細佬仔第一次入急症!

自從孖寶兄弟出世以來, 爸爸媽媽光顧急症室的次數, 比去戲院還多, 今次輪到細佬仔出事!

上星期一(8月24日)晚上11點, 孖寶兄弟準備瞓覺, 爸爸叫佢地收拾玩具, 但細佬冇執, 只係呆咗咁企係度, 正當爸爸想鬧佢之際, 佢突然走黎媽媽身邊, 媽媽見佢滿頭大汗(開咗冷氣), 唔夠一秒, 細佬就狂嘔晒D奶出黎, 媽媽嚇到即刻抱開佢去安全地方, 誰不知清潔進行中, 佢又再嘔, 如是者, 係一個鐘頭入面, 佢嘔咗6次, 爸爸媽媽覺得事態嚴重, 決定帶佢去急症室, 去到急症室登記, 分流站姑娘見佢所有維生指數都正常, 話佢係非緊急, 爸爸媽媽都好無奈, 就係等睇醫生期間, 佢又嘔多3-4次, 但係急症室入面冇人可以幫到佢, 爸爸都開始發惡, 爸爸提意去聯合醫院或者QE, 媽媽話咁即係由頭再排過隊, 睇怕等到聽朝天光先至有得睇, 最衰上次想幫BBS買保險, 但保險公司諸多留難, 最後激氣到冇買, 如果有買保險, 一定第一時間車佢去法國!

等咗大約1個半鐘, 終於都叫佢個名, 仲以為細佬會爆喊, 扭計唔入去(佢係等候期間已經講咗N次要出去!), 但佢竟然好乖, 好合作咁揭起件衫俾醫生聽肚仔, 又擘大口俾醫生睇喉嚨(應該係平時媽媽講得多"莎莎睇醫生", 佢知道晒成個程序), 最後醫生話佢應該係腸胃炎, 開咗止嘔藥水同電解質沖劑俾佢。返到屋企, 佢堅持要飲水, 結果又嘔, 搞到5am, 佢終於都瞓咗, 我同爸爸終於都有得瞓!

星期二(8月25日)果朝我冇返工, 細佬又堅持要飲水, 仲係我唔為意的時候, 飲咗成樽水, 結果... 嘔返晒成支水出黎(爸爸返工問咗同事, 原來嘔唔可以飲水, 只可以用匙更'畢'水飲), 不過, 細佬之後冇再嘔, 下午由12:45瞓到4:30, 媽媽都可以同佢一齊瞓, 爽!

星期三(8月26日)朝早, 細佬半夜每隔一個鐘頭起身一次, 要抱, 媽媽就黎暈低, 而且發覺佢有D發燒同心跳好快, 爸爸帶佢去睇醫生, 完來嘔唔可以飲水(唔駛驚佢冇水飲會脫水), 醫生話嘔仲飲水, 結果嘔出黎D水仲多過飲落去, 咁就脫水喇! 用更'畢'水飲係正確做法, 但要隔15分鐘先至可以飲一啖水... O!

由於細佬唔舒服, 所以星期三下午的學校遊戲日, 媽媽只係帶咗哥哥去, 細佬就留係屋企休息。

準備返學(5)

學校為了讓K1的小朋友能適應校園的生活, 特別於上星期四及五安排了兩天(每天1小時)的家長陪上學日。我家的小兄弟第一次穿上整齊的校服, 背起書包, 上學去!

第一天的陪上學日, 由媽媽陪孖寶哥, 爸爸陪孖寶弟, 孖寶哥一開始已經扭計, 嚷著要玩瀡滑梯, 在課室裏大哭, 老師惟有讓他瀡一次, 然後他竟然乖乖的回課室, 今天老師講故事, 一向好動的孖寶哥, 對故事毫無興趣是預期之內, 他被安排坐在前排地上, 但可能實在太沉悶, 孖寶哥經常走過來, 大叫媽媽, 在旁的老師一手把他抱過來, 放在自己的大腿上, 這樣才能令孖寶哥冷靜下來, 故事時間完結, 同學們上洗手間, 然後吃茶點, 孖寶哥不太願意排隊, 也不習慣與其他的小朋友有身體接觸(排隊要雙手叠別人的膊頭, 自己的膊頭也要被別人叠著), 吃茶點時, 孖寶哥也未有等待老師的指示, 孖寶哥的理解力真的很弱!

孖寶弟由爸爸陪同上課, 聽說是到校內的禮堂玩控球遊戲, 孖寶弟比較害羞, 但沒有哭, 只是靜靜的上課(其他較大的孩子會主動回答老師的問題), 不過, 畢竟是第一天上課, 孖寶兄弟的表現已算不錯!

第二天的陪上學日, 改由媽媽陪孖寶弟, 爸爸陪孖寶哥, 孖寶弟比較文靜, 在陌生的環璄下不會輕舉惘動(哥哥剛好相反), 不過, 在媽媽的鼓勵下, 孖寶弟肯自己到玩具櫃拿玩具, 然後坐在自己的位子上玩, 也明白老師的指示, 收拾玩具! 今天輪到孖寶弟上故事課, 他亦被安排坐在前排地上, 雖然孖寶弟沒有像其他的小朋友般, 搶著回答老師問題, 但媽媽看出他很留心地聽故事, 隅然回頭看看媽媽是否仍在這裏,  媽媽也微笑回應以及豎起母指作鼓勵。然後又是排隊上洗手間, 出了課室, 媽媽特意走開一點, 孖寶弟終於在這個時候忍不住爆發了, 淚如雨下的狂奔向媽媽, 然後抱著媽媽雙腳: 「抱! 抱! 抱! 」看得出他之前已經盡了最大的努力 -- 忍著不哭! 媽媽不停安慰他: 「你已經做得好好, 媽媽很欣賞你啊!」經過媽媽一輪的安慰, 孖寶弟終於冷靜下來, 回到課室準備吃茶點, 茶點過後, 媽媽須先到課室外待一會兒, 孖寶弟也沒有再哭了! 不過, 當日回家後, 孖寶弟整個下午及晚上的心情極惡劣...

經過兩天的陪上學日, 爸爸媽媽大致理解上課的程序, 不過, 眼見其他較大的小朋友對答如流, 在課堂上積極參與, 有說有笑, 便不禁擔心起孖寶兄弟的情況, 爸爸更說, 如果他們不習慣, 可能要求停學, 但媽媽認為這是成長必經階段, 父母不用過份保護, 當然做"大B"會較有利, 下年很大機會安排他們重讀K1

準備返學(4)

前日, 媽媽俾孖寶兄弟試著校服, 2隻豬仔都好興奮, 媽媽幫佢地著完件衫(未著褲), 就走去著鞋, 哥哥仲主動要求媽媽: 「乜...乜...乜...」, 佢"乜"咗好耐, 媽媽先至聽到佢話想要襪襪, 因為上次試鞋, 媽媽同佢講返學要著白色襪仔。

佢地而家知道返學係要著黑色皮鞋(著運動衫就要著白色波鞋), 唔可以著平時去街衫同波鞋!  第一次試著晒全套校服, 包括白襪黑鞋同孭書包。媽媽睇住佢地, 又有D感觸喇 (又黎料!) 諗返起佢地出世時細細粒, 而家大個仔, 就快返學喇! 踏入人生的新階段!

 哥哥著水手裝校服, 成個女仔咁樣!

好鍾意細佬仔個負離子頭, 立立令又夠直, wakaka

又update吓孖寶兄弟的近況:

身高: 

最近冇度過, 但應該有高到, 前年買的褲(摺腳), 舊年(剛好), 今年(吊腳)

體重: 

哥哥26.4 lbs, 細佬27 lbs, 仍然係2隻"瘦奀豬"

好行為:

哥哥成日會無啦啦叫吓你, 跟住攬實你, 搞到你成個人都軟晒, 甜到入心, 有時又會送花(Lego)俾你

細佬好肯食野, 自動埋枱食, 激嬲媽媽肯講sorry, 爸爸有時又會教佢講: 我愛你! 辛苦媽媽! 細佬都會照講, 搞到你都唔捨得嬲佢

壞習慣:

哥哥仍然會因為D好少事發脾氣, 爆喊, 典地, 但爸爸媽媽已習慣, 當佢唱歌

細佬仍然半夜都會扎醒爆喊, 要媽媽抱, 媽媽長期缺乏睡眠, 脾氣暴躁, 睇怕遲早發生家庭倫常慘案!

性格:

哥哥單純, 善良, 冇機心, 鍾意玩, 爸爸拎住雞毛掃話邊個唔聽話就打邊個, 佢仲好開心咁問爸爸借支雞毛掃黎玩

細佬醒目D, 屬於思考型, 鍾意聽故事, 會記住故事主角名同內容, 爸爸拎住雞毛掃話邊個唔聽話就打邊個, 佢即時扁咀爆喊, 要媽媽抱住, 又話爸爸曳曳

人際關係:
兩兄弟都冇以前咁驚人, 以前有陌生人上我地屋企, 細佬會好驚, 喊, 扭抱, 但而家唔驚, 哥哥係咁叫人: 叔叔! 叔叔! 叔叔!, 出街都肯同陌生人打招呼, 傾計(尤其樓下看更同隔離鄰居姨姨), 哥哥有次仲同同Lift的10歲大哥哥玩手指, 出街仍然係成日俾人問邊個係哥哥呀? 通常哥哥都冇反應, 由細佬代答, 佢會指住自己話: 細佬, 呢個! 去到鞋舖買鞋, 都有姨姨讚佢地乖! 我同爸爸都成日教佢地要有禮貌, 見到人要講: 早晨, hello, 唔該, thank you ...... 我地唔希望佢地只識得由1數到100, 卻唔識得同人講句thank you!

準備返學(3)

由於孖寶兄弟與N班無緣, 而家2歲8個月, 仍然係屋企遊手好閒, 好多細過佢地的朋友仔反而有書讀 (讀N班), 呢幾日陸續開學!

其實, 仲有2星期, 孖寶兄弟就開學喇! 所以媽媽都趕緊為佢地準備開學用品, 包括黑色皮鞋, 白色波鞋, 白襪, 白色背心底衫, 毛巾仔...等等

尋晚媽媽俾佢兩兄弟試著返學用的鞋仔, 過幾日有時間會俾佢地試著校服!

除咗試著校服, 鞋襪, 孭書包之外, 媽媽亦特登去圖書館借咗關於小朋友返學的故事書, 而最-最-最-重要係, 媽媽要俾佢地知道, 其實返學係冇媽媽陪, 所以媽媽呢幾日都同佢地講: 「返學要同媽媽say goodbye架, 你地自己入去, 媽媽等陣就會接返你地! OK?」佢地好似冇乜太大反應, 仲話"OK", 可能都唔係好明我講咩, 又或者未真係去到同媽媽分離, 所以暫時冇咩激烈反應! 不過, 佢地咁痴媽媽, 好肯定到正式返學時, 一定會喊到收唔到聲! 算啦! 人生必經階段, 我細個都好似係咁!

備註: 媽媽今日啱啱幫孖寶兄弟剪咗頭髮, 望落去精神爽利!

認識主(2)

孖寶兄弟有嚴重分離焦慮症, 所以實在唔忍心擺佢地係教會個育嬰室, 兩公婆出去聚會, 加上老公話帶佢地返去, 佢地得個喊字, 不單止認識唔到神, 仲會驚咗返教會(我都幾認同), 所以最近呢半年已經好少返教會 (落淚中...)

點樣又唔返教會, 又可以帶領孖寶兄弟認識神呢? 惟有我地多D係屋企講多D同埋以身作則!

謝飯禱告, 通常都唔記得帶佢地一齊禱告, 但記得的時候, 都會提佢地, 未禱告喎, 佢地就會講: 謝謝! 阿們! (阿嫲教的), 媽媽就會問: 謝謝邊個呀? 係謝謝主耶穌! 謝謝佢D咩呀? 俾我地有飯食囉! 因為主耶穌俾咗兩份工作俾爸爸媽媽, 爸爸媽媽先至有錢, 買野俾你地食, 買奶奶俾你地飲, 買屋俾你地住架! 所以要謝謝主! (唔知佢地明唔明)

尋日我同老公傾開返教會, 俾然然聽到, 佢又學我地講返教會, 爸爸問佢: 返教會有咩架? 媽媽仲估佢會話有"煮飯仔"玩, 點知佢話教會有主耶穌! 我同老公都O晒咀!

而家每晚臨瞓都會叫佢地一齊禱告, 由於然然每次聽到禱告就話要瞓覺, 爸爸就氹佢去窗台, 望住個天(因為主耶穌係天上), 向主禱告, 禱告完, 爸爸會叫佢地同主耶穌say goodnight!  又會同佢地講, 主耶穌好鍾意然然同逸逸, 因為主耶穌好鍾意小朋友架!