平民級粉底 Vs 貴婦級粉底

我人生第一支粉底係Shiseido, 曾經試過歐美牌子......中伏! 始終都係日本粉底適合亞洲人, 而Shiseido係出名的日本牌子, 品質有保証!

話說用咗冇十年都有八載的MAQuillAGE, 香港幾年前唔再賣, 所以每次去親日本必定入貨, 不過, 自從2020年頭爆疫, 冇得去日本入貨! 惟有死死地氣係香港Shiseido買! 入到舖頭, 個BA同我講, 佢哋只係得一隻粉底, 就係 SYNCHRO SKIN 感肌同步持久粉底 SPF35 PA++++, 是但啦! 反正都係搽D嘢上塊面, 等塊面睇落膚色均勻D啫!

一直對粉底冇乜要求的我, 突然覺醒: 一支粉底$360, 我大概可以用一年, 一支卸妝油$120, 大概2個月用一支,  一年就要$720, 卸妝竟然貴過化妝, 係唔係有D本末倒置呢?  既然一年先至用得一支粉底, 係唔係可以俾多少少錢, 買支靚D呢? 諗到呢度, 我就開始積極上網睇D貴價粉底喇! 講到貴價粉底, 日本貴婦級品牌Cle de Peau Beaute肯定係其中之一, 佢係Shiseido旗下的品牌, 所以係我首選!

爭扎咗一星期, 終於係CPB的官網買咗佢地去年7月推出的鑽光柔霧修護粉底液 SPF20 PA+++, 盛惠$1,050, 係我人生中最貴的粉底!

入正題喇! 究竟平民級粉底($360)同貴婦級粉底($1,050), 有冇分別呢? 我真係好想知道, 俾貴咗3倍價錢, 我係唔係就會升級做貴婦呢? 所以我今日做咗個唔專業的「一天實測」......

我最近的皮膚狀況: 本身係混合偏油, 但2個月前開始用Benzoyl Peroxide 2.5%清暗瘡同粉刺, 所以最近洗完面之後都係好乾, 尤其兩邊面頰(仲有毛孔粗大, 黑眼圈, T字位出油, etc......, 係一堆死症嚟!)

今日氣溫20度左右, 唔凍唔熱, 濕度65-70%左右, 有D偏低。今早同平時一樣, 用Cetaphil洗完面, 搽咗Shiseido的免疫力精華, 再搽Laura Mercier Perfecting Primer(只有少少保濕, 冇控油), 好簡單! 我係右邊面上Shiseido, 左邊面上CPB。

外觀:

一睇就知平民同貴婦的分別! wakaka......

質感: 

Shiseido比較cream狀, CPB就比較liquid狀

顏色: 

Shiseido係140, CPB係O10, 兩隻都屬於自然偏白, 目測Shiseido偏灰白, CPB就偏粉橙

氣味: 

兩隻都冇乜氣味, 起碼冇酒棈味! CPB有少少香味, 但只係好少好少!

易推度: 

我用Koyudo(晃佑堂)的粉底掃上, 雖然Shiseido比較cream狀, 但算易推, 冇啜住, 至於CPB, 由於佢係liquid狀, 所以推開完全冇難度, 不過, 少少感覺佢好易乾, 要快D手

即時妝感:

兩支粉底都係Matt Finish, Shiseido的粉感好明顯, 總之就係好明顯撻咗D嘢上塊面咁! 至於CPB, 我終於明白乜嘢係Second Skin, 望落唔覺得有搽嘢, 但就係膚色均勻咗! 勁! 其實我覺得兩支粉底的Coverage差唔多, 只係屬於中等(CPB中等偏低), 黑眼圈只係遮到4成, 兩邊面的紅印/斑都唔係好遮得到, 所以我再用少少粉底, 重點印係有紅印/斑的位置, 兩支粉底都可以build up到多少少coverage, 但都遮唔晒, 不過, CPB就算搽咗兩層都唔覺厚粉, 但Shiseido就有少少變咗白面!

觸感: 

兩邊面即時都有少少黏黏地(CPB嗰邊冇咁黏), 但兩邊都唔算笠, 畫完眼眉(即大概5分鐘後), CPB嗰邊已經唔黏, 但Shiseido嗰邊仍然有少少黏!

耐磨度: 

兩邊面都有上Laura Mercier的柔光蜜粉嚟定妝。(疫情備註: 明明好俾心機化妝, 化到美美咁出街, 但偏偏要戴住個口罩, 不斷咁磨甩個妝佢, 超級無奈!!!) 以下係今朝返到公司的狀態(上妝2個鐘後), 可以見到口罩入面張紙巾左右有少少的分別: 右邊(Shiseido)甩粉比較多(深色D), 左邊(CPB)都有輕微甩粉(好淺色)。

CPB明顯冇啱啱完妝時咁白, 透返皮膚本身的顏色出嚟, 

感覺粉底同皮膚比之前更加融合, 妝感好自然

相同的光線之下, Shiseido仍然係粉感好重, 

明顯白面!

氧化程度: 

我覺得係我自己面色容易暗沉, 唔關人事! 睇到上面幅圖的Shiseido仍然係白面, 就知佢抗氧化幾強啦! wakaka...... (後來我發覺CPB中午過後就暗沉晒, 有一日試吓唔抺走手背上用剩咗的粉底, 過咗15分鐘, 揤新鮮粉底出嚟對比, 嘩! 嚇咗我一跳, CPB氧化得好嚴重, 直情係變咗橙色, 唔怪之得每日中午過後, 塊面望落去都好似俾太陽曬紅咗咁! 妖!)

到咗中午(上妝5個鐘後), 塊面開始出油, 變咗奶油肌, 遠睇兩邊都差不多, 冇乜分別! 不過, 近睇兩邊面頰就...... Shiseido開始浮粉, 起白點點(其實今朝11點已經發覺起白點點)! 然後, 面上D紅印/斑好似冇咗粉底遮住, 原形畢露咁! CPB近睇都有少少浮粉, 都開始見到透咗面上D紅印/斑, 但冇起到白點點! 冇白點點喔! 好開心!

下午3點(上妝8個鐘後), 雖然無論遠睇+近睇, 兩邊面的額頭, 下爬, 腮位都冇乜明顯分別, 但我發現, Shiseido嗰邊面出油明顯較多! 係閃令令, 油光滿面咁款! 摸落係黏笠笠的感覺! 啜手der~! 至於CPB嗰邊, 雖然都有出油, 但只係柔光(唔係油光), 好似皮膚本身好有光澤咁! 摸落仍然係爽滑der~! 仲有一個更加嚴重的問題 -- Shiseido嗰邊, 頭先D白點點更加明顯, 而且, 法令紋(近鼻位)嚴重甩粉, 出紋, 明顯見到D粉卡咗係D紋度, OMG! 但CPB嗰邊, 雖然都有少少甩粉, 但冇一撻撻!

下午5點(上妝10個鐘後), 係冇吸油+冇補妝的情況下, 兩邊面都變咗閃令令, 油光滿面喇! CPB嗰邊都淪陷咗, 面頰浮粉, 起晒白點點! 至於Shiseido嗰邊, 簡直係慘不忍睹, 可以見到面頰的粉底已經甩到所餘無幾, 斑駁! 白點點變得更大更明顯! 到咗呢個時候, 個口罩就變得好有用喇! hoho......

總結:

平民級粉底 Vs 貴婦級粉底, 確實係有分別der~! (但只限於上妝後8個鐘內), 至於值唔值得俾3倍價錢, 去買呢8個鐘的分別, 就見仁見智喇! 

如果你只係想搽D嘢上塊面, 係正常社交距離望落膚色均勻D的話 à Shiseido

如果你對底妝有要求, 鍾意成日近距離照鏡的話 à CPB

補充: CPB聲稱佢所有粉底都有護膚成份, 化妝同時護膚, 所以咁貴!

後記:

呢兩個星期都係用CPB, 我發覺就算妝前保濕做得足夠, 同埋lunch過後用紙巾輕輕印走D面油, 個妝到咗下午3點左右, 都係會開始浮粉, 起白點點! (似乎用貴婦粉底都冇用, 係我自己膚質問題!) 

不過, 無可否認, CPB真係好透薄, 化咗妝10幾年, 而家先至知道乜嘢叫做Second Skin, 每朝早用Sponge上粉底, 都好懷疑D粉底係唔係俾個Sponge吸晒, 因為真係完全睇唔到有搽過粉, 但塊面的確係膚色均勻咗, 就好似係你本身皮膚咁樣, but much better! (亦因為佢咁透薄, 所以面上的瑕疵可以話係完全遮唔到der~) 

其實買咗CPB粉底一星期後, 我就忍唔住買埋佢個妝前+碎粉組合($1,400), 妝前我揀咗Correcting Cream Veil, 唔覺得佢保濕, 亦唔控油, 只係調色(但好容易重手變白面!), 同埋有SPF25防曬, 網上D人話佢好用, 平時放假可以只係搽佢+碎粉就出到街。至於盒碎粉, 真係幾大盒, 除返開每gram平過Shiseido, 網上D人話佢粉質超級幼細(但我覺得NARS的裸光蜜粉仲幼細過佢喎!) 用的時候又係"一縷輕煙"咁, 要閉氣(好驚吸咗入個肺度), 但佢完全冇遮瑕, 保濕或控油效果, 個妝亦唔見得精緻咗囉!

阿媽崩潰了!

疫情下, 復課無期, 做人阿媽, 真係人都癲!

自從2019年尾爆發疫情, 教育局多次宣佈停止面授課堂, 學校改為網上授課, 孖寶網上學習已經差不多一年, 究竟網上學習有冇用呢? 如果你問老師, 老師會答你: 「好過冇! 」 如果你問我, 我會答你: 「同冇係冇分別! 」

學校自從去年開始網上授課, 初頭係老師預先錄製powerpoint, 同學自己開嚟睇, 聽唔清楚可以回帶再播一次, 然後, 開始實時課堂, 由一個老師教全級150個學生, 講明老師未叫名, 唔准開咪搶答/講嘢, 結果, 老師仍然係任由個別學生(來來去去都係嗰10個8個)講嘢, 成堂都好嘈, 全完聽唔到老師講咩! 我個仔唔開鏡頭, 發夢, 做其他嘢, 冇人理! 到最近, 學校終於安排由一個老師教一班學生, 學生要開鏡頭, 俾老師睇到你係唔係發緊夢, 起碼叫做終於有人理吓我個仔!

不過, 隔住個芒, 老師可以做既嘢好有限, 細佬個人比較有責任心, 佢知道上堂要留心聽老師講嘢(雖然佢有時會一邊上堂一邊做定D功課先), 至於哥哥, 成日都好似冇上堂咁(有時係因為佢部ipad冇顯示個"加入"button, 搞到佢入唔到去上堂), 問佢老師有冇講/教過, 佢通常都唔知! 佢自己留言問返老師, 結果俾老師話佢上堂冇留心, 因為老師上堂時已經講得好清楚! (如果我WFH, 我都可以係隔離篤住佢, 叫佢留心D, 或者幫佢一齊聽, 而家要返工, 跟本睇唔到佢! 工人姐姐有時會向我滙報, 哥哥瞓係Sofa度上網課, 我真係嬲到想車巴佢!)

除咗上堂有冇留心的問題, 做功課又係一大問題, 理論上, 網課只係上到12:45, 孖寶食完午飯, 仲有成個下晝的時間(大概4小時)做功課 + 睇電視 + 練琴 + 食Tea + 玩! 但係每晚放工返到屋企, 都會發現哥哥冇做過功課(或者只係做咗一題), 佢的解釋包括: (1) 唔識做, 想媽媽返嚟教我! (2) 搵唔到張工作紙 (3) 以為做晒 (4) 以為冇功課 (5) 以為...... (下刪1000字廢話) 聽到哥哥呢D解釋, 我真係嬲到想車巴佢! (1) 細佬都唔識做, 但係佢會嘗試去做, (2) 你話搵唔到工作紙, 點解我一搵就搵到? (3) 以為做晒, 以為冇功課, 你有冇check功課表? 成個下晝你做咗D乜嘢??? 淨係識掛住玩!  每晚放工返到屋企已經好攰, 抖都冇得抖就要睇佢地D功課, 個衰仔仲要未做功課, 要我坐係佢隔離篤住佢做! 真係人都癲!

除咗每晚要同佢地D功課搏鬥, 星期六日仲要重同佢地溫書, 學校不停要學生默書, 測驗, 考試, 所以做媽媽的(爸爸只教數學), 星期六日仍然要同佢地溫書, 唔好以為同佢地溫書好簡單, 跟本就係重新教一次 (尤其係英文), 冇一個字識串, 句式又唔識, grammar又錯晒! 好似冇上過堂咁! 真係教到我嘔血! 仲要俾人落命令, 做人阿媽要好溫柔, 教仔都要溫柔, 唔可以惡, 唔可以鬧仔(佢聽到我鬧仔, 會叫我, 係我, 收聲!), 搞到屈埋屈埋, 已經去到崩潰邊緣!

除咗要放棄休息/篤機的時間, 同佢地溫書, 我仲要承受孖寶的冷言冷語: (1) 阿媽成日迫人溫書, 放過我地好唔好? (2) 最好全日溫書, 唔玩, 阿媽就最開心! 然後, 由於阿爸只係負責俾佢地打機+陪佢地打機, 所以阿爸係好人!  阿媽就係衰人! 

係! 係我抵死! 係我自作孽! 係我話要生仔! 所以我要一力承擔! 幾辛苦都唔好埋怨! 要怨就怨自己, 好地地學咩人生仔! 抵X死! 

銷毁之選

咁多年以嚟中伏過的雷品, 有D係網上吹到神級, 結果不外如是, 有D係鬼遮眼發神經買咗, 結果中伏!

銷毁No. 1之選 - Kiehl's 草本爽膚水(「藍水」)

網絡上聲稱無人不曉的「藍水」(雖然Kiehl's的金盞花水先至係佢鎮店之寶), 因為佢主打控油, 只要一聽到係控油產品(我T字位超級油), 我基本上係毫無招架之力der! 用咗第一次, 已經覺得佢好harsh, 根本同直接搽高濃度酒精上塊面冇分別! 好似搾乾晒你面上的油&水一樣, 冇錯! 係連皮膚入面的水份都抽乾埋! 好乾好乾! 不過, 因為佢主打控油, 所以我仍然繼續用! 結果, 幾日後, 我塊面開始爆瘡, 首先係額頭出晒密密麻麻的閉口粉刺, 然後面部其他地方不斷爆瘡, 我驚到喊咗出嚟! 即刻唔敢用, 要去睇皮膚科醫生, 搞咗大半年先至好返! 我嬲到成支藍水倒咗落廁所! 痴X線! (Sorry! 我真係憤怒到要講粗口!)

銷毁No. 2之選 - Whisper液體衞生巾

係香港推出時, 舖天蓋地的廣告攻勢, 最記得廣告話: 就好似前度男友一樣 -- 冇Feel! 然後, 登記咗仲送$20蚊coupon俾你去萬O買, 結果...... 塊衞生巾就好似一塊硬膠磟的發泡膠, 痴住係條底褲入面, 條巾本身又濕又笠(佢冇呃你, 堅係液體感覺!) 加埋D血好似吸唔到入去條巾度, 就好似經常提醒你, 你而家M come緊, 冬天都feel到好焗, 夏天簡直焗到出粒粒, 我X佢! (Sorry! 我真係一邊用, 一邊講緊粗口) 仲買咗2包添, 最後好似送咗一包俾工人姐姐, 另一包就掉咗! 點解會有咁白痴的設計??? 其實每個女生M come的時候, 最希望下面超級乾爽, 冇任何液體的感覺! 但竟然有生產商諗到液體衞生巾的概念, 我好肯定個設計師係麻甩佬嚟!!!  其實, 學生時代都用過Whisper, 摩擦到下面紅腫疼痛, 已經Blacklist咗佢十幾廿年, 不過, 見佢咁有上進心出新產品, 諗住俾多次機會佢, 結果...... 再一次令我徹底失望!

銷毁No. 3之選 - Softymo卸妝啫喱

一直都用開呢隻Softymo粉紅色透明樽卸妝油, 卸妝超乾淨(我直頭覺得佢係平價版的Fancl)! 有一日行Sasa, 見到佢呢支卸妝啫喱, 冇油喎, 可能仲清爽D, 對我容易出粒粒的肌膚更加友善(心諗!) 於是買返去即晚用, 用法同佢既卸妝油一樣, 手乾面乾(雖然佢寫住濕用都得), 然後沖水, 繼續洗頭沖涼, 沖完涼出嚟, 諗住用化妝水抺多一次就搽精華, 點知一睇, 塊化妝棉咁啡既? 好似而家先至落妝咁, 再就埋塊鏡望真D, 頂! 完全冇卸過妝! 個妝仲係度! 試吓濕用多一次支卸妝啫喱, 沖水, 都係冇妝過卸, 我X佢! 支嘢係完...全...冇...卸妝功能, 我唔知就咁用嚟平時洗面得唔得, 但已經嬲到張支嘢塞入櫃底, 之後執嘢時仲掉咗! 費是嘥位! 我只有兩個字的評論: 中伏! 

銷毁No. 4之選 - Laura Mercier 妝前底霜 (Illuminating)

上年買LM蜜粉時送咗一支佢哋的皇牌Primer試用裝, 好水潤但唔笠, 上妝貼咗(好似係!), 於是幾個月前上網買咗一支貨裝Primer - Perfecting(50ml), 另外冇得揀送一支Illuminating(25ml), 我想講就係呢支Illuminating, 睇到呢個名, 個心已經沉咗一沉, 我雖未至於中東大油田, 但中午過後出咗油勉強可以叫做"奶油肌"(但近睇已經有D斑駁), 呢支Illuminating絶對唔係我杯茶!(點解有咁多款Primer, 硬係要送呢款俾我? 係唔係賣唔去?) 不過, 如果唔用, 即係等於我用正價買咗支Primer, 冇著數到, 是但啦! 就俾一次機會佢! 用大概pea size的份量, 均勻咁搽晒成塊面, 然後, 我變咗 -- 少林寺十八羅漢銅人! 頂! 成塊面油笠笠, 仲要發晒光咁, 但唔係珠光, 係金屬光! 仲要係銅色, 冇錯, 原來支Primer係有色der!!! 我用紙巾抺返出嚟睇, 堅係銅色, 金屬嗰種銅色! 成塊面好似深色咗10度咁, 我對住塊鏡, 見到自己變咗少林寺銅人一樣, 忍唔住笑咗出嚟! 我X佢! 乜真係有人會想要呢種妝效??? LM個設計團隊究竟諗緊D乜嘢呀? 可能外國人好like...但我好肯定冇一個亞洲女生想變成少林寺銅人咁款囉!

銷毁No. 5之選 - Cetaphil Extra Gentle Daily Scrub

話說自從Kiehl's嗰隻微晶磨砂停售之後, 我簡直係生無可戀! 呢一兩年, 我尋尋覓覓過好多磨砂產品, 都冇一隻及得上Kiehl's, 由於我一向都用開Cetaphil的Cleanser同Moisturizing Lotion(大學生時代睇皮膚科醫生, 佢開俾我, 然後一直用到而家), 上網見到Cetaphil竟然有出磨砂, 我好似見到曙光咁! 因為我絶對信任呢隻皮膚專科牌子! 於是略略上網睇一下外國D comments, 多數都係投訴有怪味, 但我覺得好快洗完沖水, 陣味冇所謂啦! 亦有少數comments話佢唔係extra gentle, 而係好harsh, 不過心諗, 唔harsh又點磨得走D死皮呀? Kiehl's隻微晶磨砂都好harsh, 好掂! 香港冇得賣, 要係iherb買, 老公話買2支有特價, 咁要2支囉, 反正2023年先至過期, 有排用! 好快就寄到嚟府上, 我亦好快咁試用, 唧出嚟係透明gel咁, 的確有陣怪味, 都幾怪吓, 忍住唔好聞, 搽上塊面! 然後......嘩! 好那痛呀! 我X佢! 咩嚟架? 好似搽咗D硫酸上塊面度咁, 果一刻我真係好驚! 我驚佢已經腐蝕緊我塊面, 惟有拿拿林用花灑狂沖塊面一分鐘! 而家諗返起, 仍然猶有餘悸, 我同老公講咗我既經歷, 佢話佢試吓用, 點知...... 佢冇嘢喎! 唔那喎! (可能佢面皮夠厚) 咁送俾佢用啦! 有2支可以有排佢用喇!

銷毁No. 6之選 - Sofina Primavista Ange控油妝前隔離霜

網上神推Sofina呢隻, 話佢係中東大油田的救星! 我係水貨店買(唔知係唔係假貨?!), 我第一次用已經覺得佢 -- 完全冇控油效果! 我只係搽咗係最油的T字位, 中午過後, 用面油紙一印, 仍然係油到變透明! 而且佢除咗聲稱的控油功效(其實冇), 就冇其他功能, 上妝唔覺貼服咗, 反而搽咗佢, 搞到個妝仲厚咗, 好似面具咁!

銷毁No. 7之選 - IPSA三色遮瑕盤

一直搵緊一支可以遮黑眼圈同暗瘡印的遮瑕, 之前用Shiseido唇膏狀遮瑕膏, 好乾, 上網搵吓有咩遮瑕好用, D人瘋狂推IPSA三色遮瑕盤, 話佢係日本No.1遮瑕, 雖然佢都係膏狀, 但聲稱佢好潤, 唔乾, 唔起紋, 唔浮粉, 仲可以自己調色(咁就唔怕買錯色, 嘥咗幾百蚊!), 於是去官網買(聽講出面好多假貨), 盛惠$300。一日後已經送到府上, 真係要讚一吓IPSA的發貨效率, 但係試用後...... 好乾, 超級乾, 同Shiseido有得Fight, 緊係啦! IPSA都係Shiseido旗下品牌, 條Formula應該差不多! 雖然遮到黑眼圈7成左右, 但超級乾(已經做足保濕打底), 近睇簡直慘不忍睹! 無論用掃上, 用手指(有溫度)上, 都係起晒乾紋, 見到D粉卡晒係D眼紋入面, 超級樣衰! 至於暗瘡印, 用深色嚟遮係仲衰仲顯眼, 近睇完全唔貼, 浮晒粉, 我頂! 已經俾咗好多次機會佢, 但每次都好失望, 到最後, 我決定放生大家!

小資女包包

作為一個小資女, 包包的選擇僅限於美國牌子, 例如Kate Spade, Michael Kors, Tory Burch, Coach之類, 而當中Coach算係我比較受落的牌子。 

Kate Spade的款式同顏色都好玩嘢, 唔係人人都carry到, 好難先至搵到一個「正常」的袋! 幾年前買咗一個粉紅色, 算係「正常」, 可以拎嚟返工的包包!

2016年2月買

Michael Kors近年變咗大媽袋, 同Salad一樣, 周街都係, 加上佢D袋的設計完全冇誠意(根本就冇設計可言), 好似永遠都係得黑, 灰, 海軍藍三隻色選擇, D款年年都係咁上下, 好老土! 3年前買咗一個海軍藍, 平時都係孭嚟落街買嘢!

2017年11月買

Tory Burch個十字架logo好難頂, 仲要大大隻logo釘係個袋面, 驚死人睇唔到, 超級樣衰, 個個袋都整兩條流鬚, 係咩玩法? 所以從來都冇買過!

Coach係我回購得最多的牌子, 十幾年前人生第一個「名牌」袋, 就係Coach! 雖然Coach一直都係出晒名的大媽買餸袋, 尤其當年佢個Monogram設計, 超級老土, 不過, 自從換咗設計總監之後, Coach的設計風格就開始年輕化, 搣甩埋佢個「經典」Monogram之後, 冇咗大媽味! 加上佢的價格真係好User friendly, 所以每次想買包包, 第一時間就諗起Coach!

人生第一個Coach包包

去北海道時係Outlet買的Coach返工袋,

個袋本身好重, 帶埋飯盒就超重, 孭得好辛苦!

特登買呢個Clutch Bag出席飲宴用

呢個Backpack今年5月係SOGO突然減價, 

所以無啦啦買咗, 做返工袋, 而家日日都用, 正!

好想換個細銀包, 呢個夠晒細, 但又裝到好多咭, 又有散紙隔, 

惟一缺點係個顏色, 一心係想搵粉紅色der~!

尋日買的Coach Tabby 26, 睇嚟睇去都係白色最靚, 

又易襯衫, 係送俾自己的新年禮物, hoho!

配有可拆式長短帶各一條

Black Friday Sale

由於今年冇得去旅行, 又唔可以成日出街(疫情關係), 個心鬱住鬱住咁, 所以惟有轉移視線, 改為網上購物(其實一直都有上Amazon JP買衫, hoho...)

最近發現, 嘩! 成個11月都係Black Friday Sale! 原來未到聖誕已經大減價緊!

Laura Mercier 官網限定, 買一支貨裝的Primer(50ml), 送一支25ml的Primer, 即係變相特價咗喎! 於是我就買咗一支Perfecting Primer (但送嗰支就冇得揀), 仲有免費送貨添! YEAH!

另外, M.A.C官網做緊全單7折, 購物滿$300, 仲送一支150ml卸妝油(原價$250), 好好好抵呀! 我一直都好想買過盒胭脂(而家用緊開架品牌, 隻色唔係太靚), 於是上網睇吓大家推介咩色的胭脂, 原來勁多人推Melba色, 係蜜桃粉橘色, 好啱我偏黃的膚色! 由於要買夠$300, 所以我揀多一盒胭脂, 係帶光澤的香檳粉色, 可以做highlight!

個顏色好靚, 好啱我膚色用

(絶對絶對不能用粉紅色!)

只係用少少已經好有光澤

兩盒胭脂連卸妝油, 盛惠$325.5咋!

(仲係免費送貨, 落單1日後已經收到!)

其實一直都好想轉粉底(而家用緊Shiseido, 個色太白, 中午過後個妝已經溶咗一半), 用咗M.A.C贈送的Studio Fix Fluid粉底(NC15)試用裝, 個色OK喎, 加上而家做緊7折, 即係$360x70%=$252(但個pump要另外買), 上去官網睇, 原來冇NC15色, 只有NC14或者NC16, 我揀咗NC14, 其實同NC15差不多, 冇Shiseido咁灰白, 又唔會黃到變咗黃面婆, OK喎!

配埋個pump, 盛惠$269.5

Makeup 進化中......

話說我係2008年開始有化妝返工的習慣, 因為當年係Consultant做, 成日都要見客, 為咗行出嚟好似professional D, 所以就開始化妝 (其實第一次化妝應該係大學時去聖誕Ball, 由於當時互聯網仲未普及, 唔似得而家咁, 可以上網睇吓人地點教化妝, 加上資源"$"有限, 當年個妝...... 只可以用「慘不忍暏」同「不堪回首」嚟形容!

2008年第一次正式化妝返工, 其實只係搽粉底, 等塊面D膚色均暈D, 問咗其他人意見, 返工見客要揀好少少的粉底, 唔好買開架牌子, 所以買咗Shiseido!  另外個Sales sell 我買埋佢地盒四色胭脂(D色好靚, 仲有一格係銀色閃粉, 可以做highlight) Shiseido粉底的確冇令我失望, 用咗10幾年, 我而家仲係用緊Shiseido!

然後, 我發現化妝唔可以只係搽粉底, 因為我係油面, 中午過後個"妝"已經溶晒, 所以一定要用碎粉定妝, 上網好多人勁推Shu Uemura, 於是我就去買咗佢隻透明碎粉嚟用, 結果用咗一日碎粉就出事喇! (我細佬大婚當日用嚟定妝同補妝), 之後塊面不停爆瘡, 我驚到即刻唔敢用! 要去睇皮膚科醫生, 過咗差不多一年時間, 塊面先至叫做好返! 之後, 好多年, 我都唔敢再用碎粉!

再然後, 我又發覺都係要用碎粉(因為溶妝問題), 於是, 係"爛面"事件發生後的6年, 我又試吓用碎粉 (當然唔會再買Shu啦!) 試過韓國不知名有閃粉碎粉, 日本不知名Little Twin Stars碎粉, Sofina碎粉, Laura Mercier透明蜜粉, 暫時覺得LM係最抵用, 用完塊面冇起粒粒, 朝早上完碎粉之後成個妝變得好粉嫩(不過中午過後都係溶妝, 可能我冇補妝啦!)

再再然後, 我又發覺對眼唔夠精靈, 加上我唔係成日搽胭脂, 所以睇落好似面色蒼白, 冇嚟精神咁, 我試過夾起D眼睫毛同用mascara, 等對眼睇落去大D, 但係落妝時甩好多眼睫毛, 好驚!!!  唔敢再用! 其實畫眼線可以令對眼有神D, 但我覺得畫眼線好師奶, 於是上網睇吓人地點畫, 原來好多韓妹會畫內眼線, 打造偽素顏效果, 仲建議新手可以用眼線筆, 結果, 出事喇! 用韓國牌子Etude House眼線筆, 又唔防水又唔防油(好心唔好出眼線筆啦!) 甩色甩到對眼好似熊貓咁, 樣衰到呢!!! 後嚟改用Kate眼線液, 好易用, 又顯色, 只係中午過後眼尾位置黑咗一撻, 我認命, 我係油面, 冇辦法! 直至最近上網睇吓有冇防水防油眼線筆, 買咗一支Kiss Me試用, 出水比Kate流暢, 筆尖比Kate仲要幼細, 最最最重要係 -- 眼尾一D都冇黑, 全日只係甩咗2粒黑點, 原來...... 我唔係要認命, 我係要買支好既eyeliner呀!

再再再然後, 我發覺原來我兩條眉唔係好對稱(高低眉), 同埋缺角, 但又係一直都覺得畫眉好師奶,加上我一直覺得條眉好黑, 再畫就會勁深色, 變咗關公咁, 所以一直都冇試, 不過, 年紀越嚟越大, 條眉就越嚟越稀疏, 睇返D相, 吓? 點解變咗"無眉娘"架? 於是就膽粗粗學人畫眉, 上網D人勁推Kate四色眉粉, 其實都OK, 不過支掃用耐咗就開晒叉, 畫唔到尖尾, 於是又買埋佢支眉筆嚟用, 仲方便過用眉粉, 到而家已經回購咗勁多支喇!

再再再再然後, 我又發覺兩條眉真係好深色(眉筆顏色係自然啡, 唔算好黑), 睇返D相, 真係越睇越怪, 加上我早幾個月染啡咗D頭髮, 顯得兩條眉勁深色, 同個妝(我一向係自然妝)格格不入, 我記得好似有D嘢可以搽到條眉冇咁深色, 我唔知係咩, 只係知道好似眉gel咁, 最後, 終於俾我搵到"染眉膏"呢樣嘢, 係喇! 係喇! 就係佢喇! 猶疑咗好耐, 最後買咗Kiss me Heavy Rotation的栗啡色(04), 因為佢最平($59), 好抵玩, 買返屋企即刻拆嚟用, OMG! 真係好掂! 搽咗兩條眉即刻淺咗色, 好自然, 同眉筆隻自然啡色完美結合, 又襯到個髮色! 點解我唔早D去搵???

再......再然後, 我發現年紀越嚟越大, 眼窩越嚟越凹陷(後生時有baby face, 對眼冇咁凹), 睇落好顯老, 好大鑊! 於是上網睇吓D人"推介"用咩色的眼影會令對眼睇落超級浮腫 -- 粉紅色系, 想再浮腫D可以搽閃粉, 於是就去搵開架牌子試吓, 搵咗好耐, 多數眼影都係Earth Tone, 好少粉紅色, 最後搵到Media有粉紅色三色眼影(有閃粉), 不過, 我都唔係成日用, 因為朝早返工出門趕時間, 所以只係放假得閒先至用!

再再......再然後, 我又發現年紀越嚟越大, 朝早塊面比較乾, 搽粉底唔貼面, 於是拎返上年買LM蜜粉時送的Primer試用裝出嚟用, 嘩! 好水潤, 感覺上粉好貼, 個妝底好有光澤呀! 於是那那林上網買支正裝LM Primer嚟用, 原來條Formula改良咗, 應該仲正! 我揀咗Pure Canvas Primer - Perfecting (50ml) , 另外送多支Illuminating(25ml) 

由只係搽粉底 --> 搽胭脂 --> 上碎粉 --> 畫眼線 --> 畫眉 --> 用染眉膏 --> 用眼影 --> 到用Primer, 我的Makeup仍然在進化中, 遲D應該要搞吓個咀唇, 因為我又發現年紀越嚟越大, 個上唇好淡色, 但個下唇就色素沉澱, 越整越暗沉! 不過, 現時仍然要長期戴口罩出街, 所以暫時冇迫切需要搞個咀唇!

我生日 + 結婚15週年

由細到大, 我都好鍾意10月, 除咗因為我係10月生日之外, 亦係天氣開始轉涼, 萬里無雲, 好舒服的日子, 而且10月都係我家的慶祝月, 因為我同老公都係10月生日, 我地亦係10月結婚(而家有D後悔揀自己生日嗰日結婚, 搞到少咗一日慶祝, 同埋成日忘記咗老公都係主角, 好似無咗個結婚週年咁, 不過老公就好開心, 因為唔駛諗咁多嘢, 少咗一日煩惱, 佢覺得當年的選擇係明智der~), 所以每年10月, 我家都有一連串慶祝活動。

今年的生日+結婚週年, 我同老公又去咗海洋公園(對上一次同老公生日去海洋公園係2011年), 由於疫情關係, 公園限制入場人數, 加上冇咗9成大劣人, 所以今次去得最舒服, 唔駛點樣排隊同人迫, 只係排隊買嘢食同冇枱食嘢有D麻煩(成個山頭只得一個小食亭營業, 加上D枱少得可憐, 海洋公園係唔係諗住D遊客企係度食/行住嚟食就OK?) 我哋玩咗過山車、激流、海洋公園塔, 參觀咗海洋館、鯊魚館、企鵝館、北極館、熊貓館, hea吓hea吓就過咗大半日。

下午3點離開海洋公園, 去金鐘的Upper House食Tea, 我地book咗窗口位, 個景一流, 但就曬咗D, 個背脊好熱, 好在個太陽好快就俾隔離座大廈擋住咗。Tea Set for Two 只係$480, 平過好多地方, 而且仲有3小時免費泊車, GOOD! 老公點咗coffee(正宗盒仔茶味), 我就點咗一個玫瑰花茶 (原來只係倒D玫瑰花味糖漿落杯茶度), D咸點味道一般, 我唔識欣賞, 都係甜品啱我胃口多D, 但其實冇咩特別, 只係打咭靚!

由於行咗大半日海洋公園, 大家對腳都好攰, 老公臨時提意加插一個節目 -- 按腳! YEAH!

回家食飯後, 就到今日的重點節目喇 -- 當然係切蛋糕同埋送禮物啦! 今日好充實, 多謝老公!

另外, 由於時間關係, 我都準備咗生日禮物俾自己, wkakaka......