孖寶兄弟23個月喇!

今個月, 孖寶兄弟的語言發展突飛猛進, 尤其係細佬仔, 以前只係識講疊字, (例如: 爸爸, 媽媽, 嫲嫲, 姐姐, 車車, Nick Nick, 飯飯, 麵麵, 餅餅, 水水), 今個月開始識講2個字 (例如: 巴士, 的士, sit down, 熄燈, 開燈, 開機, 快D, 蘋果(細佬無啦啦係幼稚園interview時識得答老師果個係蘋果, 勁!), 揸車, 飛機, 廁所, 瞓覺, 沖涼)

最近呢幾日, 我發覺佢地開始識得連埋個動詞一齊講, 例如:
- 斟水水
- 飲奶奶
- 坐靚靚
- 食飯飯
- 冇晒餅餅/飯飯
- 摸摸Nick Nick
- 落地地

有一晚, 哥哥無啦啦講咗3個字: "Tom乜C" (原來佢係講緊佢架Thomas火車), 原來BBs係不知不覺間會學咗我地講既野

上次interview個老師話唔好再同佢地講疊字, 因為佢地已經識得連續發幾個音, 例如: 唔好叫蕉蕉, 係香蕉, 所以我呢排都特別教細佬講多D兩個字的詞語(哥哥冇心機學, 坐唔定, 教唔到), 例如: 提子, 粟米, 番茄, 薯仔, 牙刷, 牙膏, 蛋糕, 蛋撻, 火車)

值得一讚係兩個都識講自己個名, 同識得講自己兩歲! 對於未夠2歲的小朋友, 仲要唔足月出世黎講, 又係男仔(語言能力較女仔差), 媽媽已經覺得佢地好叻叻!