自學水彩 - 自我感覺良好篇(4)

時間過得好快, 自學水彩已經有一年的時間喇! Practice makes Perfect 係真的!

2019年9月

2020年8月

2020年9月

自學水彩 - 動物篇

 之前復活節時都畫過小兔子, 不過, 對住幅真相嚟畫, 都係第一次!

其實一直都好想幫Nick Nick畫幅水彩 (佢年紀太大喇! 應該好快就...... 我唔想等佢離開咗先至畫, 我驚我傷心到畫唔到!) 

上星期, 終於的起心肝, 膽粗粗, 抱住「試吓囉」的心態開始起稿, 呢個時候, 個燈箱真係幫咗我好大忙! (之前上網睇水彩教學, 主持人話個稿起得靚, 已經成功咗一半), 雖然好努力起稿, 但用張真相嚟印, 真係好有難度, 加上小動物唔似人咁有樣睇, 所以好努力都只係畫咗個輪廓、眼睛、鼻、口(差D睇唔到), 同埋深淺毛色的大概位置。起完個稿, 真係超級簡陃, 咁個稿起得唔靚, 係唔係已經成功失敗咗一半?!

猶疑緊係唔係應該繼續畫落去? 就咁開始上色? Err... 不如上網睇吓人家點樣用水彩畫動物, 噢! 打擊! 天呀! 簡直係神級呀! 畫到D毛一條條飛飛吓, 點畫架?!  未開始畫已經自信心大受打擊, 算啦! 我唔需要追求D毛一條條飛飛吓,試吓畫啫, 畫得唔靚咪最多嘥咗張紙啫!

於是, 即管試吓上色, 由淺色開始, 慢慢加深, 但完全不知所措 (跟本唔識點畫), 惟有叫自己唔好當幅相係真相, 只係一幅print出嚟的水彩, 照平時咁畫, 好努力咁畫咗半個下午, 終於都有D起色喇!

雖然唔係D毛一條條飛飛吓, 但叫做有深淺色, 開始有D立體感, 經過兩日的努力不懈, 終於...... 我畫好咗阿Nick個頭喇! 未畫對眼之前, 孖寶好鄙視咁話: 媽媽你畫緊D乜, 都唔似既! 做乜唔畫對眼? 我同佢地講: 對眼要最後先畫, 畫咗就會好D架喇! 到我畫咗對眼, 拎俾佢哋睇時, 佢哋態度立即180度轉變, 嘩! 好似阿Nick呀! 好勁呀! 我都覺得有9成似, 起碼一睇就知係我家阿Nick, 唔係人哋隻狗, 我好滿意!!!

畫好咗個頭, 已經成功咗超過一半, 跟住只係需要畫埋個身就OK, 由於要突顯阿Nick個樣, 所以個身唔需要咁detail, 我決定大面積上色, 渾開, 濛濛濃濃咁就可以喇!

雖然個身睇落真係有D求其, 但係, 我已經盡晒力喇! 第一次(可能係最後一次)畫動物, 我覺得自己有80分架喇!

多謝各位!