趁早!

最近有80後朋友結婚, 邀請我地一家四口出席星期日下午的Cocktail Wedding Party, 朋友搞Cocktail一來因為早已在加拿大註冊結婚, 二來想慳錢, 令我諗起曾經聽過一句說話: 「除咗死之外, 幾時都係趁早好! 包括買樓, 結婚, 生仔!」

我好早就做咗頭兩樣, 2004年買樓, 當時層居屋只係114.8萬, 對當時一搬打工仔黎講, 每月供4000-5000蚊, 係綽綽有餘, 老公仲有閒錢去買架日本車仔玩吓, 當然, 住居屋絶對唔係我杯茶 (因為由細到大都住居屋, 仲要係同一個屋苑, 結咗婚都住返係呢度, 即係冇進步過!) 跟住我地就每隔幾年換一次樓, 2007年, 2008年, 2010年, 2014年, 換到而家, 已經擁有2層樓, 自己住果層樓買果時768萬(現值超過800萬), 另外仲有一層價值580萬的2房單位收緊租。

所以真係講得冇錯, 買樓要趁早!

2005年結緍, 當時同老公一齊儲咗大概20萬, 結完婚好似仲有少少錢剩, 當年去逸東酒店(唔算咩靚酒店, 但已高級過酒樓)擺酒, 擺咗16圍左右(因為男女家分開擺, 我老豆要擺傳統中式酒樓), 每圍$5,999包酒水未計加一, 當年人情公價係500, 好朋友會做600, 一圍12人基本上可以打和, 或只係補多少少, 埋單都只係10萬左右, 唔似得而家下下都話minimum charge 要20萬。

所以真係講得冇錯, 結婚要趁早!

我惟一只係生仔冇趁早 (結咗婚7年, 2012年先至生仔, 仲要打孖黎, 救命!) 當年算係早結婚 (係我班朋友堆當中), 似住自己年輕, 想過吓二人世界先 (唔似得有D中學同學中二已經拍拖, 到結婚時已經過咗N年二人世界, 所以佢地一結即生), 同埋一直都諗唔到咩原因要生仔, 但就有一百個理由唔生仔 (我地唔鍾意小朋友, 呢個世界太污染, 香港社會競爭太大之類...) 不過, 眼見身邊越黎越多朋友生仔 (係Facebook一面倒post D BB相, 大晒幸福, 但就冇人講過湊仔有幾咁辛苦!) 於是又傻更更學人生仔 (仲要無啦啦整對孖, 可能係天譴!) 年紀大陀仔好辛苦(我仲要打孖黎), 生仔因為開刀, 唔辛苦, 但係餵夜奶, 換片, 沖涼, 抱抱, 暗瞓覺, 餵粥, 餵飯, 到而家要陪佢地玩, 處理佢地的情緒, 教佢地咩生字詞語句子, 教佢地基本自理能力, 教佢地要有禮貌, 手足之情, etc. 真係成日挑戰緊我EQ同體能的極限!

所以真係講得冇錯, 生仔要趁早!

不過, 諗返如果我當日趁早生仔, 又未必有今時今日的環境俾2個仔, 因為當時我份工又唔穏定, 又辛苦, 靠老公一個人份正苦工撐起一頭家, 仲要無啦啦多2件, 睇怕會打返原形住居屋囉!

孖寶兄弟25個月零9日喇!

又update一下孖寶兄弟的近況 --

哥哥:

1) 家人關係
哥哥變得好痴媽媽, 可能因為佢知道媽媽錫佢, 又肯抱抱, 又唔捨得鬧佢 (因為佢之前唔太痴我, 如果仲鬧佢, 佢唔理我, 所以媽媽甚少鬧然然的!), 加上媽媽係屋企的時間(即星期一至五晚, 星期六,日)都用黎陪晒佢兩個, 付出幾多, 佢地係知道的! 哥哥尋晚開始唔俾爸爸暗瞓覺, 要媽媽暗, 叫爸爸bye bye! hoho... 然然都係好錫細佬, 有野一定俾埋細佬玩, 佢跟媽媽入房, 見細佬未入黎, 都會叫細佬come!

2) 說話能力
呢幾晚開始, 臨瞓前俾晒佢2個上黎, 同我係床度一齊睇相相(以前係細佬的專利), 睇相相時, 媽媽會問好多問題, 亦會教佢地講詞語, 句子, 日常知識, 親戚關係, BB點黎等等... 經過幾日, 哥哥講野好似叻咗, 都開始識講句子 (e.g. 爸爸揸車車, 媽媽整蛋糕), 除咗句子外, 哥哥好鍾意講完中文再講英文 (e.g. 爛咗broken, 車車car, 魚魚fish, 水水water, 洗手手wash hands) 超級可愛喔!

3) 身體及心智發展
然然體重約24.5 lbs, 身高85cm, 哥哥呢排少咗流口水(可能係口腔肌肉發展成熟喇!) 但係仍然好論盡, 行行吓會跌低, 同埋專注力真係好弱(惟一專注係睇電視), 同理心都係比較弱, 同佢講細佬瞓咗覺, 講野要細聲D, 佢都仲係好大聲咁講埋D無謂野, 有幾次真係想車爆佢, 好驚佢嘈醒細佬! (真係唔知佢係冇同理心定係跟本唔明我講咩!)

4) 人際關係
出街唔係咁鐘意同陌生人打招呼, 唔肯望人, 去playgroup或者返教會親子崇拜, 佢都係自己坐埋一邊玩玩具, 好少同其他小朋友有互動(爭玩具)

細佬仔:

1) 家人關係
細佬仲係好痴媽媽, 爸爸多咗同佢玩(臨瞓前), 食飯又坐爸爸隔離(有時爸爸會同佢鬥快食), 所以佢痴多咗爸爸, 尋日返教會, 爸爸去完廁所返黎, 佢見到爸爸係門外行返入黎, 即時爆喊! 細佬仍然最鍾意搶哥哥手上的玩具, 不過, 有時媽媽鬧佢, 佢會肯俾返哥哥, 叫佢拖住哥哥, 佢都肯拖

2) 說話能力
細佬的語言能力繼續進步, 開始識講長少少的句子, e.g. 爸爸整琴琴俾鎷媽。上星期佢仲識得點阿嫲去拉埋晒個廳D窗簾布, 開燈 (估計佢應該係話: 曬曬... 拉窗簾... 黑蚊蚊... 開燈) 細佬對說話的理解能力都好強, e.g. 哥哥瞓咗覺, 佢識得講野要細細聲; 媽媽同佢講大個仔唔再用片片, 要自己去廁所, 佢會強烈表達不滿

3) 身體及心智發展
逸逸體重約24 lbs, 身高85cm (但又好似俾哥哥矮少少, 可能哥哥頭髮厚啫!) 細佬通常都可以食晒D飯, 但仍然係瘦奀豬, 佢好鍾意整齊, 佢會拎晒D Thomas火車出黎, 一架跟住一架排晒係地下, 佢安全意識好高, 冇把握佢唔會做, 所以好少跌親或整傷自己。逸逸心智發展俾哥哥成熟, 明白別人的意思, 就算扭緊計, 你同佢講吓道理, 佢都有機會收聲, 唔再扭計(但哥哥就係扭到歇斯底里!)

4) 人際關係
細佬出街肯同陌生人打招呼(當然係爸爸媽媽要求佢咁做啦!), say hello, bye bye, 通通照做。去playgroup或者返教會親子崇拜, 唔知點解, 佢都係俾人搶玩具 (當然即時爆喊啦!)

又想通了...多一點...

今日諗通咗 --> 都係唔好咁慳, 如果慳咗會令自己日後耿耿於懷的話, 就唔好慳, 好似以前咁:

1) 為咗慳錢, 唔捨得去外地影結婚相/搵過另一間攝影公司影過另一輯結婚相, 而家每次睇返D結婚相都耿耿於懷, 真係影得好差

2) 為咗慳錢, 唔捨得請陪月員坐月, 結果好似冇坐過月咁, 到而家都耿耿於懷坐月期間冇得到適當的照顧, 搞到而家身體都好差(老公話係因為我冇做運動啫!)

3)  為咗慳錢, 今次換樓買唔到高層單位, 只買到中層, 日日返工放工都耿耿於懷, 所有同我一齊入lift的人都住得高過我 (俾老公知我有呢個諗法一定又話我short short地!)

4) 成日為咗慳錢, 耿耿於懷老公走去買貴野(換車, 音響, 相機, 電話, etc.), 耿耿於懷好似只有自己一個係度慳錢

5) 為咗慳錢, 到而家30幾歲人都冇去過做facial(其實都因為驚俾人sell package), 成日都耿耿於懷自己連女人最基本的福利(去美容)都冇!

想通了, 不如唔好慳喇! 想買就買, 費是慳咗錢, 眼紅隔離條友唔幫我慳, 埋怨佢咪仲唔好!

2014年過去了... 想通了!

2014年過去了, 老實講, 2014年實在過得唔係太開心, 應該係話, 唔開心多過開心, 怨氣太深(對老公), 連佢都feel到, 一切都源於我覺得佢冇陪我一齊湊對仔, 同埋冇好似其他人老公咁樣, 欣賞老婆為自己生仔!

但係呢幾日, 我好似諗通咗少少, 因為我諗返起其實我老公一直都唔鍾意細路(其實我自己都係), 要求/期望一個唔鍾意細路的人, 陪我一齊湊仔(仲要係打孖黎), 同埋好似其他人老公咁樣, 欣賞老婆為自己生仔, 我呢個要求/期望似乎真係好唔現實, 好唔合邏輯!

諗通咗我對老公的要求/期望原來係完全唔跟劇情的時候, 我對佢的怨氣好似突然消失咗, 尋晚佢主動幫個仔沖涼(其實佢以前都成日幫晒2個仔沖涼, 因為我對手痛, 筋膜炎), 同埋佢半夜三更聽到細佬仔喊, 走去隔離房抱住個仔, 暗返佢瞓, 我見到佢咁做, 反而覺得好唔好意思, 麻煩到佢! (係真呀! 以前只有心裏暗地怨佢唔幫手, 我三更半夜走去氹個仔, 佢就倒頭大睡!)

諗通咗我對老公的要求/期望原來就等同我唔鍾意食梳槤, 佢辛辛苦苦托個梳槤返黎同我分享, 仲期望我好欣賞佢做既野一樣! 我開始諗吓我老公其實都有好多野值得我去欣賞:

1)  唔煙、唔酒、唔玩女人 (佢最憎人食煙噴到佢, 飲少少酒都面紅, 同埋以佢的身高好難有女人埋到佢身, hoho...)

2)  顧家 - 佢放工一定係返屋企, 有時仲要佢去買餸 (佢知我唔鍾意行街市又濕又迫, 怕我辛苦, 所以佢去)

3)  肯做家務 - 未生仔前屋企冇工人, 全部家務都係佢做 (因為佢話我做家務的方法唔啱佢心意)

4)  成份糧俾晒我 - 聯名戶口出糧 (所以我都係成份糧俾晒佢), 屋企的水電煤供樓管理上網雜費, 全部都係佢搞掂, 連我D信用咭數, 交稅, 電話join咩plan, 都係佢幫我搞埋, 基本上我咩都唔駛煩

5)  我鍾意的野佢通常都會買俾我 - 講真, 我鍾意的野唔多, 亦好少"扭"佢買野, 但當佢知道我鍾意某樣野, 尤其係貴野, 連我自己都唔捨得買時, 佢通常都買俾我/鼓勵我買 (e.g. agnes b返工袋, mysty woman 大褸, panasonic麵包機, totoro龍貓記事簿, yamaha數碼鋼琴, ikea梳妝枱, rasonic電焗爐)

6)  錫老婆 - 都算就我, 通常小事都就我, 我承認自己有時都小姐脾氣(但唔算勁, 我覺得!), 佢唔鍾意細路都就我生仔; 成日都唔想我辛苦(寧願佢自己辛苦埋佢) e.g. 去街市買餸、煮飯、去快餐店食飯, 佢一定幫我買埋拎埋俾我、如果男人可以陀仔, 佢應該都會幫我陀對仔, 唔駛我咁辛苦; 佢仲成日敎2個仔對住我講: 媽媽, 我愛你!

7)  肯幫手湊仔 - 大前提係佢唔鍾意細路都幫我湊, 我放產假時, 佢斷斷續續請咗一個月假陪我, 又煲住劇捱到12點幾1點餵夜奶, 冇叫醒我幫手, 曾經試過有段時間冇工人, 佢都同我並肩作戰咗2個月

8)  好錫2個仔 - 雖然佢唔鍾意細路, 但佢好錫2個仔, 肯陪佢地玩, 做埋D白痴表情; 哥哥有2次要入急症室, 佢都好緊張; BBS要去健康院, 佢次次都陪我地去; 我冇時間幫2個仔搵幼稚園, 佢就填晒D表格, 仲請假親身去交埋表

9)  一手包辦屋企所有hardware的維修 - 大至搬新屋要裝修, 小至BB玩具要換電蕊, 當然包括埋佢自己架車, 唔係壞咗都要得閒落去整下先至安樂

10)  都唔算大駛 - 佢平時都好少買衫褲鞋襪手錶之類, 好少用錢, 對食方面更加係慳到冇朋友 (但佢知我對食都有少少要求, 有時都會陪我去食吓貴野, 氹吓我開心), 佢只係每年換一次手提電話 (我怕執輸, 通常都一齊換埋, 其實跟本冇需要換), 換車(生咗BBS後換咗架七人車, 補咗10萬蚊, 一年後嫌架七人車唔夠馬力, 換咗另一架, 補多1萬), 買相機同鏡頭 (生咗BBS後話要每個月影BB相, 結果影咗初頭幾個月, 之後就封塵)

諗到呢度, 我開始明白, 老公唔係唔幫手湊仔, 只係我地分咗工, 佢係會計部+採購部+機電工程部, 我就係湊仔事務部, 負責照顧2個仔的起居飲食同情緒 (計落我仲少野做D喎!)。

2015年第一篇blog, 提醒我要感恩, 欣賞我老公, 記住以後唔開心, 同老公鬧交之後就開黎睇吓喇!!!

孖寶兄弟的第一次 -- 搬家

2014年的聖誕節早上, 我們搬家了!

話說媽媽自從2005年下嫁了爸爸之後, 已經搬了4次, 今次是第5次, 但對於兩小兄弟來說, 搬家還是第一次, 媽媽都有點擔心他們未必適應新居, 會否嚷著要回家(舊居)?!

由於搬了4次, 媽媽基本上已經身無分文, 兩袖清風, 最多只有衫褲鞋物之類的隨身物品(連化妝品, 護膚品也不多, 媽媽實在太慳家了!) 滿以為有4次的搬屋經驗, 今次應該無難度, 爸爸還說自己"pack"箱已經可以了, 不用媽媽出手 (請問哪次不是我出手的呢?) 結果到了最後關頭, 媽媽還是要出手的 (因為時間倉促, 爸爸直至搬屋前一日, 還要到新居那邊清潔, 辛苦爸爸了! 至於工人姐姐, 基本上不知何謂搬屋, 更不知要幫手......)

到了搬屋那天早上, 嫲嫲一早已經來幫手 (感謝嫲嫲一直以來的幫忙, 搬屋後還要山長水遠由沙田來將軍澳湊孖B! ) 早上9:15, 搬屋工人來到, 嫲嫲趕緊與工人姐姐帶孖寶到樓下公園避避, 還以為只需30至45分鐘可以清場, 出發前往新居 (根據過往經驗), 誰不知到了11:30才可以全完清場 (可能多了2位孖寶的關係, 實在太多雜物! 搬屋公司的車大到進不了停車場, 還要召喚另一架貨車才裝得下我家的雜物, 真的有這麼多嗎? 媽媽的很少啊... 難道是爸爸的?!)

早上11:30我們向將軍澳的新居出發, 到埗後第一時間當然是帶兩位小王子到樓下商場食肆醫肚 (其實嫲嫲早已帶他們去飲茶, 最肚餓應該是媽媽和爸爸, 但爸爸和工人姐姐要留在新居等搬屋工人, 只能夠食飯盒), 結果到下午3時才能帶孖寶返回新居。

孖寶似乎對新居一點都不陌生, 很好奇的東奔西跑, 滿屋都是雜物, 連走廊都堆得滿滿, 但孖寶樂在其中。他們很快已經習慣這個新居, 第一天已經認得我們家門口, 升降機門一打開, 他們已懂方向的飛奔到家門前, 好肯定的站在門口指著等爸爸開門!

由於有小朋友的關係 (已經不再是二人世界的Quality of Life), 新居加添了不少禦寒設備, 包括浴室寶及冷暖空調, 孖寶洗澡及睡覺都暖暖的, 不怕著涼。全屋舖了無縫木地板, 冬天不太冷之餘, 孖寶跌落地也不會太傷; 兩位小王子的睡房由兩間細房打通而成, 地方寛敞, 還弄了個大衣櫃擺放小王子的衣服及玩具; 廚房也不再是媽媽夢寐以求的open kitchen, 而是加了灰玻璃趟門, 但也不失型格; 走廊加了門, 希望有少許隔音效果 (主要是防止BBs午睡期間被Nick Nick的吠聲吵醒); 主人房窗簾也不再是落地式 (防止BBs玩窗簾); 當然, 由於家有工人, 主人房的廁所門也不再改到走廊, 保留私隠!

順便也來Update一下孖寶兄弟的情況:

細佬仔越來越懂事(溝通到的!), 聽得懂人家說甚麼, 也能簡單說出自己的需要, 出街甚少扭計大吵大鬧, 基本上媽媽一個人帶細佬出街無難度! 不過, 由於細佬太懂得表達自己, 最近愛上點歌播放, 媽媽真的不勝其煩!  而且, 細佬開始懂得說句子了 (e.g. 媽媽整蛋糕, 逸逸食蛋糕, 媽媽去veevee, 睇相相...一陣...瞓覺) 不過, 細佬仔經常搶哥哥的玩具, 還連聲說: "唔該晒 x N次", 以為說了"唔該晒"就不算是搶喔!

至於哥哥, 仍然可以用"一舊飯"來形容 (仍然未能溝通到!) 媽媽已經提醒過這樣做會有危險, 但仍然做, 結果當然是受傷! 媽媽問誰跟媽媽落街街買包包, 他只顧看電視, 一臉茫然, 直到細佬換了衣服著鞋鞋跟媽媽開門出街之際, 他才如夢初醒, 哭成淚人! 但哥哥也有他的優點, 就是不計較, 細佬搶他的玩具, 他通常只會說"曳曳", 然後任由細佬搶走他手上的玩具; 對於細佬經常要點歌播放, 哥哥則沒所謂, 看甚麼聽甚麼也可以!  哥哥很討人喜歡, 除了樣子甜美之外, 又懂得緊緊的扭著人家的頸, 挽著人家的手臂, 很窩心! 哥哥還從爸爸那裏學了個市井的說法, 每當他喝到美味的湯湯(或任何飲品), 他會喝一口, 然後豎起手指公說一聲:"正"! 太搞笑了!

孖寶兄弟2歲零19日喇!

上星期媽媽開始喉嚨痛, 打乞痴, 流鼻水, 哥哥首先俾媽媽傳染 (因為媽媽戴口罩, 哥哥一見到就好驚, 爆喊, 仲要抓甩媽媽個口罩, 結果第一個被傳染), 跟住輪到細佬, 因為細佬夜晚初段同媽媽瞓, 佢塊面面同媽媽塊面面只有一呎距離...

好在兩隻豬仔的病情都唔算嚴重, 最嚴重都應該係媽媽, 因為病咗2星期都未好返, 仲係日日要呻鼻涕(個鼻呻到出血, 好痛!), 呢2日仲有D咳, 未試過病成2星期都未好返(緊係啦! 都冇休息過, 就算睇咗醫生, 放緊病假果日, 留係屋企都係要湊仔...唉!)

Update一吓BBS最近的情況, 哥哥自從上次喊到歇斯底里撞爆眼角入咗急症之後, 呢幾個星期乖咗, 好少無緣無故扭計, 相反, 細佬仔唔知係唔係出牙仔唔舒服, 扭計咗好多, 成日都要媽媽抱抱 (其實媽媽已經抱住咗佢!)

佢地呢2個星期的語言能力又進步咗好多, 已經可以講3個唔同音的字, 包括:
- Tom乜C (呢個好早已經識講)
- I-Cream時 (講咗好多次, 唔係I-Cream時, 係I時Cream)
- 唔該晒 (呢個肯定係爸爸媽媽平時講得多)
- 打死你 (呢個好明顯係阿嫲成日話要打死阿Nick)
- 捐山Loan (呢個係爸爸氹佢地著衫時講既)
- OneTwoThree, ABC (呢2個就係扭要開電視睇時講的!)

細佬仔仲開始識得講簡單句子, 例如: 「爸爸揸車車!」尋晚2個爭玩具, 爸爸出手調停, 照例講:「唔准爭, 邊個玩先既?」細佬情急之下竟然衝口而出:「逸逸玩先!」果刻, 我同爸爸, 哥哥都呆咗,冇諗到佢竟然會識講 (爸爸直頭話好似同緊D狗講野, 隻狗本來吠緊, 突然間識講人話咁!), 咁既然佢講到係佢玩先, 當然俾返個玩具佢啦!

哥哥就成日講英文: change, wash, 一至十的英文, 指住其中一個數字佢都識講, 唔駛順次序; A至Z都識識地, 最叻講doubleU; 眼耳口鼻的英文都識晒, 最鍾意指住個車頭燈話係eyes (佢想像力都幾豐富!) 有一次媽媽打開本書指住隻雞問佢係咩黎, 佢竟然識講chicken, 媽媽都呆咗, 原來佢識咁多生字! (媽媽都冇教過, 可能係姐姐教)

總括黎講, 細佬語言天份高D, 佢尋晚食完咳藥水之後同媽媽講: 「逸逸... 咳咳... 食藥... 舒服... 叔叔... 藥藥...」媽媽幫佢翻譯如下: 「逸逸因為咳咳, 所以要食藥藥, 食咗就舒服, D藥藥係今朝睇醫生叔叔俾既!」

每年必備 -- 龍貓記事簿

自從2005年去日本度蜜月係台場邂逅咗龍貓記事簿, 以後每年必備就係一本, 通常老公會係十月送俾我做生日禮物 (2007年唔知點解冇買到, 好似係老公叫我唔駛心急咁早買, 結果買唔到)!

買咗8年喇, 今年加價加到190蚊 (又話日元跌咗好多), 好肉痛, 爭扎咗好多, 去過文具舖, citysuper, sanrio睇過其他diary, 都冇一本diary睇得上眼, 最後都係死死地氣俾成差不多200蚊去買咗心頭好!

註: 2015年果本so far係最靚