自學水彩 - 初階篇 (5)

過去一個星期, 開始嘗試畫大面積的花花, Loose Rose 仍然係我的弱項, 無論點畫都係唔似!

唔應該畫最右邊塊葉, 搞到成幅畫側埋咗一邊咁

Loose Rose畫得好差, 好在旁邊有點綴, 望落去不至於太樣衰

最易畫, 冇乜技巧, 但效果最滿意

葉片位置重疊, 多咗D層次

自學水彩 - 初階篇 (4)

其實, 由細到大, 我都好鍾意畫畫!

記得細個, 我的志願係想做一個畫家, 但係D大人聽到我咁講, 就即刻同我講: 做畫家會乞食架喎! 啊......

讀書時期攞過的奬項全部都係畫畫:

(1) 依稀記得小學低年級時, 係樓下個平台參加即場填色比賽, 攞到奬品乙份, 我仲問阿媽, 甲即係一, 乙即二, 係唔係有2份奬品咁解呀?!

(2) 小學五年級 - 學校的「香港特色建築物繪畫比賽」, 我畫咗匯豐銀行, 攞咗亞軍!

(3) 中學一年級 - 參加全港「清潔運動繪畫比賽」, 我得到亞軍, 我仲記得要去沙田新城市廣場參加頒奬典禮! 最近同老媽講返, 佢話當年佢同老爸一齊出席我的頒奬典禮, 之後, 主辦單位仲請我地去飲茶食點心啊! (我完全冇印象!)

(4) 中學二年級, 參加全港「奧運繪畫比賽」, 我攞到優異奬, 好似要去灣仔參加頒奬典禮!

(5) 中學三年級, 參加沙田的「燈飾繪畫比賽」, 我仲好記得, 年30晚, 老豆同我去城門河影燈飾相, 俾我對住張相嚟畫, 最後好似都有優異奬! (但係傻更更借咗張相俾同學, 佢對住嚟畫就攞咗季軍, 阿媽話我做乜借張相俾人咁傻!)

由中一至中三, 係學校畫親D畫都靚到俾老師攞晒去貼堂, 一張都冇留底, 當年又冇相機可以影低佢, 所以完全冇得睇返自己以前D畫作, 好可惜!

到咗中四選科, 我放棄咗有得修讀藝術科的文商科班, 揀咗純文科班, 因為純文科係3班文科班入面最叻, 通常大部份同學都可以升中六!

到咗大學選科, 我放棄咗藝術系, 因為我知道做畫家會乞食, 不過, 我讀嗰科地理, 都係乞食!

放棄咗畫畫20幾年, 我已經唔記得自己鍾意畫畫! 直至近年係Facebook睇到有朋友去學畫畫, 甚至有40幾50歲的朋友, 同老公仔女全家一齊去學畫畫, 就係咁, 我同自己講, 我都要重拾畫筆!

以前讀書, 只係用過油粉彩(感覺超糟糕!)、廣告彩(得奬作品全部都係用廣告彩畫的)、木顏色、鉛筆素描, 從來未接觸過水彩, 好! 我就試下水彩畫啦!

然後, 一開始, 買咗盒Pentel的大人の水彩(聲稱係水溶性粉彩), 但感覺超級糟糕, D粉彩跟本唔溶, 就算預先將D顏料溶咗落水度, 同水彩都係兩回事嚟! 跟住去學咗一堂水彩畫, 原來我都可以畫到架! 於是對畫水彩充滿熱情! 然後, 買錯咗盒俾小朋友玩的水彩, 完全畫唔返上堂嗰幅畫的效果, 心情又跌落谷底! 最後, 終於買咗盒Van Gogh水彩, 又重拾畫水彩的信心!

經過2個月以嚟的不斷嘗試, 有失敗(90%), 有成功(10%)! 成功只係佔少部份, 所以好多時都係好沮喪! (尤其是銷毁咗張昂貴水彩紙的時候!!!) 但又要不停叫自己唔好放棄, 繼續努力練習, 真係要好大興趣同熱情先得!)

我好肯定, 畫水彩畫係咁多畫之中, 最難掌握的! 因為:

(1) 你永遠唔知道, 當你落筆之後, D水會點流動, 兩隻顏色又會點樣互動

(2) 你永遠預計唔到幅畫畫完會係咩色, 因為你係調色碟見到隻色, 唔等於你畫落畫紙的色, 畫咗落畫紙的色, 乾咗之後會淺咗色

(3) 畫水彩的成敗關鍵就係水量的控制, 但我永遠都控制唔到, 支筆一係乾得滯, 一係就太濕

(4) 畫水彩好少起稿, 因為水彩本身係透明, 上咗色都會見到鉛筆痕, 就算起稿, 都係好淺色(或者起完稿, 再擦到近乎見唔到D線), 尤其有一種水彩風格係講求隨意、自然, 不過, 對我嚟講, 唔起稿就落筆畫, 簡直係一場大災難!

(5) 水彩乾得好快, 畫畫時要分秒必爭, 所以網上有教授教學生, 未落筆前, 首先要望住張紙, 用個腦畫一次先, 但我發覺自己個腦好似控制唔到隻手咁, 畫出嚟的效果硬係同心目中相差好遠

(6) 除咗快, 仲要夠「狠」同「準」, 因為水彩係冇修改空間(唔似廣告彩咁, 可以用一隻色蓋過另一隻色, 亦唔可以好似木顏色或者鉛筆咁, 可以用擦膠擦), 我落筆唔夠「狠」(因為D水彩紙好貴啊!), 更糟糕就係經常唔「準」, 就算對住幅畫嚟畫, D位都係走晒!

為咗減少挫敗感, 氹吓自己開心(咁先至有動力再畫落去), 所以今個星期都係畫小花! 以下係今個星期的作品(唔見得人嗰D已經銷毁咗! hoho...):

孖寶升小二

上星期一(9月2日), 孖寶開學!

今年, 爸爸安排咗孖寶搭另一班校巴, 上落車位置都係對面馬路的屋苑入口, 佢話個站近D, 返學放學都唔駛行咁遠, 老實講, 我覺得以前個站(隔離商場地下的上落客區)冇乜問題, 係行遠少少, 但唔駛過馬路, 安全D, 加上係室內, 唔駛日曬雨淋, 不過, 老公的argument係, 唔會成日打風落雨! (err... 啊!... )

開學日, 冇打風, 不過落狗屎啫! 仲要係本來毛毛雨, 一落到地面準備過馬路, 就落狗屎! 吓? 咁大雨, 點行呀? 有遮都全身濕晒啦! 加上本身已經遲咗出門口, 結果, 早上7:31, 校巴直接係我哋眼前駛走了!

WTF! 咁而家點算呀? 惟有爸爸揸車送佢哋返學囉! (註: 頭先落狗屎, 搞到走咗架校巴, 等架校巴走咗, 就無落雨, 個天好明顯係玩嘢!) 不過, 今日孖寶開學, 能夠親自送佢哋返學校, 係學校門口影張相留念, 都係一件美事! (孖寶有爸爸媽媽送返學, 應該都會開心D!)

哥哥, 你做乜扁晒咀呀?

開學第2, 3日, 哥哥一朝早起身, 都爆喊! 鬧情緒! 佢話唔想返學, 因為要寫好多嘢, 老師俾好少時間, 佢寫唔切, 又要抄上課時間表, 佢抄唔切, 應該係充滿挫敗感, 好彷徨, 好無助! 媽媽被調Section初期都有呢種感覺! 好明白!

至於細佬, 佢話返學好開心(都唔知係唔係特登講反話, 寸阿哥?!) 不過, 聽佢講, 佢話個班主任好溫柔, 好好人, 又有好多小一的同班同學仔一齊讀返同一班, 好開心! 佢仲話佢嗰組係最高分, 因為佢不停舉手答問題, 幫佢嗰組攞咗好多分數! (咁佢同組D同學應該都幾Like佢!)

哥哥就冇乜點講佢嗰班的情況, 只係知道佢個班主任都好好人, 而且佢同晴晴(教會的朋友)一齊坐, 有個熟人點都冇咁彷徨掛?! 希望哥哥都可以快D適應新學期啦!

今年, 我哋作出一個突破 -- 就係俾孖寶帶飯! 佢哋小一全年都係訂飯盒, 但佢哋話好難食, 所以我同爸爸決定, 俾我家工人姐姐試吓, 每朝早煮飯, 然後送去學校, 不過, 最頭痛係要諗煮D乜嘢, 孖寶唔多鍾意食飯(炒飯除外), 食菜, 所以都係整意粉、薯蓉、炒飯、冷麵之類, 孖寶似乎都幾鍾意食自家飯餸!

另外, 就係要報名參加今年的樂器班, 尋日上網check, 見到哥哥已經被老師優先選入口琴班, 無須再報名, 但係細佬個小提琴老師要轉時間(下午), 我哋唔想, 所以要換另一個老師, 如果報唔到名, 就要去樓下D琴行學小提琴喇! (貴D, 但就方便好多!)

佢哋暫時都唔算太多功課, 細佬可以係食飯前做晒, 但哥哥個人唔專心+成日發夢, D功課要留到我哋返嚟篤住佢先至做 (咁放學返嚟成個下晝究竟做咗D乜?) 我同老公休息咗個半月, 而家又要開始晚晚返屋企睇功課, 回復一日打2份工的日子 -- 正職 + 兼職補習!

自學水彩 - 畫紙篇 (上)

毫無疑問, 畫水彩最重要就係張紙!

上網搵咗好耐, 有兩派學說:

(1) 一張靚紙絶對會令你的作品升級! 對新手嚟講, 一張靚紙絶對幫到你減低挫敗感, 讓你充滿希望, 有動力繼續學習! 反而用cheap紙, 好多水彩技巧都做唔到, 冇晒成功感, 學習之路難上加難, 好快就會放棄!

(2) 初學者唔需要用靚紙, 因為靚紙好貴(註: 係香港美術用品公司買歐洲牌子100%純棉水彩紙300gsm, 每張價錢大約要$10至$20不等), 搞到心理壓力太大, 落筆困難, 提心吊膽, 享受唔到畫水彩的樂趣! 反而用cheap紙, 你可以肆無忌憚咁練習唔同的水彩技巧, 就算畫衰咗, 都冇咁心痛(銀包都冇咁傷)。

兩派學說都有佢既道理, 雖然我的的確確試過用cheap紙, 感覺超挫敗, 但我非常認同初學者需要不斷反覆練習 (冇技巧俾你用頂級水彩紙都冇用), 所以一張價錢合理質素唔太差的水彩紙, 對初學者非常重要!

最後, 我揀咗Canson XL Watercolour Pad (300gsm), 其實外國網站的留言好壞參半, 有人話用嚟練習一流, 有人話係廢紙, 不過, 更廢的紙我都用過啦! 話晒Canson都係出產頂級Arches水彩紙的公司, 應該唔會差得去邊掛? 加上Made in France都俾咗我好大信心! 一本30張 A4 size 300gsm 水彩畫簿, 盛惠$82(特價), 平均大約$2.7一張, 我可以肆無忌憚咁練習, 冇心理壓力!

以下係我用Canson XL Watercolour Pad的第一張作品, 因為係木漿紙, 所以水痕比較重(其實我有時都幾鍾意), 不過, 畫花時好難做到無痕漸變的效果(挫敗感!), 另一個缺點係: 就算乾透仍然可以去色, 所以比較難做到層叠的效果, 圖中間的主花用咗層叠手法, 但畫第二層的時候, 底層D色有少少起咗出嚟! 不過, 有時都係一個優點, 下圖底部唔小心high到D深啡色, 立即用濕紙巾抺, 都抺走咗9成, 不過, 見到張紙就嚟"霉", 即刻收手。之前試過用Canson的Montval水彩紙, 雖然大家都係Student Grade的300gsm木漿紙, 但XL明顯薄D, 摸上手鞋D! 至於畫畫時的感覺, XL明顯係cheap紙的感覺(可能係心理作用), D顏料好快乾, 水量多的時候, 張紙有少許彎曲變形, 正如網上的留言, 唔能夠作大面積渲染, 例如畫天空, Landscape, Cityscape之類, 不過, 我通常都係畫細面積既嘢, 所以冇問題!

以下係用Canson的Montval 300gsm 水彩紙, 落筆時感覺紙面順滑D, 雖然D顏料都係乾得好快 (似乎係好多水彩新手的問題, 網上有人教落D蜜糖落去杯洗筆水入面, 我未敢試, 驚惹蟻), 但係冇XL乾得咁快(感覺顏料會停留係紙的表面多幾秒, 唔係即刻索咗入去), Montval係去色(Lifting Colour)方面比XL的表現好D, 而且因為Montval厚實D, 擦多幾次張紙都未爛, 就算多水量張紙都冇乜變形!

後記@2019.09.13

尋日發現中南廣場做緊開學優惠, 全線畫簿有85折, 我計過, 一本Canson Montval的A3 Size畫簿 (12張 + 送4張), 原價$139, 有85折, 即係$118.15, 1張A3可以開到2張A4, 即係總共有32張A4, 每張平均只係$3.7, 比XL畫簿貴$1張, 但質素好D!

網上見到有大師級用Saunders Waterford水彩紙(100% Cotton, 300gsm), 畫花超靚, 就算只係用Wet-on-Dry嚟畫, D顏色都唔易乾, 就算隔咗一陣再落筆, 2隻色仍然融合得好自然, 畫完成朵花之後, 每一片花瓣仍然係濕漉漉, 仲可以係畫花柄時, 張D顏色溶入去花瓣入面, 簡直就係我想要的效果! 所以趁有85折, 買咗一本20張嚟試吓。結果, 第一吓落筆, 已經感覺超級唔掂! 張畫紙本身超級鞋烚烚(好似缺水咁!), 一落筆就索晒D顏色入去底層, 而且乾得極快, 我跟本趕唔切係半濕的狀態時(係冇半濕狀態, 因為一落筆就乾晒!)加深顏色或混色, 而且因為D顏色係落筆時已經深深咁食咗入去張紙的底層, 所以完全做唔到Lifting Colour, 用正常水量, 都係變成乾筆效果! 我感覺係, 同之前張'廢紙'一樣! 不過, 由於張紙要over $7一張, 唔想嘥錢, 惟有草草了事! 更糟糕係張紙係偏黃色(都幾黃吓), 所以畫完之後, 成朵花變成暗淡無光, 真係冇眼睇! (所以冇影相)

到目前為止, 用過的畫紙排名:

1. 最好用 : 上水彩班時用的畫紙 (唔知咩牌子, 估計都係木漿紙, 但應該超過300g, 顏料唔易乾, 新手都可以做到好靚的混色效果, 吸水性極佳, 張紙完全冇變形扭曲)

2. 好用 : Canson的Montval (紙質順滑, 夠厚實, 耐磨, 顏料冇咁快乾, Lifting Colour一流)

3. OK啦 : Canson的XL Watercolour Pad (紙質薄D, 鞋D, 顏料快乾, 但wet-on-wet時都做到混色效果, 不過, 張紙會變形扭曲, 乾咗好D, 但都係曲咗)

4. 差 : Saunders的Waterford (紙質好鞋, 偏黃, 顏料極速滲入底層, 係表面乾透, 混色, Lifting Colour全部都做唔到, 吸水性極佳, 張紙簡直係超級饑渴咁!)

5. 超差 : 不知名散裝水彩紙 (吸水性極佳, 吸到過晒底, 顏料唔會停留係畫紙表面, 混色, Lifting Colour全部都做唔到, 用畫筆掃多兩吓, 張紙就開始霉爛, 張紙變形扭曲後, 就算乾咗都唔可以回復原狀)

自學水彩 - 初階篇 (2)

等咗2個星期, 我盒Van Gogh 24色固體水彩(半磚)終於到貨(30/8)喇!

立即開箱!

 紙盒印刷精美

 背面寫住Made in the Netherlands

簡潔的白色磨砂膠盒, 感覺乾淨利落!

每粒顏色都有蠟紙獨立包裝, 附送6號畫筆一支

孖寶話好似一粒粒朱古力咁, 唔該晒孖寶幫我續粒拆包裝紙

 顏色表面有光澤感

 立即試色, 用平塗法均勻上色, 做咗個Colour Chart, 色彩鮮豔!

 亦可以做出淡化效果

第一次試用Van Gogh, 畫咗以下呢幅Watercolour Loose Rose, 感覺好好! 雖然仍然係用"廢紙", 上色時仍然有顏色好快食咗入張紙的問題, 但漸變、混色效果都算做到, 仲有好明顯的水痕邊(呢個我鍾意)! 雖然Van Gogh只係Student Grade, 但對於我呢個新手嚟講, 已經好滿足, 過去2個月以嚟的挫敗感一掃而空, 我對畫水彩畫又有返希望喇!

Watercolour Loose Rose

後記: 

用法國Canson的Montval紙再畫多一次, 好明顯有分別! 質感幼滑好多! 顏色融合得好自然!