觀望了一年多...... 終於入手......
好靚的硬咭紙袋
2023年11月27日 星期一
2023年8月16日 星期三
痘痘大作戰(?)
話說2020年尾(即兩年半前)開始爆瘡, 呢幾年間, 我試咗好多痘痘藥, 包括: BPO, 杏仁酸, 水楊酸, A酸(Differin).
去年5月開始搽Differin (係iherb買, $12x/15g, 我上個月先至發現係香港藥房買, $15x/30g, 我頂!)
搽咗Differin超過一年, 經歷過冬天乾到圍住個咀甩皮, 用溫和卸妝乳／敷保濕Mask都會刺痛, 去親做Laser都俾治療師話我塊面好乾好乾, 今年夏天, 我終於可以搽大大pat Differin都冇乾冇甩皮喇!
至於爆瘡嘅情況...... 每半年爆一粒, 咁算唔算係抗痘成功呢? (我覺得係回復返之前咁囉!) 對上一次嗰粒係舊年年尾去完名古屋之後生嘅, 至於而家生緊嗰粒就係今次去完北海道返嚟生嘅! 應該係因為去日本, 日日都食天婦羅、吉列......(咁其實我係唔係唔應該再去日本?)
其實, 我個額頭一直都有好多粒粒(由大學時期已經開始困擾我), 就算我搽咗Differin超過1年, D粒粒都係冇好過, 所以我嘅抗痘大業尚未成功, 仍須努力!
之前都有上網搵過杜鵑花酸(又叫做壬二酸), 台灣皮膚科醫生嘅常用藥, 但香港好少聽到。由於係香港藥房售賣嘅註冊杜鵑花酸都係Cream狀, 我驚會塞毛孔, 然後爆瘡, 所以一直都唔敢買嚟用。然後......突然間......有一日, 我的起心肝問樓下間藥房有冇AZECLEAR Cream (Azelaic acid 20%), 竟然有, 於是我就買咗嚟試!
我係每日早上洗完面之後搽, 初頭嗰1個月, 每次搽上去之後都會痕到叫救命(但唔可以抓!), 塊面仲要痕到係咁標汗(唔知點解?) 不過, 只要捱過半個鐘後就會唔痕架喇! 用咗1個半月, 我覺得額頭D粒粒好似少咗, 好似係! 網上資料話杜鵑花酸要3-6個月先至見到效果, 所以要耐心使用!
另外, 我每星期會用3次Ipsa磨砂膏去角質, 我覺得係有幫助嘅, 而家每朝早洗面時都感覺塊面嘅顆粒感少咗, 上妝都貼服咗嘅(我而家係用粉餅, 唔敢再用粉底液)!
7月尾去旅行期間, 細佬同我講佢個額頭爆咗幾粒瘡, 係喎! 又紅又腫又痛, 陰功豬! 其實佢個額頭由舊年12月開始已經生咗好多粒粒, 我都預計到佢有今日架喇! 然後, 我醒覺......痘痘大作戰又重新開始喇!
北海道15天親子閒遊之旅2023 - 感言
由北海道返嚟已經2星期, 都係的唔起個心肝寫遊記, 原因係:
1. 今次去咗15日, 要憶述+打返咁多日所發生的事情出嚟, 係一件好龐大嘅工程, 我每日都好唔想開始(拖延症患者)!
2. 去旅行之前, 我要一個人plan晒15日嘅行程, 仲要一邊plan, 一邊諗吓孖寶會唔會怨聲載道(因為北海道真係冇乜新奇、刺激又好玩的景點), 花田、博物館、水族館、動物園, 全部都唔可以寫入行程表, 請問我仲可以安排D咩節目呢?! (請高人賜教) 由於plan行程已經plan到虛脫, 我真係好唔想去完返嚟, 仲要打返晒呢15日做過D乜嘢出嚟! 咁即係延長痛苦, 虛脫x2
3. 今次旅行, 講唔上好開心(因為我睇唔到花田+買唔到衫), 至於孖寶, 亦講唔上好開心, 因為北海道真係冇乜新奇、刺激又好玩的景點, 媽媽盡晒力, 只係安排到Tree Top Adventure, 斜坡滑車, 騎馬, 划鴨仔, 吹玻璃, ATV越野賽車(係爸爸臨時係Google搵到), 其餘時間, 都係Hea掉了! 所以孖寶都應該唔係太開心! 由於今次冇一個人開心, 咁寫遊記都冇咩嘢好講, 如果只係記錄低每日去過邊度, 咁睇返D相都OK啦!
所以, 我都係唔寫喇! 多謝各位!
2023年4月17日 星期一
苦媽的無奈
我唔係虎媽, 係苦媽, 命苦個苦!
話說2018年6月, 我寫過一篇孖媽嘅無奈...... 郁D爆喊、發癲、發脾氣、發忟憎、埋怨、唔睬人、唔應人、唔理人、挑釁人、有仇必報、有交必嗌、有人唔順眼必打...... 孖媽當時已經覺得, 我已經盡晒力去教, 教到嘔血, 但孖寶都係好唔聽話, 好唔合作, 我教仔好失敗 -- 只有無限嘅無奈!
五年過去, 孖寶仍然係好難教, 好唔聽話, 好唔合作, 包括：
1. 問佢哋做晒功課未 --> 唔睬你 + 敷衍你 + 嫌你煩
2. 教佢哋做功課, 順便睇吓其他題目有冇答錯 --> 發忟憎 + 嫌你煩 + 覺得你阻住佢睇電視
3. 提醒佢哋溫默書／測驗 --> 發忟憎 + 發脾氣 + 覺得你俾壓力佢
4. 俾練習佢哋做 --> 發忟憎 + 埋怨 + 俾說話你聽 + 覺得你害緊佢
5. 星期六/日早上幫佢地補習英文 --> 發忟憎 + 覺得你阻住佢打機 + 覺得你嘥緊佢時間
6. 就嚟考試, 幫佢哋溫書 --> 發忟憎 + 發脾氣 + 覺得你想迫死佢
7. 好喇! 我唔迫你哋, 你哋自己自發性溫書啦 --> 埋怨你 + 覺得係阿媽小器 + 覺得係你唔負責任
8. 叫佢哋唔好打咁多機, 因為會近視 --> 鬧返你轉頭 + 覺得你剝奪咗佢嘅人生自由
9. 天氣凍, 叫佢著返件褸 --> 發忟憎 + 嫌你煩 + 覺得你迫佢服毒
10. 好喇! 我唔迫你哋, 唔著褸, 冷病咗唔關人事 --> 又係阿媽太小器
11. 唔奢望佢兩兄弟相親相愛, 但可唔可以和平共處呢? --> 擰轉頭唔夠30秒就鬧交, 家嘈屋閉
12. 帶佢哋去公園／會所Playroom玩 --> 一係就俾坐係隔離個阿媽投訴我嗰仔掟嘢, 一係就有小朋友走埋嚟投訴我個仔打佢, 每次聽到有小朋友喊聲, 我都好驚, 好驚又係我兩個仔打人
無論我講咩, 或者唔講咩, 做咩, 或者唔做咩, 都係我嘅錯...... 我真係唔識點教? (請高人指教)
我係實致名歸嘅苦媽! 真係好命苦!
好無奈! 唔知呢一份嘅無奈, 要延續到幾時呢?......
曾經......
我以為可以趁孖寶仲細個, 仲有得教, 性格呢D嘢仲有得改嘅
我以為可以幫孖寶補習, 等佢地英文個底打得好D
我以為孖寶有媽媽教做功課, 唔會好似媽媽當年咁徬徨無助, 會感到幸運
我以為發晒功幫孖寶溫考試, 成績應該唔會差得去邊
我以為肯俾錢俾機會佢地學嘢, 佢哋總有一天會學有所成
我以為佢地要走嘅路, 我都走過, 我想提點一吓佢地, 等佢哋走得順D
原來......
佢哋嘅性格係唔會改變, 惟有經歷人生嘅熬煉先至能夠令佢哋改變
佢哋唔係電腦, 唔係你輸入咗咩嘢, 佢就會出返D咩results
佢哋太有主見(唔似其他小朋友咁樣唔識反抗), 佢哋唔鍾意, 就算你肯俾錢俾機會佢哋, 都係嘥氣
佢哋唔會走你為佢哋安排嘅路, 你愛佢, 唔係指條正路佢行, 而係陪佢一齊行, 雖然明知係冤枉路, 係掘頭路......
2023年1月30日 星期一
痘痘大作戰(下)
話說2020年11月用錯粉底, 開始每個月額頭／下爬都會生一粒暗瘡, 然後2021年4月, 由額頭／下爬, 開始蔓延去面豬登, 我開始意識到「唔對路」, 痘痘大作戰 -- 係20年後的今天, 再一次係我人生中上演!
一開始, 我用第一線暗瘡藥物 -- Benzoyl Peroxide 2.5% , 但搽咗4個月, 我仍然係紅 + 腫 + 痕 + 甩皮, 我意識到我應該係對Benzoyl Peroxide過敏, 要轉藥。
之後, 我用過Salicylic Acid 2%, 係Stridex水楊酸棉片(紅色), 不過, 每次用都好"那痛", 我仲以為自己抹咗D硫酸上面, 佢個盒明明寫住Tough on Acne, Gentle on Skin! 我發覺明明寫住Gentle, 但對我嚟講都係"那"既 (上次嗰隻Cetaphil Gentle Scrub又係咁)。 我本來想用完一盒佢, 但真係頂唔順, 加上冇乜效果, 我放棄。
原來台灣近十年八年興用Mandelic Acid (杏仁酸), 聲稱係好溫和的AHA, 可以煥膚, 美白, 去印, 收毛孔, 減淡細紋, 天下無敵! 一開始係用Dr. Hsieh 10%, 不過, 用咗9個月, 額頭同塊面D粒粒都係時好時壞。加上後期我轉用Dr. Wu 18%杏仁酸, 好痕, 痕到半夜狂抓, 要起身洗面, 我放棄喇!
到2022年5月, 即係痘痘大作戰展開的一年後, 我決定出最後一招 -- Burn咗塊面佢 -- 用A酸! 20年前用第一代A酸(Retin A), 成塊面Burn咗, 好似燒豬咁, 甩晒皮! 20年後, 原來A酸已經進化到第三代(Differin), 聲稱有齊第一代A酸的好處, 但就溫和好多, 如果有技巧咁用, 有機會唔會Burn咗塊面。加上, 原來第三代A酸已經係2016年獲得FDA通過無須醫生處方, 係iherb就可以買到。
用咗Differin半年, 塊面仍然係有時起粒粒, 但唔會演變成暗瘡, 感恩! 至於個額頭, D萬年粒粒仍然係不動如山, 不過, 洗面時感覺成塊面的顆粒感明顯少咗! 下爬試過爆咗一粒瘡, 半年先至爆一粒, 已經好感恩! 至於Burn咗塊面, 竟然係冇發生到, 連紅咗都冇, 超級感恩! 不過, 好明顯, 塊面係好乾好乾, 乾到用卸妝乳會"那痛", 敷水份Mask都"那痛", 每次去做1064都俾治療師話我塊面好乾(xN次), 好煩!
2022年12月聖誕節去日本旅行期間, 唔知係天氣太凍／太乾／敏感, 我塊面狂爆粒粒(雖然唔係暗瘡, 但紅紅地, 唔痕唔痛, 我好驚會演變成暗瘡)。返到嚟香港, 我拿拿林瘋狂搽Differin(每晚大大pat搽額頭), 幾日後, 我發覺額頭上面D萬年粒粒竟然減少咗90%, OMG! 然後, 我連面豬登都大大pat搽落去, 幾日後, 連塊面D粒粒都消失咗七七八八!
經過1個月的瘋狂「療程」, 終於收拾返去日本遺留係我塊面上的殘局, 而家個心仍然係猶有餘悸! 不過, 正因為1個月瘋狂大大pat搽Differin, 我塊面終於都...... 甩皮!
想生瘡, 定甩皮? 好似一定要二選一咁! 究竟幾時先至唔會生暗瘡? 係唔係要生到70歲?
後記@2023.02.17
由於大大pat搽Differin, 我塊面終於都甩皮, 同埋乾到半夜好痕, 成日第二朝照鏡時就發覺抓損咗塊面, 於是我搽咗厚厚的Serum保濕, 結果, 額頭上面D萬年粒粒又出返晒嚟, 今次, 我決定由得佢乾到裂都唔搽保濕係額頭, 同埋每朝早用AHA敷額頭, 然後只係搽防曬, 一個星期後, D萬年粒粒竟然又消失咗90%!!! 我終於明白, 面上的粒粒, 應該係保濕過度。我而家的策略係, 情願塊面乾, 都唔好搽保濕, 除非乾到痕, 咁就冇辦法, 惟有局部搽少少保濕, 但臨瞓前盡量用紙巾印走佢!
另外, 早幾日開始試用Rachel Wine的礦物粉底, 佢聲稱不阻塞毛孔, 不致痘, 肌膚零負擔, 希望多管齊下, 可以唔再生暗瘡!
2023年1月26日 星期四
大阪&名古屋聖誕之旅2022 - Day 9
2022.12.30(星期五)
今朝7:30起身, 冇食早餐, 執埋D行李, 8:30 Check out, 去機場 (好在機場只係隔離, 行5分鐘就到)。
去CX櫃位Check in, 寄倉行李, 都唔駛排好耐!
由於我地唔夠醒, 所以要死死地氣搵個龍尾排隊, 好在都仲有少少時間, 排咗20分鐘(比我預期快)。
過咗海關同Immigration, 即刻狗衝去惟一一間手信舖買手信, 掃咗4盒Royce薯片, 2盒Tokyo Milk Cheese Factory, 另外買2盒唔知咩俾工人姐姐同老公D同事, 買唔到嘢俾我老母, 唉! 好似欠咗佢咁!
去到閘口已經冇時間, 要上機, 拿拿林去汽水機買咗支綠茶, 好口乾呀! 又冇食早餐!
今次輪到我同孖寶坐, 老公同LV大媽坐, wakaka!
下午2點, 平安返到香港喇!
由於個飛機餐只係早餐, 我地係未食午餐既, 所以我提議返屋企樓下食Tea，老公話OK, 皇恩浩洫呀! 謝主隆恩!
今次旅行的戰利品, 少得好可憐!
我只係買到2件衫, 好遺憾!
2023年1月20日 星期五
大阪&名古屋聖誕之旅2022 - Day 8
2022.12.29(星期四)
今朝冇校鬧鐘, 自然醒!
早餐仍然有杯麵、三文治、朱古力包(哥哥至愛)、溏心蛋、4.0牛乳、芝士, 好豐富!
今日係最後一日喇! 聽朝就要搭飛機返香港!
早上10點, 執埋D行李, Check out(今晚要瞓機場......間酒店)。
早上10:15, 揸車去万博公園(10年前, BBs係我肚人面, 我同老公嚟過睇櫻花der~!) 万博公園入面新開咗一個叫做万博BEAST的主題遊戲(綁住條Wire, 然後係高空踩單車, 行平衡木, etc.) 孖寶好想玩, 但爸爸話去到再睇吓點先啦! 好似好唔安全! 條Wire係自己扣, 咁小朋友點識自己扣呀? 扣唔實咁點呀? 我估下面有安全網兜住掛!
揸車去万博公園要一個鐘 (我記得上次嚟大阪都想去, 但塞咗1個鐘車, 仲未行到一半路, 結果, 放棄!) 今次又冇塞車喎!
泊咗架車係日本庭園花園前(原來都唔近万博BEAST, 但網頁教泊係呢度喎!) 原來入去万博公園要俾錢架! (大人260円, 小童80円, 一家四口盛惠680円) 吓? 明明10年前嚟過睇櫻花, 唔駛俾錢人場架喎!
我地睇咗大陽之塔先, 然後先至行去万博BEAST。一家四口係大陽之塔後面+前面自拍咗好多張相, 然後, 孖寶嚷著要快D行去万博BEAST。真係行好遠, 仲要經過一大片草地同跨過條河, 不過, 香港冇呢D公園(再一次覺得做香港人好慘!), 我地要好好享受咁舒服的環境(一邊幻想著外國的生活, 爸爸同孖寶係草地上踢波, 一家人係草地上野餐, 咁就過一日喇!)
孖寶好快就會高過媽媽喇
去到万博BEAST, 爸爸話座建築俾想像中高, 同埋, 點解上面冇工作人員? 下面又冇安全網既? 好危險喎! 爸爸堅持唔俾孖寶玩, 孖寶見到現場環境, 都覺得爸爸講得好啱! 咁算啦! 唔玩喇! 行吓個公園算啦!
万博BEAST隔離有個兒童遊樂場(只係得個膠山俾小朋友爬上去), 孖寶玩得好開心, 唔捨得走! (又係嗰句啦! 點解香港冇呢D遊樂設施? 有幾難整呀? 唔識整唔緊要? 咪照抄人地囉! 唉! 又一次覺得 -- 香港的小朋友好可憐!)
繼續行公園, 個公園超大, 只係一條水道, 孖寶都玩得好開心! 然後, 我地搵咗好耐, 終於搵到個樹林Boardwalk, 一家人難得係樹林入面漫步, 優哉游哉, 真係心曠神怡!!!
Hea到下午1點, 走喇! 去食飯喇! 本來Plan咗去隔離的Expo City, 一入到商場, 嘩! 原來全個大阪D人都嚟晒呢度, 多人到呢...... 去完廁所, 本來想係一間日本餐廳門口等位, 但等咗一陣, 條龍都冇郁過, 仲要冇得攞飛, 冇凳坐, 企係室外, 凍冰冰排隊, 放棄喇!!! 不如去返頭先公路隔離嗰間Volks食啦!
下午2:30, 拿拿林去停車場攞車, 揸車去Volks(8分鐘車程), 入到餐廳, 哥哥已經不行了...... 自動切換成Sleeping Mode。爸爸叫咗個熟成牛扒鐵板, 孖寶每人一個兒童牛扒鐵板, 我就叫咗個漢堡鐵板, 媽媽最欣賞佢地個Salad Bar有秋葵, 哥哥就追加咗個Soup(佢飲粟米湯), 細佬就追加咗包包, 大家都食得好飽!
有嘢食喇! 哥哥醒返!
臨走時, 哥哥見到門口的扭蛋機, 其中一部有得扭貓貓, 佢話想送俾姑媽, 然然Good Boy! 細佬上咗車, 諗諗吓都想去扭蛋, 爸爸陪佢落車去返扭蛋, 佢扭咗隻甲蟲(要嚟嚇媽媽用的! 佢地最鍾意迫媽媽睇昆蟲, 見到媽媽個驚嚇樣, 佢地就哈哈大笑!)
然然Good Boy!
下午4:50, 去機場附近的Outlet行吓 (媽媽仲未買到嘢呀!) 一泊低架車, 媽媽就見到有間藥房喇! 拿拿林仆去睇, 爸爸! 孖寶就交俾你喇! 一入到藥房, 即刻睇吓有冇飛滋膏(朋友托買, 有, 正!) 然後, 順利搵到想買的Akaran Essential Water Gel同埋Obagi Vitamin C, YEAH! 爭扎咗好耐, 買唔買Shiseido Maquillage粉餅, 但網上D人話隻色好黃, 同埋致痘喎! 個粉盒又唔靚! 算啦! 放棄佢! 免稅要出示Passport, 所以要Call老公過嚟俾返本Passport我。
日落好靚!
之後, 揸返架車過隔離Outlet行(其實只係過條橋就到) 媽媽仲未買到衫呀! 爸爸! 你繼續湊住孖寶先! 然後, 唔好嘥時間, 要急步, 見到有熟識牌子, 即刻衝入去睇, 唔好試衫, 太嘥時間, 唔好諗咁多, 買啦! 結果...... 只係去Nice Claup買咗一件黑色蝴蝶綁帶針織衫, 買2件有10%OFF, 但我揀咗好耐都揀唔到多一件, 算啦! 嚟到呢一刻, 我放棄喇! 完全係上次去名古屋的翻版(上次係連一粒糖都買唔到俾自己, 今次好咗架喇!)
由於太晏食午餐, 某人話唔肚餓, 然後佢覺得其他人都唔應該肚餓, 我話唔得喎! 我好似有少少肚餓! 同埋我驚孖寶夜D會肚餓, 我想去吉野家買個牛肉飯, 唔係! 係3個牛肉飯! 我同孖寶食! 你唔好食!
泊咗架車係吉野家門口, 老公同我一齊落車買, 某人而家又話要買4個飯, 佢話驚孖寶肚餓! 我都係驚孖寶肚餓, 所以諗住買3個飯囉!
拎住4個飯去酒店Check in, 老公去還車, 係酒店大堂等老公期間, 個經理仲同細佬玩(細佬揸住支玩具槍對住人, 唉! 真係冇家教!) 個經理仲送咗2張貼紙俾佢同哥哥。
晚上8:30, 返上房, 食牛肉飯(孖寶好鍾意食), 仲有零食做飯後甜品, hoho!
細佬畫得好靚呀!!!
第一晚爸爸自己瞓一張床, 今晚輪到我自己瞓喇! 爸爸你同孖寶瞓! 細佬都話要自己瞓一張床, 因為第一晚佢同媽媽孖舖。
今晚要執好晒D行李, 收返埋D厚衫, Pack返好D戰利品(少量), 阿爸爸, 其實呢幾個扭蛋穀係唔係可以掉咗佢呢? 但爸爸堅持要帶埋返香港, 我睇嚟睇去, 同香港的扭蛋穀一模一樣, 唔明點解要嘥晒個喼D位...... (無言!)
其實媽媽晚晚都要執嘢, 唔知點解咁多嘢執, 真係執到人都癲! 心入面不停問自己：我究竟係嚟旅行? 定係嚟做工人?
訂閱：
文章 (Atom)