細佬戒巾尚未成功, 媽媽仍須努力!

上回講到哥哥用咗4日時間, 係復活節期間成功戒咗奶咀, 但細佬仍然戒唔到啜巾巾入睡的習慣, 佢實在太頑強, 同埋佢太醒目, 唔可以用對付哥哥的招數黎對付佢, 上次試用同一招

爸爸: 巾巾有屎喎, E, 唔好食喇!
細佬: (咀角微微向上翹起, 笑咗一笑, 好似同我地講: 你當我傻的嗎? 巾巾有屎? hoho...)

媽媽亦曾經出招

媽媽: 逸逸, 你咁鍾意pig pig豬, 不如將D巾巾送晒俾pig pig豬啦?
細佬: 豬豬曳曳! 豬豬曳曳! (爆喊 + 發爛渣)

之後媽媽又出招

逸逸: (啜緊紗巾, 準備入睡, 突然面有難色, 扯返條巾出黎 )
媽媽: 係唔係有毛毛呀? 等媽媽睇吓! (果然係佢個口入面拎返條線頭出黎)
媽媽: 嗱! 都話巾巾好污糟, 又甩毛毛 (俾埋D毛佢睇), 又有頭髮, 姐姐洗得唔乾淨架! 最好唔好食啦!

當晚冇啜巾巾瞓咗! 不過第二日又食返

媽媽: 媽媽咪講咗巾巾甩毛毛囉, 仲食?
逸逸: 冇毛毛喎! 媽媽幫我'蚊'咗佢...
媽媽: (無奈表情一個)

最近, 到爸爸出招

爸爸: 如果要去旅行, 就唔可以再啜巾巾瞓, 細佬想唔想去旅行?
逸逸: 想!
爸爸: 咁唔要巾巾, 試吓就咁瞓!

細佬冇咗巾巾就好似架車冇咗條車匙熄車咁, 唔識瞓, 係張床度典黎典去, 典到媽媽都就黎瞓著, 媽媽頂唔順, 惟有俾條巾佢, 佢即啜即瞓, 唉!

如是者, 呢幾晚臨瞓都係咁樣同佢講, 佢都唔太願意, 但都叫做肯嘗試唔用巾巾, 都試過冇巾都可以瞓得著(當然要暗足超過半個鐘啦!), 半夜扎醒爆喊, 意志力薄弱, 又話要巾巾, 媽媽為咗佢可以瞓返, 自己有得瞓, 為有就範! 不過, 比起以前每晚要啜10條巾巾, 而家只係1-2條, 已經好大進步喇! 成功在望!

後記@3.8.2015:
細佬已經有4晚唔駛用巾巾入睡, 不過, 晚晚半夜扎醒, 就會開門爆入我地間房, 我要抱佢返入佢間房, 然後暗佢瞓, 佢已經冇講要巾巾喇! 叻叻! 不過, 可能冇咗巾巾, 佢瞓得唔好, 成日扎醒, 媽媽晚晚都冇覺好瞓!

後後記@10.8.2015:
細佬已經有11日(包括午睡及夜晚)冇啜巾巾瞓覺喇! 媽媽正式宣布: 「細佬戒巾成功喇!」 Yeah! 不過, 細佬仍然係會半夜醒咗坐係床度喪喊 / 突然爆入我地間房, 平均一星期三至四晚, 仲要唔俾爸爸 / 工人抱, 一定要我抱, 唉!

去唔到旅行, 惟有入機場行吓!

好羨慕人家可以一家大細搭飛機去旅行, 或者兩公婆湊埋個B去旅行, 對於我呢個孖B媽黎講, 老公成日話去旅行=盞搞, 加上冇屋企人幫手, 要一家大細搭飛機去旅行, 都唔知等到何年何月, 惟有埋帶孖寶兄弟入機場行吓, 然後自我幻想 + 安慰一番!

由於揸車入機場果程車實在太好瞓(孖寶兄弟同我), 所以瞓醒精神飽滿, 大家都好興奮, 尤其細佬仔...

細佬: 媽媽, 快D去買飛, 要搭飛機
媽媽: 搭飛機要預早好多買定, 而家買唔到, 同埋要執好多行李去架!

機場半日遊的行程: 入機場泊車 --> 去食午飯 --> 去展望台睇飛機 --> 行吓機場的商舖 --> 回程

佢地似乎冇咩興趣睇飛機, 可能當日展望台都幾大風, 一出到去就話驚驚, 要抱, 然後掛住睇地鐵同的士, 冇心機睇飛機, 哥哥臨走時有少許扭計, 要抱!

點解既? 咩黎架?

孖寶兄弟學咗爸爸媽媽的口頭襌, 最近成日話: 「點解既? 咩黎架?」

通常係爸爸媽媽突然間買咗D好好玩的玩具返黎, 俾個驚喜孖寶兄弟, 爸爸媽媽就會扮佢地講野: 「點解既? 」孖寶兄弟又會跟住講: 「點解既? 」跟住就不停咁好多「點解既? 」「點解既? 」

湊孖B

湊孖B究竟有幾辛苦?  比起湊一個, 或者前後腳2個, 辛苦幾多倍? 唔係孖B媽, 根本係冇可能明白!  曾經有一位同事(生咗一個B)同我講, 橫掂都已經湊一個, 湊多個應該唔會太辛苦, 好明顯, 佢應該係有一隊Crew幫佢, 佢放工只係返去同個B玩。我冇佢咁幸運, 冇Crew幫我, 只有1個豬一樣的隊友(工人)!

湊孖B同湊單B的分別:

孖B	單B	前後腳大細B
如果餵母乳, 同時餵阿媽應該會被chur得”奶盡人亡”, 分開一個到一個, 阿媽就只能夠24小時瞓係床上, 化身為一頭乳牛!	餵母乳可以餵完一邊, 下餐餵另一邊, 咪咪能夠得到充份的休息	當大B戒奶後再有細B, 情況同單B一樣
用配方奶粉, 起碼要2個人幫手餵奶, 如果只得一個人, 全日的工作就只係餵奶à掃風à餵奶à掃風(因初生B每3小時飲奶一次, 而餵一個B飲奶連掃風大概就係1.5小時)	用配方奶粉更容易, 自己餵又得, 唔得閒, 叫其他人餵都冇問題, 如果有工人, 奶奶, 幫手, 每日每人只係輪2次	如果大B夠大, 仲可以幫手沖奶或餵細B
通常一個B瞓, 另一個B就唔瞓, 所以你要等2個B瞓晒, 自己可以休息, 幾乎係罔想!	只要你暗著個B瞓, 你自己就可以休息, 佢唔喊醒要飲奶, 你大可以倒頭大睡!	大B通常已建立一套作息規率, 如果已經上學, 你日間只需照顧細B, 情況同單B差不多!
就算2個B一齊瞓晒, 通常其中一個會突然扎醒爆喊, 你會好驚佢嘈醒埋另一個(通常都會!), 經常都活係徨恐中, 所以你唔會瞓得安樂!	單B冇呢個問題, 就算個B突然扎醒爆喊, 育兒書教你唔好理佢住, 等佢喊一陣先再去安慰佢5分鐘, 重覆直至佢收聲! 但孖B你休想可以咁做, 因為嘈醒埋另一個B, 你會好大鑊!	通常會出現細B喊, 嘈醒大B的情況, 不過, 大B通常可以自己瞓返!
沖奶, 餵奶, 掃風, 沖涼, 抺面, 清潔肚臍, 清潔口腔, 塗潤膚露, 幫BB著衫, 換片, 全部動作要重覆做2次	全部動作只係做一次	全部動作只係做一次
一個人冇可能帶2個B出街, 所以你好少機會出到街, 惟有做隱閉中女, 連買衞生巾都要他人代勞! 就算2個人帶2個B出街, 你個B扭計, 對方都幫唔到你手, 因為佢自己都抱住一件!	一個人帶1個B出街, 只要一條孭帶就可以, 2個人帶一個B出街更加係好輕鬆, 遇著阿B扭計, 2個人可以接力抱/安撫, 所以湊單B的話, 出國旅行都冇問題!	一個人帶拖住個大B, 再孭住一個細B, 免強都可以出到街, 如果大B夠大, 有時仲可以幫手睇住個細!
餵糊仔, 都係要2個人, 一人餵一個, 如果你餵果個食得快, 餵完仲要幫手接力餵埋食得慢果個, 如果只係得一個人餵2個, 應該要餵2個鐘, D糊仔都擺到凍晒	如果個B食得慢, 可以俾其他人接力餵	大B可以自行進食, 你只需要餵細B
當孖B一齊學坐, 學企, 學行, 一個人跟本冇可能睇得住/夠快扶住, 所以通常都睇得一個, 另一個就出意外!	學坐, 學企, 學行的時候, 都可以貼身保護!	細B見到大B識坐, 識企, 識行, 學都學得快D!
孖B雖然叫做有個伴, 但好多時都因為爭玩具, 爭竉, 打交, 家嘈屋閉!	單B冇人同佢爭, 樂得清靜!	都會有爭玩具, 爭竉的情況, 但通常都可以教個大的讓小的!
由於所有開支都要X2, 所以只能將貨就價, 孖B的生活用品, 衫褲鞋襪只能買次一等的!	將最好的俾晒佢!	細B可以執大B的用品, 衫褲鞋襪, 所以買貴D/靚少少, 都OK!
由於私立幼稚園的學費太貴, 只能夠讀學券制的屋邨學校	一定係讀私立幼稚園, 裁培佢成材!	私立幼稚園通常都有世襲制, 大B入到, 就可以帶埋細B入, 而且可執大B的舊校服, 書包, 課本, 慳返好多, 加上學費唔係一次過X2, 拉長咗攤分幾年, 冇咁吃力!

湊一個真係曉飛!

就咁睇文章標題, 其他人應該唔知我噏乜, 但對於有孖B的父母黎講, 一定好有同感! 而呢句説話, 應該係我同老公呢2年7個月內講得最多的其中一句"感嘆句"!

由於冇湊仔經驗, 亦好少同身邊朋友交流湊仔經(因為之前跟本係諗住呢一世都唔生仔, 亦唔好同我講, 我冇興趣知!), 到自己真係生咗仔先至知湊仔咁辛苦!

天意弄人, 我竟然生咗對孖B! 仲要係仔(雄性動物的普遍特徵包括: 發展遲緩, 理解力差, 精力旺盛, 好勇鬥狠, 撩事生非, 地盤意識強烈, 但危機意識極低 ... 等等)

係呢2年7個月的艱苦歲月中(精神經常處於崩潰狀態), 經常都幻想湊一個B會係點樣的情況, 好羨慕, 甚致妒恨(我承認自己有少少變態)街上果D湊單B的父母, 有時仲會有個工人同阿嫲/阿婆幫手, 四個人湊一個B, 個阿媽仲寸到揸住包薯片黎食! 條! 我出街次次都裙拉褲甩, 唔好話食薯片, 連飲啖水都冇手!

由於哥哥經常出入急症室, 醫院, 診所, 所以我同老公都有機會2個湊一個, 我地發覺, 湊一個真係曉飛! 可能平時訓練有素, 2個人湊一個B, 可以話係完全冇難度, 莫講話去日本旅行, 去冰島都得呀!

唉......

不過, 都係唔好成日咁講, 萬一真係得返一個, 我會傷心到崩潰!

孖寶兄弟2歲7個月零19日!

又update一下孖寶兄弟的成長概況!

2歲7個月的哥哥:

1)   開始識扭買玩具, 上次係日本城個廚窗見到有好多車車, 於是係咁拖住我入去舖頭入面, 話要睇車車, 然後好正經咁同我講: 「媽媽, 我想買車車!」, 我就好似一般阿媽咁同佢講, 你屋企已經好多車車喎! 然後抱起佢走, 佢大叫: 「未買車車, 未買車車, 媽媽, 我想買車車! 」繼而爆喊... 媽媽惟有抱佢去睇其他野, 分散佢注意力 (唉! 應該係嫲嫲成日話買車俾佢, 因為我同爸爸從未係佢面前買過車俾佢, 亦冇同佢講舖頭入面D車係可以買走)

2)   仍然係好錫細佬, 前日哥哥要去健康院見醫生做自閉評估(評估結果: 然然係一個正常的小朋友), 佢有幾個鐘冇見過細佬, 一返到屋企, 鞋都未除就攬實細佬。細佬唔見咗架藍色車車, 佢會即刻去幫細佬搵

3)   行街鍾意拖住細佬, 然後走走走, 走咗去... 爸爸媽媽係咁追都追唔切, 衰豬!

4)   識多咗好多野, 唔再係一舊飯, 唔知點形容, 例如: 尋日爸爸幫佢沖完涼, 佢扭計唔起身, 爸爸嬲到用水潑佢, 佢大叫: 「爸爸, 做乜用水潑哥哥呀? 」, 佢開始知道你咁做係唔錫佢...

2歲7個月的細佬:

1)   開始反叛, 細佬大部份時間都好乖, 但有時都會無啦啦扭計, 明明知道唔可以掉玩具落地下, 唔可以用豬仔車輾過D玩具, D飯唔可以周圍'high', 佢有時偏偏就做俾你睇

2)   呢排好想帶佢去旅行(其實一直都想, 好羨慕人地可以一家大細去日本), 同佢介紹乜野叫做去旅行, 佢就成日話自己乖乖, 可以去旅行喇! 但就唔肯乖乖影証件相申請passport囉!

3)   仍然係好細膽, 唔敢嘗試新野, 上星期日帶佢地去沙灘(諗住去玩水), 點知細佬全程喪喊, 扭抱, 唔肯落地接觸D沙

4)   好多時都肯讓D玩具俾哥哥, 因為哥哥一有少少唔合心意就大發雷霆, "典"地, 細佬見到哥哥咁樣, 都廢事同佢爭... 細佬好生性!