帶住孖寶去旅行@2018 (準備篇)

由於12月初臨時加插2018年1月去沖繩, 加上半年前已買2018年3月的機票去東京, 所以黎緊呢兩次旅行都係冬季! 上網睇過, 沖繩未來一個星期大概有15-20度, 唔算凍, 但聽講海風好勁, 所以外套一定要防風, 尤其小朋友! 至於3月的東京, 羽絨舖職員話係融雪季節, 比落雪時更凍 (唔知真唔真? 定係想sell我買羽絨)。

不過, 冬天帶孖寶去外地, 都係做好保暖+防風穏陣D, 話晒佢地只得5歲, 抵抗力冇大人咁好, 萬一凍親, 旅程途中病咗, 就好大鑊!

所以, 爸媽趁千色店聖誕大減價, 就同孖寶去買禦寒衣物(爸爸一向唔認為香港凍到要著羽絨, 所以孖寶係冇羽絨der~)。今次的目標係防風(for 1月沖繩)同保暖(for 3月東京), 由於千色店冇賣兒童function褸(即防風+保暖的兩件套裝), 所以惟有分開買, 而且一次過應該唔可以同時兩件褸著上身!

今個星期初, 寒流襲港, 早上氣溫跌至9度, 剛剛買俾孖寶的羽絨大派用場......

睇見都覺得你好暖啊!

除咗為孖寶準備禦寒衣物, 媽媽都要幫自己準備一下去旅行著的衫, 又有籍口去Shopping! hoho......

孖寶兄弟語錄(16)

話說爸爸係一名「淘粉」, 屋企傢俬(藥物櫃、飯枱、以前的音響櫃)、日用品(抺布、掛勾、膠盒), 孖寶的玩具(滑板車、平衡車、遙控車)以及佢自己部份的衫褲鞋襪、背囊(最少有3個以上)都係「淘」返黎。

不過, 「淘」返黎的物品, 最後大部份都係幫香港的堆田區入貨! 佢成日話阿嫲購物狂, 其實, 佢自己都係一樣 --「淘」物狂, 只係五十步笑百步!

最近, 爸爸無啦啦話要「淘」架滑板車俾自己, 40幾歲男人老狗係條街玩滑板車 (如果我係街上見到, 我會諗個麻甩佬應該係宅男, 或者係弱智, anyway, 佢堅持要買, 仲話好型! 無言......)

今朝早, 媽媽俾哥哥睇吓爸爸新買的滑板車幅相......

哥哥: 啊! 原來咁既樣! 係唔係藥房買架?
媽媽: (心諗: 又黎九唔搭八喇!) er...... 點會係藥房買呢?
哥哥: um.......
媽媽: 爸爸最鍾意去邊度買野呀?
哥哥: 淘寶!
媽媽: 啱喇!
哥哥: 吓! 會爆炸個喎!

孖寶兄弟5歲喇!

孖寶兄弟5個月大, 媽媽好想佢兩個快D大!

孖寶兄弟5歲大喇, 媽媽好唔想佢兩個大得咁快啊!

孖寶兄弟5歲生日當日係星期日, 所以爸媽幾個月前, 已經計劃等佢地生日當日, 帶佢兩個去海洋公園(港人生日免費入園), 爸媽另外去旅行社買成人入場票 + 3張餐券, 盛惠$1010。

由於孖寶兄弟(其實只有細佬仔)仲記住舊年生日會, 表哥搶佢地個氣球, 佢地好唔想邀請表哥黎生日會, 加上阿嫲去外遊, 公公婆婆星期六要開舖, 爸媽決定 -- 今年唔搞生日會喇! 不過, 仍然會有生日禮物&氣球, 放心!

孖寶生日前一日, 爸媽&姑媽姑丈係Ruby Tuesday同孖寶食生日Lunch, 姑媽仲預先叫餐廳準備咗一個朱古力雪糕生日蛋糕杯(姑媽自備出奇蛋2隻+生日牌+5字生日蠟蠋, 姑媽好錫孖寶啊!)

孖寶生日正日, 爸爸送咗兩盒散裝Lego俾孖寶(係孖寶request的生日禮物, 爸爸7月時已經買定), 媽媽就送咗兩張自製生日咭俾孖寶(係細佬仔要求, 因為佢上次見到媽媽生日, 爸爸送花俾媽媽, 仲有張生日咭, 佢話到佢生日時, 都想要生日咭!)

早上9:20出發去海洋公園, 未夠10點已經到咗, 泊好車(星期日交通好暢順!)。不過, 搭lift上到平台正門, 嘩! 好很多人呀! D人唔係排隊買飛, 係排隊入場呀! 我去排隊, 用孖寶的身份証係售票處幫孖寶換生日入場券, 爸爸話唔好同D人癲, 等D人入場先啦! 我地係門口影吓相先!

入咗場, 即刻飛奔去威威天地(兒童王國), 首先玩上次唔夠高玩的兒童版跳樓機, 由於佢兩個之前未玩過, 而爸爸又玩唔到機動遊戲 (係! 佢上次玩完越礦飛車 -- 呆咗!), 所以, 要媽媽陪玩(想當年, 媽媽同舅父去親D樂園, 都即時衝去玩機動遊戲, 唔刺激唔玩der~), 不過, 可能年紀大咗, 媽媽竟然覺得部跳樓機都幾刺激, 哥哥玩緊時同我講, 有少少驚, 至於細佬, 媽媽見佢面無表情, 問佢驚唔驚, 佢又話唔驚!

之後去玩摩天輪, 甲蟲轉轉(唔知個遊戲叫乜!), 跳彈床, 旋轉木馬, 小火車, 細佬玩完摩天輪, 嚷著要去玩多次跳樓機, 仲指定要媽媽陪玩, 哥哥去玩城堡, 返黎見到細佬玩緊跳樓機, 又話要玩多次, 我見部機咁刺激, 當然要俾爸爸試吓啦! 今次就由爸爸陪孖寶玩, 媽媽幫佢地拍video啦! Yeah!

玩完一大輪都只係11:30, 順路去睇熊貓, 再去搭纜車。第一次見到兩隻熊貓原來係...識郁架! 真架! (去咗幾次從來冇見過佢地郁!), 兩隻熊貓好忙咁食咁竹葉。之後去排隊搭纜車, 比我想像中少人, 唔算排咗好耐(大概20分鐘), 同埋條隊係keep住郁, 好快就輪到我地一家四口上纜車喇!  其實孖寶已經第N次搭纜車(之前係日本都搭過), 所以冇乜奮興。

12:45pm, 落咗纜車, 媽媽提意係纜車站隔離的嵐灣茶座食飯, 因為買咗3張餐券, 呢間餐廳用得, 同埋天氣唔熱(都幾大風), 坐戶外, 望吓海景, 都OK! 餐券每張$100, 但唔代表你可以揀價值$100的食品, 你只可以揀4個指定套餐, 2款意粉, 2款咖喱, 由於之前上網search過, D人話係酒店價錢, 大家樂的質素, 同埋個咖喱好辣(堅係印度阿差食果款), 所以叫咗2款意粉, 老公叫咗個咖喱魚飯(個餐牌仲寫住係採用挪威雪魚柳, 嘩!) 每個餐跟一杯12oz. 汽水。

一路吹住海風等D野食黎, 都幾凍! 用餐券好似等得耐過隔離枱(應該係對用餐券的懲罰黎!) 2個意粉都算正常, 孖寶好like個白汁意粉, 媽媽食個蕃茄意粉比較酸, 同埋冇餸, 但勝在個意粉都算多汁, 都易入口! 爸爸個咖喱魚就...... 中伏了! 侍應放低咗碟咖喱後, 我同老公都研究咗一陣, 首先, 一舊舊深啡色炸紙皮的物體, 前身真係魚黎? 然後, D咖喱汁橙色der~ 原來阿差咖喱係橙色? 我地真係井底之蛙! 見到碟野咁樣, 我已經唔想再望住佢, 費是污染自己眼球, 老公仲要食咗佢, 希望老公今次可以來回地獄然後折返人間啦!

最後, 老公竟然食咗一大半(實在要俾掌聲佢!), 不過, 老公一路食, 一路鬧, $100食大家樂質素唔緊要呀! 而家係連大家樂都不如!  (老公, 我明白你der~ 辛苦你喇!)

食飽飯, 一家四口又再上路喇! 由於山頂的機動遊戲全部都唔啱孖寶玩, 我地主要係去參觀企鵝館同隔離個"唔知咩"館、鯊魚館、水母館, 由於山勢問題, 上斜落斜, 莫講孖寶行得好辛苦, 大人都覺得好攰!

 兩隻小企鵝

細佬, 條鯊魚衝埋你度呀!

最後, 一家四口搭海洋快線落山, 超多大劣人, 仲要打尖, 爭位, 用下體貼住你pat pat黎行, 妖!  4:45pm, 終於返到停車場攞車喇! 孖寶上車冇幾耐都瞓咗, 佢地下晝都冇扭眼瞓, 算係好叻架喇! (哥哥食完飯有D飯氣攻心, 好想瞓, 要爸爸抱咗一陣, 但15分鐘後已經醒返, 佢話叉完電喇! 有返力喇! 爸媽都覺得哥哥好Good Boy! 至於細佬, 佢戰鬥力一向好強, 只係臨尾行出海洋快線時發脾四! (應該係發眼瞓癲!)

返到屋企, 稍事休息, 沖涼, 媽媽落樓下酒樓搵位(爸爸鍾意食中式), 一家四口食個豐富的中式晚飯, 慶祝孖寶生日! 五年前, 孖寶出世, 五年後, 爸媽終於有餐安樂茶飯食吓喇!

帶住孖寶去旅行@2018 (序幕篇)

話說今年7月中, 老公已經買定明年3月尾復活節檔期去東京的機票......

又話說, 今年8月尾同孖寶去完名古屋, 經過慘烈的一役之後, 我同老公決定唔好去咁多次旅行, 一年去兩次算喇......

又又話說, 孖寶今年9月升K.3了, 要開始搵小學, 9月係教育局第一階段的學校自行收生, 然後就係明年2月第二階段的大抽奬, 6月初有結果, 到時可能要周圍去叩門, 所以今年10月冇請假去旅行, 乖乖的留係香港......

又又又話說, 唔去旅行幾個月就身痕的媽媽(仲有成日話自己每個月都要去旅行的細佬仔), 今年8月尾去完旅行之後, 只係過咗3個月, 就已經心郁郁又想去, 真係等唔到明年3月, 太耐喇......

又又又又話說, 今年11月27日, 第一階段自行收生有結果, 孖寶竟然獲心儀小學取錄呀! 11月29日去學校註冊, 校務處人員話要等明年6月左右, 會收到學校寄來的資料, 即是話, 由11月29日至到明年6月, 已經唔駛再煩孖寶搵小學的事! 太好喇! 即是話, 可以離開香港都冇問題啦......

於是, 媽媽係12月1日那那聲上網搵機票, 希望12月中或1月頭可以加插一次旅行。由於係即興, 要搵D唔駛plan行程的地方, 所以只有一個選擇 -- 沖繩! 吓? 又去? 第三次喇喎! 冇錯! 只要離開香港, 只要係日本, 媽媽就OK架喇! hoho......

竟然, 俾媽媽搵到Hong Kong Airlines 12月中或1月頭都有平價機票, 每人$1400左右(Sorry, 咁既價錢, 我已經覺得好平!), 於是同老公相量, 原來老公12月中請唔到假, 要1月頭, 我衝入去我老闆間房, 問佢1月頭可唔可以放4日, 佢依依鵝鵝咗幾分鐘, 係咁數佢自己1月頭有幾忙, 但你幾忙關我咩事啫? 我只係問, 我請4日假得唔得? 最後, 老闆揤牙膏咁揤咗三個字 -- 都得既! (我請自己Annual Leave好似切咗佢忽肉咁!)

不過, 原來上網買機票好似買股票咁, D價位每隔幾分鐘就update一次, 仲要越睇越貴, 好辛苦咁輸入晒一家四口的資料, 準備確認&俾錢, 一click個confirm制, 個畫面彈咗個dialogue box出黎, 機票價錢已更新, 然後彈返去最初果版, 乜都冇晒! 咁即係點呀??? 果一刻, 我好想爆粗&打爆個芒!

由於試咗幾間網上旅行社都係咁, D價位分分鐘都唔同, 我放棄喇! 死死地氣去返Hong Kong Airlines個網頁買, 好在仲係$1400左右, 幾經辛苦, 終於買到4張香港去沖繩的來回機票, 盛惠$5890, 2018年1月1日早機去, 1月6日早機返, 都叫做有4個Full Days玩, 夠架喇! 我好易滿足! 我係諗住去hea架咋!

買完機票, 就輪到訂酒店, 原來1月1日的酒店好很貴! (Sorry, 真係有必要加多個助語詞, 因為一晚的價錢等於平日的3倍價錢), 平咗機票, 貴咗酒店! 算啦! 平咗機票喎! 慳咗D錢要黎資助酒店啦! (老公都有微言, 訂機票同酒店好辛苦, 未試過咁辛苦, 太Ad Hoc喇! 但我想講, 上網買機票好似係我喎! 輸入晒D資料然後彈返去最開頭的版面又係我喎! 你係唔係"鄧"我辛苦呀?!) 買完機票當晚, 返到屋企全晚不停咁搵酒店, 好靚但好貴, 好平但殘到接受唔到, 最後, 決定豁出去啦! 今次去旅行, 係要慶祝孖寶搵到好學校, 未來呢6年都唔駛煩! 值得既!

訂咗機票+酒店+租車, 媽媽星期一開始plan行程, 由於已經同孖寶去過2次, 媽媽已經熟晒D地方, 主要都係去返上兩次miss咗的景點, 同埋上網搵吓有冇其他親子景點推介。最後, 用咗4日時間, 終於都搞掂咗個行程表(每次plan行程就好似去緊旅行咁樣, 雖然好煩, 但又好enjoy! 老公應該會串我, 咁下次唔駛去旅行, 你plan吓咪當去咗囉!)

太好喇! 本來諗住要等到明年3月尾先至有得去旅行, 而家, 仲有唔夠1個月就可以去旅行喇! 好興奮呀!

給孖寶兄弟的信 (5歲)

然然、逸逸:

你們今年5歲了!

你們怎麼長大得這麼快? 媽媽開始有點捨不得呢!

每次看到你們嬰兒時的照片, 真的很可愛! 能夠有你們這對孖寶, 實在是神賜給我一生中最寶貴的禮物! 想起由懷孕, 到你們平安出生, 健康成長, 每一個階段, 都有神的恩典保守!

你們很特別, 你們與眾不同, 你們知道嗎? 神特別為你們安排, 讓你們可以一起出生, 一起成長, 一起面對人生的每一個階段, 這份經歷實在很難得! 要好好珍惜你倆的手足之情啊!

然然, 在過去的一年裏, 你很努力地成長! 過去, 你經常無故哭鬧, 哭得歇斯底里, 甚至弄傷自己, 媽媽看見也很心痛。現在, 你會嘗試控制自己的情緒, 雖然你仍然會哭, 也很愛哭, 但你會懂得說出自己的內心感受, 讓媽媽明白然然不是在發脾氣, 然然是因為不開心, 所以哭!

然然, 媽媽也很欣賞你愛護弟弟, 最深刻印像的一次, 就是暑假的時候, 我們去名古屋, 去游水, 在更衣室不見了弟弟, 你跟媽媽飛奔去找弟弟, 找著了, 你還幫弟弟脫鞋子, 又主動幫他把鞋子放好, 然然, 你很有哥哥的風範, 逸逸能夠有你這個哥哥, 是他的福氣!

逸逸, 在過去一年裏, 你在不知不覺間成長了很多! 媽媽和你說話的時候, 已經不能當你是小孩子啊! 因為你真的很懂事, 思想很成熟, 似乎甚麼都不能騙得過你! 和你說話真的很開心, 有時更加是很具挑戰性, 因為很多時候, 你所說的話都是媽媽意想不到的, 媽媽實在既開心又驚訝, 逸逸, 為何你年紀小小, 懂的卻那麼多?

逸逸, 媽媽也很欣賞你做事認真, 有責任心! 我想, 這是天父賜給你的性格吧! 擁有這種性格特質, 對你將來讀書, 甚至出來社會做事, 是個很大的優勢, 你要好好利用啊!

最後, 然然, 媽媽希望你能夠繼續保持你活潑開朗的性格, 這是天父賜給你的禮物, 亦希望你能夠用這份樂觀的性格感染弟弟。逸逸, 媽媽希望你能夠把你的聰明才智用在正確的事上, 並且對自己多一點信心, 放鬆一點, 笑多一點, 愛哥哥多一點。

生日快樂!

媽媽
2017年