孖寶兄弟2歲零19日喇!

上星期媽媽開始喉嚨痛, 打乞痴, 流鼻水, 哥哥首先俾媽媽傳染 (因為媽媽戴口罩, 哥哥一見到就好驚, 爆喊, 仲要抓甩媽媽個口罩, 結果第一個被傳染), 跟住輪到細佬, 因為細佬夜晚初段同媽媽瞓, 佢塊面面同媽媽塊面面只有一呎距離...

好在兩隻豬仔的病情都唔算嚴重, 最嚴重都應該係媽媽, 因為病咗2星期都未好返, 仲係日日要呻鼻涕(個鼻呻到出血, 好痛!), 呢2日仲有D咳, 未試過病成2星期都未好返(緊係啦! 都冇休息過, 就算睇咗醫生, 放緊病假果日, 留係屋企都係要湊仔...唉!)

Update一吓BBS最近的情況, 哥哥自從上次喊到歇斯底里撞爆眼角入咗急症之後, 呢幾個星期乖咗, 好少無緣無故扭計, 相反, 細佬仔唔知係唔係出牙仔唔舒服, 扭計咗好多, 成日都要媽媽抱抱 (其實媽媽已經抱住咗佢!)

佢地呢2個星期的語言能力又進步咗好多, 已經可以講3個唔同音的字, 包括:
- Tom乜C (呢個好早已經識講)
- I-Cream時 (講咗好多次, 唔係I-Cream時, 係I時Cream)
- 唔該晒 (呢個肯定係爸爸媽媽平時講得多)
- 打死你 (呢個好明顯係阿嫲成日話要打死阿Nick)
- 捐山Loan (呢個係爸爸氹佢地著衫時講既)
- OneTwoThree, ABC (呢2個就係扭要開電視睇時講的!)

細佬仔仲開始識得講簡單句子, 例如: 「爸爸揸車車!」尋晚2個爭玩具, 爸爸出手調停, 照例講:「唔准爭, 邊個玩先既?」細佬情急之下竟然衝口而出:「逸逸玩先!」果刻, 我同爸爸, 哥哥都呆咗,冇諗到佢竟然會識講 (爸爸直頭話好似同緊D狗講野, 隻狗本來吠緊, 突然間識講人話咁!), 咁既然佢講到係佢玩先, 當然俾返個玩具佢啦!

哥哥就成日講英文: change, wash, 一至十的英文, 指住其中一個數字佢都識講, 唔駛順次序; A至Z都識識地, 最叻講doubleU; 眼耳口鼻的英文都識晒, 最鍾意指住個車頭燈話係eyes (佢想像力都幾豐富!) 有一次媽媽打開本書指住隻雞問佢係咩黎, 佢竟然識講chicken, 媽媽都呆咗, 原來佢識咁多生字! (媽媽都冇教過, 可能係姐姐教)

總括黎講, 細佬語言天份高D, 佢尋晚食完咳藥水之後同媽媽講: 「逸逸... 咳咳... 食藥... 舒服... 叔叔... 藥藥...」媽媽幫佢翻譯如下: 「逸逸因為咳咳, 所以要食藥藥, 食咗就舒服, D藥藥係今朝睇醫生叔叔俾既!」

每年必備 -- 龍貓記事簿

自從2005年去日本度蜜月係台場邂逅咗龍貓記事簿, 以後每年必備就係一本, 通常老公會係十月送俾我做生日禮物 (2007年唔知點解冇買到, 好似係老公叫我唔駛心急咁早買, 結果買唔到)!

買咗8年喇, 今年加價加到190蚊 (又話日元跌咗好多), 好肉痛, 爭扎咗好多, 去過文具舖, citysuper, sanrio睇過其他diary, 都冇一本diary睇得上眼, 最後都係死死地氣俾成差不多200蚊去買咗心頭好!

註: 2015年果本so far係最靚

放開懷抱...學習放手!

自孖B出世, 接生姑娘將孖B放在媽媽懷抱中的一刻, 兩年了! 孖B一直沒有離開過媽媽的懷抱!

孖B初生的時候, 飲奶, 睡覺, 甚至扭計, 都被媽媽的懷抱緊緊的包圍著, 很溫暖, 很安全......

孖B四個月大, 開始懂得認人, 遇著有陌生人靠近, 更加不能夠離開媽媽的懷抱......

孖B六個月大, 開始會坐, 能夠離開媽媽的懷抱一會兒, 但扭著要睡覺, 還是要躲進媽媽的懷抱.....

孖B一歲, 開始會走路, 能夠離開媽媽的懷抱多一會, 但跌跌碰碰的時候, 仍然需要媽媽的懷抱作倚靠......

孖B兩歲, 要到幼稚園面試, 準備明年入學, 到時候, 孖B將要第一次真真正正離開媽媽的懷抱(媽媽真的很不捨得呢!), 展開他們人生的新一頁, 媽媽也是時候開始學習放手, 讓孖B自己去經歷自己的人生 (當然, 媽媽也很樂意陪伴孖B去經歷一個愉快又難忘的童年喔!)

小孖B, 媽媽只想對你們說, 無論外面有多大的風雨, 媽媽的懷抱隨時為你們打開, 有需要的話, 仍然可以躲進來, 媽媽的懷抱永遠都是那麼的溫暖和安全呢!

孖寶兄弟2歲生日會!

今年係BBs的第二年生日! 今年好似過得快咗, 相比第一年(簡直渡日如年!)

今年, BBs終於有份一齊食返自己個生日蛋糕, 有可以食麵麵(其實係意粉), 仲有媽媽親手整的愛心炒飯, hoho...

佢地而家越黎越得意, 尤其細佬仔, 佢真係明我地講咩, 就算佢喊緊, 發緊脾氣, 都會聽人講野, 聽完會收聲, 好乖!

媽媽: 邊個曳曳?
細佬: 哥哥
媽媽: 佢點樣曳曳?
細佬: 喊喊
媽媽: 咁你呢?
細佬: 乖乖豬 (仲要豎起手指公)
媽媽: 啊! (哈哈!)

至於哥哥, 都係成日扭計, 發脾氣, 喊到顛咗, 唔會聽人講野, 爸爸通常都會唔睬佢, 由得佢喊, 佢就會走黎搵媽媽, 媽媽通常都心軟, 抱抱同加以安慰, 不過, 哥哥唔發脾氣果時, 個樣真係得意到成日都想咀佢! hoho...

超細B幼稚園面試大作戰

踏入11月, 係幼稚園面試的高峰期, 雖然小孖B係2012年12月出世, 我同爸爸都想佢地做大B, 即2016/17年讀K1, 不過, 眼見佢地成日係屋企游手好閒, 成日要開機睇電視(媽媽好驚佢地未入幼稚園就要戴眼鏡), 所以就叫爸爸幫佢地報幼稚園, 試吓有冇學校肯收佢地, 其實本來係想報2015/16年N班, 但爸爸話冇得報(唔知係冇, 定係未有得報住), 所以全部都係報K1, 變咗要夾硬做細B (佢地仲要係超細B, 因為早產咗一個月)

其實至今已經連續四個星期六入將軍澳幼稚園面試, 雖然媽媽平日都會幫佢地練習, 但小朋友係好睇心情的動物, 心情好就肯答老師問題, 肯跟住指令完成動作, 但遇著當日心情唔好, 就唔睬你, 唔望你, 爆喊, 你都奈佢唔何, 做媽咪的, 惟有內心安慰自己, 算啦! 預咗唔得, 只係去試吓面試, 吸收吓經驗啫! 我成日講, 我地最大的籌碼就係下年可以再黎過!

上星期六去面試, 老師走過黎同細佬傾計, 佢竟然叫老師go way (我心即時打個突, 今次死硬! 最驚老師以為我地做家長教壞佢, 但我地都冇, 真係冤枉呀!) 阿哥就一如以住, 同老師零眼神交流, 但佢竟然係餅餅利誘之下, 肯講自己咩名同幾多歲。

不過, 上星期六竟然收到信, 保良局易澤峯幼稚園收咗佢地 (簡直難以置信, 因為細佬面試當日爆喊, 我當時仲想同個老師講: 算啦! 我地唔in喇!)

而家總算已經有2間收咗佢地, 一間係西北扶輪(新移民子弟學校), 另一間就係保良局易澤峯(老公話係好野黎. 但上次interview都見到D疑似支那人), 其實最希望就係宣道恩怡收佢地啦! 最近屋企(唔駛過馬路), 又係基督教!

孖寶兄弟23個月喇!

今個月, 孖寶兄弟的語言發展突飛猛進, 尤其係細佬仔, 以前只係識講疊字, (例如: 爸爸, 媽媽, 嫲嫲, 姐姐, 車車, Nick Nick, 飯飯, 麵麵, 餅餅, 水水), 今個月開始識講2個字 (例如: 巴士, 的士, sit down, 熄燈, 開燈, 開機, 快D, 蘋果(細佬無啦啦係幼稚園interview時識得答老師果個係蘋果, 勁!), 揸車, 飛機, 廁所, 瞓覺, 沖涼)

最近呢幾日, 我發覺佢地開始識得連埋個動詞一齊講, 例如:
- 斟水水
- 飲奶奶
- 坐靚靚
- 食飯飯
- 冇晒餅餅/飯飯
- 摸摸Nick Nick
- 落地地

有一晚, 哥哥無啦啦講咗3個字: "Tom乜C" (原來佢係講緊佢架Thomas火車), 原來BBs係不知不覺間會學咗我地講既野

上次interview個老師話唔好再同佢地講疊字, 因為佢地已經識得連續發幾個音, 例如: 唔好叫蕉蕉, 係香蕉, 所以我呢排都特別教細佬講多D兩個字的詞語(哥哥冇心機學, 坐唔定, 教唔到), 例如: 提子, 粟米, 番茄, 薯仔, 牙刷, 牙膏, 蛋糕, 蛋撻, 火車)

值得一讚係兩個都識講自己個名, 同識得講自己兩歲! 對於未夠2歲的小朋友, 仲要唔足月出世黎講, 又係男仔(語言能力較女仔差), 媽媽已經覺得佢地好叻叻!

產後抑鬱?(3)

自從BBs出世之後, 我同老公就成日鬧交, 可能因為一次過要照顧2個BB真係好辛苦, 好大壓力, 又可能因為大家對對方的期望唔同咗, 老公覺得湊仔係做人阿媽的責任(我最憎佢咁講!), 而我就希望老公可以同我並肩作戰(但我好快就發現佢跟本從來就冇諗過要並肩作戰, 佢只係無奈地迫住要出手湊仔, 佢甚至因為要幫手湊仔, 覺得自己唔係男人!)

結咗婚就黎十年, 我終於發現原來老公都好大男人! (曾經以為自己好幸福, 搵到個唔大男人的男人做老公) 老公成日同我講: 你做人阿媽, by default 係要湊仔! 我好想回敬佢一句: 咁你做男人, 做人老公, 係唔係by default要養埋老婆, 唔駛佢做野做得咁辛苦撐住頭家呀?  點解湊仔就話by default係做人阿媽的責任, 賺錢養家就話要公一份, 婆一份, 因為個家大家都有份, 咁係唔係叫雙重標準呢???

上次鬧交時, 老公話佢就得我好犀利, 好辛苦! 咁難度我冇就過佢咩? 佢成日話要換車, 換樓, 買呢樣買果樣(全部都係貴野!), 我都唔鍾意啦! 最後咪又係就佢, 順佢意! 喂! 你駛緊D錢, 我都有份賺返黎架! 諗返轉頭, 我係屋企都冇話事權可言, 連食早餐時食蛋先定係食麵先, 都要聽老公話, 想吩咐工人做咩做咩, 又鬧我唔可以咁樣同工人講, 妖! 咁我唔講, 俾你講晒算喇!

同阿嫲或者朋友出街飲茶就更加顯得佢大男人, 只係顧住同朋友傾計, 個仔扭晒計都唔理, 由得我野都冇得食/食唔飽, 抱住個仔出茶樓外面行, 返到仲要一手抱住個仔, 一手食飯, 佢就次次食到捧住個肚走, 我就次次餓住個肚走囉! (其實阿嫲都係次次食唔飽)

之前就成日戴住個headphone打機, 我同佢講野都聽唔到 (我有一次索性叫佢去死囉, 佢都係聽唔到!) 而家就學人做咗低頭族, 機不離手, 食飯又whatsapp, 夜晚有時叫佢幫手睇住2個B, 又係坐係sofa whatsapp (都唔知係唔係出面收埋條女), 佢覆人地D whatsapp就好快, 我send俾佢呢, 就睇咗鍾意就覆囉, 唔鍾意咪當冇收過 (其實我好多次都叫自己唔好再whatsapp佢, 反正佢睇咗都唔覆, 好多次叫自己唔好係佢低頭玩電話時同佢講野, 因為佢跟本冇聽我講野!)

算啦! 我同老公而家都唔會講咩心事呀! 深入野架喇! 我哋D話題只有間屋同2個仔, 工人, 呢類家事! 唔好話我咩都唔同佢講, 係佢落閘先囉!

老公話我好不滿佢, 其實睇返日記, 我諗因為有好多野, 日積月累造成我今日對佢的不滿,

(1) 我唔鍾意佢成日話要換車, 佢就一年換一次車,
(2) 我唔鍾意佢買貴野, 佢就成日買貴野 (所以有一排我狂買衫俾自己同BBs洩憤),
(3) 我唔鍾意佢落去整車, 成日唔陪我湊仔, 佢就成日落去整車, 留低我係屋企湊仔,
(4) 我唔鐘意佢換樓, 佢就換,
(5) 我唔鍾意住將軍澳, 佢就搬將軍澳,
(6) 我唔捨得送咗隻狗俾人, 佢就送咗阿Brad俾人 (好冇人性囉!)

諗起佢呢D野, 我就無名火起!!!

唉! 不過, 同身邊的朋友比較, 老公都算係咁喇! 佢又幫手湊仔(雖然係被迫的!), 又買餸煮飯, 又肯同BB沖涼, 又幫BBs報幼稚園, 所以我都唔可以要求咁多喇! 何況今次想生仔係我, 所以我成日同自己講, 我應該自己承擔/受返囉!!!