我唔係虎媽, 係苦媽, 命苦個苦!
話說2018年6月, 我寫過一篇孖媽嘅無奈...... 郁D爆喊、發癲、發脾氣、發忟憎、埋怨、唔睬人、唔應人、唔理人、挑釁人、有仇必報、有交必嗌、有人唔順眼必打...... 孖媽當時已經覺得, 我已經盡晒力去教, 教到嘔血, 但孖寶都係好唔聽話, 好唔合作, 我教仔好失敗 -- 只有無限嘅無奈!
五年過去, 孖寶仍然係好難教, 好唔聽話, 好唔合作, 包括：
1. 問佢哋做晒功課未 --> 唔睬你 + 敷衍你 + 嫌你煩
2. 教佢哋做功課, 順便睇吓其他題目有冇答錯 --> 發忟憎 + 嫌你煩 + 覺得你阻住佢睇電視
3. 提醒佢哋溫默書／測驗 --> 發忟憎 + 發脾氣 + 覺得你俾壓力佢
4. 俾練習佢哋做 --> 發忟憎 + 埋怨 + 俾說話你聽 + 覺得你害緊佢
5. 星期六/日早上幫佢地補習英文 --> 發忟憎 + 覺得你阻住佢打機 + 覺得你嘥緊佢時間
6. 就嚟考試, 幫佢哋溫書 --> 發忟憎 + 發脾氣 + 覺得你想迫死佢
7. 好喇! 我唔迫你哋, 你哋自己自發性溫書啦 --> 埋怨你 + 覺得係阿媽小器 + 覺得係你唔負責任
8. 叫佢哋唔好打咁多機, 因為會近視 --> 鬧返你轉頭 + 覺得你剝奪咗佢嘅人生自由
9. 天氣凍, 叫佢著返件褸 --> 發忟憎 + 嫌你煩 + 覺得你迫佢服毒
10. 好喇! 我唔迫你哋, 唔著褸, 冷病咗唔關人事 --> 又係阿媽太小器
11. 唔奢望佢兩兄弟相親相愛, 但可唔可以和平共處呢? --> 擰轉頭唔夠30秒就鬧交, 家嘈屋閉
12. 帶佢哋去公園／會所Playroom玩 --> 一係就俾坐係隔離個阿媽投訴我嗰仔掟嘢, 一係就有小朋友走埋嚟投訴我個仔打佢, 每次聽到有小朋友喊聲, 我都好驚, 好驚又係我兩個仔打人
無論我講咩, 或者唔講咩, 做咩, 或者唔做咩, 都係我嘅錯...... 我真係唔識點教? (請高人指教)
我係實致名歸嘅苦媽! 真係好命苦!
好無奈! 唔知呢一份嘅無奈, 要延續到幾時呢?......
曾經......
我以為可以趁孖寶仲細個, 仲有得教, 性格呢D嘢仲有得改嘅
我以為可以幫孖寶補習, 等佢地英文個底打得好D
我以為孖寶有媽媽教做功課, 唔會好似媽媽當年咁徬徨無助, 會感到幸運
我以為發晒功幫孖寶溫考試, 成績應該唔會差得去邊
我以為肯俾錢俾機會佢地學嘢, 佢哋總有一天會學有所成
我以為佢地要走嘅路, 我都走過, 我想提點一吓佢地, 等佢哋走得順D
原來......
佢哋嘅性格係唔會改變, 惟有經歷人生嘅熬煉先至能夠令佢哋改變
佢哋唔係電腦, 唔係你輸入咗咩嘢, 佢就會出返D咩results
佢哋太有主見(唔似其他小朋友咁樣唔識反抗), 佢哋唔鍾意, 就算你肯俾錢俾機會佢哋, 都係嘥氣
佢哋唔會走你為佢哋安排嘅路, 你愛佢, 唔係指條正路佢行, 而係陪佢一齊行, 雖然明知係冤枉路, 係掘頭路......
