抵港時間晚上7:10, Very Good!

行程規劃大致如下:

Day 1 - 香港 --> 福岡機場 --> 博多駅附近酒店

Day 2 - 租車 --> 東平尾公園(滑草) --> 香椎花園 (森林家族主題樂園) --> 午睡 --> 九州鉄道博物館 --> 北小倉酒店

Day 3 - 北小倉 --> 城島高原遊樂場(Kids' Driving School) --> 血之池地獄 --> 別府市內酒店

Day 4 - 別府 --> 九州自然動物園(African Safari) --> 湯布院溫泉街 --> 湯布院溫泉酒店

Day 5 - 湯布院 --> 九重夢大吊橋 --> 阿蘇火山 --> ASO FARM VILLAGE

Day 6 - 阿蘇 --> 高千穗峽 --> 天空小火車 --> 熊本市內酒店

Day 7 - 熊本城 --> 草莓農場摘草莓 --> 福岡機場 --> 香港

孖寶兄弟語錄(9)

一向喊點極低的媽媽......

細佬: 媽媽, 如果你同爸爸第二時死咗, 我同哥哥又死咗, 我地係唔係會再見架?
媽媽: (聽到細佬咁問, 已經鼻子一酸) 係呀! 我地會係天堂度再見架!

哥哥: 媽媽, 就算你死咗! 我都會捉住你隻手!
媽媽: (雙眼即刻紅晒, 眼淚差點湧出黎) 啊... (因為要忍住喊, 已經講唔到落去)
哥哥: 我要俾D力量你嘛!
媽媽: (終於忍唔住, D眼淚把把聲咁流落黎!)

Playhouse

孖寶兄弟第一次去Playhouse玩係去年2月新年期間...

今年2月新年期間, 媽媽又提意帶孖寶去玩, 因為天氣凍, 實在諗唔到有咩地方好去。

雖然見到佢兩個玩得好開心, 但爸爸話每年只會去一次, 唔係錢的問題, 而係孖寶玩完都會病, D地方太多病菌喇! 加上爸爸鍾意佢地多D接觸大自然, 呼吸清新空氣, 晒吓太陽, 跑跑跳跳, 會比較健康! (媽媽都同意的!)

不過, 話說回來, 小孩子始終都係鍾意玩, 不論室內室外, 只要有得玩就得! 無可否認, Playhouse能夠提供一個較為安全及不受天氣影響的環境, 孖寶的確玩得好開心, 玩咗3個鐘都唔捨得走啊!

 舊年腳震震要人扶住, 今年來去自如

 細佬好鐘意玩呢架車

 哥哥鍾意踩單車

媽媽都玩得好投入

睇到孖寶咁開心的笑容, 爸爸! 唔慳得架! 下年再黎過!

去沙灘玩

孖寶好鍾意去沙灘, 無論夏天去游水(其實係玩浮床), 或者冬天去堆沙!

話說孖寶兄弟第一次去沙灘應該係2015年5月(孖寶當時2歲5個月), 因為自從2014年尾搬咗去將軍澳之後, 去清水灣沙灘只係20分鐘車程, 所以媽媽心郁郁好想帶孖寶去玩沙(D育兒專家話: 赤腳踩沙, 雙手玩沙, 有助刺激幼兒的感覺神經喎, 對幼兒發展好架!) 既然係專家話, 媽媽當然要游說爸爸帶孖寶去啦!

由於第一次去沙灘, 加上天氣未熱, 所以唔諗住落水, 只係去踩吓沙, 去到沙灘, 就如爸媽所料, 細佬即場爆喊, 死都唔肯落地, 雙腳唔想接觸D沙, 至於哥哥, 佢係一D都唔驚, 仲好興奮!

哥哥第一次見到大海, 好興奮

細佬就全程唔肯落地, 要媽媽抱

由於媽媽仍然覺得踩沙對幼兒感覺發展好重要, 於是, 6月, 媽媽又提意去沙灘喇! 今次仲帶埋玩沙工具去, 希望可以鼓勵細佬落地接觸吓D沙! 經過爸媽不斷鼓勵同埋爸爸落力陪玩, 細佬最終都肯落地踩吓D沙, 同埋一齊玩喇!

爸爸陪玩

細佬開始覺得玩沙其實幾開心

7月再去沙灘, 由於天氣熱, 今次諗住落埋水玩, 不過, 可能果日比較大浪, D浪聲好大, 細佬好驚, 於是媽媽大部份時間都係要抱住細佬! 至於哥哥, 佢仍然係好興奮, 好快已經搞到全身都係沙!  由於媽媽要抱住細佬, 爸爸一個照顧哥哥(洗腳, 抺乾腳, 著鞋), 又要收拾帶黎的物品, 真係好狼狽! 經過呢一役之後, 媽媽不得不承認, 似乎唔適合帶孖寶去沙灘, 可能佢地跟本唔鍾意陽光與海灘......

細佬個樣超級可憐

哥哥自己玩

2016年4月, 天氣比較熱, 為咗鼓勵孖寶去沙灘, 爸爸帶埋張浮床去沙灘, 可能大個仔咗, 細佬竟然唔驚沙喇! 仲玩得好開心! 不過, 玩完沙之後要清潔仍然係好狼狽!

細佬完全唔記得自己曾經好驚D沙, 仲同哥哥落水玩

為咗令到孖寶去沙灘玩得更加開心, 爸爸仲淘咗2架吹氣消防車造型的兒童艇仔俾佢地, 佢兩個超級開心! 不過, 爸媽每次去沙灘就只係負責推艇, 冇得玩! 有一次爸爸帶咗張浮床去沙灘, 諗住俾媽媽玩, 結果孖寶一試上癮, 以後次次去沙灘都要帶浮床, 再冇玩消防艇lu......

孖寶第一次玩浮床

去年新買的泳衣
(孖寶兄弟係反斗車王的超級粉絲)

去到沖繩都要落沙灘玩, 每人必備沙鏟一個

媽媽都好鍾意玩沙 

(因為要補償返童年冇去過沙灘玩沙的遺憾)

雖然夏天過去, 唔能夠再落水玩, 但孖寶仍然好鍾意去沙灘玩沙, 只要天氣唔太凍, 有陽光就會去, 爸爸買咗兩架沙灘泥頭車, 又有沙鏟, 水桶, 孖寶每次都玩到唔捨得走!

冬天的沙灘冇乜人, 好正!

為咗令「去沙灘玩」變得更吸引, 爸爸仲淘咗好多設備, 包括: 1個沙灘帳幕、2張沙灘凳, 1張沙灘枱, 1個收音機, 每次去沙灘必定會帶齊零食飲品, 加上孖寶兄弟開始可以自己玩, 而家「去沙灘玩」成為爸爸媽媽一種享受!

孖寶賽車

孖寶非常非常鍾意玩平衡車!

話說去年5月, 孖寶係某個商場第一次見到平衡車, 試玩咗10分鐘, 玩到唔捨得走, 一向錫孖寶的廿四孝爸爸, 返屋企第一件事就係上淘寶淘咗2架平衡車俾佢地 (希望唔會爆炸啦!)

過咗幾日, 平衡車已經送到孖寶手上, 第二日, 孖寶已經急不及待要出街試車! 雖然只係第二次玩, 哥哥好快已經上手, 平時行樓梯都腳震震的細佬, 雖然比哥哥稍遲掌握, 但好快已經睇到佢進步!

由於兩個越揸越快, 為咗安全起見(雖然未試過炒車, 但都試過失平衡跌低咗), 於是媽媽提意係反斗城買兩個頭盔(雖然淘寶都有, 但始終係關乎安全的野, 都係睇過, 摸過, 試戴過, 會穏陣D! 註: 都係Made in China)

 嚴禁拍照嗎?

全套藍色的裝備

於是, 從果時開始, 每星期六、日同假期, 例必要去吓玩平衡車!

孖寶玩得好開心, 但爸爸媽媽就...... 企埋一邊發呆!

產後抑鬱(康復篇)

自從2015年10月寫咗最後一篇產後抑鬱(6)的文章之後, 我的產後抑鬱似乎漸漸消失了!

至於點解會突然康復, 應該係同有得去旅行好大關係, 話說自從2012年4月去完大阪返黎, 知道有咗BBS之後, 已經有3年零6個月冇去過旅行, 加上身邊同樣生咗B的朋友都有得去旅行 (湊埋個B去或者乾脆掉低個B俾屋企老人家湊), 但我地冇可能帶埋BBS, 屋企亦冇老人家可以接收我兩個B, 再加上老公不停咁SEND人地一家四口的旅遊blog俾我睇...

我:     你係唔係想帶我地去?
老公: 唔係! 只係俾你睇吓! 遲D可以考慮吓去!
我:     遲到幾時?
老公: 唔知啊!
我:     (心諗: 你係唔係想激死老婆搵山拜?) 真係嬲到我差D一張凳車埋個芒度! 仲試過有一次係公司嬲到做唔到野, 要請半日假出去行吓, 散吓心!

可能老公都聞到火藥味 (加上係佢經常係度點火試爆), 佢終於都醒覺, 然後係2015年8月提意, 不如10月去旅行, 叫埋奶奶同家姐一齊去, 可以幫手睇頭睇尾! 老公終於都瞓醒喇! 我當然第一個話好啦! 老公拿拿林上網買機票, 去4日沖繩, 回程當日仲係我生日添!

自從2015年10月去完旅行返黎, 我好似冇咁抑鬱, 不過, 由於當時孖寶仍然係每晚喊醒幾次, 係長期嚴重缺乏睡眠休息的情況下, 我的情緒仍然係好似M Come 咁 -- 每月總有幾日係情緒低落, 會因為好少事嬲, 好唔開心, 冇耐性, 做乜都冇心機, 唔好同我講道理, 我想一個人呢埋係房靜吓!

之後, 老公都唔太抗拒去旅行喇! (以前同佢講, 人地孖B都帶去旅行啦! 佢會一句得埋黎 : 搵黎搞啦!) 於是我地係2016年6月又去4日沖繩, 8月去咗2日澳門, 同埋10月去咗6日大阪, 雖然去旅行期間都係好辛苦 (Day 1已經想飛返香港), 但去完返黎, 睇返D相又好開心, 好療癒!

其實由2016年8-9月開始, 孖寶好少再夜晚半夜喊醒, 同埋佢地返咗上午班, 每晚9:30必定要入房瞓覺, 我基本上晚上10點可以自由活動, 10:30瞓覺, 由於睡眠充足, 日間的情緒都穏定咗好多, 加上老公而家好積極咁搵機票, 每次去完旅行／未去旅行已經買定下次的機票，知道黎緊又有得去旅行，我的產後抑鬱都好似續漸消失喇！

後記 :
回想坐月的日子係我人生中最黑暗的日子, 我其實好想請陪月, 但老公唔想, 佢話佢會請假陪我, 結果佢真係有請假, 但說好了的月子餐, 一餐都冇食過! 買咗鹿茸俾我補身, 人地話燉鹿茸要2粒鐘, 佢話嘥電嘥錢, 叫我燉半粒鐘好喇! (冇錯! 係我自己燉俾自己食!) 至於新鮮飯餸, 只係頭一個月有得食, 過咗一個月, 佢就拿拿林叫工人夜晚煮埋聽日飯, 每日下晝就係食叮飯, 工人煮的飯已經好難食, 仲要叮到乾爭爭咁食, 我肯定我係全世界最折墮+淒慘的產婦!!! 而家間中都會因為坐月時未有得到悉心的照顧而唔開心!