Infinity無奈

話說一向對小朋友冇乜好感的我, 就係大約五年前, 因為見到身邊好多朋友都生咗/有咗BB, 所以一向容易受人影響的我, 無啦啦話想生BB, 然後又無啦啦有咗, 仲要無啦啦有孖胎... 好唔容易接受咗呢個事實, 幻想有對龍鳯胎或者孖女都唔錯。無奈天意弄人, 懷孕16周照到係孖仔... 我又再一次情天霹靂! 從此, 我的人生就陷入咗無盡的無奈之中!

知道係孖仔之後, 我除咗失望, 已經冇乜期望! 正常+健康就OK! 由於兩個都係仔, 已經可以想像將來屋企會係點, 只有4個字形容 -- 永無寧日! 或者2個字 -- 戰場!

五年以來, 我就係一個永無寧日的戰場上, 日以繼夜, 夜以繼日, 然後又日以繼夜, 夜以繼日, 係無盡的無奈之中, 經歷最人生中最黑暗的歲月, 任由原本已經唔多的鬥志被消磨殆盡, 以僅餘的求生意志維持著自己每日的生命而非生活, 就係靠著呢個信念 -- 只要孖寶正常+健康就OK!

五年過去, 如果唔計佢地身高比同齡小朋友矮一個頭、每隔3個月左右病一次、或者無啦啦嘔的情況, 孖寶都算正常+健康。至於郁D爆喊、發癲、發脾氣、發忟憎、埋怨人、唔睬人、唔應人、唔理人、挑釁人、有仇必報、有交必嗌、有人唔順眼必打, etc. 媽媽都主觀地認為/估計佢地應該係正常, 因為佢地係男仔! (其實咁樣諗都係有D無奈!)

直至今個星期一參加咗佢地一位同學仔(男仔)的生日會(冇錯! 爸媽本身有社交障礙, 絶少帶孖寶去Social, 今次應該係五年以來的第一次), 媽媽開始懷疑佢地係唔係唔正常! 生日會上有好多小朋友, 先唔好講生日會的主角(因為佢阿媽係幼稚園老師, 你可以話, 咁佢阿媽緊係有方法教到個仔說話得體又大方啦!), 生日會上安排咗魔術師同小朋友玩遊戲, 小朋友鬥快舉手, 講真! 個個都咁快, 邊度睇到, 其實都係求其揀一個小朋友, 誰不知, 孖寶輪流發脾氣: 都唔公平! 唔玩喇! 我咁努力都唔叫我! 我好唔開心! 然後, 發出震耳欲聾的喊聲 (爸媽即時超級尷尬), 其他小朋友係無野既, 佢地仍然好投入咁玩遊戲, 請問我兩個仔發生咩事? -- 好無奈!

然後, 生日會的主角走過黎同我講, 第一次 -- 哥哥媽媽, 哥哥打我表妹呀! 第二次, 細佬媽媽, 細佬頭先好大力打我背脊! 我當然同佢講, 明白, 我今晚返去會教訓佢地! 你放心! 我想講, 唔係孖寶打人好曳, 而係人地俾你打(有冇即時還手我唔知), 人地識得搵你阿媽同你阿媽講你打佢! (但我家孖寶仍然停留係BB的階段, 嗚吖! 媽媽! 佢打我!) -- 好無奈 x 10!

另外, 就係佢兩個, 係生日會上, 追住其中一個(只係一個)男同學黎打, 無論講幾多次: 唔可以打人! 唔可以傷害人! 我只係覺得自己好似講緊"肺話", 同埋成個潑婦咁! (自從生咗孖寶之後, 我的Elegant淑女形像已經盪然無存!) -- 好無奈 x 100!

最後, 就係生日會的主角 -- 佢地的男同學, 要特別講明佢係男仔, 因為我一直以為男仔就係爆喊、發癲、發脾氣、發忟憎、埋怨人、唔睬人、唔應人、唔理人、挑釁人、有仇必報、有交必嗌、有人唔順眼必打, etc. (因為生物學家話雄性動物的睪丸素會令佢地好勇鬥狠! 呢個係自然界的定律!) 但係、原來、其實、現實、係有男仔都可以好聽話、斯文、有禮貌、說話有條理、大方得體、俾人挑釁都唔打人、輸咗唔發脾氣、辛苦唔發忟憎 -- 好無奈 x 1000!

其實, 孖媽自問都唔係一個無家教的人(自問有禮貌, 知書識禮), 我真係唔想孖寶行出黎, 會俾人覺得好似無家教咁(但而家似乎就係呢個情況囉!) 孖媽自問教孖寶已經教到嘔心瀝血, 又不時上網睇吓D咩育兒方法適合孖寶, 而且屢敗屢試, 自己的EQ亦有所提升(已經甚少鬧仔, 係俾仔鬧到喊多囉!), 自己搞唔掂已經搵社工幫手, 安排孖寶接受遊戲治療, 但係, 孖寶今次係群體中的表現, 正式宣佈咗孖媽呢五年的教育係好失敗! -- 好無奈 x Infinity!

後記@2018.07.18

孖寶又再一次失禮人前了! 7月14日晚, 家長們係屋苑會所搞咗一個謝師宴, 有家長提意小朋友表演多次畢業舞, 同埋獻唱兩首歌給老師, 細佬當日朝早已經話唔想去, 因為佢唔想跳舞同唱歌, 為咗氹佢地去, 我惟有話唔跳唔唱囉! (但我暗中帶定表演服裝)。當晚, 佢地堅持唔肯換衫, 老公帶佢地去遊戲室玩一陣, 希望佢地之後會肯換衫表演, 結果係遊戲室出黎之後, 兩個不斷發脾氣, 包括:

(1) 好熱, 點解冇人同我抺汗? (細佬)
(2) 我想繼續玩, 我要玩呀! xN次 (哥哥)
(3) 我唔想跳舞, 點解要迫我? (Both)

由於夠鐘表演, 加上孖寶兄弟仍然唔合作, 我叫負責的家長放棄佢兩個, 唔好再等! 跳完舞, 輪到唱歌 (孖寶之前都唱過俾我聽, 唔止一次, 我好肯定佢地識唱), 佢兩個繼續堅持唔唱! 唱完歌, 輪到小朋友送禮物俾老師, 排隊的時候, 孖寶兄弟又發生爭執, 結果俾人Skip咗, 好啦! 家陣唔駛你地送喇! 你地安樂啦!

果刻, 我同老公都忍無可忍! 老公拉咗佢兩個出去, 我拎埋D背囊, 跟住出去, 老公嬲到爆炸! 大鬧孖寶, 孖寶爆喊, 我都好想喊! 因為我又再一次教子無方! 好失敗! 好無奈!

第二日的早上, 有媽媽whatsapp我, 問返我昨晚係唔係早走, 我忍唔住喊, 喊到收唔到聲! 我覺得自己已經盡晒力去教, 教到嘔血, 但孖寶都係好唔聽話, 好唔合作, 我好失敗! 我唔知以後仲可以有咩方法教仔!

孖寶升小一 (準備篇)

話說孖寶唔需要經過無情的小一選校大抽奬的洗禮, 就已經係去年11月的自行選校階段, 獲心儀的小學取錄。

今年6月11日, 學校安排小一新生到學校參加分班試(呢間小學不設精英班, 分班試的目的只係初步評估學生的能力, 平均分配到每一班, 所以媽媽事前亦只係輕描淡寫, 同孖寶講: 「你地要去考分班試, 老師會派一份試卷俾你, 係你未見過, 識做就做啦! 唔識做就漏空佢! 唔緊要架!」我自問唔虎媽, 所以從來冇買過坊間的咩咩模擬試卷俾孖寶做, 老實講, 孖寶連試卷係咩黎, 都唔知, 亦未見過! 加上我唔想俾咁大壓力孖寶, 所以事前亦冇乜點講關於應試技巧, 就連文具同顏色筆都唔記得幫孖寶帶去, SORRY呀!

但係, 哥哥似乎好似意識到分班試係咩黎! 佢話: 我唔想同細佬分開! 我要同細佬一班呀! (呢D說話, 以前係細佬講既, 佢兩個而家好似調轉咗身份咁!) 我同老公惟有安慰佢: 唔緊要啦! 你地小息同午飯時間都可以約埋一齊玩架! 你地各自去識新朋友, 又可以介紹自己D朋友俾對方, 咁咪識到好多朋友仔囉!

不過, 哥哥仍然係好抗拒, 當日入到學校, 考生要去操場集合, 哥哥緊緊的拖住細佬隻手, 堅持唔入去, 唔考分班試! (兩個感情好到如斯地步, 媽媽都無話可說!) 幸好在場的老師都Nice同有耐性, 氹吓氹吓就氹咗佢兩個行入去操場。家長就要去禮堂聽講座。

再一次聽校長講學校的教學理念, 實在好感恩孖寶可以入到呢間學校! 講座於下午4點左右完結, 老師帶返每班小朋友黎禮堂同家長會合! 然然係第一班小朋友, 我見到佢, 佢走埋黎我度, 扁晒咀, 然後同我講: 我好唔開心呀! 繼而爆喊: 我跟本唔想黎考分班試! 好難呀! 我根本唔識做! 又俾咁少時間我做! 嗚嗚!

原來, 駐校社工頭先係課室已經留意到然然的情況, 佢問我: 小朋友係唔係有特殊學習需要? 我見佢頭先好多都唔識做! 我話: 佢應該唔係有學習障礙, 佢係情緒有D失控! 然後, 社工邀請然然去佢辦公室傾吓(老公陪佢), 我就帶細佬落返地下去廁所。等咗好耐, 都未見老公同然然, 我惟有帶細佬去辦理其他手續先, 包括: 訂飯、校巴報名、買教科書、買中文圖書、買校服、交回條, etc. 每一項都要排隊, 而且要排好耐, 過咗10分鐘, 老公帶埋然然落黎地下操場, 佢話社工安慰咗佢, 佢笑返喇! GOOD! 我話咁你有冇同社工講希望跟進, 佢話冇, 唔駛啦! 吓??? 咁難得機會! 你都唔叫社工跟進然然經常情緒失控, 又唔駛錢, 你做乜放棄呢個機會呀??? 天呀! 我好多時都唔明老公諗緊乜野!

由於真係好多人排隊, 排咗好耐, 就算我同老公分開排, 每人排一個項目, 都慳唔到幾多時間, 最後搞到5:30先至搞掂, 但同行的友人已經一早搞掂走咗! 返到屋企, 先至發現執錯咗校服俾我,即刻打電話去同校服商講, 佢話可以換返! (咁都好D)

只係一個下午, 我個荷包就蒸發咗超過$7,000, 包括: 訂飯($350)、校巴($720)、買教科書($1,300)、買中文圖書($300)、買校服($500)、書簿雜費($400)、影學生相($20), 唔好忘記, 以上每項開支都係要X2!

帶住孖寶去旅行@2018 (暑假篇)

2018年的上半年度差不多過去, 已經同孖寶去咗2次旅行, 一次係1月, 另一次係3月, 但係黎到6月, 感覺又好似好耐都冇去旅行咁...... 仲要等多2個月, 先至有得去旅行。

今年暑假, 我地會去宮崎(九州南部), 雖然已經去過九州, 但南部其實未去過, 亦唔知有咩玩, 最近開始plan行程, 發覺其實冇咩啱孖寶玩(唔係喎! 網上有好多九州親子景點介紹, 係唔係你唔識搵咋?) 唉! 冇錯! 係有好多親子景點, 但孖寶唔like牧場、水族館、動物園、天然岩石&自然景觀, 咁請問仲可以去玩咩呢? 由於孖寶呢排鍾意忍者(Ninja), 所以媽媽試吓上網搵吓九州有冇咩忍者主題樂園, 竟然係--有架! 不過, 係佐賀, 我地係宮崎, 真係冇雷公咁遠, 點去呀?! 其實另外搵到一間近熊本的忍者體驗課程, 但好似8月唔開班, 同埋都幾激吓, 孖寶咁細, 我驚佢地跌落河, 或者俾飛鏢飛到, 或者俾火燒到, 都係forget it!

由於老公想盡快訂晒D酒店先(驚暑假多人訂, 遲D訂可能會冇房或者貴咗! 加上經歷過上次去東京住咗2晚溫泉酒店, 感覺同佢地去, 根本享受唔到溫泉設施, 食飯耐D佢地又唔耐煩, 搞到我同老公有豐富晚餐都食到由背脊骨落, 所以今次決定唔住溫泉酒店, 慳返D錢黎住D級數高少少的酒店), 所以我地先決定咗條路線同每一個地方留幾多日, 然後先至搵吓每個地方有咩玩, 最後, 終於用咗大約一星期時間寫好個行程喇!

Day 1 - 香港 --> 宮崎 --> 納涼花火大會

Day 2 - 宮崎市自然動物園 --> 宮崎科學技術館 --> 宮崎

Day 3 - 宮崎 --> 櫻島火山 --> 汽車渡輪 --> 鹿兒島

Day 4 - 鹿兒島水族館 --> 人吉鐵道博物館 --> 熊本

Day 5 - 熊本 --> 阿蘇牧場 --> 阿蘇中岳火山口 --> 別府

Day 6 - 城島高原遊樂場 --> 海地獄 --> 別府

Day 7 - Harmony Land --> 別府塔 --> 別府

Day 8 - 別府 --> 宮崎 --> 香港

孖寶畢業了!

2018年6月9日係孖寶學校的畢業典禮, 即是話, 孖寶3年的幼稚園生活即將結束!

回想起孖寶就黎入讀幼稚園的那年夏天, 媽媽要訓練孖寶開/閂書包, 點樣係書包拎毛巾盒同餐具出黎, 點樣收返埋, 又試著校服模擬返學, etc. 到咗開學的時候, 孖寶每日返學都喊, 要老師抱抱安慰, 轉眼間, 佢地將會由幼稚園雞, 升級成為小學雞喇!

畢業典禮係浸會大學的大學會堂舉行, 由於我地有4張飛, 所以邀請埋嫲嫲同姑媽出席(姑媽話: 吓? 小學都未讀, 就去大學行畢業禮?! wakaka........)

孖寶一早就要返學校, 原來佢地要搭旅遊巴去大學會堂採排, 媽媽送孖寶返學校, 然後睇住佢地排住隊行出黎, 再跟住佢地落去地下搭旅遊巴, 又同佢地揮手, 當我望住係旅遊巴上面的然然, 突然間鼻子一酸, 好想喊! 唔知點解! (喂! 而家又唔係要送佢出國讀書, 只係搭旅遊巴去採排咋喎, 一陣下晝咪見囉! err........)

爸爸幫佢2個Gel咗頭, 好靚仔呀!

好唔捨得個仔呀!

下午2:20去到大學會堂, 老公去泊車, 嫲嫲約咗姑媽未到, 我入去坐先。過咗大約10分鐘, 老師安排畢業同學就座, 我見到細佬仔, 佢都見到我, 我不停同佢揮手(好似刧後重逢咁!) 大約下午 2:40, 典禮開始, 學校請咗好多嘉賓, 又副焗腸, 又校董, 又顧問校長, 又牧師, 個個都要出黎講野, 我心諗, 悶死D小朋友。搞咗差不多一個鐘, 終於都到咗"授憑"的環節 (前一晚先知道細佬會代表全班男同學係主禮嘉賓手中接過文憑 (好威水呀! 不過, 好似只係因為佢矮, 排第一個, 所以就順便搵埋佢做咁解囉!)

細佬個樣好認真

哥哥企最左邊第一個

又搞咗一大輪, 大約下午4點, 終於到咗所有家長都好期待的環節, 就係畢業生表演! 爸爸仲為咗今次呢個表演, 特登係上星期去旺角買咗一個價值$3,XXX的鏡頭 (個鏡頭仲大過部相機, 同埋只影一次, 雖然佢話會用多D, 但佢係呢方面的誠信, 已經跌到零! 我唔會再信佢! 今次呢個畢業禮好貴囉!)

畢業典禮約下午5點結束, 辛苦晒孖寶喇! 一朝早去採排, 中午啃麥當當, 然後坐足3個鐘, 再用5分鐘時間表演。

個正門裝修緊, 影相好唔靚

當日晚上, 嫲嫲請大家去食晚飯, 多謝嫲嫲!