孖寶兄弟語錄 (6)

由於佢地儲埋好多垃圾, 最近佢地愛上咗剪紙碎, 仲鍾意儲埋成箱紙碎, 媽媽為咗減輕對屋企儲存空間的壓力, 提議細佬仔不如掉咗個扭蛋殼 (媽媽天真以為咁樣就可以減輕對屋企儲存空間的壓力?!)

媽媽: 不如掉咗呢個啦! 都冇用!
細佬: 唔得架! 有用架!
媽媽: 吓? 有咩用?
細佬: 要黎保護對眼! 同埋要黎睇野既!
媽媽: 唔係掛?! 咁你示範點用喇!

爸爸媽媽即場笑到收唔到聲!!!

唧花曲奇

話說自從7月頭, 媽媽每個星期六下午都會整曲奇, 由於整曲奇已經整到零失敗, 就開始Pat Pat痕了, 要試吓整好Hit的唧花曲奇!

唧花曲奇所需材料同之前整的印模曲奇一樣, 所以唔再詳細介紹, 主要分別係, 整印模曲奇的麵團唔可以太軟, 所以通常舊麵團整好之後要放入雪櫃雪20分鐘左右至硬身, 至於唧花曲奇所需的麵團要軟身, 所以整好咗麵團之後, 就直接放入唧花袋, 咁先至容易唧到靚花, 焗之前要放入雪櫃雪20分鐘至比較硬身, 咁焗出黎先至唔會溶晒, 走晒樣!

不過, 整咗2次唧花曲奇都係唔脆既, 反而似BearBear熊罐果隻曲奇咁, 食到成口粉 (老公唔係好Like), 今日上網爬文, 先至知道唧花曲奇係唔會卜卜脆架, 成功的唧花曲奇口感應該係鬆化, 一入口就化晒, 咁即係我其實成功咗喎! 其實, 我個人都唔係太Like果種口感, 始終覺得曲奇係要脆先至好食, 不過, 我好鐘意唧花的過程, 好好玩, 唧得靚會好有成功感, 唧唔靚我會剷走佢再唧過,加上我的忠實Fans -- 細佬仔仍然好Like媽媽整的曲奇, 佢話, d曲奇好淋呀! 好好味! (笑樣加一滴汗的表情符號)

Anyway, 都分享一吓唧花曲奇的製作方法:

(如要整朱古力味, 可以係打完牛油同糖之後, 加入朱古力粉或美祿粉, 個人覺得朱古力粉冇乜味, 反而用美碌粉就超好味, 記得如果加咗朱古力粉, 咁麵粉就要落返少D, 唔係舊粉團就會變成超硬, 好難唧花)

1. 取一個即棄膠唧花袋 (千期唔好用布質果隻, 我用過一次, 唧到標油, 成手都係, 個袋又難洗, 感覺好唔衞生, 最後成個袋掉咗)

2. 在唧花袋的三角型底部剪一個開孔 (開孔要配合唧咀大小, 唧咀用最普通的花紋圖案就可以)

3. 在焗盤舖上牛油紙備用

4. 搓好麵團, 趁麵團軟淋淋就放入唧花袋, 扭緊唧袋的上端

5. 唧花有好多方法, 我用的是最簡單的打圈唧法, 順時針由外到內唧, 最後稍為按壓一吓中央部份

6. 唧好花後, 擺入雪櫃雪20分鐘至硬身

啱啱唧好的曲奇係最靚架, 條花邊好sharp, 成個曲奇好立體,
但焗完之後就......

6. 焗爐預熱170度, 焗15分鐘左右即成

7. 打開焗爐約10分鐘, 然後取出放涼

孖寶兄弟語錄 (5)

每晚孖寶瞓覺前, 媽媽都會陪孖寶一陣(其實都成30分鐘, 咁叫做一陣?!), 熄晒燈, 媽媽坐係孖寶床邊, 通常孖寶都唔會瞓覺, 而且不停咁同媽媽講野, 要媽媽經常打斷佢地話題, 早幾日......

細佬: 媽媽, 你老咗, 我買部按摩機俾你, 可以碌上, 碌落!
媽媽: 嘩! 細佬你好錫媽媽, 好孝順啊!
細佬: 係呀! 你要擺你隻大腿上去, 好林果度, 按摩, 咁就會好舒服喇!
媽媽: (心諗: 乜我隻大腿好林咩?!)

準備升K.2 (2)

其實就冇咩要準備, 因為原校升讀K2, 同埋都係返幼稚園啫, 所以唔似得返小學/中學咁, 要好多準備。

由於孖寶兄弟生長好緩慢, 所以舊年買果套XS碼校服仍然啱著! 至於返學鞋, 細佬放暑假前話對運動鞋好窄, 爸爸買咗對超大碼俾佢, 9月開學應該仲有鬆, 哥哥就要度吓腳仔, 可能都要買過對鞋。

至於最需要準備的, 都係作息時間, 經過超過一個月的調校, 佢地已經養成早睡早起的習慣喇! 爸爸媽媽真係要開香檳慶祝, 以下係孖寶的作息時間表:

07:45  起床 (佢地最近呢幾日都7:30起身, 然後過黎爸媽間房, 上埋我地張床)
07:45  刷牙
08:00  食早餐
08:20  食完早餐, 去便便
08:30  自由玩樂時間
12:30  食午餐
13:30  午睡
14:30  起床
15:00  下午茶 (鈣思寶/益力多 + 餅乾, 呢排唔鍾意食乳酪)
15:30  可以睇30分鐘Youtube
16:00  自由玩樂時間
18:30  沖涼
19:00  食晚餐
19:45  爸爸媽媽陪孖寶玩遊戲時間
20:45  刷牙
21:00  講故事
21:15  返房準備瞓覺
21:30  媽媽陪孖寶
22:00  瞓著 (之後就係媽媽的自由時間喇! YEAH!)

至於最需要準備的人 -- 應該都係媽媽! 因為媽媽要朝早幫手, 包括幫佢地刷牙, 同佢地一齊食早餐, 換衫, 帶佢地返學 (因為工人姐姐一個人無可能又整早餐, 又照顧到佢地, 一朝早趕時間返學, 媽媽一定要幫手), 所以媽媽由今個星期開始, 提早15分鐘起身, 梳洗, 換衫, 化妝, 如果要同爸爸落樓下食咗早餐先, 仲要再早20分鐘起身。另外, 媽媽要準備心情應該黎緊K2的功課壓力, 吓? 功課壓力? 點解唔係小朋友有壓力, 係個阿媽有? 唉! 話說細佬仔係一個好有責任心的小朋友, 食完飯會主動拎D功課出黎做 (呢幾日媽媽講故事 -- 故事中的主角話: 最開心的事就係畫圖畫喇! 至於細佬, 佢竟然話: 開心的事就係做功課! 好想錄佢音!) 但係哥哥, 每次叫佢拎功課出黎, 佢都十萬個唔願意, 每次問佢想唔想做暑期作業, 佢都話唔想! 所以媽媽的壓力就係咁黎 -- 係叫人做功課的壓力! (真係唔敢想像升咗小學會點......)

Anyway, 早幾日, 媽媽同爸爸傾計, 大家都有同感, 最近湊孖寶輕鬆咗 (哥哥喊少咗, 雖然佢都會因為好少事而爆喊, 但再冇喊到歇斯底里, 都算快咗收聲!) 媽媽同爸爸講, 好似最辛苦的階段已經過咗, 要好好享受黎緊呢2年喇! 因為上咗小學, 就會係另一個戰場, 另一個「更辛苦」階段的開始!

一覺瞓天光!

一覺瞓天光?

做咗人父母的, 應該已經忘記咗呢個詞語, 或者已經唔知係咩黎! 話說自從懷孕中期開始, 媽媽已經唔可以一覺瞓天光, 因為個肚實在太大, 太重, 每晚要轉身一定醒幾次, 到懷孕後期, 更加因為太辛苦, 要坐到天光先至瞓得著!

到咗孖寶出世之後, 我同老公都唔可以一覺瞓天光, 因為要餵夜奶, 無論係一齊起身餵, 抑或輪流起身餵, 都係無覺好瞓, 甚至係無覺可瞓!

到咗孖寶6個月叫做戒到夜奶 (11點餵完, 第二朝6點再餵), 但爸爸媽媽都唔可以一覺瞓天光, 因為孖寶會半夜起身爆喊, 除咗要抱佢地起身, 安撫一輪之外, 哥哥就要不停幫佢執奶咀同塞奶咀, 細佬就要不停幫佢換紗巾, 摺靚條巾(啱啱fit佢個口型), 然後塞紗巾入佢個口, 無論天氣凍, 天氣熱(開冷氣), 都要全晚不停起身檢查有冇FU被, 凍唔凍, 爸爸媽媽想一覺瞓天光? 跟本冇呢個權利/可能, 除非係死咗!

到咗孖寶戒咗奶咀/紗巾, 佢地半夜仍然係會爆喊, 仲會變本加厲 --> 喪喊,老公甚至用「撞邪」黎形容佢地, 因為係合埋雙眼, 精神失常咁雙腳狂踢, 抱住佢地係會傷及你內臟既! 所以惟一方法係放低佢係大人床或梳化由得佢喊 (因為驚嘈醒埋另一個, 所以通常一開始已經急急抱佢離開現場先), 再唔收聲就開晒全屋的燈, 務求令佢, 快D醒呀你! 快D醒呀! 由於佢地係半夜爸爸媽媽EQ最低的時候搞D咁既野, 所以爸爸好多時都忍唔住車巴佢地! 發展到後期, 佢地一邊喪喊, 一邊大叫: 唔鍾意爸爸! 結果, 只有媽媽可以收拾個殘局, 留守到最後一刻, 即make sure佢瞓咗先, 試過頂唔順, 以為佢差不多瞓著, 可以走得, 結果媽媽返房一瞓上床, 又聽到爆喊聲, 媽媽又重覆做返同一連串動作 (哥哥有時仲大叫鼻塞, 抖唔到氣, 媽媽要幫佢洗鼻, 吸鼻, 噴鼻, 仲要捱鬧!)

備註: 最艱苦時期係每隔兩個鍾, 由唔同的人爆喊! 要安撫, 抱抱, 等佢收聲, 陪瞓, 直到佢瞓著, 最快要30-40分鐘, 輪到媽媽返房, 聽住爸爸的坦克車聲, 要典床典足一個鐘先至瞓得返, 但係30分鐘後, 喊聲又響起)

呢個情況持續咗3年...... 只有3個字可以形容 -- 「人都癲」!

最近, 好似開始漸見曙光喇! 話說最近2星期, 孖寶再冇半夜起身爆喊喇 (行雷閃電除外, 哥哥好驚, 話要同我地瞓, 至於細佬, 第二朝問返佢, 佢竟然話聽唔到行雷聲同哥哥的爆喊聲, 勁!)

我同爸爸終於再嚐一覺瞓天光的滋味 -- 爽!

孖寶兄弟語錄(4)

話說呢幾日爸爸個pat pat好痕, 佢好想買架電動車俾孖寶, 但只能買一架, 兩個人, 得一架車, 點玩?

爸爸: 如果我買一架電動車返黎, 好唔好?
細佬: 好呀!
爸爸: 但我買一架咋喎, 你地會唔會打交, 爭住玩?
細佬: 唔會架, 我會讓哥哥玩先, 我排隊!
爸爸: (雙眼亮晶晶) 吓? 真係架? 細佬你好乖! 咁你俾哥哥玩先, 玩幾耐呀?
細佬: 玩一陣, 只可以玩一陣架咋!
爸爸: 但係如果真係兩個都爭住要玩, 打交, 搞到喊晒, 咁點呀?
細佬: 咁就兩個都唔俾玩, 爸爸掉咗架車佢, 連乖果個都冇得玩架喇!
(正當爸爸媽媽想講野既時候......)
細佬: 我好明白事理架! (配合埋佢個沾沾自喜樣)
(爸爸媽媽即時笑到出唔到聲)
細佬: 你地兩個做咩笑到咁?! 吓?! 笑咩? (佢自己都忍唔住咀角微微向上)
爸爸: 因為細佬你真係好明白事理! 爸爸都想講!
媽媽: 因為細佬你好可愛!!!


孖寶兄弟每晚瞓覺前都要爸爸、媽媽陪佢地, 通常係爸爸陪先, 同佢地傾吓計, 今日做咗D咩, etc. 然後就熄燈, 輪到媽媽陪...

哥哥: 媽媽, 我想你幫我R背脊!
媽媽: 我R一陣架咋!
哥哥: 唔得, 要R到我瞓著 (已經急不及待扯起件衫俾我R)
(15分鐘後......媽媽手軟...... 停咗)
哥哥: 媽媽你要幫我R背脊!
媽媽: 吓? 仲R?
哥哥: 我想你R到我瞓著!
媽媽: 咁我老咗, 你會唔會同我R背脊架?
哥哥: 會架! (媽媽心諗: 信你至奇! 我老咗, 你就嫌我一陣老人味, 唔想R)

細佬: 媽媽, 我想你坐係度陪我!
媽媽: 陪緊囉! 我陪一陣架咋! 你要自己瞓!
細佬: 唔得! 我想你陪好耐!
媽媽: 吓? 要陪到你瞓著?
細佬: 唔係! 我要你陪到聽朝!
媽媽: 吓? 聽朝? 咁我要瞓埋係你隔離喎!
細佬: 唔得! 你要坐係度!
媽媽: 坐到聽朝??? 咁我咪冇得瞓覺???
細佬: 你聽朝瞓返!
媽媽: 吓? 但係我聽朝要返工喎!
細佬: 媽媽, 我想你陪我呀! 陪好耐呀!
媽媽: 得啦! 你瞓咗先講啦!
細佬: 瞓咗講唔到架!
媽媽: (笑到出唔到聲)
細佬: 你做乜笑我?

孖寶兄弟語錄(3)

細佬: 媽媽, 我唔想你返工呀!
媽媽: 咁不如等你大個, 輪到你返工, 媽媽咪唔駛返工囉!
細佬: 咁你要幫我湊BB喎!
媽媽: 吓? 幫你湊BB?
細佬: 係呀! 我老婆幫我生咗D BB出黎, 你幫我湊!
媽媽: 吓? 仲要係D BB, 唔係一個?
細佬: 係呀! 好多BB!
哥哥: 媽媽, 你都要幫我湊BB!
媽媽: 吓? 仲要湊埋你D BB? 咁媽媽咪要湊好多個BB囉? 屋企變咗托身兒所!


哥哥: 媽媽, 我第二時大個返工, 你係屋企等我! 我會係個camera睇住你, 你記得揮手喎!
媽媽: 啊! (心諗: 到你大個, 都唔駛要個cam啦!)


細佬: 媽媽, 我第二時大個返工, 我放工就會即刻返黎
媽媽: 我驚你第二時會話, 媽媽, 我放工要同朋友出街食飯, 唔返黎食飯喇!
細佬: 唔會架! 我會返黎架! 我放工之後, 會去買餸, 然後煮飯俾你食!
媽媽: 咁又唔駛, 到時我唔駛返工, 等我去買餸啦, 我煮飯俾你食!
細佬: 咁食完飯, 我帶你落去玩"奸爸爹" (要入錢的機動遊戲)


哥哥: 媽媽, 第二時你老咗, 我食完飯, 然之後再餵你食飯!
媽媽: 好啊! 然然好孝順媽媽! 咁如果我好肚餓, 你可唔可以餵咗我食飯先, 然之後你先至食呀?
哥哥: 得架! 我餵咗你食先!
媽媽: (心諗: 希望我老咗都唔駛你餵啦!)