39 + 1

話說上星期同老公行街市, 生果檔阿嬸仲係叫我「妹妹」, 所以 39 +1 對我黎講, 唔係擔心歲月不饒人, 或者變成人老珠黃, 反而係最近有好多人生的反思 ......

39 + 1, 就算長命的話, 都已經係人生的一半, 開始進入人生的下半場, 回顧過去的人生, 我的結論係 : 我枉費咗人生的上半場迫自己做咗兩樣自己唔鍾意做的事 -- 讀書 & 返工。由未夠3歲讀幼稚園, 一直讀到24歲Master畢業, 再讀多2年Part-time Master, 結婚之後再用一年時間寫Dissertation, 足足用咗24年時間讀我唔鍾意的書。由2002年出黎做野, 到而家, 足足返咗16年我唔想返的工。試問人生有幾多個40年? 我已經枉費咗40年去做自己唔鍾意做的事, 人生只有一次機會, 我係唔係想繼續枉費之後的40年呢? 還是應該做一D自己鍾意做的事呢?

不過, 如果咁諗落去, 我驚我會生無可戀! 所以, 我又回顧過去的20年, 我由一個一無所有(無方向, 無目標, 無盼望), 只係識死讀書的女生, 變成今日樣樣都有(有美滿婚姻, 有可愛孖寶, 有穏定工作, 有安居之所)的幸福人妻&人母, 都唔算好枉費丫!

人生的下半場要點過? 仍然要諗, 但我仲未諗到......

雖然有人覺得生日冇咩特別, 唔需要咩慶祝, 但生日對我黎講, 仍然係好重要, 因為我可以有藉口請假, 唔駛返工! YEAH! 如果生日都要係工作中渡過, 咁真係唔知生存黎為乜?! (純屬個人立場)

今年的生日, 我安排咗以下的節目同老公一齊慶祝 (其實生日的日子亦係同老公的結婚周年紀念, 但年年都唔記得, 其實老公都係主角, 好後悔當年揀自己生日的日子結婚, 搞到少咗個紀念日去慶祝~)

(1) 早上7:30送咗孖寶上校車, 我同老公去茶樓飲早茶 (我地係成間茶樓最後生的兩個)

(2) 飲完茶, 唔知去邊, 去咗SOGO行街, 但冇特價, 又睇唔啱, 冇消費!

(3) 中午12:00, 帶Nick Nick去覆診 (佢上星期六做咗手術)

(4) 下午1:00, 去將軍澳某酒店嘆全身按摩90分鐘 (好正, 好C服, 差D瞓著咗!)

(5) 下午4:00, 去尖沙咀1881的Van Gogh Sense嘆下午茶 (幾有特色, 但D甜點太甜, 頂唔順! 我叫咗杯Brulee Coffee飲, 搞到夜晚瞓唔著!)

(6) 下午5:15, 回家湊仔!

(7) 晚飯過後, 老公突然唔知係邊度拎咗扎花出黎送俾我, 好Surprise呀! (同老公拍拖+結婚16年, 佢送俾我的花, 5隻手指數得晒, 其實我每次收花, 都好滾動! 我係好易氹的女人黎!), 然後, 孖寶神神秘秘叫我拆開個公文袋睇吓, 佢地話都唔知係咩黎 (好識做戲!), 係我指定每年的生日禮物 -- 龍貓記事簿, 然後, 我揭開第一頁, 孖寶各自寫咗「媽媽, 生日快樂! 身體健康!」點解唔係「媽媽, 哥哥愛你!」既??? 上次爸爸生日, 你係咁寫俾佢喎!

爸爸，生日快樂！

爸爸今日生日, 細佬仔係2個星期前(即工人姐姐生日第二日), 當我地同姐姐唱完生日歌切完蛋糕之後, 細佬細細聲係我耳邊講, 遲D輪到爸爸生日, 佢咁鍾意模型, 不如我地買副模型送俾佢, 果刻, 我真係有一種老懷安慰的感覺, 阿仔終於大個仔喇! 佢唔再只係自我中心, 乜都諗住自己,  佢會諗身邊的人, 佢會記住爸爸的生日, 同埋識諗買野送俾爸爸, 氹爸爸開心!

我見到細佬咁有心, 當然要和應佢啦! 不過, 爸爸D模型已經多到成個雜物房都係, 我又點會想買多副俾佢呢? 我同細佬講: 唔! 你呢個提議好好喎! 不過, 爸爸咁多模型, 應該唔駛再買俾佢喇! 不如, 我地畫張生日咭送俾佢啦! 佢應該會仲開心! 細佬欣然接受我呢個提議, 之後, 每隔幾日, 佢就提我, 媽媽, 你幾時拎張咭紙俾我, 等我可以畫張生日咭俾爸爸呀?

終於, 上星期五, 媽媽記得拎張咭紙俾細佬喇! 不過, 咁窩心的舉動, 又點可以少得我家的甜心哥哥呀? 佢係爸爸的忠實FAN屎, 由BB的小時候已經開始迷戀爸爸(我取笑爸爸, 佢前世應該係搞GAY既!) 哥哥成日都會無啦啦攬實爸爸, 同佢講: 爸爸, 我好鍾意你呀! 所以我將細佬呢個提議同哥哥講埋, 細佬亦唔介意同哥哥一齊設計一張生日咭俾爸爸!

上星期六, 我同哥哥趁爸爸送咗細佬去學小提琴, 我地就開始設計生日咭喇! 咁重要的事, 媽媽當然忍唔住出手啦! 不過, 都明白張咭係小朋友畫黎送俾爸爸既, 唔可以過份加工, 所以, 媽媽只係幫手係咭入面寫咗Happy Birthday的藝術字, 其他野, 就由得佢地自由發揮啦! 我同哥哥講, 要寫D字係張咭入面, 你想寫乜呀? 哥哥諗咗一陣, 佢唔係寫生日快樂, 而係寫 -- 爸爸, 哥哥愛你! (嘩! 我收到都冧死!) 然後, 我問哥哥, 咁你想畫D咩呀? 佢話想畫個生日蛋糕, 我上網搵咗幾個蛋糕樣俾佢睇, 佢自己照住畫, 油顏色! 我睇到佢好認真! 好欣賞佢!

之後, 輪到爸爸送哥哥去學口琴, 我就同細佬講, 我寫咗Happy Birthday, 哥哥就寫咗字同畫咗個生日蛋糕, 個封面由你設計啦! 細佬二話不說, 寫咗生日快樂同Happy Birthday係個封面, 然後, 我叫佢諗吓畫D咩? 佢話都係想畫蛋糕, 不過, 要媽媽幫佢起稿, 佢跟住畫同油顏色, 細佬都好認真, 我睇到佢好想畫好張咭, 等爸爸生日時送俾佢! 係 -- 愛呀!

其實, 孖寶兄弟呢個秘密行動, 爸爸一早知道, 不過, 佢當然唔出聲啦! 今朝早, 佢兩個一起身就走過黎我地間房, 我問細佬今日係咩日子呀? 佢仲記得係爸爸生日, 仲同爸爸講咗一聲: 爸爸, 生日快樂! 至於哥哥, 佢話今日係大日子呀! 我問佢係咩大日子呀? 佢竟然答我: 今日學校放早一個鍾呀! (err...... )

然後, 細佬好緊張咁問我......

細佬: 咁今日點同爸爸慶祝呀?
媽媽: 今晚買個生日蛋糕返黎同爸爸慶祝囉!
細佬: 好啦!
媽媽: 咁不如用你D利是錢買蛋糕, 好唔好?
細佬: 唔得!!!
媽媽: 咁哥哥你呢? 用你D利是錢買啦, 得唔得?
哥哥: NO!!!
媽媽: 細佬, 又係你提意同爸爸慶祝既? 咁一係我地3個夾份買蛋糕喇!
細佬: 咁...... 要唔過100蚊喎!
媽媽: 嘩! 咁又唔駛咁多錢, 你夾20蚊啦!
細佬: OK! 咁你係銀行拎返我D利是錢出黎先, 我俾100蚊你, 你找返錢俾我!
媽媽: 咁找幾多錢呀?
細佬: 80蚊囉! 你今晚記住俾返80蚊我呀!
媽媽: ...... (數學測驗又唔見你計得咁快?!)

老公, 你快D多謝我啦! 生咗兩個咁可愛的囝囝俾你, 同你慶祝生日! 你睇你幾幸福!

後記

媽媽放工後買咗個蛋糕返屋企......

媽媽: 細佬, 我買咗蛋糕喇! (好開心咁同佢講)
細佬: 咁買咗幾多錢呀?
媽媽: 120蚊
細佬: (即時變臉 --> 想喊) 你做乜買個咁貴既蛋糕呀? 我咪講咗20蚊囉!
媽媽: 吓? 120蚊好貴咩? 20蚊買唔到蛋糕架! 仔!
細佬: (已經聲淚俱下, 哭成淚人!) 你俾返120蚊我呀! (x N次)
媽媽: (好想笑, 但要忍住), 咁好啦! 我唔駛你夾錢喇! 個蛋糕由我出錢買俾爸爸!
細佬: 咁你都要俾返D錢我架!
媽媽: (為咗息事寧人, 媽媽係銀包度拎咗張100蚊紙出黎) 嗱! 俾返100蚊你喇!
細佬終於收咗聲, 但仍然好唔開心......

叫佢買個蛋糕俾爸爸, 好似攞佢命咁! 難為老爸老媽, 咁多年以黎, 係佢身上駛咗幾多錢... 唉! 不過, 諗深一層, 我地對自己父母, 咪又係咁...... 現眼報呀!

帶住孖寶去旅行@2018 (終極篇)

話說今年8月暑假去完日本之後, 就要一年後(即2019年暑假)先至有得再去旅行喇! 咁殘酷的事實, 媽媽又點會接受到呢?! 冇得去旅行簡直就係生無可戀!

於是, 媽媽係孖寶開學冇幾耐, 又密謀今年年尾去多次旅行! 其實今年1月, 3月, 8月都去咗旅行, 年尾再去多一次, 即係一年去四次日本, 咁過份?! 講出黎, 實俾我家大老爺鬧爆! 不過, 為咗孖寶的幸福(細佬仔好鍾意去旅行), 同埋令自己每日返工變得有意義, 媽媽甘願冒住生命危險, 向大老爺提出呢個請求! 而佢竟然....................冇反對呀! 真係謝主隆恩!

然後, 就係上網搵機票, 原來, 9月中先至開始搵聖誕的機票...... 乜你以為咁遲搵, 仲會有平機票咩?! err..... 啱啱先至開學, 研究咗個校曆表好耐, 再聽聽埋埋其他家長的解說, 先至知道今年有3次測考, 分別係今年11月, 下年4月, 同埋下年6月, 即是話, 今年12月聖誕節, 孖寶唔需要係溫習中渡過, 亦即是話, 真係可以考慮去旅行喎! 由於後知後覺, 而家買聖誕機票, 最平要$6000幾蚊一張(只係搵CX, 因為簾航價錢係一樣), 一家四口盛惠over $24000, 我家大老爺唔激得架! 搵咗一大輪, 參考埋"算死草"的意見(註: "算死草"係一個人), 原來係12月22號出發的話, 機票的價錢就會突然貴咗好很多, 所以要12月21號出發! 吓? 21號? 孖寶仲要返學校開聖誕聯歡會喎! 乜"算死草"你阿仔唔駛返學咩? 要架! 放學即刻去機場, 搭下午機, 晚上到! 嘩! 果然係名不虛傳, 機關算盡, 甘拜下風!

終於, 我地都因為錢跪低咗, 搵咗21號CX去程名古屋, 回程大阪的來回機票, 一家四口盛惠$17,656, 除開每人大約$4000幾, CX喎! 我好滿足了! 加上我地成日都話想試吓呢條路線(唔駛行回頭路), 所以今次係喜出望外既!

不過, 孖寶21號當日係12:40pm放學, 即是話, 爸媽要揸車去學校接佢地, 然後直接出機場, 孖寶要係車上換返便服, 今次真係好激動! 而另一個隠憂就係 -- 聖誕去日本會好凍! 吓??? 乜你地唔係諗住聖誕去日本, 就係想玩雪咩??? Sorry! 媽媽真係好怕凍! 孖寶亦唔見得好鍾意玩雪! 只係為咗影幾張相 -- 置身於白雪雪的世界, 雙手兜住D雪, 然後作狀扮吹雪花, 太大犠牲喇! 所以, 今個行程, 我地會一直南下, 同埋盡量避免去D會落雪的山區。

經過媽媽一星期的努力, 行程大致如下:

Day 1 - 香港 --> 名古屋機場

Day 2 - 名古屋Legoland

Day 3 - 名古屋Legoland

Day 4 - 愛知航空博物館 --> 豐田產業技術紀念館

Day 5 - 名古屋港水族館 --> 磁浮鐵道館

Day 6 - 鈴鹿賽道樂園 --> 奈良

Day 7 - 奈良 --> 白濱

Day 8 - 白濱 --> 和歌山 --> 關西機場 --> 香港

今年一共去4次日本:
                  沖繩6日
                  東京8日
                  九州8日
+ 名古屋&大阪8日
= 全年有30日都係日本! 太開心喇! 好滾動呀!