孖寶兄弟9個月喇!

雖然佢地比同月齡既bb細粒（爸爸成日話：孖胎喎, 你想點呀?冇得同人比較！），不過，睇住佢地健康，正常，仲好開心咁成長著，媽媽開始覺得好幸福，而呢份幸福仲要係x2！ 其實由知道係孖胎開始，媽媽都未真正開心過（詳情請參考「孖B媽懷孕周記」），更加從來唔覺得陀孖胎有幾幸福，整個懷孕過程都只係 = (擔心+辛苦) x2，到BBs出世，又係另一個惡夢的開始，初頭幾個月簡直可以用"非人生活"黎形容，每日就係湊仔，活著唔再有生活，只係為咗生存，仲搞到出現產後抑鬱．．．．．有次出到街見到人地兩公婆湊一個B，仲輕鬆到一邊換片一邊打情駡俏，我係佢地隔離餵緊細佬飲奶，爸爸就係外面照顧緊哥哥，果刻我簡直覺得果兩公婆係度showoff，火都黎埋，心入面一直都問：「點解我要係2個？」 痛苦的日子過得特別慢長（爸爸話：好似過咗幾年咁耐！）媽媽簡直覺得渡日如年，回想起初頭幾個月，最辛苦莫過於要餵夜奶，頭一個月爸爸請咗假陪媽媽坐月，所以餵夜奶都係並肩作戰，一人餵一個，有時會開收音機聽，有時會開電視睇，其實而家諗返，果段日子都幾開心架！不過，後來爸爸開始要返工，於是爸爸夜晚餵11-12點，媽媽早ｄ瞓，準備半夜2-3點起身餵奶，一個人餵兩個真係好攞命，哥哥飲奶都算快，通常10-20分鐘都搞掂，但係要掃風，掃風時間通常都比飲奶仲要耐，掃完風仲要抱住佢坐一陣，唔可以即刻瞓低，唔係會嘔奶窒息，好危險，用咗一個鐘左右搞掂咗哥哥仲未可以瞓，因為仲有細佬仔，細佬仔飲奶超慢，仲要每餵一安就要掃一次風，因為佢好易嘔奶（仲要係由個鼻度噴返出黎，好得人驚！）通常餵細佬都要超過一個鐘，萬一孖寶兄弟唔生性，飲完奶眼光光瞓唔返，仲要暗佢地瞓，搞搞吓，咁就搞咗成3個鐘，真係天都光埋！（註：初生BB每隔3小時就飲一次奶，即係話又夠鐘餵下一餐奶．．．．．．）