帶住孖寶去旅行@2017 (預備篇)

話說自從2015年10月第一次帶孖寶去旅行之後, 孖寶爸變得好積極, 今次未去旅行已經買定下次的機票, 經過2015年10月去沖繩, 2016年6月再去沖繩, 以及2016年10月去大阪, 孖寶爸認為每年去兩次旅行最適合, 孖寶媽就覺得暑假一定要去, 因為孖寶放1.5個月暑假, 要全程留係屋企實在太悶喇! 至於另一次旅行的時間 (其實都要配合學校假期, 即只有聖誕節, 農曆新年同復活節), 孖寶爸覺得聖誕同新年去旅行都比較凍, 所以都係復活節去會好D, 所以就決定今年4月同8月去旅行喇!

由於一家四口去旅行, 開支都幾大, 唔好講酒店, 起碼機票就要俾貴一倍, 同埋焗住要旺季去, 唔可以吼淡季機票, 所以孖寶爸好積極, 提早半年已經上網搵定機票。

話說孖寶爸去年9月尾10月頭已經諗定今年4月復活節去邊, 就係去九州, 因為機程少於4小時的地方, 選擇唔多:

1.  沖繩好近, 係親子旅行聖地, 但已經去過2次
2.  鹿兒島都比較近, 機程唔耐, 但唔知有咩啱小朋友玩, 好似係去睇風景多
3.  大阪舊年10月去
4.  名古屋機程同大阪差不多, 都係極限, 但唔知有咩啱小朋友玩
5.  東京, 渡蜜月時去過, 同去旺角冇分別, 同埋機程要4.5小時, 孖寶會發癲

最後惟有選擇九州, 香港去福岡機程約3.5小時, 加上北九州唔算咩大城市, 媽媽鍾意自駕遊鄉下地方, 啱晒! 於是孖寶爸就係10月頭買咗CX去福岡的機票, 2017年4月9日至15日 (7日), 盛惠$12,xxx!

由於已經決定8月暑假會再帶孖寶去旅行, 孖寶爸今年1月又開始上網搵機票, 由於孖寶媽真係好唔想去東京, 加上知道名古屋Legoland會係今年4月1日開幕 (其實都唔知名古屋仲有咩啱小朋友玩), 於是就決定買CX去名古屋機票, 一家四口又係盛惠$12,xxx, 2017年8月24日至31日 (7日)!

能夠一年去兩次旅行, 最開心果個應該就係 -- 孖寶媽! hoho!!!

去咗沖繩一樣的婚禮

2017年第一個重要節目就係去參加親戚係愉景灣舉行的婚禮。

其實同呢個親戚唔算太熟, 但由於奶奶的關係, 加上知道呢個親戚的經歷, 難得佢搵到真正的幸福, 所以雖然山長水遠, 我地都要一家大細去撐佢場!

婚禮12:00舉行, 11:15有Shuttle Bus係欣澳站接載賓客, 我地10:20開車, 接埋姑媽一齊入去, 入到去欣澳有個好大的露天停車場, 泊好車, 11:10啱啱好, 孖寶見到架Shuttle Bus同佢地上次係學校搭果架一樣, 好興奮咁同我地講, 上次架旅遊巴係點點點, 佢地去程同回程都一齊坐, 仲輪流坐窗口位!

大概10分鐘車程去到愉景灣酒店, 新郎已經係車站度迎接大家, 落咗車第一時間帶孖寶去廁所先, 由酒店行去隔離的教堂, 短短的路程, 孖寶行咗好耐, 因為周圍都好新奇, 再加上我地預到警隊前一哥 -- 鄧X成, 因為新郎係總警司, 係新郎介紹下, 孖寶同前一哥Salute! hoho...

入到教堂, 嘩! 好靚呀! 好似去咗沖繩咁呀! 教堂兩邊同最前面係落地大玻璃, 前面就係海邊喇! 加上堂日天氣好好, 藍天白雲, 陽光普照, 中午氣溫24C, 行禮期間, 哥哥好大聲咁講野, 差D要抱走佢, 行完禮, 趁D賓客散去, 我地就把握機會, 係咁靚的教堂入面影吓相先!

真係好靚, 好想同老公影番張靚相, 

可惜周圍都係人, 同埋...要拖住個小朋友!

跟住就係等影相, 然後等食野, 好在酒店按排得唔錯, 有cocktail同chocolate, 同埋可以入去會場坐低先, 等咗好耐, 新人進場, 睇片, 致辭, 1:30終於有野食喇! 係Buffet黎, 鍾意食乜就拎乜, 我同老公都好like, 魚生有三款, 都唔錯, 有凍蝦, 蟹腳, 我同老公只係食呢幾樣同甜品都已經飽晒! 孖寶直頭係練仙, 可以唔食, 只係食雪糕, 是但啦!

3:00走人, 原來架Shuttle Bus啱啱開咗, 要等半粒鐘...吓? 唔係呀化? 孖寶開始眼瞓, 再唔走會爆炸喎! 老公第一次好豪咁話, 搭的士啦! (講咗我的心聲啊!) 好在搭的士咋, 搭的士出去, 再揸車返屋企, 返到去已經4點 (如果等Shuttle, 睇怕5點先至返到, 同埋已經俾計時炸彈炸死咗!

後記: 愉景灣呀! Brad Brad就係俾人送咗黎愉景灣, 俾人領養咗架! 應該要去探吓Brad Brad... (Brad Brad, 掛住你啊!)

新銀包

除咗手袋之外, 我身上最貴的, 應該係銀包！（鑽石我都鍾意, 不過冇人買俾我）

我買銀包都有Ｄ要求 -- 就係要粉紅色／紅色，同埋要Fancy!

對上一次買銀包係2008年2月, Anna Sui銀包, 盛惠$1350, 雖然個銀包已經用咗差不多9年, 但由於出街好少要我俾錢（通常係老公俾錢／簽咭）, 個銀包好少開黎開去,  所以用咗9年都唔係太殘, 不過, 人生有幾多個9年? 我唔想一世人只係用過幾個銀包...

用咗9年都仲好新淨, 個盒保存得超好!

其實2016年生日都已經好想買個銀包送俾自己, 但因為睇唔啱, 同埋想去日本買, 應該會平D（結果係買唔到既! 因為要湊住孖寶, 根本冇可能有時間去睇銀包!）拖吓拖吓, 拖到2017年, 先至的起心肝去睇銀包, 由於首要條件係要夠Fancy, 所以都冇乜咩牌子可以選擇, 一係就Anna Sui (唔知D分店去晒邊, 屋企同公司附近都冇), 結果去咗Samantha Thavasa,  俾我見到個粉紅色同好閃的長方型銀包（搵唔返正方形，似乎所有女人銀包都規定係要長方形）, 個Sales話係2016聖誕特別版, 問咗老公意見, 佢都覺得呢個靚, 就決定買啦! 盛惠$1910!

睇中呢2個, 最後決定買左邊果個, 因為閃D!