舊年唔去影樓, 第一次試外攝, 係網上搵到個攝影師, 收費唔貴, 影出黎的效果都唔差! (有同事睇完我輯相之後, 叫我介紹個攝影師俾佢。)
由於舊年感覺良好(佢地影相時唔算扭計, 係細佬臨尾有少少發脾氣, 哥哥玩足全程, 笑容滿分!) 所以今年又搵返個攝影師再影過。由於舊年係去廸欣湖, 已經影咗坐草地、奔跑、玩平衡車的相, 媽媽今年想再進取D, 提意去海灘影踢水花、衝浪、玩沙的相, 爸爸聽到呢個提意, 當然係皺晒眉頭啦! 吓? 唔好喇掛! 好麻煩喎! 搞到成身都係沙! etc. (註: 爸爸本身有潔僻)。
我問咗攝影師, 佢有2個提意: (1)大埔海濱公園, 景點多, 唔太多蚊 (2) 汀九灣泳灘+麗都泳灘。我話我想影海灘, 但驚多蚊, 我知汀九果邊都幾多蚊+蠓。老公話不如問吓黃金海岸或者石澳, 攝影師影過黃金海岸, Send咗另一個客D相俾我睇, 唔掂喎... 個背景全部都係樓, 我想影natural feel喎! 攝影師話未影過石澳, 但可以試吓!
於是, 趁4月30日孖寶學校假期, 我同老公請假, 約埋攝影師去石澳影全家福。當日天氣開始熱, 但唔算好曬, 不過, 個天灰灰地, 都擔心影出黎D相, 效果不似預期!
當日10點係石澳海灘等, 雖然唔係假期, 但竟然都幾多人, 幸好近石灘果邊冇人, 我地去石灘附近影。孖寶好乖, 都算好合作, 係海邊行咗好多次, 又要奔跑, 又要拖手, 來來回回都有成10次, 之後, 細佬開始有D扭計, 因為佢地以為黎海灘玩, 唔知道原來冇得玩, 仲要重覆做同一個動作N次。攝影師都叫我地休息吓, 俾孖寶玩15分鐘先(攝影師仲幫我同老公影咗幾張雙人相)。細佬係玩沙期間, 又同哥哥發生爭執, 爸爸惟有不停安慰細佬。(老公之後同我講返, 因為3年前去影樓影相, 佢狠狠的鬧咗細佬一餐, 佢到而家都仲好後悔, 其實真係唔應該鬧佢, 影相對小朋友黎講, 真係好辛苦!)
之後影全家係海邊影踢水花相, 睇人地D相好靚, 但現實係...... 好狼狽, 因為孖寶好落力咁踢水花, 搞到我同老公濕晒(OMG! 我地冇帶衫褲黎換架!) 之後輪到孖寶兩個自己走去衝浪, 喂! 唔好走咁出呀! 返返入黎呀! 濕晒喇! (媽媽不斷大叫, 但是... 兩個已經變咗落湯雞咁!)
黎到沙灘, 緊係唔少得坐係沙灘啦! 攝影師叫我同爸爸, 豁出去啦! OK! 成條褲同大脾Lar都係沙囉! 之後幫孖寶換衫, 去石灘果度影咗幾幅相, 但細佬繼續發脾氣, 堅持帶黑超+唔笑!)
影完沙灘的部份已經12點(夠2個鐘), 我地之前同攝影師講咗想影埋附近d好有特色的屋仔, 攝影師完全冇趕住收工, 仲話好呀! 冇問題呀! 你睇睇兩個小朋友的情況, 仲可唔可以繼續影先啦! 由於細佬仍然係發緊脾氣, 媽媽即刻拎盒零食出黎俾佢地食, 補充體力, 然後跑去對面士多買橙汁俾佢地飲, 飲完橙汁, 細佬心情好返d, 孖寶話: 都想行埋過去睇屋仔。
原來好多人黎影婚紗相, 仲有好多遊客, 不過, 有特色的屋仔其實唔多, 影咗幾間, 老公提意行上山坡, 因為山坡另一邊有條藍色橋(影婚紗相指定景點), 好熱, 好曬, 好斜, 好多人, 好辛苦, 終於去到山坡的另一面... 好很多人呀! 算喇! 跟本影唔到! 走吧! 唔好意思, 要攝影師同我地行咗好多冤枉路。
下午1點左右, 收工喇! 辛苦晒攝影師! 仲有... 孖寶! 咁熱咁辛苦, 都自己行, 冇扭計(係! 細佬飲完橙汁就冇再扭計)
一個月後, 終於有相睇喇!
