名古屋親子之旅2017 - Day 4

2017.08.27 (星期日)

今日陽光普照, 天氣炎熱!

媽媽早上7:30起身, 然後差不多8點叫醒孖寶, 刷牙, 換衫, 落去食早餐。早餐選擇唔多 (比小牧的AB Hotel少), 但有牛奶、有雞蛋、有麵包, 營養足夠, 唔夠飽的話, 食多幾個包都會飽。

早上9:30, 開車出發, 今日去刈谷的岩ケ池公園, 其實刈谷好近豐田市, 由我地住的酒店去, 車程約25分鐘, 但由於好多車, 好多燈位, 行咗車30分鐘後先至上IC, 搞到10:15先至到。泊車要排隊, 好在都唔係排咗好耐(10分鐘左右), 公園免費入場, 但又係要收泊車費500円。

10:30終於可以入公園玩喇! 我地第一時間去咗玩入錢的電動遊戲車, 每款都係50円玩一次, 抵過去冒險樂園! 有兒童電動車, 細佬揀咗消防車, 哥哥想揀警車, 但有小朋友玩緊, 佢揀咗架斑馬車, 之後佢見小朋友玩完警車, 即刻衝過去揸警車, 細佬就玩多次消防車, 原來每人只可以玩一次, 我見排隊D日本人睇到眼都凸埋, 今次真係唔好意思!

之後就行去買飛玩揸電油車、飛機、旋轉木馬同小火車, 每人每個遊戲要一張遊戲券 (一家四口一齊玩就要4張), 旁邊有遊戲券的自動售賣機, 一張100円, 買1000円送1張(即有11張), 老公叫我買1000円啦! 玩咗兩個遊戲之後唔夠飛, 又買多1000円!

售票機

揸車

揸飛機

細佬話唔想玩小火車, 佢想玩多次飛機, 於是我同哥哥坐小火車, 爸爸同細佬去揸飛機。

我同哥哥去玩小火車

   爸爸同細佬去揸飛機

公園除咗機動遊戲之外, 仲有兒童遊樂場(滑梯, 千秋, etc.), 孖寶又係烈日當空之下玩咗一輪, 由於真係太曬太熱 (我驚孖寶中暑), 所以提意去坐摩天輪 (3歲以上每人600円, 但4人同行有折, 只需2000円, 即HKD140, 平過中環個摩天輪, 仲要唔駛被迫同大媽困係同一個車廂!), 同埋摩天輪有冷氣, 真係要去涼吓冷氣先, 好熱!

原來摩天輪其中4個車廂係全透明架, 即係張凳同個地板都係透明, 可以望返落地面, 老公同職員講話想揀透明車廂, 職員話要等20分鐘, 因為我地前面仲有兩group人排緊, 我地要等第三架!

孖寶排隊期間又周圍走, 又話點解咁耐! 究竟係港童特別冇耐性, 抑或我地教子無方?! 唉! 惟有不斷同佢地講, 就到架喇! 你地睇吓個摩天輪幾高? 數吓幾時個透明車廂輪到我地?

真係等咗20分鐘, 到我地喇! 一入到車廂, 好C服呀!!! 好涼爽呀! 可唔可以轉慢D, 我唔想咁快落返黎呀!

全透明車廂

個公園其實唔大

大約20分鐘後, 終於要落返黎喇! 原來搭摩天輪的小朋友每人都送一張遊戲券, 拋波入籃, 細佬舉手話要玩先, 本來想叫佢企定定睇清楚先, 佢已經求其拋咗個波出去, 誰不知, 個波碌咗入去個黃色籃入面, 細佬中咗奬呀! 工作人員仲拎起個搖鈴噹噹噹 (好似睇日劇咁), 媽媽帶細佬仔去揀禮物, 佢揀咗支水槍, 爸爸陪哥哥拋波, 當然拋唔中啦! 得粒糖! 哥哥即場爆喊! 佢要同細佬一樣, 佢都要水槍, 佢仲話不如而家走去拎走支水槍, 爸爸同佢解釋, 咁即係偷野! 犯法架!

哥哥喊得好凄涼, 媽媽都好明白佢感受, 細佬有, 但佢冇, 佢好憤怒, 佢覺得係個工作人員唔啱 (佢唔明白係因為佢拋唔到個波入有顏色的籃入面), 媽媽都好想幫哥哥, 氹佢話買雪糕俾佢食, 佢都唔制, 佢一定要支水槍, 爸爸惟有同佢去便利店睇吓有冇, 媽媽就同細佬去排隊買雪糕, 可能因為今日係星期日, 超多人, 排咗好耐先至買到一支朱古力甜筒雪糕。

哥哥仍然係好唔開心, 爸爸應承佢, 買多份旅行禮物俾佢, 又同佢去玩多一次小火車, 哥哥稍稍忘記咗剛才的憤怒, 重現笑容!

爸爸同哥哥去坐多次小火車

我帶細佬去玩消防車, 哥哥都黎咗, 佢又話要玩

下午1:30點, 要走喇! 我地仲未食飯, 仲約咗下晝2:45去牧場參加雪糕製作體驗, 雖然去牧場只係30分鐘車程, 應該食唔切飯, 於是又買包食 (孖寶最鍾意朱古力包), 兩日Lunch都要捱麵包, 辛苦孖寶喇! 老公話如果經過100円店, 就去睇吓有冇水槍, 買返支俾哥哥啦! 話口未完, 前面真係有間100円店, 入去睇, 都係冇水槍, 爸爸惟有買包老番lego俾哥哥, 細佬又話要, 唉! 好在哥哥已經忘記咗之前的憤怒。

買完野繼續上路, 老公話架車冇油, 要去入油, 細佬落車睇爸爸入油, 哥哥瞓咗, 冇得睇! 老公仲唔記得閂返個油蓋, 行咗一陣車先至係倒後鏡睇到... hoho

細佬仔第一次睇爸爸入油

去到牧場, 泊好車, 叫醒孖寶, 又係一輪鬥爭, 因為孖寶發脾氣: 好眼瞓! 好辛苦! 起唔到身! 做乜叫醒我? 又氹又鬧咗一大輪, 終於都剷到佢地起身, 落車, 行去牧場, 不過仍然係怨氣沖天, 加上天氣好熱, 好曬, 點樣用言語安撫大少同二少都冇用!

由於已經2:30, 所以去唔到搾牛奶先, 要直接去上堂的地方 (上完堂3:30搾牛奶已經Closed), 去到上堂間屋仔, 係地下Counter俾咗錢 (孖寶每人900円), 去洗手, 上二樓課室, 原來日本人都興遲到, 等到2:50終於開始, 老師知道我地唔識日文, 所以都會用簡單英文 + 做動作, 等我地知道要做咩, 其實都好簡單, 就係倒D糖落杯奶度 --> 攪均佢 --> 擰埋個蓋 --> 封膠紙 --> 將D冰畢落個桶度(一半) --> 擺杯奶落去 --> 再畢D冰入去(全滿) --> 將個桶碌黎碌去(15分鐘) --> 完成! 其實都唔算雪糕, 似牛奶味思樂冰, 孖寶唔like, 但其實我覺得幾好味! 食完仲可以洗乾淨個杯拎走。

學員A

靚仔導師

終於完成, 有雪糕食喇!

牧場有得騎小馬, 一定要帶哥哥去騎, 哥哥好開心, 兜一個圈900円, 我地鼓勵細佬騎, 但佢唔肯嘗試, 佢話好驚 (唔知佢係驚隻馬咬佢, 還是驚會跌落黎)。騎完馬仔, 見個牧場都冇咩玩, 都係走喇! (因為細佬發緊脾四!)。

哥哥鍾意騎馬仔

下午4:30離開牧場, 揸20分鐘車程, 去西松屋, 夏季服裝半價, 但冇孖寶的size, 買咗兩件薄的長袖衫 (其實西松屋D衫的質素......上兩次去睇已經唔係好買得落手)。反而我地今次係想黎買水壺的, 哥哥個水壺爛咗, 細佬個水壺跌咗, 行行吓, 爸爸見到兩對閃燈鞋仔, 好靚, 又咁啱有紅色的消房車(18碼), 同埋黑白色的警車(17碼), 叫孖寶試著, OK喎! 另外, 想買兩件雨褸, 因為夏天成日落雨, 姐姐拖住佢兩個, 但佢兩個擔遮, 其實唔係咁方便! 結果, 就買咗2件長袖衫、4個水壺、2對鞋, 同埋2件雨褸, 盛惠>10,000円。

西松屋附近就係AEON MALL, 所以又要入去行吓, 順便食晚飯。由於星期日, 超多人出黎食飯, 我負責係餐廳門口等位, 老公就同孖寶係商場行吓, 之後問返孖寶, 原來爸爸去睇自己D野 -- 電器類。

晚上7:10, 終於有位喇! 叫咗3個餐, 唔知燒咩魚, 總之成間野都係食"用草黎燒"的魚 / 雞, 所有餸上面都有炭屎, 我同老公講, 如果工人炒餸係咁, 已經俾我鬧爆咗!

是日晚餐

由於返酒店都要45分鐘, 所以食完飯都係快D走人喇! 名古屋周圍都塞車, 就算行IC, D車都開得好慢, 說好了的45分鐘車程, 最後都係超過1小時。

返到酒店, 老公幫孖寶沖涼 (辛苦晒!), 媽媽去大浴場沖涼, 順便浸吓熱水浴 (其實大浴場只係得兩格俾人沖涼, 旁邊有一個比浴缸大D的熱水池)。細佬好鍾意新買的閃燈鞋, 佢話想聽日開始著, hoho... 切生果俾孖寶&老公食, 幫孖寶刷牙, 換片 (就黎5歲夜晚瞓覺都仲要著片, 唉!), 不停叫佢兩個冷靜D, 快D瞓, 聽日去Legoland, 仲唔瞓, 聽朝起唔到身就唔帶佢去 (講咗N次)。

孖寶的新鞋仔

孖寶瞓咗, 我執埋3個仔(孖寶&孖寶爸)聽日要著D衫出黎, 終於都可以休息喇! 老公仲上網睇新聞 + FB, 我頂唔順喇! 我瞓先! 不過, 原來個人太攰, 係好難瞓得著架!

Day 4 完

名古屋親子之旅2017 - Day 3

2017.08.26 (星期六)

今日多雲但冇雨, 間中有陽光!

溫泉旅館的食早餐時間最遲係8點, 我地尋日已經mark咗8點食早餐, 我set咗鬧鐘7:30起身, 刷牙、洗面、換衫、化定少少底妝, 7:45叫醒孖寶, 幫佢兩個刷牙, 換衫。

 又係尋晚太夜瞓, 今朝起唔到身

8點過少少落去食早餐, 又係去返尋晚間廂房, 原來已經成枱食物, 不過, 可能我地遲到, 冇人serve我地, 老公惟有行去對面叫人黎。

早餐都好豐富(我覺得), 孖寶每人有一碗飯, 嬸嬸仲每人醒多包撈飯粉俾佢地, 細佬二話不說就食晒成碗飯, 養佢兩個真係好慳飼料!

食完早餐, 老公提意去對面朝市行吓, 睇到D桃一箱6-8個, 都係賣緊1200円, 好抵, 好想買, 不過, 今日只係Day 3, 無理由托住箱桃周圍玩多4日, 加上擺係車入面焗咁耐, 一定爛晒! 老公見到有撈飯粉, 我話普通野黎, 應該周圍都有, 唔駛買住! (結果成個行程都冇再見過撈飯粉, 下次見到要買咗先!)

 酒店門口, 唔算華麗, 但decent!

朝市其實只係一間雜貨舖

買唔到野, 行返酒店, 係酒店地下大堂間紀念品商店買咗兩盒星星造型的朱古力, 叫做配合返日本第一星空的主題, 經過足浴池, 我記得孖寶尋日嚷著話想要去浸腳, 我同爸爸講, 我帶佢地去浸腳, 爸爸就返上房先。

哥哥入到去, 二話不說除鞋除襪, 仲想除埋條褲, 我話唔駛架! 浸腳架咋! 佢太興奮, 跳咗入去個足浴池, 仲踎低, 條褲濕晒, 俾我鬧咗佢一鑊金既! (不過, 而家諗返, 其實佢第一次浸, 佢又點識咁多規舉, 佢都唔係有心整濕條褲仔!)  至於細佬, 佢一向都係非常小心, 做乜都睇定D先至郁的人, 所以佢仍然係企咗係度, 加上見到我鬧緊哥哥, 佢只係企係度等, 等我搞掂哥哥之後, 我就幫細佬除鞋除襪, 然後拖佢行落去足浴池, 搵張凳坐低, 浸腳仔, 佢地話D水好熱, 我話係呀! 唔可以浸太耐! 過咗一陣, 爸爸都落埋黎(佢驚我搞唔掂, 落黎幫手)。

 細佬呢排影相好鍾意伸脷

哥哥終於肯乖乖坐係度浸腳

返上房執行李, Check-out, 原來果2張天空樂園入場券係要錢架! (仲以為酒店包埋, 但我地明明冇揀包入場券個Plan, 入場券成人每位2,200円), 另外孖寶每人要收2,160幾円雜費, 埋單40,340円! (上次湯布院30,000幾円仲有埋房間內附風呂, 真係好抵!)

老公揸返架車去酒店門口, 執行李上車, 有個職員(妹妹)企咗係我地架車旁邊好耐, 原來佢等我地執完野, 送咗個紙鶴吊飾俾我地掛係車入面, 之後, 有個好似經理走埋出黎, 見我地開車, 不停鞠恭同揮手, 超級有禮貌, 我仲以為佢地做得太多大劣人生意, 已經冇咗呢個傳統添! 呢間酒泉旅館雖然冇湯布院果間咁正, 但我都幾滿意!

今早的行程係去愛‧地球博公園, 車程要1.5個鐘, 行IC, 老公超速啊! 可能我呢兩晚都唔夠瞓, 係車度瞓著咗, 醒返的時候, 老公話佢行錯路, miss咗個停車場入口, 要行返轉頭。公園免費入場, 但停車場收費日泊500円。

重點在錶版上

大約11:15, 泊好架車, 第一時間衝去重點節目, 兒童綜合活動中心 (即係一個超大型室內兒童遊戲室, 其實室外都有個水池俾小朋友玩水)。兒童免費入場, 成人每位300円。孖寶見到咁大個兒童遊戲室, 超興奮, 哥哥帶住細佬周圍走, 搞到唔見咗爸爸媽媽, 細佬驚到爆喊! 佢地最鍾意玩"捐地窿", 玩咗好耐, 自己唔小心撞到個頭就爆喊, 喊完又玩, 玩玩吓又喊, 如是者, 玩到下午1點, 媽媽不行了, 媽媽要食飯呀!

"捐地窿"

館入面有攤檔賣便當, 300-500円, 另外二樓有餐廳, 唔貴, 緊係去餐廳食啦! 坐得舒服D嘛! 買咗2碗烏冬+1碗飯, 哥哥鍾意食烏冬, 細佬鍾意食飯。

有飯食喇!

食飽飽, 兩兄弟又去玩過! 館中間有個塔, 可以上到最高的展望台, 欣賞周圍的風景, 哥哥要去廁所 (爸爸帶佢去), 佢嬲我同細佬唔等佢, 上咗塔頂先, 爆喊! 之後佢地去咗玩人造小山坡 (要除鞋除襪), 又玩咗好耐, 爸爸媽媽就坐埋一邊, 呆等咗好耐 (爸爸間中幫佢兩個影吓相)。

下午3點, 走喇! 玩咗大半日, 其實館外面仲有玩水的人造石澗, 爸爸話太熱, 又唔想佢地濕身, 所以冇去玩(孖寶唔知)。

公園返酒店只係20分鐘車程, GOOD! 酒店對面有超級市場, 我地去咗買桃、蘋果、乳酪、益力多同薯片。

3:45到酒店Check-in, 我地會住係呢間酒店4晚, 因為我同老公唔想日日搬酒店, 晚晚執野, 所以住4晚, 但其實去市中心的景點唔太方便, 車程要45分鐘, 塞車的話更加要1個鐘以上, 由香港可以揸上深圳喇!

Check-in之後, 我地請Reception的職員幫我地打電話去愛知牧場, book聽日下午2:45的雪糕製作體驗, 雞同鴨講咗好耐, 職員終於明白我地意思, 成功book咗, 牧場話要早15分鐘到, 如果要消取, 就要聽朝6點前通知牧場, OK!

上到房, 間房幾細(上網睇相大D架喎!), 但兩張床泊埋一齊, 都可以瞓到一家四口, OK啦! 35000円住4晚, 冇期望!  (不過, 下次可以住返好少少, 如果要連續住幾晚的話) 本來諗住俾孖寶午睡一陣, 但佢兩個話唔眼瞓, 由於花火大會今晚7點先至開始, 仲有時間, 老公話不如去AEON MALL行吓。

孖寶上車冇幾耐就瞓咗, 下晝5點左右去到AEON, 我話我唔行喇! 我留係車度睇住孖寶, 老公去行咗一陣, 佢話好大! 5:30左右就走, 因為去花火大會的場地都要40分鐘車程, 加上附近可能會封路, 同埋要搵停車場泊車, 都要時間, 都係早D去好D (本來諗住係AEON食咗飯先, 但似乎趕唔切)

6:40左右去到花火大會現場附近, 好多人向住同一方向行, 好塞車, 有警察指揮交通, 個燈位塞咗好耐(15分鐘), 附近的停車場都滿晒, 誤打誤撞, 老公駛咗架車入橫街, 我話我google過, 好熟, 好似可以企係呢個海邊度睇, 話口未完, 就俾老公搵到個街邊位 (已經有幾架車都係就咁泊低係度), 我地決定就咁泊低架車, 行去海邊, 帶埋張舖地墊同一袋零食, 俾我地搵到個空位, 可以坐低, 天色開始暗, 有D大風, 但唔凍! 孖寶不停話要食零食。

如果係香港睇煙花, 前面條欄杆一早已經企滿晒人, 

你休想坐係後面欣賞煙花?!

等咗冇幾耐, 就見到第一枚煙花係我地眼前的上空綻放, 雖然10幾年前同阿爸阿媽細佬去美國廸廸尼都睇過現場煙花, 但同老公&孖寶都係第一次, 仲要咁近距離, 前面全完冇人阻擋, 果刻, 太震撼喇! 甚至有一股莫名的感動湧上心頭, 好想喊呀!

現場睇煙花, 震撼的巨響+火藥味 = 超正!

不過, 身旁的哥哥, 超級驚D巨響, 佢要媽媽幫佢掩住對耳仔 (好似平時半夜行雷咁), 正當媽媽仍然沉醉於花火的璀璨之中的時候, 哥哥突然話要去vee vee, 細佬又話要去, 吓? 你兩個玩野呀? 頭先叫你地去又唔去! 爸爸帶佢兩個行去後面的臨時廁所, 爸爸話個廁所好暗, 哥哥差D跌落屎坑。

過咗一陣, 兩兄弟又嚷著要走, 咁耐架? 走未呀? 睇完未呀? 我想走! 我唔想睇喇! 所有的震撼、感動、醉人、璀璨...... sorry, it's already over! 媽媽惟有保持冷靜, 同盡量勸佢地留多一陣。"捱"到7:45, 我地一家四口走先喇!

雖然等唔到花火8點完結就走, 但已經超出我所想(我諗住只可以睇15分鐘, 而家竟然可以睇咗45分鐘, 好滿足喇!)

由於仲未食飯, 所以諗住揸車返酒店途中搵野食, 點知行錯路 (個GPS經常指示唔清晰), 誤打誤撞, 又去返頭先間AEON, 由於已經晚上8:30, 所以要即刻搵野食, 係G/F條食街來回咗兩次, 最後決定食魚生飯, 餐廳另有定食(啱孖寶食)。

自小已經唔俾手機佢地出街食飯玩,
好悶? 填顏色啦!

食完飯已經係晚上9點幾喇! 返酒店又要40分鐘, 都係唔好再行商場, 快D開車返酒店喇! 由於仲未買Legoland的入場券 (要去7-Eleven買1-Day Family Pass), 老公提意去買埋!

沿途好多Family Mart同Lawson, 就係冇7-Eleven, 行咗好耐先至見到有一間, 一家四口落車去買, 同職員雞同鴨講, 又要輸入姓名, 但只有日文輸入法, 英文版面直頭冇Legoland入場券揀, 搞咗好耐, 叫職員幫我地用日文輸入老公個名的拼音, 終於成功出到張單, 去cashier俾錢, 盛惠19,600円 (約HKD1,400)由於入場券係指定日期, 我地揀咗8月28日(Day 5)去, 希望到時唔好落雨啦! (我睇日本氣象廳話應該多雲)。

買完飛, 已經10點幾喇! 真係要快D返酒店喇!

孖寶今晚又係搞到差不多11:30先至瞓, 簡直係去年大阪之旅的翻版, 晚晚都咁夜瞓, 又唔夠瞓, 孖寶每日都超級扭計, 今次去旅行, 爸媽同孖寶都好辛苦啊!

Day 3 完

名古屋親子之旅2017 - Day 2

2017.08.25 (星期五)

名古屋今日好好天, 陽光普照, 天氣炎熱! 不過, 氣象廳預計長野縣(阿智村個縣)多雲有雨, 吓? 咁大鑊? 咁今晚仲去唔去到睇星?

由於要避開正午時間係戶外活動, 所以媽媽一早計劃今朝早去滑草先。

鬧鍾未響, 媽媽已經起咗身, 可能因為張床唔好瞓, 加上媽媽自己知自己事, 要搞好耐, 所以早D起身梳洗+化妝。8點叫醒孖寶, 刷牙, 換衫。

由於尋晚太夜瞓, 孖寶8點都未起身

8:30落去食早餐, 食早餐的地方都幾大, 選擇亦比之前住過的東橫INN同Comfort Hotel多, 爸爸幫孖寶拎野食, 媽媽就幫孖寶斟咗兩杯奶。

哥哥今次去旅行都算肯食早餐

食完早餐返上房, 執埋行李, Check-out, 老公去停車場揸返架車返黎, 期間, 哥哥話要去poo poo, 吓? 咁頭先係房度問你, 你又話冇, 而家check-out咗先至話要poo poo, 惟有留低兩個喼係酒店大堂, 叫細佬跟埋一齊黎, 哥哥poo poo期間, 細佬又話想poo poo, 喂! 你兩個玩野呀? 我惟有叫哥哥繼續屙, 媽媽一陣返黎, 然後帶細佬去隔離個廁所(唔係廁格), 開住兩邊廁所門, 先幫哥哥抺pat pat, 再幫細佬, 搞完一大輪, 行返出酒店大堂, 爸爸已經揸咗架車黎, 好在冇俾佢話我做乜掉低兩個喼係大堂唔理 (我實在係迫於無奈先至咁做)!

就係幫細佬仔影完呢張相後,
哥哥突然話要去poo poo

正式出發, 由酒店去滑草公園要30分鐘, 加上多車+塞車+搵唔到個停車場入口, 結果要45分鐘先至到, 可能係平日, 冇乜人, GOOD! 原來要登記先至可以借用滑草兜, 仲要限定每人只可以玩4次, 同埋規定要戴頭盔, 細佬好抗拒個頭盔, 由借兜一路扭到上山坡, 加上天氣熱, 細佬心情好惡劣, 至於哥哥就好興奮, 因為有得玩, 佢最鍾意就係玩! 哥哥首先跑上山坡, 但被工作人員(伯伯)阻止, 因為要有成人陪同先至玩得, 頭兩次, 我同細佬玩, 之後兩次就調轉, 我同哥哥玩, 雖然個山坡睇落去冇上次福岡果個咁高, 但都好刺激, 好好玩! 不過, 天氣實在太熱, 爸爸話玩完走喇! 唔再玩多一round!

 個滑草坡睇落好短

 規定要戴頭罩, 仲要冇得揀顏色

 好似小童咁!

天氣熱, 心情唔好, 細佬唔想戴頭罩

滑草道隔離有個兒童遊樂場, 孖寶話好想玩一陣 (雖然爸爸話太熱, 要走喇!) 遊樂場唔係好大, 但有間3層高的樹屋, 滾軸滑梯, 滑輪, 千秋, 細佬又要玩, 又要發脾四, 大嗌: 好熱! (x N次) 媽媽惟有開行把手提電風扇吹住佢, 哥哥就玩到唔捨得走!

爸爸拖住細佬一齊入樹屋

離開公園, 揸車去下一個景點 -- 航空宇宙科學博物館, GPS顯示車程要1小時, 諗住沿途搵野食, 不過, 由於時間尚早, 加上今日下午5:30要食晚飯, 所以決定去超市買麵包食, 買咗袋牛角包, 細佬揀咗腸仔包, 哥哥就揀咗朱古力包, 就係咁係架車入面食咗個所謂「午餐」。另外, 見超市有花火賣 (價錢就由200円至5000円都有), 雖然行程安排Day 6 玩, 但都係買定先, 我地揀咗包1000円的, 但成個超市都唔見有打火機賣 (之前係香港上網search過, 話要係便利店先至有得賣)。

 牛角包 + 北海道3.7牛乳 = 正!!!

其實都難為咗孖寶, 要陪爸媽一齊捱麵包

繼續揸車去航空博物館, 終於都見到喇! 好似好大同埋裝修緊, 泊好車, 行過草地, 好似去咗後門咁, 接待處話博物館而家裝修緊, 只開放一個展館 (就係一眼睇晒咁大, 仲要係冇冷氣的鐵皮屋入面), 老公話一場黎到, 都參觀吓啦! 成人每位300円, 小童免費。展館入面最吸引孖寶就係模擬揸民航客機同戰機, 由於冇乜人, 所以玩咗好多次, 不過, 真係好熱, 頂唔順! 展館仲有太空人... 衫俾人企埋去後面影相扮太空人, 孖寶又玩咗一大輪!

 模擬駕駛民航客機

 模擬戰機

 細佬初頭唔肯扮太空人影相

之後行過隔離的紀念品商店 (媽媽只係想涼下冷氣, hoho...), 孖寶見到有玩具飛機, 玩咗好耐 (佢兩個冇扭過要買, 不過媽媽見佢兩個玩得咁開心, 就同爸爸講, 不如送俾佢地做旅行禮物!) 爸爸叫孖寶每人揀一架, 佢兩個都揀咗 Osprey戰機, 爸爸就買咗件T裇俾自己。孖寶有禮物, 好開心, 尤其細佬, 因為佢好記得媽媽應承過佢, 會送旅行禮物俾佢!

三父子都買到禮物, 超開心!

由於要趕係5點前去到今晚入住的溫泉旅館, 所以要快D走喇! 行出停車場期間, 有個工作人員 (伯伯)走埋黎, 送咗每人一張貼紙俾孖寶, 佢地好開心!

下午3點, 揸車去阿智村的天心溫泉旅館 (GPS顯示要2個鐘), 希望趕得切啦! 孖寶上車冇幾耐已經瞓咗! 氣象廳話落雨, 真係落雨喎!  由於主要都係山路, 唔多車, 所以4:30已經去到溫泉旅館附近, 老公話想去超級市場買D野飲+生果+乳酪, 孖寶都起咗身, 一齊去買野! (雨停咗, 但都係多雲)

下午4:45, 終於到咗溫泉旅館喇! 有職員迎接我地, 去Reception登記, 揀咗5:30食晚飯, 同埋今晚7:30去天空樂園(酒店有入場券俾我地, 臨出發前去返Reception拎飛就可以)

酒店俾我想像中decent, 雖然有D舊, 但環境唔錯, 職員帶我地上房, 間房俾我想像中大, 亦唔up dup, 孖寶見到係溫泉旅館的setting, 有矮枱+地墊, 就二話不說拎晒D地墊黎玩, 仲急不及待要拆架Osprey戰機出黎玩, 見到孖寶開心, 媽媽都好開心!

由於仲有30分鐘就食飯, 加上今晚去睇星, 要瞓草地, 老公話唔好同孖寶沖涼住, 一家人係房度hea, 5:30落去食飯, 酒店安排咗我地係獨立廂房入面食, 孖寶兄弟見到成枱都係食物, 好興奮, 晚餐唔算特別豐富, 但我都食得好飽 (可能老公唔夠飽)。

晚餐都算幾豐富

食完飯, 醒起唔記得拎張膠墊 (要舖住黎瞓草地), 要返上房拎, 原來酒店職員已經幫我地舖好床舖, 孖寶見今晚瞓地下, 又好興奮。

由於天空樂園(第一場)的上山纜車開到7:45停駛, 同埋好多人排隊, 所以都要快D揸車去。落去酒店大堂Reception拎入場券, 交低房匙, 晚上6:30揸車出去, 由於係郊區, 冇路燈, 好黑, 加上個GPS老點, 老公又唔跟住前面D車, 上咗半山, 越行越唔對路, 結果要揸返架車落山, 7:15去到纜車站, 嘩! 點解星期五都咁多人架?

纜車站個停車場一早爆咗, 要泊隔離個爛地, 好在仲有位, 同孖寶行過去纜車站排隊, 一向冇耐性的哥哥, 不停話: 咁耐架? 幾時到我地呀? 媽媽惟有同佢講: 咁我派你去前面睇吓喇! 你睇吓有幾多人, 返黎話我知! 原來前面真係好多人, 不過, 望返轉頭, 嘩! 係我地後面排隊的人仲多, 條龍越整越長!

排咗超過30分鐘, 終於可以上纜車喇! 原來不設座位, 全程企, 同埋個車廂入面只係得一盞超細好昏暗的燈, 纜車上山, 個山好黑, 車廂又冇乜燈, 加上都幾迫, 好在孖寶冇嗌好驚, 冇扭計, 個山好高好高, 架纜車行咗好耐, 我感覺好似搭咗20分鐘先至上到山頂, 落咗纜車, 我地跟住D群眾一路向前行, 行咗一陣就見到有個大草地 (已經有好多人), 我地搵咗個空位, 舖咗張膠墊, 俾兩個背囊孖寶挨住, 不過, 可能因為下晝落過雨, 草地又濕又凍, 唔係咁舒服!

影完呢張相冇幾耐, 孖寶就開始埋怨, 咁耐架!

晚上8點就會全場熄燈睇星星, 仲要等15分鐘, 不過, 只係過咗5分鐘, 孖寶就不停咁話: 咁耐既? 幾時有得睇? 其實雖然周圍都有強力射燈, 但望上天都可以見到有幾粒星星特別光。就係一遍埋怨聲+安撫聲之中, 終於等到佢全場熄燈, 嘩! 星星呀! 不過, 唔算多! 全完冇上次係澳洲見到條銀河咁震撼! 加上多雲, D星星好似俾層膜隔住咗咁, 個天灰灰濛濛咁, 唔夠黑!

睇咗幾分鐘, 孖寶又扭, 哥哥話想走先, 吓? 成個草地都瞓滿晒人, 點走得甩呀? 加上纜車停駛咗喎, 冇可能係呢個時候落返山喎! 爸媽惟有不停咁安慰孖寶, 講吓其他野, 分散佢地的意注力! 好辛苦先至捱咗30分鐘, 等佢開返燈, 全場開燈後, D人好似走難咁, 走都走唔切, 爸爸拖住哥哥, 我拖住細佬, 我行得慢, 差D同老公失散咗! 平時睇得多二次大戰電影, D猶太人點樣走難, 點樣家人分散, 點樣生離死別, 果刻, 我全全完完感受得到!

大家同一時間衝去搭纜車落山, 我地都算走得快, 排咗20分鐘, 下一架纜車就輪到我地上喇! 呢個時候, 孖寶哥突然話要去vee vee, 吓? 你早唔講遲唔講, 而家vee vee, 下一架纜車到我地喇喎! 細佬又話要去vee vee, 我同老公惟有死死地氣同個職員講 : Toilet! 行返出去搵廁所, 我同老公講: 一陣都唔知俾唔俾我地返去? 如果要重新排過就大鑊, 都見唔到龍尾!

去完廁所, 厚住面皮搵返個職員, 佢竟然俾我地入返去, 唔駛再排過 (再排過應該要2粒鐘後先至落到山)。9:30落咗山, 哥哥出咗纜車站就扭計, 佢話好熱, 要除咗件外套, 爸爸叫佢等陣先, 行出D先除, 因為後面好多人, 佢唔聽, 自己夾硬除, 仲要掉咗件外套落地下, 俾爸爸鬧咗佢一鑊金既!

行返停車場攞車, 揸車返酒店, 10點返到酒店, 幫孖寶沖涼, 刷牙, 叫佢兩個calm down同強迫佢地瞓覺。

仲係好興奮, 瞓唔到!

晚上11點幾, 我同老公輪流落去浸溫泉, 有個露天風呂, 冇人, D燈又暗, 所以感覺有D恐佈, 浸咗一陣就走, 半夜12點, 終於可以抖吓, 切個桃同老公一齊食!

個桃好大個, 都算甜, 好多汁!

12:30終於可以瞓覺, 但張床墊唔夠厚, 好硬, 我側瞓好辛苦, 我係衣櫃搵多張床墊出黎, 老公幫我加多張墊底, GOOD! 可以瞓覺喇!

Day 2 完