2022.12.26(星期一)
校咗鬧鐘, 今朝7:45起身!
食完早餐, 執埋行李, 早上9點Check out, GPS顯示車程要35分鐘, 結果都係要1個鐘。又係泊返架車係金城碼頭停車場(泊3/F唔駛上落樓梯), 今日唔係假日, 所以日泊只係1,000円 (尋日泊咗2.5個鐘, 盛惠1,500円)。
泊好車, 急步過天橋過對面Legoland, 第三次嚟喇, 熟晒D環境! 一家四口拿拿林係門口自拍, 即刻入場!
細佬話要玩咗過山車先, 然後一家四口直衝入去, 冇乜人排隊, 等第二架車已經上到喇! 玩完第一次後, 孖寶話想玩第二次, 爸媽當然唔會再玩啦! (我諗起舊年係廸廸尼, 玩完2次灰熊山谷, 再加一次Space Mountain, 差D嘔落人地架過山車度, 我唔想案件重演呀!) 好在我生咗對孖仔, 孖寶兄弟2個人, 有伴一齊玩, 爸媽可以企埋一邊, 爸爸本來想幫佢地影相, 但架過山車太快, 都睇唔到佢地係邊!
之後, 去玩飛天單車, 我同細佬坐, 爸爸同哥哥坐, 都係冇乜人排隊, GOOD! 揀星期一嚟Leogland, 係明智的決定! 然後, 離遠見到有人玩Ninja飛行器, 好似好好玩, 好刺激咁喎, 上次都唔見有, 今次一於玩D之前未玩過的遊戲啦! 可能真係好玩, 所以比較多人排隊, 我地等到第3輪先至上到, 一人一架機, 可以手動拍翼, 好得意, 我幫佢地影相, 結果俾工作人員發現我冇擺低手機, 即場被"沒收"! 原來, 真係好好玩, 好似雀仔咁, 好Free係天空度飛咁!
我話好想玩返上次揸船射水嗰個遊戲(為咗玩呢個, 媽媽仲特登帶定雨褸俾孖寶), 所以就行返去海盜區, 都唔算多人排隊, 但因為一個family一架船, 所以都等咗成15分鐘先至上到船, 哥哥超級興奮, 不停射人, 落船之前仲射濕咗細佬個pat pat。
係附近搵個位, 食吓零食&香蕉(因為Legoland收5pm, 為咗爭取時間玩多D遊戲, 我地諗住唔食午餐)。休息過後, 行咗去中間睇Lego城市模型。之後, 我見到上次好想玩但冇玩到的遊戲 -- 企係架船上不停掟灣, hoho! 即刻跑去排隊, 都唔算多人排隊, 又係我同細佬一架船, 爸爸同哥哥一架, 結果, 細佬瘋狂掟灣, 片晒D水入架船度, 我隻襪濕晒! 細佬玩完第一次, 仲想玩多次, 我唔得喇! 隻腳好凍呀! 爸爸你陪細佬玩啦! (哥哥話唔駛玩多一次)。
原來哥哥見返上次部BB跳樓機, 佢話想去玩, 我話好呀! 你自己去排隊玩啦! 之後, 細佬都過埋嚟, 同哥哥一齊玩跳樓。
之後, 我地去咗Lost Kingdom玩射槍, 孖寶唔記得上次有玩過, hoho! 然後, 我地去玩揸船仔, 孖寶話今次想自己一人揸一架, 好呀! 爸媽鍾意一齊坐一架, YEAH! 玩完揸船仔, 孖寶見到隔離可以自己砌船, 然後放架船沿住水流衝落嚟, 又玩咗一大輪先肯走(D水凍到冰水咁)。
孖寶話已經冇興趣玩揸車(睇落又真係好BB), 去咗玩消防局救火(上次爸爸同哥哥玩, 我同細佬冇玩到), 我地一家四口合作, 合力整郁架消防車, 同其他組鬥快, 去到對面, 落車, pump水, 救火, 然後揸返架消防車返起點, 完成! (結果, 我地係最快的一組, YEAH!)
消防局對面就係睇4D電影, 原來就快開場, 於是就衝咗入去睇, 孖寶話睇唔明, 是但啦! 總之就係有D風吹埋嚟, 有D水彈埋嚟, 都幾過癮!
之後, 見到有Lego Workshop(我記得呢間嘢以前係賣Souvenir), 原來可以自己用Lego砌個圖案, 貼係牆上(細佬好想可以買走!) 咁又玩咗半粒鐘!
下午2:30, 爸爸話好肚餓, 要出去食午餐, 返嚟再玩過。佢同哥哥大大步衝咗出門口, 好在我諗住穏陣D, 問吓職員係唔係可以再入場先? 原來係 -- 唔可以! 我拿拿林大叫爸爸, 叫咗好多聲, 佢先至有反應, 回頭望吓我, 我話職員話出咗去, 冇得再入場! 爸爸當然銀咗一大輪啦! 結果都係要屈服, 死死地氣係Legoland入面搵嘢食!
去咗門口隔離間炸雞店食, 爸爸一見到個價錢已經...... 求其叫咗一個套餐同一個兒童餐(咁爸爸你頭先又話好肚餓, 要食嘢, 而家叫得2個餐, 夠邊個食呢?!) 拎住2個餐上樓上搵位, 大把位, 冇人既! 爸爸出去斟汽水, 孖寶食炸雞, 媽媽都好肚餓, 我唔客氣喇! 爸爸, 你唔肚餓, 可以唔駛食!
細佬話想食爆谷, Legoland入面得一個小食亭賣爆谷, 我記得上次食過, 淋既! 又冇味! 唔甜! 唔好食! 不過, 算啦! 孖寶想食, 買囉!
孖寶話想去兒童遊樂場玩攀架, 好呀! 你地玩啦! 爸媽去玩其他嘢, 4pm過嚟執返你地! 我同老公去咗Lego Factory, 諗住冇乜人排隊, 應該好快入得, 點知等咗30分鐘(想講粗口)! 我其實只係想幫孖寶拎2粒Lego紀念品, 我唔係想參觀囉!
下午4點去搵返孖寶, 孖寶又話, 想去埋揸船仔隔離個遊樂場玩(咁其實唔駛俾咁多錢入嚟Legoland玩啦, 求其係出面搵個免費公園玩咪得囉!) 媽媽提議玩多次揸船仔先, 然後孖寶去玩遊樂場, 等候孖寶期間, 我同老公又入返去Workshop砌Lego(因為外面收咗太陽, 真係好凍!!!)
下午5點, 收檔喇! 要走喇! 細佬話想去Souvenir Shop睇吓有冇嘢買! 係冇既! 算啦! 走喇! 今晚要去鈴鹿, 要揸超過1個鐘車先至到!
行返去停車場攞車, 途中見到有街頭表演, 睇咗一陣。
晚上7點去到鈴鹿AEON, 7:30搵嘢食, 爸爸話呢間日本餐廳唔錯, 要影張相記低佢, 下次搵返呢間。
今晚住鈴鹿賽車場酒店(包早餐), 所以唔駛去超市買嘢, 晚上9點到咗酒店Check in, 個女職員英文好勁, 佢話可以而家俾咗錢先, 咁聽日就唔駛再過嚟Check out, 又話驚我地book唔到聽日個Suzuka Challenger, 話可以幫我地上網(日文網)Reserve咗先, 搞咗一大輪(用唔到信用咭俾錢, 因為收唔到個code), 搞到10點先至揸車去另一個Building返酒店房, 爸爸已經開始埋怨緊媽媽! 孖寶又已經好攰! (媽媽好對你地唔住呀!) 其實我自己都好攰! 好辛苦! (早知唔好理個職員講乜, 拿拿林俾咗錢就返房)
突然, 哥哥話急poo, 我同哥哥即刻返房先, 爸爸同細佬仔拎行李(辛苦晒!), 然後架車要泊係停車場, 老公要去泊車, 再行返返嚟! (再一次辛苦晒!)
到呢一刻, 我真係辛苦到想喊! 再加上, 間房...... 除咗4張床同網上照片一樣之外, 成間房同個廁所都強差人意(呢間酒店仲要係旅程中最貴的一間)...... 我已經到咗臨界點...... 仲要係D喼入面, 拎返全家人D衫同梳洗用品出嚟, 等孖寶沖完涼, 仲要批蘋果俾佢地食, 我已經攰+辛苦到......差D喊出嚟! 我突然覺得去旅行去得好折墮, 今次係我話想去旅行, 結果...... 自討苦吃...... 自己又辛苦, 孖寶又辛苦...... 每日都好攰, 每晚都好夜瞓, 然後, 我塊面唔知太凍 / 太乾 / 還是敏感, 不停狂爆粒粒, 越爆越多粒, 我好驚會爛面, 呢一刻, 我好想爆喊, 好想即刻飛返香港......
我惟有深呼吸, 然後叫自己收返埋D眼淚, 錢已經駛咗喇! 人都已經係日本喇! 惟有叫自己唔好諗得咁負面, 孖寶係攰, 但佢地今日係Legoland玩得好開心!
安頓咗孖寶瞓覺, 我都拿拿林沖涼, 執埋D嘢, 瞓覺!
