經過大半年的練習, 自我感覺越嚟越良好, 所以就試吓用返之前的「廢紙」(Waterford Saunders) 再畫一次, 再一次拎上手, 我冇睇錯, 張紙真係超級黃, 都唔敢想像畫出嚟會係點, 究竟畫咩可以用咁黃的紙, 可能要畫D同歷屎有關或者好有意境的題材先得, 我用嚟畫花, 睇怕畫出嚟都係暗淡無光!
開始落筆, 感覺仍然係張紙超級缺水, 我已經先用濕筆打底, 但張紙吸水勁快, 未開始上色, 表面的水已經冇晒, 不過, 好在仲未乾晒, 仲可以上色, 上色時感覺D顏色比較(木漿紙)容易化開, 而且化開得比較自然(唔會一撻撻), 另外, 亦比較容易做到深淺色/混色漸變的效果(因為之前用木漿紙, D水份停留係表面的時間比較長, 漸變色停留係表面太長時間, 就變成得返一隻色!), 不過, 由於真係好化, 所以好難做到Sharp邊(D邊都化埋), 而且, 我要再講多一次, 張紙真係超級饑渴, 正常水量都做到乾筆效果, I don't want!!!
由於影相時打咗燈, 所唔覺好黃, 但事實上, 張紙真係好黃, 成幅作品正如我所料, 暗淡無光, 無嚟生氣, 有D覺得嘥咗心機咁, 但又棄之可惜, 不過, 我終於開始領略到棉漿紙的好處, 漸變同混色真係好靚, 係木漿紙做唔到的! 不過, Waterford Saunders 的紙真係好好好黃, 我唔知可以用佢嚟畫乜?! 好想試吓法國頂級名牌Arches紙, 因為網上好多人勁讚!
四月的作品
正式放棄Waterford Saunders紙, 用返cheap cheap的Canson XL Watercolor Pad, 由於係復活節, 所以要畫返隻小兔子應吓節, 用咗10日時間, 算係近期比較快完成的畫作 (用得最長時間係畫個花環, 而唔係主角小兔子!)
五月的作品
由於疫情減退, 一切Resume Normal, 每日都要返工, 放工返到屋企已經好攰, 每晚只係好想好想去瞓覺, 冇心機、冇心情、冇動力去畫我最愛的水彩, 今個月只有以下呢幅作品, 唔係咁滿意, 花盆邊D長春藤的綠色應該可以有多D變化, 而家成幅畫望落去好似得一隻綠色咁, 好Dull!
