孖寶兄弟23個月喇!

今個月, 孖寶兄弟的語言發展突飛猛進, 尤其係細佬仔, 以前只係識講疊字, (例如: 爸爸, 媽媽, 嫲嫲, 姐姐, 車車, Nick Nick, 飯飯, 麵麵, 餅餅, 水水), 今個月開始識講2個字 (例如: 巴士, 的士, sit down, 熄燈, 開燈, 開機, 快D, 蘋果(細佬無啦啦係幼稚園interview時識得答老師果個係蘋果, 勁!), 揸車, 飛機, 廁所, 瞓覺, 沖涼)

最近呢幾日, 我發覺佢地開始識得連埋個動詞一齊講, 例如:
- 斟水水
- 飲奶奶
- 坐靚靚
- 食飯飯
- 冇晒餅餅/飯飯
- 摸摸Nick Nick
- 落地地

有一晚, 哥哥無啦啦講咗3個字: "Tom乜C" (原來佢係講緊佢架Thomas火車), 原來BBs係不知不覺間會學咗我地講既野

上次interview個老師話唔好再同佢地講疊字, 因為佢地已經識得連續發幾個音, 例如: 唔好叫蕉蕉, 係香蕉, 所以我呢排都特別教細佬講多D兩個字的詞語(哥哥冇心機學, 坐唔定, 教唔到), 例如: 提子, 粟米, 番茄, 薯仔, 牙刷, 牙膏, 蛋糕, 蛋撻, 火車)

值得一讚係兩個都識講自己個名, 同識得講自己兩歲! 對於未夠2歲的小朋友, 仲要唔足月出世黎講, 又係男仔(語言能力較女仔差), 媽媽已經覺得佢地好叻叻!

產後抑鬱?(3)

自從BBs出世之後, 我同老公就成日鬧交, 可能因為一次過要照顧2個BB真係好辛苦, 好大壓力, 又可能因為大家對對方的期望唔同咗, 老公覺得湊仔係做人阿媽的責任(我最憎佢咁講!), 而我就希望老公可以同我並肩作戰(但我好快就發現佢跟本從來就冇諗過要並肩作戰, 佢只係無奈地迫住要出手湊仔, 佢甚至因為要幫手湊仔, 覺得自己唔係男人!)

結咗婚就黎十年, 我終於發現原來老公都好大男人! (曾經以為自己好幸福, 搵到個唔大男人的男人做老公) 老公成日同我講: 你做人阿媽, by default 係要湊仔! 我好想回敬佢一句: 咁你做男人, 做人老公, 係唔係by default要養埋老婆, 唔駛佢做野做得咁辛苦撐住頭家呀?  點解湊仔就話by default係做人阿媽的責任, 賺錢養家就話要公一份, 婆一份, 因為個家大家都有份, 咁係唔係叫雙重標準呢???

上次鬧交時, 老公話佢就得我好犀利, 好辛苦! 咁難度我冇就過佢咩? 佢成日話要換車, 換樓, 買呢樣買果樣(全部都係貴野!), 我都唔鍾意啦! 最後咪又係就佢, 順佢意! 喂! 你駛緊D錢, 我都有份賺返黎架! 諗返轉頭, 我係屋企都冇話事權可言, 連食早餐時食蛋先定係食麵先, 都要聽老公話, 想吩咐工人做咩做咩, 又鬧我唔可以咁樣同工人講, 妖! 咁我唔講, 俾你講晒算喇!

同阿嫲或者朋友出街飲茶就更加顯得佢大男人, 只係顧住同朋友傾計, 個仔扭晒計都唔理, 由得我野都冇得食/食唔飽, 抱住個仔出茶樓外面行, 返到仲要一手抱住個仔, 一手食飯, 佢就次次食到捧住個肚走, 我就次次餓住個肚走囉! (其實阿嫲都係次次食唔飽)

之前就成日戴住個headphone打機, 我同佢講野都聽唔到 (我有一次索性叫佢去死囉, 佢都係聽唔到!) 而家就學人做咗低頭族, 機不離手, 食飯又whatsapp, 夜晚有時叫佢幫手睇住2個B, 又係坐係sofa whatsapp (都唔知係唔係出面收埋條女), 佢覆人地D whatsapp就好快, 我send俾佢呢, 就睇咗鍾意就覆囉, 唔鍾意咪當冇收過 (其實我好多次都叫自己唔好再whatsapp佢, 反正佢睇咗都唔覆, 好多次叫自己唔好係佢低頭玩電話時同佢講野, 因為佢跟本冇聽我講野!)

算啦! 我同老公而家都唔會講咩心事呀! 深入野架喇! 我哋D話題只有間屋同2個仔, 工人, 呢類家事! 唔好話我咩都唔同佢講, 係佢落閘先囉!

老公話我好不滿佢, 其實睇返日記, 我諗因為有好多野, 日積月累造成我今日對佢的不滿,

(1) 我唔鍾意佢成日話要換車, 佢就一年換一次車,
(2) 我唔鍾意佢買貴野, 佢就成日買貴野 (所以有一排我狂買衫俾自己同BBs洩憤),
(3) 我唔鍾意佢落去整車, 成日唔陪我湊仔, 佢就成日落去整車, 留低我係屋企湊仔,
(4) 我唔鐘意佢換樓, 佢就換,
(5) 我唔鍾意住將軍澳, 佢就搬將軍澳,
(6) 我唔捨得送咗隻狗俾人, 佢就送咗阿Brad俾人 (好冇人性囉!)

諗起佢呢D野, 我就無名火起!!!

唉! 不過, 同身邊的朋友比較, 老公都算係咁喇! 佢又幫手湊仔(雖然係被迫的!), 又買餸煮飯, 又肯同BB沖涼, 又幫BBs報幼稚園, 所以我都唔可以要求咁多喇! 何況今次想生仔係我, 所以我成日同自己講, 我應該自己承擔/受返囉!!!

哥哥第二次入急症

繼今年5月31日, 哥哥被X街工人餵咗條2.5cm三文魚骨吐血入急症後, 佢又係上星期六晚入急症! 事緣佢當日已經非常扭計, 可能唔夠瞓, 心情好差, 夜晚8:30瞓覺時扭計, 喊到歇斯底里, 媽媽坐係床邊同佢講, 暗佢瞓覺, 拍pat pat, 但佢無啦啦發顛, 右眼撞咗埋去床頭, 我即時抱起佢加以安慰, 爸爸都衝入房睇然然, 突然發覺佢D眼淚有血水, 嚇到嗱嗱林車佢去急症室!

講到呢度, 不得不讚一下香港公立醫院對小朋友的無微不至, 完成登記手續, 然然即被分流到緊急, 但其實佢對眼已經冇流血水, 又冇表面傷痕, 只係等咗10分鐘左右, 已經叫佢個名, 醫生話佢對眼擘得大, 又冇狂標眼水, 應該冇撞裂角膜, 不過, 為安全起見, 都係call眼科醫生再check, 於是有工作人員帶我地上咗4樓, 等眼科醫生, 本來諗住醫生都收晒工, 可能要等到半夜, 或者要安排入院, 等第二朝醫生返黎, 點知等咗半個鐘, 有個著住便服的醫生姐姐衝衝咁趕返黎幫然然檢查, 果刻, 我真係慶幸冇幫BBS買醫療保險, 同埋第一次覺得, 噢! 我地每年納咗咁多稅, 今次都算值回票價喇! (咁當然唔希望再有下次啦!) 我估睇私家都冇咁快同咁好服務囉!

初步檢查應該冇撞傷到隻眼, 應該係眼角啫, 醫生開咗眼藥水同眼藥膏(佢咁細點搽膏呀?), 同埋幫佢約咗星期一返眼科中心覆診!

唉! 真係嚇死媽媽呀! 然然! 你唔好咁顛得唔得呀?! 如果你隻眼有事, 咁就一世架喇, 媽媽都唔知點算, 情願俾埋隻眼角膜你喇!

Brad Brad! Sorry!

老公今日將Brad Brad送俾人(本來佢諗住送埋阿Nick, 但因為我喊晒, 唔捨得, 所以阿Nick先至可以留低, 但其實阿Nick先至係最衰同埋對BB有潛在攻擊性)

我真係估唔到, 其實最艱難的時期都過咗, 當時雖然都有諗過將狗狗送咗俾人, 但都唔忍心, 竟然而家反而要將阿Brad送俾人, 唉!

我知道我冇資格話留低阿Brad, 因為我真係冇幫手打理過D狗(由大肚開始己經冇), 每日要餵狗, 每星期要梳毛修甲, 每三星期要沖涼, 每年要打一次防疫針, 全部由老公包辦, 佢有時間都寧願陪吓2個仔或者去整吓車啦!

因為有小朋友而唔要狗狗, 我一向都好卑視呢D人, 但竟然到BBS兩歲的時候, 我都做埋呢D人, 我唔覺得小朋友同狗狗唔可以和平共處, 事實係BBS同狗狗已經和平共處咗2年, 老公話今次決定係為咗阿Brad好, 因為我地冇時間照顧佢, 諗返都係, 我好少摸阿Brad, 其實由Brad第一日接返黎, 佢只係陪阿Nick, 我地對阿Brad都只係寵物 (佢唔同阿Nick, 阿Nick我當佢係仔一樣, 去旅行都買一大堆零食同狗狗衫俾佢)

阿Brad, Sorry! 希望你搵到主好人家, 繼續傻更更咁好好生活落去! (我今朝冇望阿Brad, 冇摸佢, 亦冇同佢影臨別照, 費是睇返傷心啦!)

人生的新體會

當上媽媽後, 我的人生和價值觀都徹徹底底的改變了!

感謝神, 讓我有機會當媽媽, 讓我真正體會人生!  雖然有時BBS扭計的時候, 會覺得佢地好煩, 好想揼扁佢地, 好想自己呢埋, 但係見唔到佢地的時候, 又會好掛住佢地, 甚至有時候出門口, 佢地同我講bye bye, 我都眼濕濕 (當然要笑住同佢地講bye bye, 唔可以俾佢地見到我眼濕濕啦!) 我成日都會睇返佢地的舊相, 由出世時細細粒(每人得5磅), 到而家曉行曉走, 開始識講野 (同埋同佢地講野, 佢地真係明白!), 睇住佢地兩兄弟一路成長, 實在覺得生命好奇妙, 能夠有小朋友亦唔係必然 (因為我本來係不育的!) 

呢2個小朋友, 另我對人生有新的體會! 我要提醒自己好好珍惜每一日同佢地相處的時間! 好好珍惜佢地仍然好需要我! (因為佢地真係大得好快, 我開始有D唔捨得佢地咁快大喇!) 

記住: 今日, 你係佢地o既全世界; 他日, 你再走不進佢地o既世界! (當我諗到呢度, 我就唔再介意佢地成日要: 媽媽, 抱抱! 抱到對手都軟, hoho...) 

從沙田到將軍澳(2014年版)

四年前發表了一篇網誌, 題為「從將軍澳到沙田」, 萬料不到四年後, 竟然又從沙田重返將軍澳! (其實七年前, 即2007年已經發表過一篇題為「從沙田到將軍澳」的網誌)

話說自從兩位小王子出世後, 經常為買奶粉、尿片和日用品而煩腦, 因為我家附近荒蕪一片 (正因為此, 我家享有無敵城門河景), 曾經因為BBs出院回家後, 才發現所買的chu chu奶咀太實, BBs跟本無法吸啜, 樓下又沒有藥房, 當時已經是晚上, 惟有等第二朝, 老公一早駕車去買, 當時情況真的十分危急, 哥哥差點餓死! 此外, 由於有了孩子, 放工後自然歸心似箭, 可是由我們家到公司的命脈 - 新巴682路線經常出現脫班, 迫到爆的問題!  從此, 搬屋便成為我和老公之間一個熱門(爭拗)話題!

老公認為:

- 要搬的話, 一定要搬返將軍澳, 因為近公司, 約需30分鐘 (其實現時每朝搭682返工, 只需50分鐘)
- 我們現時所住的屋苑實在太殘舊, 每朝等好耐lift, 又沒有會所, 帶BBs游水水也不方便, 因為沒有沖身設備 (老公這點, 我是頗同意的!)
- 要有酒店式大堂及現代的屋苑設備 (這是我十年前的想法, 估不到現在的老公, 突然又愛上酒店式大堂)


我認為:

- 有私家車, 買日用品的問題是可以解決的
- BBs長大了, 買奶粉、尿片等日用品並沒有以前般迫切
- 搬屋牽涉到巨額的厘印費, 裝修費以及每月供樓開支大增, 不搬屋的話, 省下的錢應該足夠我每日搭的士放工 (我這點, 老公是頗同意的!)

由於並沒有一面倒的好/壞處, 所以搬屋的問題一直未有定案!

幾個月前, 老公的將軍澳朋友們先後賣樓/計劃換樓, 於是激發起老公的鬥心! 老公開始放盤, 由於開出天價, 我早肯定他無可能賣得出層樓, 於是也沒有放在心上, 加上睇樓的人多, 但只睇不買, 老公也想放棄, 決定封盤!  過了一個月, 老公得悉將運澳的朋友已覓得買家, 準備賣樓, 又再次激起老公賣樓的決心, 今次減價重推單位, 結果... 當然是一放即賣, 一閃即逝!

由於事出突然, 其實我並未有心理準備賣樓/搬屋, 頭兩日, 我仍然可以倒頭大睡 (反而老公話瞓唔著!) 但過了兩天, 得悉老公一直心儀的將軍澳新x城2期1000呎單位冇盤, 我開始識驚及擔心, 甚至半夜醒了不能入睡, 我哭了! 因為今非昔比, 現在多了兩位小王子, 一切都以他們的福趾為重, 現在牽涉到他們的住屋問題, 真是非同小可, 做媽媽的, 萬萬不可要兩位小王子屈就比現時更細的房子, 又想起將軍澳那會有好學校? 加上將軍澳著名的圍城景與我現在坐享的無敵河景比較...... 個心實在"那住那住"

老公一向知道我對將軍澳沒有好感, 所以提意考慮大圍的「明俾阿誠哥屈」(簡稱"明誠") 或者觀塘的「棺穴。嘩!瘋!」不過, 既然今次搬屋的導火線是返公遠及樓下無藥房, 將軍澳的新X城是惟一可以乎合到老公的搬屋條件, 而且價錢沒有前兩者高, 對我來說, 省下的錢可以作為BBs的教育基金, 因此, 雖然實在不太喜歡將軍澳及今次所買的單位(圍城景, 方向差, 不夠高層, 雖然實呎有700, 但感覺上比我家現時640呎還小), 但還是用我的名買下了! 唉...

後記@10.8.2015
搬咗去將軍澳已經8個多月, 作為沙田友死係沙田魂的我, 仍然對沙田念念不忘, 每次返沙田探父母, 經過熟悉的街道, 街角, 商場, 公園, 都滿載我的童年回憶! 我深信, 總有一天, 我可以重返沙田!

除咗以前我列出一大堆討厭住係將軍澳的理由之外, 今次又多一個, 就係呢度的空氣質素太差, 我自從搬過黎之後, 開始有鼻敏感, 成日打乞痴, 流鼻水, 起初仲以為自己傷風, 但傷風冇可能咁頻密掛, 細佬仔都同我一樣, 有D鼻敏感, 慘慘豬!

後後記@3.2.2016
搬咗去將軍澳已經一年多, 我仍然相信有朝一日, 我會重返沙田的!  將軍澳除咗屋苑樓下就係大型商場同地鐵之外, 對我冇乜好處, 而家除咗老公冇鼻敏感之外, 我同兩個仔都有, 老公仲話佢唔覺空氣差, 如果差的話, 會感覺得到, 咁我同兩個仔而家都感覺到, 仲搞到鼻敏感, 係你自己一個人仲未感覺得到咋喎!

孖寶兄弟21個月喇!

真係好想好想記低BBs的成長點滴!但係因為呢半年工作實在變得超忙, 加上, 再講一次, 呢個乜鬼Google Blogger真係超級唔好用(今日發覺應該係Blowser問題, 轉用Google自家的Google Chrome就打到字喇!)所以已經有一年冇記低BBs的成長, 真係好可惜, 希望由而家開始, 可以再寫Blog! 

BBs已經21個月喇! 除咗行得好穏陣, 仲識行得好快, 上落梳化, 爬高爬低, 「捐」枱底,「捐」入窗簾布玩, 打開我個衣櫃拎晒D防潮包出黎玩, 兩兄弟性格好唔同, 各有所長, 各有所好, 分析如下: 

哥哥鐘意:

- 爸爸, 極度迷戀爸爸, 已經去到瘋狂的境界
- 錫錫Nick Nick(其實係成個人瞓上去壓扁Nick Nick)
- 非常扭計(經常大喊:「爸爸, 抱抱...嗚...」)
- 食乳酪, 橙, 蕉, 提子及各式生果(連榴槤咁臭都食), 媽媽造的包包, 番茄牛, 粟米片, 餅餅, 乳酪餅
- 勇於探索新事物

哥哥唔鐘意:
- 跟住爸爸數1,2,3, 或者唱do, ra, me
- 做D手作野, 一坐低就走人

細佬就鐘意:
- 媽媽, 媽媽放假係屋企, 一定要媽媽餵飯, 媽媽抱抱
- 笑 (由以前的喊喊豬, 變成得意豬, 可愛指數爆燈)
- 指住自己JJ, 同篤人地(包括媽媽)的JJ
- 食乳酪, 蕉, 提子, 粟米片, 餅餅
- 跟住爸爸數1,2,3, 或者唱do, ra, me (己經識得數1-10, 有時唔駛提佢, 都可以講得出下個number)
- 搶哥哥手上玩緊的玩具 (呢樣野最衰格!)
- 做埋D手作野, 包括砌Lego, 貼貼紙 (大個D可以教佢整小小廚, hoho) 

細佬唔鐘意: - 嘗試新口味或接觸新事物