孖寶兄弟9個月喇!

雖然佢地比同月齡既bb細粒（爸爸成日話：孖胎喎, 你想點呀?冇得同人比較！），不過，睇住佢地健康，正常，仲好開心咁成長著，媽媽開始覺得好幸福，而呢份幸福仲要係x2！ 其實由知道係孖胎開始，媽媽都未真正開心過（詳情請參考「孖B媽懷孕周記」），更加從來唔覺得陀孖胎有幾幸福，整個懷孕過程都只係 = (擔心+辛苦) x2，到BBs出世，又係另一個惡夢的開始，初頭幾個月簡直可以用"非人生活"黎形容，每日就係湊仔，活著唔再有生活，只係為咗生存，仲搞到出現產後抑鬱．．．．．有次出到街見到人地兩公婆湊一個B，仲輕鬆到一邊換片一邊打情駡俏，我係佢地隔離餵緊細佬飲奶，爸爸就係外面照顧緊哥哥，果刻我簡直覺得果兩公婆係度showoff，火都黎埋，心入面一直都問：「點解我要係2個？」 痛苦的日子過得特別慢長（爸爸話：好似過咗幾年咁耐！）媽媽簡直覺得渡日如年，回想起初頭幾個月，最辛苦莫過於要餵夜奶，頭一個月爸爸請咗假陪媽媽坐月，所以餵夜奶都係並肩作戰，一人餵一個，有時會開收音機聽，有時會開電視睇，其實而家諗返，果段日子都幾開心架！不過，後來爸爸開始要返工，於是爸爸夜晚餵11-12點，媽媽早ｄ瞓，準備半夜2-3點起身餵奶，一個人餵兩個真係好攞命，哥哥飲奶都算快，通常10-20分鐘都搞掂，但係要掃風，掃風時間通常都比飲奶仲要耐，掃完風仲要抱住佢坐一陣，唔可以即刻瞓低，唔係會嘔奶窒息，好危險，用咗一個鐘左右搞掂咗哥哥仲未可以瞓，因為仲有細佬仔，細佬仔飲奶超慢，仲要每餵一安就要掃一次風，因為佢好易嘔奶（仲要係由個鼻度噴返出黎，好得人驚！）通常餵細佬都要超過一個鐘，萬一孖寶兄弟唔生性，飲完奶眼光光瞓唔返，仲要暗佢地瞓，搞搞吓，咁就搞咗成3個鐘，真係天都光埋！（註：初生BB每隔3小時就飲一次奶，即係話又夠鐘餵下一餐奶．．．．．．）

已經2個月冇出街喇!

上次個工人四月中辭職走佬, 當時又未搵到新工人, 拿拿林搵咗個親戚過黎, 同奶奶拍檔湊孖寶, 不過只限星期一至五, 所以到咗星期六,日, 我同爸爸就變咗湊仔婆同湊仔公, 要出街的話, 就一定要帶埋BBs, 所以當時已經練成一身好本領, 帶BBs出街冇難度 (不過, 當然係好辛苦啦!) 自從新工人5月尾黎咗之後, BBs只係6月出過3次街, 包括一次去Studio影全家福, 一次去表哥係麥當當搞o既生日會, 以及一次去健康院打針針, 自始之後, 每次媽媽話想帶BBs去街街, 爸爸都會話: 唔好喇掛! 盞得搵黎搞! 搵自己笨!

結果, BBs2個月都冇出街見過人, 惟一有2個好處:

1. BBs好少病 (因為少出街接觸病菌, 不過, 恐怕長此落去會不堪一擊, 少少病菌都冇扺抗力)
2. BBs皮膚好好好白 (我出街見到其他bb, 冇bb好似我對孖寶咁白, 因為完全冇晒過太陽, 死啦! 都唔知會唔會骨質疏鬆添呀!) 

所以媽媽每個星期都會游說爸爸, 不如帶BBs出街, 吸吓菌, 等佢地扺抗力高d, 又可以見多d人, 等佢地冇咁驚人啦! 經過2個月既游說, 爸爸終於say yes, 尋日(星期日)帶咗BBs去玩具反斗城買玩具 (不過, 爸爸仍然有微言, 佢話: 你驚遲d佢地唔會lur住要去玩具反斗城咩?) 不過, BBs有機會出街, 媽媽真係"鄧"佢地好開心呀! 似乎最開心果個應該係媽媽, 因為BBs 似乎對出街冇咩反應, 哥哥仲係中途瞓著咗添, 爸爸仲係等lift 時暗寸媽媽, 快d 擰架bb車對住d人群, 等佢見多d人嘛! (註: 哥哥當時已經瞓到不醒人事!) 咁難得先至爭取到可以出街, 當然要影返張"到此一遊"啦! 不過, 哥哥就.... 呆晒!

媽媽的煩惱 - BB濕疹(4)

由8月2號帶2隻豬仔去睇醫生, 斷斷續續幫佢地搽類固醇已經有2星期喇! 而家報告返佢地既情況:

細佬仔
好返9成, 只有淡淡的紅印, 但整體黎講, 都可以叫做皮光肉滑, 靚仔返晒! 不過, 之前停咗2日又起過, 又要再搽返, 爸爸話今次一定要搽到連印都冇先至好停喎, 但係, 阿爸爸呀! 已經搽咗2星期喇! 醫生話最耐只可以搽10幾日... 我應該點做好呀?

哥哥
本來好返9成, 早2日停咗冇搽又起返, 左面本來只係有幾點紅色, 所以搽類固醇都只係點幾下, 點知... 星期一放工返到屋企, 哥哥半邊面變咗燒豬, 唉! 點解會咁架? 搽類固醇好似仲發得勁咗, 定抑或因為星期六食咗三文魚粥粥呢? 結果尋晚, 爸爸決定唔再同哥哥搽類固醇, 改為只係搽Aqueous Cream (每2小時1次, 仲要大大pat咁搽, 搽到好似人地日本藝技咁), 睇吓過2日情況點樣, 到時再決定搽咩? 唉! 到時仲可以搽咩? 我都唔知...

不過, 呢2日, 媽媽終於諗通咗! 雖然BBs面上d 濕疹真係好困擾媽媽, 但係相比其他疾病, 濕疹真係好小事! 爸爸成日都話冇生命危險咪得囉! 其實都唔係冇道理, 換個角度諗, 佢地係孖胎, 能夠平安出世, 雖然唔係好足月(36周4), 但係都算足磅 (每人5磅), 又健健康康, 正正常常咁成長, 應該要感恩!  其實BBs既濕疹唔算最嚴重, 因為嚴重係流膿出血水, 佢地又唔算好辛苦(因為我冇乜見佢地話好痕, 要不停咁抓面, 佢地捽面都係因為眼瞓, 亦冇話半夜痕到瞓唔到)! 爸爸仲話, 媽媽唔開心, 佢地會feel到! 我都同自己講, 點解要將個focus 擺係佢地塊面上面d 濕疹, 而唔係將focus 擺係佢地既開心笑臉上面呢? 每次返到屋企, 佢地見到爸爸媽媽都會好興奮, 哥哥會手舞足蹈, 細佬會尖叫, 媽媽要好好記住佢地2個天真可愛既笑臉!

媽媽的煩惱 - BB濕疹(3)

搽咗5日類固醇，哥哥右邊面好返9成（左邊面因為冇搽，所以仍然爛面，仲好似越爛越大範圍，所以尋晚惟有幫佢搽埋左邊面），細佬仔2邊面眼肚對落ｄ濕疹都好返7788，但係2個面朱登搽咗癬膏5日，都未有好轉（初頭2日搽咗癬膏真係冇咁紅，但之後就越整越紅同大範圍咗），所以尋晚都開始搽類固醇！有人話類固醇係糖衣毒藥，我唔否認，因為搽咗真係會好返，不過會翻發，所以好返之後，惟有繼續不停咁搽cream，補濕！補濕！補濕！不過，狂搽cream都係會出事，因為天氣熱，加埋搽cream，搞到佢地塊面仔出晒紅點點．．．唉！即係搽又死，唔搽又死！

上星期六BBs 8個月大！媽媽開始幫佢地轉食2餐固體（加3餐奶），不過，要諗每日每餐要食唔同既粥仔，真係諗到頭都爆！加上佢地濕疹底，嘗試新食物都要好小心，萬一食咗爛面就大鑊！所以呢個又成為媽媽另一個煩惱！由BBs 6個月開始試食糊仔粥仔以黎，佢地只係食過以下既食物：

南瓜（第一種嘗試的蔬菜，但細佬好似對南瓜敏感，食完塊面多咗好多一撻撻紅色）
番薯（番薯有時煲粥，有時整奶米糊）
薯仔
節瓜（仲以為冇乜味，佢地唔like添，但工人話佢地好鐘意食，仲食得好快！）
甘筍（通常配雞肉煲粥，我食過，好好味）
菠菜
菜心
西蘭花（哥哥唔鐘意食，可能因為texture）
香蕉（要黎整奶米糊，但係我試過一啖，勁甜！每星期只可以食一次）
豬肉
雞肉
馬有魚（成煲粥腥到丫！但係佢地竟然都肯食，真係好乖）
三文魚（都係成煲粥勁腥，但佢地照食）

其實BBs係食粥呢方面真係好乖，聽人地講佢地d BB唔鐘意食會吐返出黎，so far 孖寶兄弟都好俾面，煲乜食乜，只係哥哥有時眼瞓，食食吓瞓著咗，或者食到一半就瞻天望地，食唔晒，而細佬就係為食仔一名，有幾多就食幾多，仲要餵慢ｄ都發脾四既！

其實好想試吓俾佢地食粟米，甜甜地，我諗佢地會好like，但又驚佢地敏感，仲有蛋黃，好有營養，但係又驚食完會爛面！  

媽媽的煩惱 - BB濕疹(2)

話說上星期一開始，BBs d 濕疹越整越嚴重，媽媽真係束手無策，已經狂搽cream，細佬搽咗5日類固醇都係冇好轉，哥哥又無啦啦爛面 (其實佢自從4月以來都己經冇搽過類固醇, 仲以為佢唔會再出事添)，好在媽媽平時都有mark低佢地飲奶, 食野, 作息同埋塊面面既情況。翻查記錄，佢地剛剛10日前轉2號奶粉（其實媽媽一直都唔想轉，因為上次轉食雪X奶粉，結果10日後出事，2個塊面都變咗燒豬，但係爸爸成日話2號奶粉每罐平30蚊，營養又好d，我真係好後悔冇堅持唔轉奶粉）由於時間吻合，我好懷疑今次都係轉奶粉出事！

到上星期五，媽媽朝早起身，發現孖寶兄弟面上d濕疹突然惡化，嚇到真係想喊，於是拿拿淋拍醒爸爸，提意打電話返公司請假，即刻帶BBs去睇醫生。其實媽媽當時個心已經急到想喊，但知道喊住去同爸爸講，一定俾佢話我short short地，甚至唔肯合作帶BBs睇醫生，所以我惟有壓低聲線，扮冷靜同佢講（都唔明點解做老豆見到個仔塊面爛晒，都唔覺得有問題？）。爸爸“唔“咗一聲表示唔反對，於是我打蛇隨棍上，提意食返1號奶粉（雖然食1號細佬都係爛面，但起碼救返哥哥先啦，佢食1號只有輕微濕疹，通常狂搽cream一星期左右都會好返）。不過，如我所料，爸爸唔同意轉返1號，果一刻，我真係忍唔住喊出黎，點解BB食1號好好地，你為咗平30蚊要搞到佢地爛面呢？我真係好唔明！！！雖然好多人話濕疹唔關食物事，但只要有機會幫到既辦法（當然要安全啦），點解唔試呢？（同埋跟本唔係試新辦法，只係食返原先隻奶粉啫，no harm!）

拿拿林打電話去診所，約11:30am去睇醫生，本來寫低咗好多野想問個醫生，但係個醫生跟本就唔聽我描述BBs個病情，只係一味講濕疹係乜野，我好辛苦先至插到咀問咗幾個問題：

我：轉返1號奶粉得唔得？
醫：我食人奶食到3歲，冇轉過奶媽
我：咁轉食豆奶會唔會有幫助？
醫：如果佢地係全身都生晒濕疹，我會建議你試吓轉豆奶
我：細佬搽類固醇都好唔返喎
醫：我都係開類固醇
我：咁類固醇最多可以搽幾耐？
醫：冇話搽幾耐，可搽可唔搽，因為類固醇唔係醫好佢既，不過你話搽類固醇都好唔返，可能係生癬，我開d癬膏俾佢搽

睇完醫生，媽媽既心情都冇乜好轉，可能因為又係搽類固醇，又冇開到咩消炎呀，止痕呀咁... 唉! 算啦! 睇西醫就預咗係咁樣！之後同爸爸去藥房，用2罐2號換返豆奶，但係又驚2號豆奶蛋白質高，又係爛面，結果換1號豆奶！

由BBs2個月開始起濕疹以黎，媽媽已經不停上網搵濕疹資料，淨係補濕cream都買咗好多隻:

1)  Vaseline - 成份最簡單，冇藥性，最適合初生BB用，但真係好油，搽到油光滿面咁，顯得ｄ濕疹更加嚴重，夏天搽仲會起晒紅點點
2)  Aqueous Cream - 成份簡單，適合初生BB用，但係唔夠潤，搽一陣就乾返晒
3)  Cetaphil - 媽媽自己都用開，搽面好潤，聲稱搽一次有效24小時，但係BBs越搽越紅
4)  Physiogel Cream - 已經用咗一支，叫做都有效，哥哥試過搽呢隻野好返，唔駛搽類固醇，不過，呢排好似已經唔work
5)  Physiogel AI Cream - 好多媽咪推介，見紅即用，可惜我2個BBs 越搽越紅，唔敢再試
6)  Sorbolene Cream - 醫生開的，上網check過係澳洲好common，而且經濟實惠，哥哥初頭都ok，一個星期後越搽越紅，所以都唔敢俾細佬繼續用
7)  椰油 - 用哥哥半邊面做白老鼠，搽咗一個星期好返，不過可能太油，起晒粒粒，細佬就越搽越紅
8)  馬油 - 一搽即紅，嚇死媽媽，即刻要用濕棉花幫細佬抺返走

如是者，支支cream都只係用到一半，搞到而家成屋都係cream．．．．．．

網上話濕疹成因不明，但好大可能係同遺傳有關，喂！我同老公都冇濕疹，又冇鼻敏感、食物敏感之類，點解２個仔會有濕疹架？仲話好多BB都有濕疹，唔駛擔心，但係我身邊朋友既BB個個都皮光肉滑囉，而家出街都會望多兩眼人地d BB, 又係皮光肉滑！點解只有我2個BBs塊面咁架？每次諗起個心就那住那住！

唉！而家惟有寄望佢地大個ｄ，免疫力系統成熟ｄ，冇咁敏感，ｄ濕疹會慢慢變得冇咁嚴重同冇翻發得咁密啦！（都唔奢望會完全好返）

後記：
終於發現幕後真兇喇！應該就係．．．．．．爸爸！（因為奶奶同我講，唔駛擔心架！你老公細個果時都係咁架，我都係幫佢搽類固醇之嘛，佢一紅我就幫佢搽架喇！）啊！真相大白．．．．．．  

媽媽的煩惱 - BB濕疹

最近為著BBs的濕疹好煩, 好擔心, 好想喊! 冇呢個煩惱既人可能覺得我好白痴, 但係我好肯定, 面對同一個問題的媽媽, 十個有十個都會同我一樣, 想喊! 我仲要有兩個濕疹BB, 所以係想喊 x2 !

其實自從BBs兩個月開始, 塊面仔就紅卜卜, 起晒點點, 初頭以為係媽媽懷孕時d hormones 傳咗俾BBs, 過一排會好返, 加上當時冬天, 天氣凍, 不停幫佢地搽cream保濕, 結果都唔掂, 最後都係要睇醫生, 睇得醫生就預咗要搽類固醇, 不過, 類固醇真係好magic, 搽咗3至5日, BBs好返晒, 變返白白滑滑, 好kawaii 呢!

不過, 濕疹最煩惱既地方係會返發, 的確係! 哥哥好d, 可能佢身體免疫系統強d, 到而家只係搽過2次類固醇, 其餘時間, 雖然有時塊面仔都會鞋鞋地, 有少少紅, 但係幫佢狂搽補濕 (我通常係抺濕佢塊面仔, 趁塊面仲濕既時候, 就大大pat 咁搽cream上去, 通常一星期就會好返9成! 細佬就冇哥哥咁好彩, 我都唔記得咗幫佢搽咗幾多次, 最近一次病發係六月中, 開頭只係幾撻紅紅地, 跟住就越整越大範圍, 我真係好唔想同佢搽咁多類固醇 (幾乎每月總要搽一次), 所以我今次冇搽, 試吓用幫哥哥既方法, 唔work, 又試AI cream, 椰油, 但唔work, 仲越整越紅, 跟住又試吓寶貝濕疹膏, 初頭真係好magic, 即係唔紅, 連印都冇, 但係過咗兩日就慘lu, 越整越大範圍, 仲好似有個印咁, 唔退, 嚇到我拿拿聲唔敢再搽, 惟有死死地氣搽類固醇, 但今次連類固醇都唔掂, 己經搽咗5日, 只係初頭2日好似好d, 之後繼續搽己經冇反應, d印好似入咗皮層入面咁, 退唔到, 我真係好驚! 而家都知點算好.... 再睇西醫? 只會開隻更強力既類固醇! 試吓睇中醫? 我本身真係唔係好buy 中醫囉! (雖然我睇咗中醫, 飲咗7日中藥就bingo咗!)

早兩日, 連哥哥都出事, 塊面無啦啦紅咗一大撻, 我都決定唔到同唔同佢搽類固醇好? 趁佢初起, 搽咗控制住先? 還是好似之前咁, 試吓大大pat cream狂搽幾日, 睇吓會唔會自己好得返? 如果好唔返, 會唔會好似細佬咁, 拖咗成個月, 變咗爛面仔? 唉! 我就黎諗到人都顛喇!

而家每日放工返屋企都好驚, 好驚見到佢地塊面又嚴重咗, 佢地塊面好返d, 我心情就會好d, 一見到佢地塊面差咗, 我心情就直插谷底, 飯都冇心機食!

已經搽咗5日類固醇（每日3次），但係細佬仔塊面都係有印，好似ｄ色素食咗入皮膚入面，唔會退咁！好驚！

斷咗片差不多半年!

自從去年12月3號無啦啦緊急入院生咗孖寶兄弟之後, 一直都超級忙碌, 照顧佢兩兄弟真係心力交瘁, 簡直可以用"非人生活"黎形容我呢大半年的生活! 加上產假完咗, 返到公司突然變得好多野做, 所以跟本無時間寫blog, 今日終於都有少少時間, 當然係公司啦! 返到屋企唔好諗住可以有時間寫blog, 連去廁所, 沖涼, 食飯, 甚至瞓覺, 都要以"光速"黎進行, 無錯, 連瞓覺都係"光速"之下進行, 因為每晚都唔覺得自己有瞓過覺...

孖寶兄弟的近照 (左邊係"怒髮哥", 右邊係"抱抱龍")

產後抑鬱? (1)

2013年1月25日 (星期五)

今日好唔開心!

工人放咗假 (只係做咗3個月就可以放假, 只有我地咁好人既啫!) 奶奶返大陸, 老公本來話請假幫手湊BBs, 結果...... 早上10:30, 老公話落咗去停車場搞架車, 裝咩門邊LED腳踏, 一整就整咗成日, 只係lunch上黎食飯同洗咗BB衫, 我就一個人孤軍作戰, 一個人幫2個B沖涼, 餵奶, 呢個喊完到果個, 我真係心力交瘁!

黃昏6點, 老公返屋企, 佢本來話去買尿片, 結果冇買到, 但就俾我發現佢偷偷地買咗部SONY TABLET俾自己, 我果刻真係即時怒火中燒, 頭先話唔夠時間買尿片, 但竟然就有時間買「玩具」俾自己囉!

我湊住2個B, 辛苦咗成日, 佢就走去搞架車, 無無謂謂整D裝飾, 仲要lunch時, 我問佢, 可唔可以睇住2個B一陣, 我想飯後休息一個鐘, 佢竟然都係想落去整埋架車, 叫我自己瞓住黎睇2個B囉! 我真係好唔開心! 雖然最後佢都留咗係度1個鐘, 但果一個鐘, 我唔係要黎瞓, 係喊咗足足一個鐘!

自從12月頭生咗BBs以來, 老公己經駛咗好多"我地"既錢, 包括:

1. 買相機鏡頭(話影BBs)
2. 買車(我一直都話想等BBs3個月先去睇車, 結果, 要我坐月期間, 傷口痛住咁死去同佢去九展買車)
3. 換手提電話(成5000幾一部呀! 我為咗唔好蝕抵, 明明冇用, 都要同佢出埋同一部電話)
4. 換汽車音響
5. 今日又買部Sony Tablet

枉我就死慳死抵, 冇得請陪月, 搞到我好似冇坐過月咁, 冇得去私家院醫生仔, 要去政府開刀, 搞到而家個子宮縮唔返去個盆腔入面, 我就係咁慳錢, 佢就係咁駛錢!

我明白佢都好辛苦, 想買野俾自己氹吓自己開心, 咁我呢??? 我就咩都冇! 見朋友買禮物送俾剛剛生完BB既老婆, 多謝老婆咁辛苦! 但我老公就... 只係識得買野俾自己... 諗到呢度, 我簡直係嬲到忍唔住要爆!!!

結果... 當然係同佢吵大鑊啦! 老公差D掟咗哥哥落地下, 如果佢真係痴線到傷害我個仔, 我一定同佢死過!