2017.04.10 (星期一)
日本氣象廳真係好準, 一朝早起身打開個窗簾, 今日真係落雨, 本來今日安排咗去機場附近的東坪尾公園滑草 --> 森林家族主題公園 --> 九州鐵道紀念館, 好明顯, 去唔到滑草, 咁森林家族呢? 落雨喎, 個公園好多設施都係露天, 好似去唔到喎! 咁不如改行程, 行商場shopping啦! Anyway, 租咗車先算!
孖寶未夠8點已經被爸爸媽媽嘈醒咗, 但冇發癲, Good Boys!
刷牙, 換衫, 8:30落去食早餐, 呢間酒店的早餐係免費, 有沙律蛋, 雜菜, 牛角飽, 鮮奶, 橙汁, 咖啡, etc. 都算唔錯!
細佬一向都鍾意食, 哥哥今次去旅行, 都肯食吓早餐,
但佢兩個仍然係唔飲鮮奶(已係香港訓練佢地飲), 只飲橙汁
食完早餐返上房, 媽媽執埋D行李, 9:30 check-out, 因為落雨, 本來諗住爸爸一個人行去租車(但爸爸尋晚發覺原來佢租咗兩架車, 事緣係佢之前book咗但冇cancel到, 之後又book咗另一個平D的租車plan), 可能要同租車公司講數, 所以爸爸叫埋媽媽同孖寶四個人一齊行去, 行李就留係酒店。雖然行去租車公司只係後面條街, 但由於落雨, 好凍, 地面好多水氹, 加上我同老公一人拖住一個仔, 一把遮又要遮自己又要遮孖寶, 又驚孖寶俾雨淋親, 結果行咗好耐, 孖寶對鞋仔濕晒, 入晒水, 10:00到達租車公--Budget, 好多人係門口排緊隊, 等等吓先至發覺原來要係門口本簿度簽到排隊, 俾個日本人"打咗尖", 唉! 是但啦! 之後有對香港夫婦話趕時間, 又乜又物咁, 老公好心話讓俾佢地先, 結果搞到11點先至完成晒租車手續。
揸車返酒店拎行李, 先至醒起漏咗2把遮係租車公司, 又要揸返去拎, 好在係後面街啫! 由於D雨一直都未停過, 天氣又凍, 我話不如去行商場, 但老公話一場黎到, 不如揸咗去森林家族睇吓咩情況先。
差不多中午12點, 去到公園門口, 孖寶係車上瞓咗, 媽媽落車睇吓, 唔算好大雨, 但都幾凍, 諗咗一陣, 決定求其泊低架車係門口, 入去行個圈同玩一次摩天輪就走。天氣差都有好處, 唔駛煩買唔買套票, 因為冇諗住留好耐, 所以只係買入場券。孖寶突然話要去vee vee, 爸爸拿拿林帶佢地入咗場, 衝去廁所先, 媽媽繼續買飛。
無啦啦瞓著咗, 去旅行好似永遠都唔夠瞓咁
入到公園, 真係冇人既(只有工作人員), 由於太凍, 所以就衝咗入去間舖頭, 睇吓媽媽最愛的森林家族公仔屋先, 大部份的款式香港都見過(有D已買了), 不過被我發現竟然有公仔屋牆紙賣(一早就應該要出啦！) 媽媽即時揀咗兩套for屋企果兩間公仔屋, YEAH! 另外, 仲俾我發現佢2017年最新推出的城市街道同電車系列, 個店員話外面仲未有得賣架! 我見個價錢只係10,584円咋(約HKD700幾咋) 好平呀! 好想買啊! 可惜屋企冇位擺......
公園入面好多花同森林家族公仔, 唔落雨的話, 影相好靚
兩套公仔屋牆紙, 爸爸話一定要同媽媽影返張相留念
最新推出的城市系列, 好靚啊!
哥哥見到有個Playground有得玩公仔屋, 二話不說除鞋入去, 細佬仔就嚷著要出去行吓, 於是我睇住哥哥, 爸爸帶細佬出去行。玩玩下, 突然有兩隻森林家族公仔(真人扮的)出現, 走埋去哥哥身邊, 佢初頭掛住玩唔知道, 直至兩隻公仔走埋去同佢玩, 佢先至如夢初醒, 由於跟本冇其他人, 兩隻公仔係咁同佢玩, 佢好開心, 媽媽就不停影相(細佬係度就好啦!)
先黎一個抱抱, 哥哥都唔知點反應
哥哥同森林家族真人公仔影相, 好開心!
兩隻公仔行咗去門口, 我同哥哥都跟住行去門口, 希望可以叫埋細佬返黎, 原來呢個時候, 爸爸都帶返細佬返黎喇! 細佬見到兩隻公仔, 好開心, 好奮興, 於是一家四口不停咁同兩隻公仔影相!
細佬返黎喇! 可以一齊影相
由於根本冇其他人, 我地不停咁同公仔影相
細佬同佢個松鼠公仔影相
爸爸話見到媽媽間公仔屋(Real-size), 可以入去參觀, 不過, 要等到1:45先至開門。吓? 而家1點都未夠喎...
為咗等公仔屋開門, 我地去咗隔離間Thomas屋行吓, 其實只係一間賣Thomas商品的舖頭, 又係開咗兩張枱俾小朋友玩火車, 孖寶自動波走埋去玩, 爸爸話佢出去泊返好架車先! 由於已經1:15, 媽媽提意食咗lunch先, 然後去參觀公仔屋, 最後搭一次摩天輪就走人。
冇乜選擇, 叫咗3碗烏冬
Real-size 森林家族屋
扮同公仔食飯
幸福摩天輪
下午3:05離開森林家族主題公園, 孖寶話下次要再黎過, 原本plan咗去九州鐵道博物館, 但由於要超過1小時車程, 睇怕去到都閂門, 所以決定返酒店先, 今晚住小倉的Harmonie Cinq Hotel。
途中見到西松屋, 本來plan咗聽日去別府果間, 但既然唔駛搵就係眼前, 當然要入去Shopping一番, 其實西松屋D衫同深水埗, 花園街的貨式差不多, 所以媽媽都冇乜興趣, 只係揀咗幾件車仔衫俾佢地, 其他accessories又冇乜特別, 最後買多兩pack毛巾仔俾佢地返學, 做抹手巾, 走人!
下午5點到達酒店check-in, 又係幫孖寶沖涼先, 再揸車去AEON MALL行街食晚飯。
今晚的酒店, 個outlook very ok喎!
就係去AEON MALL途中, 竟然見返上次好鍾意食果間剧扒餐廳--Volks, 媽媽提意不如食咗先(因為印象中AEON MALL只有food court, 媽媽最憎食!), 入到去, 我地自己揀咗窗邊的卡位, 爸爸叫咗漢堡扒飯(full set有湯 + 麵包 + 沙律 + 飲品), 媽媽叫咗鐵板燒雞扒(soup set有湯 + 麵包 + 沙律), 另外叫咗一個兒童餐(消防車造型)俾孖寶share。媽媽最like佢地個粟米湯同埋沙律bar有秋葵, 正!
一家四口食得飽飽der
食飽飽原來已經晚上7:30喇! 雖然夜咗少少, 都去AEON行吓啦! AEON MALL八幡就係穿梭機公園隔離, 泊咗車係R/F, 照例要去反斗城行吓(其實屋企樓下都有啦!), 爸爸叫佢地每人揀一本填色畫冊, 係送俾佢地的旅行禮物, 細佬好開心, 揀咗本NEMO, 哥哥就冇反應(還是聽唔到呢?!), 於是媽媽幫佢揀咗本巴斯光年, 佢話都鍾意! 係反斗城門口見到有扭蛋機, 媽媽打咗個眼式俾爸爸(因為尋晚細佬扭蛋, 哥哥冇扭到), 爸爸叫哥哥揀一個機黎扭, 佢竟然揀咗個菇菇, 雖然爸媽再三游說, 有其他更靚的公仔扭蛋, 但哥哥仍然好堅持要菇菇, OK! 你鍾意就得啦!
揀返兩架靚車先
哥哥扭咗舊全白色的菇菇出黎, 爸爸bear一聲!
臨走又係去supermarket買乳酪, 飲品, 生果, 買咗包香蕉豆奶俾細佬, 佢話好鍾意飲! 哥哥就要特濃豆奶(媽媽同佢講係鈣思寶o黎!)
9點鍾返酒店喇! 今晚得兩張床, 仲要分開咗, 所以媽媽同細佬仔瞓, 爸爸就同哥哥瞓(佢兩個都咁大鼻鼾聲, 一齊瞓就啱晒!)
媽媽雖然戴咗耳塞, 但都聽到爸爸的鼻鼾聲, 算啦! 好過冇用耳塞架喇! 不過, 原來同細佬瞓都幾攞命, 因為佢會不停咁轉身, 一巴車埋你塊面, 或者無影腳, 甚至瞓係你個肚腩上面, 仲要不停踢走晒D被, 媽媽終於明白, 一晚起10次身幫人蓋被係咩感覺!
Day 2 完
感想:
自從2010年去澳洲旅行的陰影(去咗13日有10日都係落雨), 我每次去旅行最驚就係落雨(對我黎講, 旅行落雨就好似世界末日一樣!) 不過, 經歷過上次去大阪, 我的心態改變咗, 既然錢都駛咗, 假又請咗, 去旅行都係想開心啫! 所以, 不如開開心心去面對仲好啦! 落雨啫, 咪改行商場shopping囉! 一樣咁開心! 去唔到一個兩個景點, 算囉! 咪下次再黎過囉! 反正我黎緊呢幾十年都只係會去日本! 我發覺正向思維會令自己開心好多, 尤其去旅行的時候, 積極解決突發的情況, 樂觀面對不如意的事, 係好緊要der!
