自學水彩 - 進階篇(3)

話說8月時買咗盒Van Gogh水彩(拎咗返公司用), 然後10月時又買咗盒Rembrandt(係屋企用), 越用就越發覺Student Grade同Artist Grade水彩真係好大分別! Rembrandt係好顯色, 基本上用濕筆係水彩磚上點兩吓, 已經好深色! 但Van Gogh就係要點好多吓, 但都係好淺色! 另外, 明明用Rembrandt好容易做到的平塗、漸變、混色, 用Van Gogh會變成好明顯兩截色, 加上Van Gogh出名水痕好明顯 (我個人覺得唔係太適合要嚟畫花草, 比較適合用嚟畫插畫或者漫畫), 所以用Van Gogh時係充滿錯折同挫敗感der~!

以下係用Van Gogh畫的花花大特寫, 我已經盡晒力, 用wet-on-wet上咗3層色(唔敢再上, 我驚張紙會霉爛), 但顏色都係好淡, D顏色好似出唔到咁! 加上水痕太明顯, 唔係咁靚!

 上第一層色

右邊係原圖, 我上咗3層仍然係做唔到原圖的Sharp Contrast效果

仲有2星期就係聖誕節喇! 當然要畫返一幅有聖誕氣氛的水彩畫啦! 早幾日上網見到有聖誕限定水彩班, 教人畫聖誕花環(我當然唔會再去俾錢上堂啦!) 係喎! 簡單易畫又可以係短時間內起貨, 一於畫聖誕花環啦!

快靚正之選, 仲可以做聖誕咭!

另外, 今個月係屋企只係畫咗以下呢幅:

牡丹花 (唔係玫瑰啊!)

原來唔止中國人鍾意畫牡丹, 鬼佬水彩都好鍾意畫牡丹der~

後記@2019.12.28

最後, 總算係去旅行前一日完成埋今年最後的畫作(本來想係聖誕節前完成, 配合聖誕氣氛der~)

孖寶兄弟7歲喇!

點解時間會過得咁快? 可唔可以俾返孖寶BB我呀? 佢地以前肥嘟嘟, 頭大身細, 手短腳短, 好好抱, 好好攬啊!

細佬一直都好期待生日, 佢好想開生日會, 哥哥就好似冇咩所謂咁! 不過, 佢地半年前就已經揀定咗要咩生日禮物, 就係LEGO賽車。由於每年生日都係爸爸負責送禮物, 搞到媽媽好似兩手空空, 冇任何表示咁, 所以媽媽今年除咗自製2張生日咭, 另外仲買咗2份禮物俾孖寶, 哥哥近來愛上咗畫畫(同媽媽一樣), 佢話想要本畫簿, 至於細佬, 佢好鍾意玩Card Game(其實哥哥都係), 所以媽媽決定買盒Card Game俾佢, 趁機鼓勵佢邀請哥哥一齊玩, 學習分享!

12月1(星期日)係屋企舉行生日會, 其實生日會只係得爸爸, 媽媽, 嫲嫲, 姑媽同工人姐姐, 為咗增添Party氣氛, 媽媽用咗3晚的時間(仲要小心翼翼由公司拎塊A1-size Foam Board返屋企), 整咗近幾年好流行的派對影相框(Minecraft主題)。

 除咗整個框, 仲整埋2把道具劍

 孖寶的生日禮物

 哥哥仲有少少Baby Face

 但細佬個樣已經大個仔咗好多了!

孖寶一齊切蛋糕, 好開心!