關西親子之旅2016 - Day 2

2016.10.18 (星期二)

朝早7點, 已經俾隆隆的火車聲隆醒咗, 爸爸話佢6:30已經起身, 瞓唔著, 孖寶未夠8點都起埋身, 勁! 佢地尋晚零晨1點先至瞓, 只係瞓咗7個鐘!

今日大阪好好天, 日本氣象廳的天氣預測好準!

我地酒店就係路軌上面

幫孖寶刷牙, 換衫, 落去食早餐喇!

早餐分日式同西式, 我同老公都揀咗西式, 個日本大媽就咁拎起枱上兩份西式早餐 (唔知擺咗幾耐, 已經凍冰冰), 仲笑笑口拎埋黎我地個位, 唉! 是但啦! 已經好過東橫INN, 細佬鍾意食蛋, 腸仔, 包包, 哥哥照例絶食, 只飲橙汁, 要人餵先至叫做食咗幾啖包, 哥哥, 你去吊鹽水算啦!

好在有多士爐整返熱D包

哥哥絶食, 細佬食到個口脹卜卜

9:30就離開酒店(比原定計劃早), 行去隔離Times(設於Mazda陳列室內)租車, 老公搞咗好耐, 雞同鴨講一輪, 我帶孖寶去店內的兒童playground玩(點解香港冇呢D咁簡單的設施呢? 只係一個角落, 又唔駛好多錢, 香港的商人就係唔做呀!) 終於搞掂, 10:20可以出發去天王寺動物園喇!

孖寶最鍾意就係車, 有老豆的遺傳

幾張地墊, 少量玩具, 孖寶已經乖乖唔會周圍走

要求由兒童坐墊換成BB Car Seat, 保護能力高D

大阪都幾塞車, 行車好緩慢, 預計車程25分鐘, 結果要一倍時間先至去到, 泊咗係地下停車場, 每30分鐘150円, 可能唔夠瞓, 哥哥被吵醒開始發老脾, 細佬都有少少, 於是兩公婆要一人抱一件, 行咗2層樓梯上返地面, 媽媽手腳發軟, 媽媽不行了!

入園前去廁所, 點知細佬係vee vee果30秒期間俾蚊針咗pat pat, 好痕, 爸爸惟有返車拎藥膏, 爸爸發現唔見咗張泊車飛, 又老屈阿媽拎咗, 我冇喎, 你冇俾過我! 搞咗好耐, 搵人幫手撳過張飛, 我同兩個仔係動物園門口, 變咗動物, 任途人觀賞, 哥哥不停話好熱, 好曬, 細佬好痕, 媽媽feel到佢兩個就黎發顛, 惟有俾包橡皮糖佢地頂住先!

去完廁所出黎影相, 原來細佬個pat pat

已經俾蚊針咗, 好痕! 慘慘豬!

入到動物園, 兩兄弟對睇動物都冇興趣, 不停問, 咁耐既? 走未? 媽媽惟有提意買雪糕食, 400円, 一啖食落去, 真係得D雪(ice), 冇糕(cream), 中伏!

中伏

佢兩兄弟連食雪糕都冇興趣, 繼續不停話想返酒店, 吓? 我地啱啱出黎咋喎! 真係好冇癮, 帶佢地去旅行, 佢地又辛苦, 我同老公又辛苦, 都唔知為乜, 好想今晚搭飛機返香港算吧~!

食完雪糕, 爸爸話走喇! (氹住佢地先), 實情係繼續行, 都總算睇到大象, 長頸鹿, 斑馬, 老虎, 狼, 河馬, etc.

呢個係咩影相post黎?

到此一遊

原來已經下晝1點幾, 係時候要走喇, 媽媽好肚餓, 要食野, 去到停車場, 哥哥話要屙尿, 又要行返去廁所, 搞咗一大輪, 出閘, 又收多我150円, shit!

2pm去附近商場搵野食, 哥哥拉住我入咗間食麵的餐廳, 由於太肚餓, 是但啦! 入到去, 寫住支那XXX, 條! 咁即係食大陸麵, 唉! 是但啦! 原來個waitress識講國語, 太好喇! 可以溝通到!

食完野, 爸爸話見到有SEGA, 想去睇吓喎! 結果爸媽陪孖寶兄弟玩咗一轉揸車, 盛惠1000円, 爸媽各自陪一位小朋友坐, 又幾好玩喎, 小朋友有制服著, 自己踩油, 控制軚盤, 沿住條路, 中間要完成D task, 再揸返終點。

仲要換埋車長制服, 戴埋帽, 好認真

兩位小車長好有型

就係呢個場, 要完成唔同的tasks

完成後有贈券, 每人可玩夾糖機一次, 職員哥哥好好人, 打開個玻璃, 張D糖推前D, 堆高D, 等佢地易夾D, 細佬第一次夾唔到, 個哥哥仲開返部機俾佢玩多次, 然後仲有20個金幣送, 我地玩咗釣魚機, 爸爸玩得好叻, 玩咗好耐!

玩完已經5pm, 已經冇可能去万博公園同隔離個Expo City商場, 爸爸話why not? 於是嘗試揸車去, 但由於大阪實在太塞車, 揸到6點幾, 睇睇個GPS, 只係路程的一半, 唔對路喎, 都係返轉頭啦! 於是又揸返去市中心, 去AEON DOME CITY (一早叫咗佢去)

去到又係行玩具店, 睇咗佢地d野先, 因為爸媽應承咗送旅行禮物俾佢地, 細佬好記得, 於是每人送咗一架Tomica車仔, 之後搵野食, 4/F係最多食肆, 去到原來係Food Court (媽媽最憎食), 冇辦法啦! 馬死落地行! 問咗佢兩兄弟想食咩, 食烏冬, OK, 媽媽買碗大烏冬三母子share, 爸爸你自己揀你鍾意食咩啦!

強顏歡笑 -- 媽媽最憎食Food Court

食食吓烏冬, 媽媽見哥哥有D狼狽, 於是幫佢剪斷D烏冬, 佢即刻破口大駡: 媽媽好衰! 隔離枱香港人聽到晒! 果刻, 我終於忍唔住喊咗出黎, 已經抑壓咗兩日喇! 第一次去日本去得咁折墮, 咁委屈, 咁想返香港, 點解隔離枱一家人咁開心, 我就要俾個仔鬧? 點解要帶佢地去旅行? 點解要生佢地出黎? 我真係好後悔自己所做的一切, 我以為對個仔好, 食麵食飯都問過佢地先, 一碗麵三母子分, 我都唔敢食D麵, 只係敢食住D葱先, 我已經盡晒力做個好媽媽, 點解落得如此下場? 我真係好傷心, 忍唔住係大庭廣眾之下飲泣(每次講起都忍唔住喊), 我同然然講, 我唔係嬲你, 但我真係唔識得做你媽媽, 你搵過第二個姨姨做你媽媽啦!

成餐飯, 都係由背脊骨落, 老公話去supermarket買D野飲同生果返酒店, 由於我實在太傷心, 之後發生咩都唔係好記得! 只係記得返到酒店好似食咗個cake... 沖涼...執野入喼, 準備聽日搬酒店, 因為要去京都喇!

宵夜

媽媽的甜品, 食完開心返!

半夜俾老公架747客機的引擎聲嘈醒, 瞓咗係浴缸, 唔得, 真係好硬, 又凍, 瞓唔到, 惟有死死地氣返上床, 係床尾瞓, 都係聽到坦克車展過我耳邊的聲, 好痛苦, 已經兩晚冇瞓, 好想喊出黎, 我覺得自己好可憐, 去旅行去得好唔開心, 最後, 係痛苦中慢慢睡去! 天開始光, 又聽到隆隆的火車聲, 天呀! 我究竟有冇瞓過?!

Day 2 完

關西親子之旅2016 - Day 1

2016.10.17 (星期一)

今日天陰陰, 天文台話下午可能改發3號風球, 但老公話唔駛驚, 8號風球都可以起飛!

由於今次係搭簾航(HK Express), 加上之前有2次的不愉快經歷(餓住個肚上機, 又冇飛機餐食, 結果我燶面!), 所以媽媽提意今次早D出機場, check in 後去食個豐富午餐。早上11點, 最後檢查行李, 出發!

一路上的交通都好暢順, 唔夠12點就去到機場, 泊好架車, 去T2 check in。

泊好車, 準備去Check in

可能時間尚早(我地班機15:15), 所以個counter冇人排隊, check in後, 地勤話班機遲咗係日本果邊起飛, 預計要15:50先至起飛, 比原定時間遲35分鐘, OK, 我忍你!

之後就推住個手提行李去搵野食, 機場冷氣凍, 爸媽叫孖寶著衫, 哥哥唔肯著, 發顛, 跪地爆喊, 爸爸忍唔住車巴佢! 打得好! 唔該幫我打多巴, 入我數! 真係好想送返佢出市區俾阿嫲湊, 我地同細佬去算數喇!

擾嚷咗大半個鐘, 終於可以去食飯喇, 去咗板長, 叫咗兩個定食, 再加幾件壽司, 一個玉子壽司俾細佬, 佢好like!

細佬試孭爸爸個大背囊, 好大個呀!

孖寶冇野做, 走黎走去

由於仲有時間, 爸爸提意去睇飛機, 睇咗一陣走人, 去埋廁所就入閘過海關同immigration, 入到禁區, 即刻衝入去萬寧買返2支水先, 然後就搭無人駕駛去閘口, 點知報示牌話轉咗登機閘口, 同埋delay咗, 好在有個小朋友playground, 佢地玩得好開心, 爸媽就等到發呆, 等咗好耐好耐......

玩得好開心, 仲有電視睇

去到閘口繼續等

終於都可以搭巴士去上飛機喇, 仲落緊毛毛雨, 航空公司都有派雨褸, 上到飛機已經好多人, 好擠迫!

坐低咗, 又等咗好耐好耐, 最後差不多6點先至起飛, 咁去到關西機場咪10點幾?! (日本快一個鐘), 拎埋行李, 搭火車, 去到酒店咪要零晨12點?!

係機上, 媽媽不停食野, 因為已經係夜晚7點, 係食晚餐時間, 真係好肚餓, 加上下午個餐又唔係特別豐富! 好在買咗一袋排包, 叫做可以頂得一陣, 爸爸見媽媽食到狼吞虎嚥咁, 提意不如買個飛機餐食, 媽媽當然唔客氣啦! 空姐話而家得返個日式牛肉飯定食, 是但啦! 就呢個啦! 加罐橙汁添! 盛惠HKD135, 爸爸簽咭時有少少震驚, 你年年換車, 成日買ipad, iphone, 相機, 喇叭, 簽咭時又唔見你震驚o既?!

有野食喇! 

其實孖寶都好肚餓, 佢地見我有野食, 又要食, 結果佢兩個一人一啖食晒我兜飯, 算啦! 我食餸!

我的估計好準確, 10:30左右降落, 落機之後, 哥哥突然發爛話要自己推個藍色手提行李, 係要由飛機門口開始推, 媽媽為咗息事寧人, 抱起佢, 拎住個行李, 反方向逆流而上, 跑返去起點, 俾佢推, 爸爸係呢個時候趕到, 二話不說車巴佢, Good! 唔該幫我車多巴!

又搞咗一大輪, 終於過咗Immigration, 拎返行李 (行李已經一排排咁放咗係地下等候認領)

夜晚差不多11點, 孖寶好攰

之後就那那林去買飛搭火車, 望住個售票機, 我同老公都呆咗, 突然搵唔到自己要搭去邊個站, 要入幾多錢, 因為好多人, 好混亂, 又夜, 個心又急, 最後要拎返張行程表出黎, 先至買到飛。

好混亂, 見到個牌, 呆咗!

老公仲話要去JR個counter買埋嵐山小火車的飛, 吓? 就黎11點喇喎, 2個仔已經開始扭眼瞓! 加上條龍... 好長喎, 我唔想排!

結果, 只係買咗南海電鐵的飛, 去「堺」站, 成人每位盛惠820円, 落到月台, 下一班車11:29開出, 吓? 仲要等半粒鐘, 唔係化?!

要等半粒鐘先至開車

原來真係要等半粒鐘, 11:28, 爸爸問有冇人要去vee vee, 哥哥話急尿, 要屙尿, 吓? 你玩野呀?! 爸爸! 就黎開車, 落咗車冇得上返車架喇! 尾班車開12點, 仲要唔係特急! 結果係吵鬧聲中, 火車開喇! 哥哥再冇話要屙vee, 佢話佢會忍到! 然後就輪到細佬, 不停問: 幾時到? (N次) 媽媽心入面都有一份委屈的感覺, 唔好意思呀! 哥哥, 細佬, 搞到你地咁辛苦, 係媽媽的錯, 冇阻止爸爸買簾航機票!

零晨時份, 終於到咗「堺」,只有我地一家四口落車, 好荒涼呀!

只有我地一家落車

好在又唔算好凍, 爸爸同哥哥拿拿林去車站個廁所, 出閘, 行返落地面, 好在酒店好近火車站, 行咗3分鐘左右, 好似見到黑暗中的曙光, check in, 攞鎖匙, 上房喇!

一打開門, 大家都呆晒, 細佬話: 咁細既! um...... 媽媽之前上網睇過, 間房個樣係一樣既, 但睇相真係睇唔出間房咁細, 媽媽都無言! 惟有講一句: 但張床都夠大喎, 我地今晚可以一齊瞓, yeah! 於是, 兩兄弟即刻除鞋跳上床!

已經係深夜12點喇

哥哥話要沖涼(仲指明要媽媽幫佢沖), 那那林幫佢兩個沖涼, 安頓好晒佢兩兄弟, 爸爸忙著煲水, 媽媽忙著執D衫褲出黎, 零晨兩點... 終於可以瞓喇!

Day 1 完

孖寶兄弟語錄(7)

上星期六食早餐時, 細佬突然同爸爸講

細佬: 爸爸, 你第二時老咗, 我買架輪椅俾你!

爸爸: hoho...唔駛啦! 希望我老咗仲行得郁, 唔駛坐輪椅

細佬: 要架! 我買架輪椅俾你, 然後你坐上去, 我幫你綁安全帶, 我推你

(雖然爸爸已經講咗幾次唔想要, 但細佬仍然好堅持, 將來等爸爸老咗要買架輪椅推佢, 媽媽惟有叫爸爸, 你就接受個仔的一番心意啦! hoho...)

(備註: 細佬後來仲話要去淘寶買架輪椅, hoho, 會唔會爆咋架?!)

帶住孖寶去旅行@2016 (進階篇)

由於媽媽太想去旅行, 加上爸爸太想氹媽媽開心, 於是今年4月已經買定10月的機票去大阪, 經過6月去咗4日沖繩以及8月去咗2日澳門, 爸爸媽媽對於帶孖寶兄弟去旅行已經有過實戰經驗, 當然每次去旅行的過程都係好痛苦, 媽媽通常第一晚係酒店就好後悔帶佢地去旅行, 然後到最後一日離開酒店時, 就會咀角微微上揚, 心想 -- 甩難喇! 雖然如此, 當睇返旅行時候影的相, 又會憧憬著一家四口去旅行的幸福假像當中, 如是者, 就是一個又一個的惡性循環!