話說我塊面一直有以下嘅困擾：
(1) 額頭上面嘅萬年粒粒（閉口粉刺），試過搽BPO，杏仁酸，水楊酸，果酸，Clindamycin（抗生素)， Differin（第三代A酸），Tretinoin（第一代A酸），杜鵑花酸，瘋狂磨砂，都係冇好過，時好時壞，一係就乾到爆炸＋甩皮時，粒粒會少咗啲，但只要搽返少少保濕，成個額頭又會標返晒啲粒粒出嚟
(2) 個額頭係又乾又油，以為因為搽A酸，未建立耐受性，所以個額頭長期鞋烚烚，但已經搽咗差不多3年（Differin搽咗1.5年+Tretinoin搽咗1.5年，仲未耐受？），我都有搽Ａ酸係兩邊面，但塊面冇鞋烚烚，只係比較乾（圍住個咀有時會甩皮），同埋間中痕到半夜會抓損塊面
(3) 每次去打斑，都會俾美容師話我塊面好乾，尤其係個額頭，佢話我乾到起晒粒粒，仲嚇我話，咁乾打laser落去，會再爆多啲粒粒出嚟，叫我要勤力啲敷Mask（打laser前敷保濕時會好那痛，美容師話因為我塊面太乾）結果每次打完laser都爆瘡爆到懷疑人生
(4) 砸咗幾萬蚊係塊面上（打斑＋護膚品），勁搽防曬（係屋企唔出街都搽），擔遮，帶帽，但永遠都係塊面黑過條頸，塊面係又黑又黃（註：條頸冇做過任何treatment）
(5) 塊面（眼底／鼻樑附近）有時會無啦啦凸起一粒粒，又唔似粉刺，好似係個毛孔撐大咗（見到個毛孔係中間凹落去，周圍凸起）
(6) 塊面敏感咗，可能搽咗A酸，間中無啦啦紅咗一撻，用卸妝乳等含活性界面劑嘅嘢，塊面會好那痛
(6) 用粉底液嚴重浮粉（唔知係因為皮膚太乾，吸晒D粉底液，淨返啲粉，抑或係皮膚太油，溶晒D粉底液)，再加上塊面成日起粒粒，已經轉用咗粉餅3年喇
最近，再睇返台灣皮膚科醫生嘅youtube（兩年前都睇過)，如果你有以下症狀：
(1) 一直長痘痘，塗了痘痘藥，抗生素都無效，不斷復發
(2) 顆粒長不停，額頭有粗糙的顆粒感
(3) 皮膚又油又乾，脫屑，粗糙
(4) 肌膚暗沉蠟黃，毛孔粗大
(5) 皮膚敏感，痕癢，容易泛紅
(6) 上妝不貼服，浮粉
(7) 打完皮秒雷射會爆痘
你就好大機會患上咗「蠕形蟎蟲症」!
吓？點解同我嘅症狀一模一樣嘅？係唔係講緊我呀？
其實幾年前都睇過其他台灣皮膚科醫生講酒糟肌（香港叫玫瑰痤瘡），症狀係兩邊面朱登紅卜卜，一睇就知，酒糟肌係由面上的蠕形蟎蟲引起（呢隻蟲係每個人身上都有，正常係冇事嘅，但太多蟲係塊面就會引起好多皮膚問題）
OMG!!! 我一直都唔知道，原來我塊面一直所受嘅困擾，咁多年嚟，可能都係因為呢隻蟲？！
