北海道親子之旅2019 - Day 4

2019.07.30 (星期二)

今日天陰陰, 但冇落雨!

為咗避開食早餐的人潮, 我地決定9點先至落去食早餐, 食早餐前, 老公同哥哥去大浴場浸多次溫泉, 我唔想浸, 因為太多人, 好冇癮! 我同細佬留係房度, 我執嘢!

差不多9點, 落去餐廳食早餐, 果然已經過咗人潮, 今朝食得舒服過尋晚, 同尋晚晚餐一樣, 選擇不多, 但食得飽。

早上9:45 Check out, 10點出發去登別, 車程要1小時, 似乎趕唔切去睇11點的企鵝巡遊, 不如去參觀地獄谷先。

早上11點到達大湯沼停車場, 泊車盛惠500円(10幾年前唔駛錢泊車架喎!) 不過, 原來可以泊埋地獄谷的停車場, OK啦! 孖寶話D琉璜味勁臭, 周圍行吓, 影咗幾張相, 孖寶突然唱: 我們已經戀愛了! 吓? 哥哥細佬, 你地係幾時開始戀愛架?! 咁細個就學人談戀愛, 仲要兩兄弟添, 咁可愛! 爸媽當然唔會放過呢個機會, 即場要求佢地拍片啦! 佢哋扭扭擰擰, 要爸媽陪唱, 一家四口係人地景點度玩拍片, 都唔係嚟觀光既!

之後, 老公揸車兜上山度睇吓, 可以係山頂望返落嚟大湯沼, 然後, 繼續沿山路行, 可以去到一個叫做俱多樂湖, 係火山湖, 好大, 水面好平靜, 環境好舒服, 不過, 好多昆蟲飛飛吓, 我同細佬落咗車一陣已經頂唔順要上返車, 爸爸同哥哥落咗去湖邊影相。之後, 揸返架車去地獄谷停車場, 泊車, 行入去參觀, 孖寶係D木棧道跑嚟跑去, 騷擾到人, 唉! 真係羞家!

中午12:30離開地獄谷, 要出發去登別尼克斯海洋公園, 下午2點有企鵝巡遊, 仲未食飯! 老公話唔想係樂園入面食飯, 因為通常都唔好食, 途中經過一間好似有嘢食的建築物, 唔肯定係唔係餐廳, 因為有圍牆, 有內園, 老公叫我入去睇吓, 原來真係有嘢食, 有飯, 有烏冬, 家庭式經營, 好似都OK, 咁快快脆食咗嘢先!

完全睇唔出呢間屋係餐廳

入到去, 孖寶話想坐地蓆 (因為佢地可以走嚟走去), 原來間嘢冇冷氣, 只有風扇, 同埋開咗窗, 不過冇風。叫咗2個麵, 1個飯, 等咗10分鐘都未有嘢食, 大鑊! 因為我哋入嚟之前, 咁啱有一枱香港人, 餐廳要招呼咗佢地先, 等咗20分鐘, 終於有嘢食喇! 嗱嗱林塞D嘢食入個口度, 再由背脊骨落, 下午1:30走喇 (只係用咗15分鐘食晒D嘢!) 好在去樂園只係10分鐘車程, 下午1:40泊好車, 買飛入場, 大人2,500円, 小童1,300円, 一家四口盛惠7,600円, 老公話唔平喎! 係呀! 不過, 要睇企鵝巡遊, 冇辦法啦!

仲有15分鐘先至到2點, 老公話去個城堡入面行吓, 原來係室內水族館, 有3層, 行咗入去, 想行返出嚟的話, 唔係咁易, 我話要霸位睇企鵝巡遊喎! 一家四口氣來氣喘咁搵返條路出返嚟, 廣場上面已經超多人, 惟有搵吓仲有冇吉位插入! 孖寶細細粒, 可以走去人堆前面, 我同爸爸惟有搵個水tum嚟企(只有水tum位冇人)。我哋企咗係龍尾, 巡遊開始, 只係聽到音樂同遊人的起哄聲, 乜都睇唔到, 等咗好耐, 終於見到著住黃色圍裙的工作人員, 帶住8隻小企鵝行緊過嚟, 孖寶第一次咁近距離見到企鵝, 呆晒!

企鵝遊行完, 有工作人員講解企鵝, 不過, 我地唔識日本, 唔知佢講乜, 加上天氣都幾熱 (全日冇落雨, 冇風, 應該超過30度, 孖寶滿頭大汗!) 好多人都散去, 正當我地都想離開的時候, 企鵝巡遊下半場開始, 因為D企鵝仔要行返返屋企。於是, 我地雖然排龍尾, 而家就變成龍頭, 加上頭先D人有90%都走晒, 我地基本上係同小企鵝同步一齊行, 睇住佢地返屋企der~!

Bye Bye小企鵝

睇完企鵝巡遊, 下午2:45有海獅表演, 嗱嗱林行去海獅表演場館, 已經坐滿晒人喇! 我地惟有坐最側邊下排D位, 是但啦! 原來全場只得一隻海獅同一個訓練員表演, 唔算好精彩, 不過海獅會游埋嚟, 俾每邊的觀眾近距離睇清楚。

Smile!

下午3點, 去睇沙甸魚燈光Show, 等咗好耐, 好多人, 好焗 (註: 北海道所有室內場館普遍都唔夠冷氣/唔開冷氣, 雖然佢冬天好凍, 全年有10個月都係20度以下, 但7-8月可以去到30度高溫, 其實都應該要安裝足夠冷氣囉!) 老公睇睇吓話好焗, 唔掂, 同細佬出返去先! 我陪哥哥繼續睇, 到差不多完場, 我帶哥哥離開先!

天氣太熱, 我提意買雪糕食, 老公終於冇阻止我喇! 買咗一支蜜瓜味, 一支牛乳味, 個蜜瓜味有D假, 牛奶味OK! 食完雪糕, 去行返頭先未行完的室內水族館。下午4:20離開樂園, 揸車返去千歲市, 車程約1個鐘。

原來佢哋真係已經戀愛了! wakaka......

下午5:30到達千歲AEON MALL, 原來好細, 冇嘢行, 行咗一陣, 去行二卜リ, 又係冇嘢行既! 算喇! 搵嘢食! 搵咗幾個街口, 都決定唔到食乜, 晚上7點, 算喇! 去食西式咖喱飯專門店啦! 佢兩個之前係香港話鍾意食咖喱飯!

原來除咗咖喱飯, 仲有其他飯食既! 我哋全家都冇叫咖喱飯, 我叫咗個好多沙律菜+漢堡扒餐, 老公叫咗個漢堡扒加蛋餐, 另外叫咗2個兒童漢堡扒餐俾孖寶。

晚上8點食完飯, 去返頭先AEON超市買嘢, 唔駛買聽朝早餐(酒店包早餐)。晚上9點返酒店, 今晚住ANA Crowne Plaza, 靚嘢嚟! 但唔貴喎 (4星級酒店, 唔駛20,000円包早餐, 暑假的北海道嚟講, 算好平)! 上到房, 間房唔大, 2張床比較窄, 但間房同個浴室都好靚, 孖寶今晚可以係浴缸度玩水。

Day 4 完

備註: 今日全日都冇落過雨, 原來日本氣象廳同香港天文台一樣, 都係信唔過der~! 老公好心痛用咗800円買咗把遮, 仲要只係用咗10分鐘(都冇)! 我就覺得, 雖然嘥咗錢, 但係冇落雨! 應該要感恩! 最好成個行程都唔需要再用把遮啦! 日日陽光普照!

北海道親子之旅2019 - Day 3

2019.07.29 (星期一)

今日天陰陰, 電視的天氣報告話今日稍後時間天氣開始唔穏定, 聽日都係咁上下, 吓??? 唔穏定? 即係會落雨?! 點算呀? 對我嚟講, 去旅行落雨 = 世界末日, 因為當年去澳洲13日, 有10日都係落雨, 我成個行程都毁掉, 心理陰影面積大到無法估算!

係房入面食早餐, 今日有冷麵食, 孖寶最Like! 早上未夠9點check out, 出發去洞爺湖, 車程超過2個鐘。睇住個天由天陰陰, 變成落毛毛雨, 雨勢時大時細, 中途經過道之駅, 去廁所。

早上11點左右, 終於見到洞爺湖溫泉個路牌喇! 然後, 落狗屎的時候, 我地到咗目的地 -- 昭和新山熊牧場。 由於出發前睇咗日本氣象廳預測成個行程每日都陽光普照, 所以只係帶咗一把(自私的)遮, 要嚟遮太陽, 我提意老公不如你落去買多把遮啦! 今日同聽日都要用!

老公落車去買遮, 但好耐都未返, 孖寶話要去睇吓爸爸搞乜鬼, 於是三母子, 擔住一把遮, 衝過對面馬路, 原來爸爸煩惱緊買摺遮定係直遮...... 吓? 是但啦! 家陣落緊狗屎, 買把最大把直遮啦! 盛惠800円。買完遮, 即刻衝過去熊牧場, 不過, 真係太大雨, 有遮都全身濕晒, 惟有入室內避吓雨先。過咗20分鐘, D雨好似細咗, 老公話, 去熊牧場睇吓!

係熊牧場門口影咗張相, 仲係落緊毛毛雨

早上11:45, 入去熊牧場買飛, 同佢講: Two Adults, 另外指住孖寶話: Two Kids! 佢竟然收咗我3個小童價錢, 俾咗3張小童飛我, 好在老公發現, 即刻去退錢! 另外, 買咗2包餅仔, 俾孖寶餵熊Bear Bear, 入到熊牧場, 冇落雨, 仲有少少陽光, 可以收遮喇! 孖寶瘋狂咁亂掉D餅仔入個熊欄入面, 好快就冇晒餅喇! 冇喇! 唔再買餅! 你哋亂咁掉既! 我有理由懷疑D熊係人扮既, 因為D熊識得翹腳坐同做出各式各樣的瑜珈動作, 超級搞笑!

 呢隻肯定係人扮既!

中午12:15, Bye Bye熊Bear Bear, 本來plan咗搭纜車上山, 雖然已經停雨, 但天陰陰好大霧, 老公話上到去都睇唔到嘢, 唔上山喇! 係山腳度影咗今次旅行惟一一張全家福(唔該晒前面的香港人家庭!) 冇嘢搞! 走喇! 趁而家冇落雨, 去洞爺湖邊睇吓有冇得划鴨仔!

到此一遊相

12:40到咗洞爺湖邊, 有一檔鴨仔喎! 睇吓個價錢牌, 有電動鴨仔呀! YEAH! 價錢仲平過上次山中湖喎! 電動鴨仔可以坐四個人, 3,500円30分鐘, 上次山中湖隻爛鬼鴨(殘到爆, 仲要踩到腳軟)都要3,000円呀! (上次好明顯係搶錢啦!) 而且, 佢呢度D船...... 好新淨啊!!! (心心眼) 不過, 間屋仔閂咗門, Counter冇人, 我哋不停對住間屋講: 思咪媽些! 係冇人既!  正當我哋放棄之際, 突然有架車駛過嚟, 停係屋仔隔離, 係唔係有工作人員嚟呀?

原來佢真係工作人員嚟! YEAH! 有得玩鴨仔喇! 佢安排咗隻金光閃閃的鴨仔俾我哋, 仲幫我地抺走D雨水先, 又教咗老公大概點操控, 出發喇! 今次又可以一家四口排排坐, 孖寶坐中間扭肽盤, 好開心!

玩到1:20, 泊返鴨仔去碼頭, 影咗幾張相, 走喇! 去食嘢喇! 周圍兜吓, 睇吓有咩食, 誤打誤撞, 去咗一間手信舖, 因為有得泊車, 手信舖樓上有餐廳,  唔貴喎, 仲要望住洞爺湖個景嚟食飯, 正呀!等咗10分鐘, 有位喇! 老公叫咗個魚生飯, 我叫咗個蒸海鮮飯, 另外叫咗2個兒童餐俾孖寶。

 等位期間, 哥哥話好肚餓

特別一提, 自從頭先落咗半個鐘狗屎, 新買嗰把超大直遮用咗10分鐘, 之後...... 就一直...... 冇再落雨! 老公話早知等吓先啦! (但係日本氣象廳話呢2日都落雨喎! 同埋, 而家冇再落雨, 應該要開心先至係!)

下午2:30食完飯, 去火山博物館參觀, 細佬話唔想去, 想返酒店, 吓? 咁早返酒店?! 於是, 半推半就帶咗佢地去參觀火山博物館, 結果, 係玩到唔願走既! 都話要嚟睇架啦! 好在冇返到酒店咋!

下午3:50, 返酒店前去士多買D飲品, 桃, 花火(今晚係湖邊玩)。今晚住洞爺湖萬世閣, 老牌大型溫泉酒店, 10幾年前住過, 而家翻新咗, 再冇得係房入面享用會席料理, 要去大廳食自助餐。上到房, 同佢網上幅相有落差, 豪華感欠奉, 好家庭式, 個座地冷氣又殘又污糟, 不過, 望到成個湖, 今晚可以係房度睇煙花。

下午4:30, 老公話酒店對面有D舖頭, 不如落去行吓, 落到樓下大堂, 好香啊! 唔知邊度傳嚟好香的焗蛋糕味! 原來係酒店整緊豆沙燒餅呀! 個職員仲主動俾咗4個我地試食, 好好味呀! 啱啱整出黎的燒餅, 好熱, 好香, 好好味! 孖寶都好鍾意食! 食完美味的燒餅, 出去行吓, err...... 只有一間藥妝同一間手信舖, 冇嘢睇既!

新鮮出爐燒餅

返上房, 老公帶孖寶去浸溫泉(辛苦晒!), 我自己一個人去浸, 入到去更衣室, 好多人, 好多阿媽帶住D女, 好嘈, 堅係大浴場, 跟本唔係享受溫泉。草草了事, 返上房喇! 老公話佢地三父子上去頂樓浸, 望住個湖景, 正!

三父子一齊去浸溫泉, 好幸福!

冇嘢做, 一家四口瞓咗一陣, 晚上7:10, 落去餐廳食自助餐, 嘩! 門口大排長龍, 拎住7點鐘飛唔代表你可以入去, 照係要等位, 等咗超過20分鐘, 終於輪到我哋! 嘩! 超多人! 食物種類同選擇一般, 叫做可以食飽, 但唔精緻, 有一兜兜刺身, 但食落冇鮮味! 佢有一個為小朋友而設的自助食物區, 孖寶可以自己夾自己鍾意食的食物, 好開心! 食完飯, 爸爸同孖寶去雪糕櫃畢雪糕食!

煙花係晚上8:45開始, 我地嗱嗱林返上房睇, 放煙花隻艇啱啱嚟到我地酒店前面, 煙花睇得好清楚, 哥哥話好靚啊! 9:05睇完煙花, 落湖邊玩花火。細佬話佢而家唔驚(舊年因為係酒店露台玩花火, 搞到煙霧漓漫, 酒店職員入房調查, 嚇親細佬!) 哥哥一向都好大膽, 玩花火冇驚過, 細佬開頭有少少驚, 要媽媽幫佢一齊揸住支花火, 今次特登買細包D花火, 玩咗大半個鐘finish, 返上房喇!

晚上10:15孖寶上床瞓覺, 今次訂房特登揀咗食事‧布団あり, 孖寶每人要俾多6,111円, 所以今晚一人一張床, 瞓得好C服! YEAH!

Day 3 完

北海道親子之旅2019 - Day 2

2019.07.28 (星期日)

今日陽光普照, 萬里無雲。

早上8點起身, 係酒店房入面食早餐, 是日早餐有麵包, 三文治, 壽司, 仲有十勝牛乳, 孖寶飲益力多 (北海道超市原來係冇香蕉豆奶der~)。

9:45離開酒店, 出發去大倉山展望台, 曾經係冬季奧運會的主舉場地。早上10:05到達, 泊好車, 搭扶手電梯上去, 然後排隊買飛(買纜車+博物館入場, 搭纜車兜, 埋到Counter, 我話: Two adults, two kids! 佢問我小朋友幾歲, 我話Six, 佢收咗我錢, 但老公發現只得3張飛, 2個大人加一個小童, 我又再走返去counter同佢講, 雞同鴨講咗一大輪, 佢收返張小童飛, 還返一個小童的錢我! 吓? 本來係諗住買多張小童飛, 而家佢仲唔收我錢添! 希望小童真係唔駛買飛啦!

雞同鴨講買飛

行到去纜車站, 哥哥要同爸爸坐, 細佬要同我坐, 好在職員冇話孖寶冇買飛啫! 第一次坐兜上山, 雙腳吊吊揈, 幾得意! 上到展望台, 可以欣賞札幌市的市景(今晚會上另一個山睇夜景), 不過, 今日好大煙霞, 好濛, 加上俾個太陽係咁曬住, 都幾熱, 孖寶悶到不停玩個入錢望遠鏡, 20分鐘後就落返山。

我同細佬仔坐

早上11點參觀冬季運動博物館, 聽講入面有D互動遊戲啱孖寶玩。個博物館有兩層, 但唔算大。孖寶兄弟對於擺係玻璃櫃入面唔識郁的古董展品冇興趣, 成日話要行快D, 落咗下層, 終於見到有嘢玩喇! 有模擬滑跳台滑雪, 四人雪兜(爸爸同孖寶玩), 三人雪上步行(媽媽同孖寶玩), etc. 孖寶玩得好開心!

中午12點離開大倉山, 出發去小樽整音樂盒喇! 呢個係今次旅程的重點節目, 不容有失! 由札幌揸車去小樽, 車程約45分鐘, 行行吓高速公路, 個GPS突然老點要出返黎, 明明只係行咗一半咋喎! 所有車都出晒, 似乎前面封路, 之後被迫沿住海邊山路行, 好多車, 行得超慢, 最後, 下午1:40終於到咗小樽的JR車站(妖! 足足用多咗1個鐘時間), 老公本來plan咗去三角市場食魚生飯, 佢派我去探路, 細佬仔話陪我, 結果, 我地2母子入到去, 都未行夠10步已經想出返嚟, 好多人, 好多大劣人, 迫過旺角女人街, D食肆係門口望入去已經唔開胃, 香港好多新式大排檔/冬菇亭企理過佢, 好多人企晒係門口/通道等位, 好熱, 好焗, 應該冇冷氣, 我即刻call老公: 唔掂! 環境惡劣! 走人!

老公話記得我地去過運河附近的壽司店食嘢, 我唔記得, 成日以為係好多人行嗰條街囉! 老公話有間政壽司好出名, 附近亦有其他壽司店, 不過, 因為孖寶唔食得生嘢, 要搵間有熟食的壽司店, 唔係咁容易, 最後, 搵到一間唔知咩壽司(門面普通, 入面好似家庭式經營), 是但啦! 已經下午2:15, 就嚟餓死喇! 孖寶都話好肚餓! 雖然係家庭式, 裝修又唔豪華, 但價錢可以媲美五星級酒店, 老公話豪一次啦! 我哋叫咗一碗魚生飯(我同老公share), 天婦羅SET, 茶碗蒸, 老公話小樽條街好多嘢食(係咩? 點解我唔記得?), 唔夠可以一陣再食過! 啊......!

壽司店個門面一D都唔吸引

下午3點食完飯, 揸車去音樂盒體驗工房, 老公要等位泊車, 我同孖寶入去揀住D材料先。孖寶好開心, 一人拎住個籃(哥哥隨手放低咗個籃, 俾人攞咗都唔知, 唉!) 揀音樂揀咗好耐, 然後揀配件又揀咗好耐, 排隊俾錢, 盛惠7,128円(購物滿5,000円可以退稅, 退稅後實俾6,600円), 俾完錢, 拎埋D膠水, 可以搵張枱坐低慢慢整, 爸爸媽媽負責搽膠水, 孖寶負責痴上去。孖寶好滿意自己的製成品, 不過, 膠水要半個鐘先至乾, 要留低製成品係度, 一陣返嚟拎。

 好認真咁揀音樂盒

下午4:30行過對面馬路音樂盒本館睇嘢, 孖寶手多多, 不停搞D音樂盒。之後行過去對面, 上去LeTAO個塔上面睇吓, 我同老公講, 當年孤寒, 唔捨得係度食tea, 老公話今次食返啦! 然後落返去廳餐等位, 雖然都有唔少人等位, 不過都算去得快, 好快就到我哋喇!

我地叫咗2個Tea Set, Chocolate Cake 同埋 Cheese Cake, 1杯蘋果汁, 1杯Iced Coffee, D cake俾我想像中細件, 但都幾好味, 孖寶好鍾意食, 係咁搶食(估唔到佢哋咁鍾意食), 我食咗少少咋。

下午6點, 老公想去小樽運河行吓, 但由於今日係祭典, 封晒路, 好多人, 跟本冇地方可以泊低架車, 加上孖寶上車後已經體力不支 -- 瞓咗! 算吧啦! 係架車度影張相算! 走人! 經過西松屋, 落去行吓, 冇嘢啱孖寶, 走喇!

晚上7:10, 終於返到札幌, 老公plan咗去拉麵橫丁, 正想泊低架車係對面的停車場, 老公同孖寶輪流急尿, 搞咗一大輪, 終於可以泊低架車, 行去對面的拉麵橫丁(我同老公11年前嚟過)。拉麵橫丁其實係一條有十幾間拉麵舖頭的後巷, 環境未至於惡劣, 但一定唔係一家大細的好去處 (我個人認為只係適合麻甩佬去食碗麵走人嗰款!) 由街頭行去街尾, 再由街尾行返去街中間, 只有一間有四人枱(其他好多都係吧枱, 或者跟本冇位), 是但啦! 就呢間啦! 呢間好似係雞肉湯底專門店, 我地叫咗3碗唔知咩拉麵, 加一客餃子, 好好味, 湯底好濃郁!

晚上8:25, 出發上藻岩山睇夜景, 8:40泊低架車係山腰, 買飛搭纜車上山頂, 職員問孖寶幾歲, 我話: Six, 佢又係叫我買2張成人+1張小童飛(呢度明明有2個小童, 但只須1張車票, 係唔係北海道獨有玩法?!) 是但啦!

上到山頂, 個夜景好靚, 細佬仔都話好靚! 不過, 都幾大風, 有D凍! 行咗一個圈, 見到排隊搭纜車落山的人龍越嚟越長, 我話不如排定先喇! 今次, 老公終於識得咩叫輪流排隊, 換人, 俾我出去抖吓, 不過, 排咗好耐, 條龍都冇乜郁過, 之後, 我叫老公帶孖寶去排隊影相, 我繼續排隊坐纜車, 排咗超過30分鐘, 終於可以搭返纜車落山喇!

晚上10點, 返酒店喇! 老公set咗中途會經過一間收23:00的超市, 買埋聽朝的早餐, 10:40終於返到酒店, 嗱嗱林幫孖寶沖涼, 安頓好孖寶, 已經係晚上11:30!

Day 2 完

北海道親子之旅2019 - Day 1

2019.07.27 (星期六)

今次去旅行事之前完全冇未出發先興奮的感覺!

由於早幾晚每晚都不停執執執, 所以朝早出發前已經冇嘢執!

今朝未夠6點已經起身, 孖寶可能太興奮, 所以唔駛叫, 6點左右都自動起咗身。飛機早上9:20起飛, 所以要7:30去到機場, 6:30離開屋企, 由於冇時間食早, 餐老公親自整咗4份咸牛肉炒蛋三文治, 帶去機場食。

早上6:35, 工人姐姐幫我地影咗張全家福, 出發喇!

可能時間尚早, 一路上交通非常暢通, 7:15已經到咗青衣機鐵站, 泊車, 轉乘機場快線去。7:30左右到咗機場, 去CX櫃位寄倉行李 (老公早2日已經網上check in咗), 唔算多人排隊, 好快搞掂。之後, 搵位坐低, 品嚐老公的愛心三文治。食飽飽後, 過Immigration, 由於係暑假, 所以都幾多人, 排晒長龍。睇顯示板先知道我地搭嗰班機個登機閘口轉咗(好在睇吓啫), 搞到一家四口係機場入面行嚟行去! (後來先至聽到有宣布, 話改咗登機閘口。去到閘口, 等咗好耐好耐, 9:30先至上機, 又再等咗好耐好耐, 10:20先至起飛, 足足Delay咗一個鐘囉!

今次冇揀窗口位坐(孖寶冇興趣睇飛機起飛/降落), 一家人坐中間一排4人位, 方便照顧孖寶同去廁所。孖寶好乖, 睇戲, 打機, 但冇瞓覺。

香港去札幌機程大約4.5小時, 只係比去東京耐少少, very good! 下午3:45就到咗喇!

落機後, 哥哥突然話想嘔, 吓? 頭先都冇事架! 可能係佢頭先不停打機, 搞到暈機浪!

下午4:30拎返D行李, 由International行去Domestic, 搵咗好耐, 先至搵到租車的counter。原來又係要搭Shuttle去好遠的地方攞車。下午5:15去到Times, 好大, 好有系統(因為要等叫number), 等咗好耐, 全部人都走晒, 終於輪到我哋, 老公照舊打發我去辦手續, 雞同鴨講咗一輪, 老公走埋黎, 發現原來我只係租咗張ETC Card, 冇買Expressway Pass, 又要同個職員講, 又搞咗一大輪。之後, 由另一個職員帶我地去停車場攞車, 老公一見到架車, 呆咗! 佢話唔係佢租嗰架 (其實我見到架車咁殘都有D唔開胃), 又要搵另一個識講英文的職員, 同佢講我地想換車, 結果又返返入去等, 等到第二班, 第三班人都走晒, 終於輪到我哋, 可以俾返老公本來租嗰款車我哋, YEAH!

等租車期間, 孖寶扮鹿仔同狐狸。

佢地個頭同個紙牌完美結合, 毫無違和感!

終於俾返架似樣D既車我哋

黃昏6:20, 終於可以出發去札幌喇! 本來諗住5點租到車, 6點可以去到札幌, 而家足足遲咗1個鐘囉!

晚上7:15去到AEON MALL, 唔行喇! 好肚餓, 搵嘢食, 但2/F周圍都唔見有餐廳, 只見到個Food Court, 雖然最憎去Food Court, 但馬死落地行, 是但啦! 食完飯落咗G/F, 原來係有餐廳架! (想喊!)
仲有好多賣女仔衫的舖頭, 好想Shopping呀! 不過, 上次去東京掛住Shopping, 搞到孖寶好慘, 我自己都好後悔, 所以決定今次唔睇衫!

細佬仔由未出發係香港時, 已經嚷著要買旅行禮物, 佢頭先未食飯已經話要去揀旅行禮物, 爸爸應承咗佢, 食完飯過隔離Seria(100円店)揀玩具, 細佬見到一把金色的玩具劍, 係你喇! 我一直都想擁有一把咁樣既玩具劍! 至於哥哥就睇嚟睇去都冇乜頭緒, 最後都係跟細佬, 買同一款劍, 佢揀藍色!

之後去超市買水果、飲品、聽朝的早餐, 晚上9點, 返酒店喇! 呢間堅係4星期酒店, 有服務員幫我哋推D行李上房。上到房, 俾我上網睇細, 又話有30平方米, 張床有120cm咁闊, 唔覺, 但都OK啦! 個浴室好大, 有企缸, 有浴缸, 但個企缸冇燈, 黑蚊蚊, 唔想入去沖涼囉! 第一晚嚟到北海道, 緊係要試吓夏天的特產 -- 蜜瓜! 特咗價都要300円 two slides, 應該係靚嘢嚟! err...... 點解有陣天拿水味? 北海道蜜瓜特色嚟? 唔識欣賞, 感覺中咗伏!

天那水味既蜜瓜, 中伏!

Day 1 完