去唔到旅行, 惟有入機場行吓!

好羨慕人家可以一家大細搭飛機去旅行, 或者兩公婆湊埋個B去旅行, 對於我呢個孖B媽黎講, 老公成日話去旅行=盞搞, 加上冇屋企人幫手, 要一家大細搭飛機去旅行, 都唔知等到何年何月, 惟有埋帶孖寶兄弟入機場行吓, 然後自我幻想 + 安慰一番!

由於揸車入機場果程車實在太好瞓(孖寶兄弟同我), 所以瞓醒精神飽滿, 大家都好興奮, 尤其細佬仔...

細佬: 媽媽, 快D去買飛, 要搭飛機
媽媽: 搭飛機要預早好多買定, 而家買唔到, 同埋要執好多行李去架!

機場半日遊的行程: 入機場泊車 --> 去食午飯 --> 去展望台睇飛機 --> 行吓機場的商舖 --> 回程

佢地似乎冇咩興趣睇飛機, 可能當日展望台都幾大風, 一出到去就話驚驚, 要抱, 然後掛住睇地鐵同的士, 冇心機睇飛機, 哥哥臨走時有少許扭計, 要抱!