孖寶兄弟第三年過農曆新年喇!

孖寶兄弟今年2歲, 但已經係第三年過農曆新年喇!!!

今年帶佢地周圍去拜年, 已經冇往年咁辛苦, 因為:

1.  佢地已經識行識走, 唔駛成日抱(扭抱除外)

2.  冇以前咁驚陌生人 (以前一有陌生人接近就會響警鐘 -- 爆喊!)

3.  唔駛食粥仔, 唔駛定時定候飲奶, 可以食大人飯 (出街基本上帶D水同食具就可以, 最緊要帶足夠尿片, 因為仲未識去廁所, 唉!), 出街食飯一定要食麵麵(BBS所指的麵麵泛指所有條狀的澱粉質, 包括拉麵, 烏冬, 米線, 意粉, 粉絲...etc.)

4.  下午茶唔一定要飲奶, 所以唔駛帶熱水奶粉沖奶, 求其一人一包鈣思寶又得, 果汁又得, 唔飲都得(唔好提佢地就得喇!)

又Update一下孖寶兄弟的近況:

兩兄弟越黎越痴媽媽, 因為媽媽真係好錫佢地, 佢地係感受到, 媽媽成日陪佢地玩, 又講故事, 又同佢地一齊睇相相, 每晚都暗佢地瞓覺 (而爸爸只係間中陪佢地玩, 佢大部份時間都呢埋係佢個workshop入面唔知搞乜), 所以兩兄弟有咩事都搵媽媽, 包括:

1.  媽媽去廁所, 去刷牙都要跟埋入去
2.  媽媽係廚房整蛋糕, 切生果, 又要搬張凳企埋上黎睇
3.  跌親撞親要媽媽抱抱錫返
4.  出街要媽媽拖住
5.  瞓覺就係咁話要媽媽陪你(我)
6.  俾爸爸鬧時就更加要搵媽媽求救 (媽媽雖然心痛, 但都唔可以出手, D人話老公教仔, 做老婆既唔可以出聲維護個仔, 如果唔係, 個仔大個咗唔識得做男人喎!)

所以媽媽成日都同爸爸講, 你唔夠我鬥架, 爸爸! 你睇2個B幾痴我, hoho...

孖寶兄弟最近多咗好多互動, 包括:

1.  一齊玩Thomas火車
佢地簡直就係超級Thomas粉絲, 過年前買咗套Thomas火車路軌俾佢地玩, 佢地好鍾意砌路軌, 玩得好開心, 不過玩玩下又爭火車, 一係就話人地阻住佢架車行!

2.  一齊周圍走
臨瞓前好鍾意係走廊走黎走去, 兩兄弟你追我續, 玩得好開心, 尋晚仲一齊扯起件底衫露肚臍, 細佬仲篤哥哥肚臍, 然後兩個笑到卡卡聲!

3.  鬧交
呢個都係兩兄弟的互動之一, 成日都用說話挑釁對方, 通常都係話對方曳曳, 務求令對方發脾氣為止 (以細佬挑釁哥哥居多, 細佬試過發開口夢都話哥哥曳曳)!

4.  分享
正常的小朋友係唔會識得分享! 惟有爸爸媽媽多D教佢地兩兄弟要有福同享, 相親相愛, 所以有好野玩, 有好野食, 有書書睇, 媽媽都會叫佢地自己拎一個, 然後俾一個哥哥/細佬; 哥哥/細佬喊, 就會叫另一個安慰佢, 叫佢唔好喊; 希望慢慢教佢地兩兄弟要互相扶持!

孖寶兄弟的語言能力繼續進步, 尤其係細佬, 細佬識講再長一D的句子, e.g. 媽媽買蛋撻返黎俾逸逸食, 另一方面, 佢開始識得講出自己的不滿(唔再用喊黎表達), e.g. 唔食飯, 唔瞓覺, 媽媽曳曳抱哥哥, etc.  至於哥哥, 成日都有幾句口頭禪, e.g. 俾哥哥好唔好? 黑蚊蚊點解? (成日都話黑蚊蚊, 唔係佢對眼有事丫嘛?!)

牛油曲奇

牛油曲奇材料（約18塊5cm直徑曲奇的份量）

1. 牛油80g
2. 糖霜40g
3. 蛋黃1隻
4. 低筋麵粉160g

做法：
1. 牛油放室溫打軟
2. 加入糖霜打勻（要打到奶白色）
3. 分3次加入蛋黃（每次都要搞勻）
4. 分幾次篩入低筋麵粉（用橡皮刮刀撈勻）
5. 將麵團用保鮮紙包好，放入雪櫃雪至適當硬度(約20分鐘)
6. 用餅模印出曲奇形狀
7. 預熱焗爐170℃，焗18分鐘至金黃色
8. 焗完打開少少焗爐，等曲奇慢慢變涼會再脆D

貼士：
一定要用電動打蛋器打牛油同糖，一定要打得夠，感覺混合物體積變大（目的係打空氣入去，曲奇先至會脆）

好唔想返工!

仲有3日就過年喇! 媽媽返到公司簡直係唔想做野, 加上爸爸自從上星期四就請假, 每日都得返媽媽一個返工, 所以媽媽返到公司都冇咩心機做野!

尋日又試吓帶孖B返Church, 當然又係媽媽留係BB房(其實教會唔鼓勵咁做), 爸爸就出大廳(聚會), 哥哥今次的表現簡直要俾個Like佢! 話說爸爸要去泊車, 媽媽就帶孖B上去先(當然要同佢地講清楚, 爸爸去泊車, 一陣會上黎, 仲要正式bye bye咗先啦!), 哥哥好冷靜(仲以為佢會爆喊搵爸爸), 反而細佬一行到入教會, 就即時爆喊話要搵爸爸, 入到BB房, 媽媽惟有拎盒餅餅出黎氹住細佬先, 哥哥反而自動波咁走去拎玩具玩, 全完冇理過媽媽, 細佬大叫要出去, 媽媽惟有同哥哥講, 叫佢自己玩住先, 媽媽出去一陣, 後來爸爸上到黎抱細佬, 媽媽入去BB房, 見到哥哥仲係自己玩緊, D姨姨話哥哥冇喊過, 冇扭過要媽媽, 勁!

細佬可能太早起身, 唔夠瞓, 本身狀態已經唔係咁好, 所以全程扭, 就算媽媽留係房度, 佢都係咁要出去。媽媽亦曾經嘗試離開一陣, 但細佬喊到豬頭咁, 反而姨姨話哥哥都有搵過媽媽, 但後尾又唔記得咗, 又走咗去玩!

兩兄弟, 實在各有各優/缺點, 哥哥雖然理解能力差D, 但勝在面對大場面都處變不驚(佢最近已經唔再驚爸爸的"黑房"酷刑, 仲覺得好好玩, 自己走入去閂埋門, 死未?!) 細佬雖然講野叻又聽話, 但就好痴身同細膽, 爸爸媽媽行開一陣都唔得, 唉!

Bed Time, Story Time!

所有育兒書, 早教書, 幼兒工作者的文章都一面倒叫父母一定要陪養孩子從小閱讀的習慣, 連唔知衞生署定健康院都有小冊子叫父母要陪小朋友閱讀, 群眾壓力之下, 好啦! 我呢個最憎睇書讀書的阿媽(雖然本身有2個Master, 一個Degree, 但最憎讀書!), 都要去圖書館借返幾本故事書, 就係咁, 開始咗每晚bed time story的時間, 當然, 無啦啦要2隻百壓星坐定定聽阿媽講野, 實在好有對牛彈琴的感覺!

話說由於細佬仔的理解能力比哥哥高, 所以理所當然, 細佬會比哥哥專心D聽媽媽講故事! 今次媽媽借咗3本處境故事書同埋3本Thomas書, 2兄弟一見到Thomas個樣係個封面度, 已經大叫同開始搶媽媽手上的Thomas書, 幾經辛苦, 媽媽先至可以重拾主導權, 開始講故事, 不過, 故事寫得好差, 唔知講乜, 亦唔知有咩教育意義, 不過, 2兄弟真係Thomas & Friends的超級粉絲, 睇住D火車頭, 雖然唔知講咩, 但係已經好興奮, 愛不釋手!

至於其他的處境書, 包括一個小朋友做主角的生日會, 同埋用雀仔, 鴨仔做主角的故事書, 細佬就比較有興趣, 講咗2次, 細佬己經記得主角個名, 至於哥哥, 仍然係指住隻雀仔話係飛機(我暈喇!)

不過, 總算開始咗Bed Time Story的習慣, 又多咗一個親子活動, 雖然阿媽仍然未能夠體會閱讀究竟有咩好處(阿媽唔鍾意睇書讀書, 都一樣可以有2個Master, 又有份唔錯的工!)

題外話, 講開閱讀, 上次帶孖B去書局打書釘時(我從來唔認為有必要用錢買書睇, 去書局睇或者去圖書館借就可以了!),  遇到有個怪獸阿媽, 好緊張咁幫個仔(應該大我2個仔少少)揀書, 又話有D書好白痴, 又話一定要買呢本書, 仲係咁拎D書去個仔面前, 叫個仔盡快講係咩黎, 係咩黎(xN次), 個阿媽仲差D撞到另一個路過的小朋友, 原來世界上真係有呢D怪獸家長, 聞名不如見面啊! 我只覺得佢個仔好慘, 黎睇書好似參加緊問答比賽咁, 我見佢個仔唔多想答佢阿媽, 反而我2個仔一打開本書, 就係咁話我聽: 車車car, 魚魚fish... (高下立見啦! 我好肯定我而家的教育方法好啱我2個仔同我自己, hoho!)

恩典? 天譴?

話說孖寶兄弟對媽媽黎講, 實在又愛又恨!

理性上, 媽媽知道孖寶兄弟實在係上主賜的double blessing, 因為100個孕婦之中只有1個懷孖胎, 機會率係1%, 咁都俾我中到, 我仲要本來係不育的(因為有朱古力瘤), 所以實在係恩典! 由懷孕, 生產到孖寶兄弟而家2歲, 睇住佢地健健康康(雖然冇母乳飲, 但唔算多病痛), 正正常常(唔係畸型, 唔係弱智), 得得意意(哥哥好靚仔, 細佬好醒目), 實在係恩典!

不過, 更多時候, 媽媽簡直覺得孖寶兄弟係上天派黎懲罰我的!  包括:

1. 陀孖B超級辛苦, 人地單B媽健步如飛, 仲話唔捨得BB咁快離開自己個肚, 我陀孖B到28周之後基本上已經行唔郁, 去邊都要用雙手捧住個肚, 瞓唔安, 食唔落, 半夜只係可以坐係sofa度瞓, 自覺同末期病人冇乜分別, 簡直想割開個肚拎2個B出黎, 孖寶兄弟似乎係上天派黎懲罰我之前一直做公主!

2.  每個動作都要重複做2次 (換片, 餵奶, 餵夜奶, 沖涼, 餵飯, 抱抱, 暗瞓覺, etc.), 上天驚湊一個B湊會平宜咗我, 要我同一時間湊2個, 辛苦到嘔血, 簡直就係天譴!

3.  (成日喊 + 扭計 + 唔聽話  + 唔肯瞓覺 + 百厭 + 搞搞震 + 爭玩具 + 爭寵)X2 =(勞氣 + 激氣 + 嘥氣) X2, 睇你今次仲唔死? 人家一個B又乖又唔扭計, 我打孖黎, 仲要係咁難服待又唔肯合作, 簡直就係天譴!

4.  其中一個瞓瞓吓覺時發惡夢爆喊, 就會好驚嘈醒埋另一個, 搞到每日都活係徨恐之中, 簡直就係精神折磨, 咁仲唔係天譴?

5.  所有開支都要X2, 冇得好似人家咁, 執阿哥家姐D舊衫舊鞋著, 簡直就係騎刧緊我荷包, 係唔係要懲罰我收入多過人?(多少少咋喎!)

孖寶兄弟26個月喇!

最近, 孖寶兄弟迷上咗Thomas&Friends, 每日開機(睇電視)已經唔再想睇兒歌, 而係一定要睇Thomas (睇到連下一句對白講乜都記得, 最叻講: One Day), 當然連劇情都記得啦 (最叻話人倒瀉奶奶)

佢地本來以為所有火車頭都叫做Thomas, 但後來睇電視, 加上爸爸成日教佢地, 佢地而家已經認得好多車名, 包括Emily, Henry, Gordan, James, Percy, 至於肥肥地果個火車公司老闆, 佢地就叫佢做"公公"

上星期日帶BBs去玩具反斗城, 佢地一行到去Thomas個貨架, 就唔捨得走, 好在, 佢地唔知道D玩具係可以買返屋企, 佢地未有購物呢個concept, 佢地仲係以為玩完D玩具要執返好, 所以仲未識扭買玩具, 每次都可以順利離開, 反而係爸爸媽媽見佢兩兄弟咁鍾意, 都心郁郁好想買俾佢地玩, hoho...

自從上次有朋友分享, 佢個女之所以每晚可以10點就瞓, 係因為曾經困過佢係黑房, 之後就變得聽聽話話, 所以爸爸最近都好鍾意困佢地入黑房(當然係因為扭計, 喊唔停, 或者唔願瞓覺), 媽媽咁錫佢兩個, 當然唔忍心落手啦! 所以通常都係爸爸出手, 不過, 睇得出爸爸都好心痛, 通常困一陣就放返出黎, 錫返佢, 同佢講要乖乖!

細佬仔見到哥哥俾困就會幸災樂禍, 陰陰咀笑; 哥哥見到細佬困黑房就好驚下個會輪到自己, 佢會即刻合埋對眼(好實), 問佢係唔係唔瞓覺呀? 入黑房陪細佬囉! 佢就好驚咁話: 唔係! 唔係! (笑死我)

對我黎講, 湊仔最辛苦係"餵飯"同"暗瞓覺"呢兩個環節, 每晚我同工人都會一人餵一個, 其實佢地開頭都肯自己食, 只係食食吓就搞呢樣搞果樣, 唔肯自己食, 由於要餵完佢地, 我先至有得食, 所以晚晚都係食埋D冷飯菜汁(我覺得自己同工人冇分別!)  每晚最辛苦就係暗瞓覺, 因為十晚有八晚, 佢地都係唔願瞓 (已經11點先至焗佢地瞓), 我其實係早瞓的人, 通常10:30已經好眼瞓, 仲要同工人一人暗一個B瞓覺, 我好多次都係自己瞓著咗, 但個仔仲未瞓囉!  尋晚試吓唔暗, 只係熄燈, 陪佢地一陣, 跟住同佢地講, 媽媽都要返隔離房瞓覺喇! Good Night! 佢地又好似好順攤咁, 冇扭計, 自己瞓喎! 今晚再試吓先!