自學水彩 - 初階篇 (1)

經過過去1個月的反覆嘗試同測試, 我終於發現問題的原兇喇! 佢就係 -- 張紙!

由於只係初學, 唔想嘥咗D法國Canson紙, 所以用老公之前幫我買的、冇牌子、只得220g的所謂水彩紙嚟練習, 但張紙基本上係 -- 廢紙! 應該係唔可以用嚟畫水彩, 一來只得220g (畫水彩最基本要用300g),  二來張畫紙唔知咩構造, 吸色/水好快, 除非用比平時多的水份, 基本上, 用正常水量, 一落筆, 已經索晒入張紙的底層, 就算只係想平均上一層底色, 都係做唔到。張紙雖然吸水好快, 但乾得好慢, 不過, 你想趁半乾濕時混色、加色、去色、或任何修改動作, 都係做唔到, 因為D色已經深深食咗入張紙度! 試過用wet-on-wet技巧, 正常水量好快就吸收咗, 趕唔切加色, 上得多水張紙開始扭曲變形, 但D色都係化唔開/化得唔靚(可能係顏色問題, 下文詳細說明), 上多兩層色就發覺張紙開始"梅爛"。所以過去1個月以嚟, 都係充滿挫敗感!

同一個顏料, 同一個技巧, 左邊係不知名水彩紙, 右邊係Canson

一睇就知, 靚紙同廢紙的分別!

至於問題另一個原兇就係 -- 顏料!

我買咗盒俾小朋友玩的FABER-CASTELL36色固體水彩, 我唔可以話佢係垃圾, 但佢真係只係一盒玩具, 雖然顏色好鮮豔, 但冇水彩的透明感, 我覺得似漫畫筆多D, 加上佢個固體顏料好硬(唔係膏狀), 水溶性好低, 每次要用好大量的水, 支畫筆先至可以沾到少少顏色, 所以我焗住去買多一支8號畫筆畫花, 可以hold多D水份(其實A5 size紙畫花用6號筆都夠),如果要係大面積的範圍上色的話, 一定要預先用大量的水沾好大量的顏色係調色碟度。另外, D顏料亦有乾得太快的情況, 我覺得D顏料好似加咗天拿水咁, 一落筆就揮發咗! 加上佢D粉粒都幾粗吓, 遠睇冇問題, 但近睇就...... 冇眼睇!

以下係我最近2星期的作品, 我已經盡咗最大努力架喇! 唉!

 正常水量的話, 可以見到深淺有明顯兩截色, 唔係漸變色!

而且畫紙扭曲變形!

特多水量, 可以做到少少漸變, 

但2隻色的話, 就會過份地混埋一齊

最後...... 我惟有用嚟畫龍貓漫畫......

所以, 上星期五, 我拜託老公幫我係網上美術用品專門店訂咗一盒Van Gogh固體水彩24色 (特價$410), 正貨係Made in Holland架! (同級的Student Grade溫莎牛頓Cotman係Made in China, 但價錢差不多), 希望唔係買咗淘寶嘢啦! (我見淘寶賣緊200幾蚊人仔)

「見飯眼瞓」的魔咒

話說哥哥由6個月轉食固體食物開始, 食親飯都會中途瞓著!

BB的時候, 餵餵吓粥仔, 佢就釣魚, 一邊食, 一邊瞓, 當時覺得佢好可愛, 好搞笑, 仲拍咗好多佢食飯瞓覺的video。

本來以為BB先至係咁, 但隨著佢長大, 見飯眼瞓的情況一直都冇改善! 明明食飯前好地地, 好精神, 玩得好開心, 一埋到張飯枱, 對住碗飯, 幾分鐘後, 佢就會自動進入Sleeping Mode!

我成日都講, 哥哥可能中咗魔咒, 呢個魔咒好厲害, 會叫人見到飯就瞓著, 搞到人冇飯食, 最後慢慢餓死, 好可怕啊!

有時, 我地會叫哥哥離開飯枱一陣, 係屋企入面行吓, 之前甚至俾佢打機, 希望佢可以精神返, 但好多時, 佢都係攤係Sofa度瞓... 唉! 食飯瞓覺的結果就係 -- 食得好少嘢, 唔長肉, 個人又瘦又矮, 出到街, 個個都認為細佬大佢一年呀! (已經冇人再懷疑佢地係孖仔! 死未?! 今次去日本, 買入場券, 職員問我佢地幾多歲, 我話6歲, 佢自動當哥哥細一年, 唔收佢錢, 次次都係俾一個小童錢咋!)

見飯眼瞓原來不限年齡, 不限地方, 不限時間, 不限款式:

1. 由BB到而家6歲半, 都係見飯眼瞓
2. 無論係屋企食飯, 抑或出街食飯, 都係見飯眼瞓, 食食吓飯係餐廳入面瞓著咗
3. 無論係香港, 抑或去外地旅行, 都係見飯眼瞓
4. 無論係Lunch Time, 抑或晚飯, 都係見飯眼瞓
5. 仲以為佢見到飯先至會眼瞓, 而家已經進化到見到飛機餐都瞓著, 結果要掉咗個飛機餐, 等佢瞓醒後, 再問空少俾過另一個餐佢

我好肯定哥哥係中咗魔咒, 因為佢見飯眼瞓, 但見床就精神, 晚晚都走出黎, 話自己瞓唔著, 爸爸講笑話: 啱喇! 當佢瞓唔著時, 就擺碗飯上枱, 等佢望住碗飯, 咁就自自然然會瞓著!

究竟有咩方法先至可以解除哥哥「見飯眼瞓」的魔咒呢?

終於有返自己興趣喇! (3)

上星期三去咗上水彩畫班, 終於挑起咗我畫水彩條筋, 第二日Lunch Time, 我就急不及待去公司附近的美術用品舖買咗一大堆材料返嚟, 希望我呢股畫水彩的熱情能夠維持落去啦!

玩開藝術的人都會明白, 玩藝術係一個「燒銀紙」的遊戲! 我以前玩樹脂黏土迷你食品, 日本製黏土超貴又細包, 好多時失敗咗要再整過, 損耗都唔少, 所以我買台灣黏土, 唔駛100蚊有1kg, 整九大簋都得喇! 牛頓油彩幾十蚊一支, 做食物, 例如生果、蔬菜、蛋糕、西餅、麵包、日式料理、中式飲茶, 吓吓都要用好多唔同的顏色, 條數好噤計! 所以我買簡体字版的牛頓油彩, 一盒24色好似都係50幾蚊, hoho!

畫水彩畫都係咁既情況, 首先, 水彩最重要係張紙, 一定唔能夠用淘寶貨, 一般Student Grade的歐洲牌子水彩紙(300g), 動輒都要3-4蚊一張(比A5大少少), 而且一落筆就返唔到轉頭, 畫衰咗冇得救(可能係我技巧差啫!), 所以紙張的損耗都唔少!

另外, 顏色都好重要, 一盒24色專業用水彩(磚)的價位可以去到over $1000, 我呢D咁既新手, 買嚟都係嘥, 左諗右諗, 最後只係買咗盒FABER-CASTELL的36色固體水彩, 唔駛$200(叫做德國牌子, 但緊係Made in China啦!), 不過, 佢賣點好似係俾小朋友玩, errr......

最後就係畫筆, 想當年讀書時用Pentel已經好威水, 但係, 當同其他水彩畫筆比較, Pentel真係買唔落手, 未用已經見到D毛開晒叉, 摸上手鞋烚烚, 而且好易甩毛(過往經驗), 不過, 貂鼠毛畫筆實在太奢侈, 俾我呢D新手用, 買嚟都係嘥, 所以都係買返人造纖維(聽聞係耐用過動物毛) 揀黎揀去, 最後買咗2支Van Gogh畫筆(No. 4, 6), 兩支細細的畫筆盛惠over $100。

無論係整樹脂黏土抑或畫水彩畫, 我既原則都係, 用比較平的價錢買材料, 然後就靠自己的技巧, 將普通的材料發揮到淋離盡致。

以下係我的平價水彩畫工具 :

 紅色反光面膠盒, 感覺無咁cheap

因為新手, 仍然未掌握到混色技巧, 所以都係買多D色方便D
顏色鮮豔度比我想像中好

法國Canson Montval 300g水彩紙 (特價$44.5/12張)
Van Gogh人造纖維水彩筆, 好順滑!

經過一星期時間的練習, 暫時都係畫花, 因為畫花比較隨意, 色彩豐富, 完成的作品比較有美感, 就算畫得差都可以呃得吓人! 以下係我過去一星期的作品 :

備註: 以上的畫作唔係用Canson的Montval水彩紙, 而係用老公之前幫我上網買的冇牌子而且只得220g的水彩紙。

可能始終係紙質同顏料的問題, 硬係覺得上堂畫嗰幅水彩花環靚好多, 顏色化開得好自然, D水痕好靚! 但係自己係屋企畫嗰D就...... 應該係技巧問題! 只要Keep住練習, 我相信, 一年後, 我可以畫出更靚的水彩畫!

終於有返自己興趣喇! (2)

話說今年3月的時候, 突然挑起咗條筋, 想畫水彩畫, 買咗盒水溶粉彩、畫紙、畫筆, 點知...... 全完失敗! 好難! 超級難! 但上Youtube睇人哋畫水彩, 係好隨意, 好快, 無難度! (打擊) 似乎真係要去上吓堂, 俾錢人賺!

事隔3個月, 上個月, 終於的起心肝, 去報水彩畫班, 尋晚去上堂, 係觀塘的私人畫室, 其實只係提供畫紙、水彩、畫筆俾你, 你自己乖乖地坐係度畫啦! 首先係File入面揀一幅自己想畫的圖, 個老師只係開頭教吓你一D基本技巧, 幫你畫幾筆開咗個頭, 然後...... 你自己畫喇! 老師會間中巡吓, 睇吓你畫成點, 幫你修補一下, 然後叫你下一步畫乜嘢! 一堂2個小時, 可能我太專注畫畫, 完全唔知時間過!

以下係我今堂的作品 -- 水彩花環

首先用鉛筆輕輕畫一個圓形

先畫主花

用不同顏色畫葉, 老師話葉的形狀比起顏色更重要

再畫埋其他裝飾點綴

畫埋花蕊

完成

媽媽陪我!

早排上網睇到一篇育兒的文章, 作者係一個爸爸, 佢話自己都算早放工, 但每日陪伴小朋友的時間就只有「短短的4小時」。我計一計, 每朝早6:30起身至7:30送孖寶搭校車, 只有1小時, 放工返到屋企6:30至夜晚9:30孖寶上床瞓覺, 只有3小時, 原來我每日見到孖寶的時間都只係得「短短的4小時」。間中試過約朋友放工後食晚飯, 返到屋企已經夜晚10點, 孖寶已經瞓咗, 然後就要等到第二朝6:30起身先至見到孖寶, 即係有24小時冇見過孖寶啊! OMG! 所以平日夜晚我都好少約朋友出街, 就算去做瑜珈或者上興趣班, 都盡量夜晚9點返到屋企, 務求趕得切係孖寶瞓著之前佢地一面! (呢D都算係雙職媽媽的辛酸!)

平日放工返到屋企, 真係好攰, 好想抖吓, 但就不停有人叫: 媽媽! 媽媽! 媽媽! 老公有時都會忍唔住笑我: 一返嚟就「媽」爆你! 每當有人呼喚我, 我就會同老公講: 我又被「寵幸」喇! (笑+滴汗emoji表情一個)

不過, 諗深一層, 其實要好好珍惜呢段仍然被需要的日子! 孖寶好想媽媽可以參與佢哋的遊戲, 好想同媽媽分享每一件佢地覺得有趣的玩具/畫作/事情, 好想媽媽聽佢哋訴說一天的所見所聞, 孖寶就係如此的單純地愛著媽媽!  愛一個人, 就係好想成日見到佢, 好想成日同佢一齊, 好想同佢分享嘛!  多年前一個電視廣告, 個爸爸話: 「今日, 你係佢既全世界! 他日, 你再走不進佢既世界!」Sad but true! 所以, 我同自己講: 要好好珍惜今日我仍然係孖寶既世界入面!

尋晚, 爸爸帶哥哥落街睇醫生, 細佬即刻走埋黎, 攬住我條腰, 個頭仔挨落去我肚腩度, 然後好嗲咁同我講: 媽媽, 我想你陪我玩LEGO! 佢話我好耐冇同佢玩過! (乜係咩? 好似尋日先至同你玩咗, 你仲叫我唔准掂, 咁點玩呀?!) 原來佢話係好耐之前有一次, 我同佢係茶几度一齊砌LEGO, 一齊諗要砌D乜嘢, 佢嗰次好開心, 記到而家!

阿仔呀! 其實媽媽都有成日都陪你哋玩架! 煮飯仔、伏匿匿、紅綠燈、飛行棋、波子棋、幫幫遊樂場、魔力橋、畫水彩畫、砌LEGO、Star Wars格劍、Cooking Mama、釣魚Game...... (多到唔記得) 仲有陪瞓、陪睇卡通片、陪練琴、陪溫書添!

激心又窩心的孖寶兄弟

孖寶兄弟每日都好激心, 由於激心的事實在太多, 媽媽今生今世都沒齒難忘, 所以都唔需要記錄落嚟。

反而係窩心的事, 由於發生的機會率太低, 太珍貴喇! 所以要趁而家仲記得的時候, 記錄落嚟!

以下係窩心事件薄:

(1)
話說爸爸經常都會幫媽媽, 製造窩心的時刻, 例如: 「嘩! 你哋睇吓媽媽對你哋幾好, 係我就攬實媽媽, 錫佢一啖喇!」或「嘩! 你哋睇吓媽媽幾錫你哋, 咁你哋要點做呀? 仲唔快D? 快D啦!」然後, 孖寶就會走過黎, 攬一攬媽媽, 錫媽媽面面一啖! 好窩心啊!

(2)
話說有一次, 媽媽因為溫書的問題拍枱鬧細佬(好似係!), 細佬當然即場爆喊啦! 然後, 哥哥好平心靜氣咁走埋嚟(用好成熟的語氣同表情)同我講:「媽媽, 你跟我過嚟!」 佢拖住我入房, 同我講:「你知唔知你咁發脾氣係唔啱架?你冷靜D先, 自己諗吓先!」(佢平時發氣脾氣, 我就係咁樣帶佢入房, 然後同佢講返同一句說話! hoho......) 見到佢咁, 已經嬲唔到落去, 仲覺得佢突然變得好大個仔, 處事好成熟(只係今次), 好窩心啊!

(3)
我家的習慣係食完晚飯之後, 拎大量的零食出嚟食(工人姐姐見到, 心入面不停咁問: 你哋既然食唔飽, 點解唔食多D飯呢?), 當媽媽不停咁食薯片時, 細佬就會同我講: 「又話自己成日生飛滋, 咁仲食咁多熱氣嘢?」(因為佢只可以食三塊, 但爸媽就食幾多塊都得)。估唔到, 阿媽"鵝"我, 我會覺得佢好煩, 但阿仔"鵝"我, 我竟然會感覺好窩心!

(4)
病咗(發燒)的時候, 係房入面瞓到天昏地暗, 第二朝起身, 老公同我講, 然然尋晚想入黎探我, 但佢話俾然然聽, 媽媽瞓咗, 唔好嘈醒媽媽, 然然就好乖咁靜靜的走了! (聽到老公咁講, 真的覺得好窩心!)

(5)
哥哥最窩心的時候, 就係佢想你陪佢瞓覺的時候, 媽媽會坐係佢床邊, 佢就會"碌"過嚟攬住媽媽雙腿, 成個頭鑽入媽媽的懷中, 然後好大力咁攬實媽媽, 超級爹爹豬! 早兩日, 哥哥過咗黎同我瞓(爸爸係孖寶房同細佬仔瞓), 哥哥一早起身, 去完廁所後, 爬返上床, 成個人鑽入媽媽的懷中, 媽媽都攬實佢, 實在要好好珍惜, 佢仍然仲咁爹爹豬的日子, 因為我知道, 好快(可能係幾年後), 佢就唔再想攬實媽媽, 亦唔想俾媽媽攬實!

(6)
尋日, 細佬陪我去買鞋(哥哥陪爸爸泊車), 試鞋的時候, 細佬仔同我講: 「你著到最入未呀? 著到最入先!」然後, 佢踎低, 伸咗隻手指仔入去我隻鞋後面, 「都OK! 仲有一隻手指位!」(佢學爸媽平時同佢買鞋咁), 能夠被阿囝「照顧」, 真係好窩心啊! 回程途中, 我係上車同老公講返, 細佬仲話: 「係啦! 好似我帶佢去買鞋咁!」hoho......

幾年前, 睇咗一篇文章, 內容大概係, 生男孩子的媽媽, 應該要點樣做, 先至能夠造就孩子將來成為堅強、有勇氣、有主見、有承擔、又細心體貼、懂得照顧女人的男人, 秘訣就係 ─ 媽媽唔能夠太強, 甚至有時要假扮柔弱, 老公係呢方面, 亦非常配合, 佢成日都同孖寶講: 「媽媽係要嚟錫既! 唔可以"蝦"媽媽! 我哋要保護媽媽!」

我成日同老公講笑: 「你睇我對你幾好! 生咗兩個仔俾你! 有人陪你玩LEGO、砌模型、睇車、打機! 我就冇人陪我玩喇!」其實, 老公, 你對我都好好! 俾咗兩個仔我, 將來, 就可以有3個大隻佬保護我、照顧我喇! hoho......

後記@2019.07.10

尋晚食完飯, 爸爸帶哥哥落去睇醫生(佢背脊、手臂、大脾內側都起晒紅色一撻撻), 爸爸同我講返佢地之間的對話 --

然然: 我覺得爸爸好高大!
爸爸: 其實爸爸一D都唔高大, 你見唔到其他叔叔都高過爸爸咩? 爸爸係屬於矮!
然然: 其實我知道, 我都識比較架嘛! 不過, 我鍾意你, 所以咪話你高大囉!

然然其實係一個Sweet Boy! (唔發癲的時候)

然然換牙

話說然然下排右側門牙係四月初的時候開始鬆鬆地(其實早幾個星期已經發現佢下排D門牙突然變得好唔齊整, 同埋唔知點解唔係甩正面隻門牙先, 係側門牙咁奇怪!) 我同老公都覺得佢隻牙仔有機會係去旅行途中甩, 點知冇甩到, 平安無事, 但隻牙就越嚟越鬆!

5月3日(星期五)下午放學返到屋企, 然然係食下午茶期間甩咗隻牙(好可惜爸爸媽媽唔在場, 嫲嫲幫佢執返隻牙, 流咗少少血, 哥哥喊咗一陣 (其實甩牙之前幾, 佢食飯時唔小心咬到隻筷子, 隻牙仔都流咗幾多血出嚟, 仲以為即時會甩, 但又冇, 爸爸話幫佢拔出嚟, 佢驚到喊晒, 臨瞓都仲同我講, 好驚好驚, 一邊講一邊喊, 慘慘豬! 但其實換牙係人生必經階段, 驚都要面對架!)

一個星期之後, 即係5月10日, 然然又甩埋下排隻正門牙(右), 不過, 嫲嫲冇Whatsapp我地, 我地當日返到屋企, 然然係Sofa瞓著咗, 所以我地都唔知佢甩咗牙, 佢起身之後, 突然同我地講佢今日甩咗牙仔, 我地先至係鞋櫃頂搵返隻牙, 原來又係食下午茶的時間, 嫲嫲話然然今次甩牙冇流血, 佢都冇咩嘢, 好叻仔!

其實, 甩咗第一隻牙之後, 我地已經見到佢有隻恒齒係左門牙(未甩)後面出緊嚟, 甩咗第二隻牙之後, 就好明顯見到有2隻恒齒(正門牙)出緊嚟, 但其實佢隻左門牙仲未甩, 但就俾後面D牙頂到成隻向前瞓低咗, 同埋走晒位, 佢就隻牙都有少少鬆, 估計今個月應該都會甩埋呢隻! 但然然非常驚, 講起甩牙就想喊, 又唔想食嘢(因為驚整甩隻牙), 唉! 佢已經瘦到得棚骨!

至於細佬, 就仲未有換牙的跡象, 佢成日問我佢幾時會甩牙(我話佢BB時好遲先至出牙仔, 所以換牙都應該會遲D), 佢仲話, 甩牙有咩好驚喎! (而家咁口響, 甩牙時記住唔好喊呀!)

後記:

6月2日(星期日), 然然下晝食食吓提子的時候, 突然話甩咗隻牙仔, 我叫佢連埋粒提子都吐埋出黎(落我手掌度), 然後係堆嘔吐物入面, 搵返佢隻牙仔出黎(係下排右門牙), 佢好冷靜, 好似冇嘢咁, 亦冇流血, 爸媽都讚佢叻仔! 媽媽都"鄧"佢好高興, 因為佢呢個星期, 因為隻門牙好鬆, 唔敢食嘢, 成日都話冇胃口, 而家甩咗隻牙, 終於都可以唔駛就住就住咁食嘢喇! C服晒!