帶住孖寶去旅行@2016 (感想篇)

爸爸的感想:

辛苦係事實, 同埋一定唔同我地自己兩個自己去旅行咁簡單, 而家諗返, 真係唔應該覺得同佢地去旅行係掃興, 能夠同佢地一齊去旅行應該要感恩, 雖然佢地咁辛苦, 但問極佢地都話要去, 因為孖寶太鍾意我地, 所以無論爸爸媽媽去邊, 佢地都話要跟埋去, 佢地未必真係鍾意去旅行, 而係佢地真心鍾意我地, 想同我地一齊!

媽媽的感想:

寫第一、第二日的遊記時, 諗返真係唔知為乜要去, 去得咁辛苦, 咁掃興, 但寫晒六日遊記之後, 再由頭睇返一次, 其實佢地真係幾辛苦, 係無得選擇的情況下, 跟住爸爸媽媽周圍騰, 舟車勞頓, 食無定時, 去D景點又未必係自己想去的, 晚晚搞到成11點先至有得瞓覺, 真係太辛苦佢地喇! 畢竟佢地只係兩個未夠4歲的小朋友!  希望半年後, 佢地大個D, 行程安排得好D, 最緊要係唔好再搭簾航, 咁個旅程就可以舒服D啦!

關西親子之旅2016 - Day 6

2016.10.22 (星期六)

今日我生日呀! 但好似冇人記得囉!

今朝起身, 打開窗簾, 天陰陰, 凍凍地, 同之前幾日的天氣相差好遠喎! 仲以為和歌山係南部, 會暖D添!

老公7:30起咗身, 落去浸溫泉, 7:50老公返上黎, 我都那那林落去浸吓溫泉先, 公眾溫泉有室外溫泉, 但天氣凍, 行出去都幾凍吓, 同埋, D水唔夠熱囉! 所以浸咗一陣都係返番室內。

Book咗8:30食早餐, 所以我落咗去浸溫泉, 就由老公叫醒孖寶, 刷牙, 換衫, 準時落去食早餐喇!

今朝早餐唔係坐地下, 有枱坐, 酒店又係安排佢地每人一碗白飯, 今日的早餐係半自助形式, 有待應奉上白飯, 漬物同麵鼓湯, 其他餸就要自己出去拎, 早餐的選擇都算多, 有野菜沙律, 天婦羅, 日式蛋, 腸仔同燒魚, 爸爸幫佢地每人拎咗一包紫菜, 要黎送白飯 (養佢兩個可以慳好多米飯)! hoho...

哥哥最愛食白飯

食早餐期間, 媽媽話: 今日我生日喎! 爸爸好似如夢初醒咁, 佢兩個就半信半疑咁, 你三父子咩態度呀?! 爸爸叫孖寶唱生日歌俾媽媽聽, 細佬即時唱咗個廣東話國語版生日歌, 爸爸就做指揮 (好似成件事都同佢無關咁!) 哥哥就直頭唱都唔肯唱! 唉! 生仔啦... 吓...

食完早餐, 返上房執埋行李, 今日返香港喇! Check email, 原來我地班機delay咗, 由15:15變成16:20, OK! 咁又多D時間最後'沖廁'(Shopping)喇!

幫手扶住D行李, Good boys!

10點Check-out, 原來杯烏龍茶真係要計錢既, 同埋要收多100幾円唔知咩費, 合共要補多300幾円(老公之前book酒店已係用信用咭俾咗錢)。老公去停車場揸返部車過黎, 搬埋D行李上車, 落緊毛毛雨喎! 即係都去唔到和歌山城啦! 咁直接去西松屋啦!

孖寶一上到車又瞓咗, 去到西松屋, 媽媽落車入去睇衫褲鞋襪, 爸爸就留係車度睇住孖寶, 辛苦晒! 可能媽媽買得太耐, 搞到孖寶都醒埋, 一齊入埋黎搗亂, 最後, 買咗2件長袖衞衣 (西松屋D衫同旺角花園街果D冇乜分別, 所以媽媽都冇乜興趣買俾孖寶), 2個珊瑚絨睡袋(係香港搵咗好耐都搵唔到, 一心想黎日本買), 3pack襪, 一對BB女手套(日本製), 同埋2盒Tomica餅乾(爸爸推介)。

去完西松屋, 爸爸話仲有D時間, 不如去附近AEON MALL (爸爸每日都要行一次), 呢個商場又係有超靚手推車, 又係有反斗城 (爸爸幫細佬吸鼻時, 應承咗佢買架消防車俾佢)。

呢度都有超靚手推車

我地去咗反斗城, 爸爸叫細佬揀車, 細佬唔要消防車,揀咗薯條車, 爸爸話哥哥唔乖, 唔買車俾佢, 哥哥一聽到"唔買車"呢三個字, 就即刻發顛, 爆喊, 加瞓埋落地下, 我同爸爸訓練有素, 知道唔可以輸, 今次讓步, 以後就會俾佢食住, 知道只要發顛lur地, 就可以買玩具, 哥哥足足胡鬧咗大半個鐘, 下晝1點喇! 2點半要去到機場還車, 夠鐘要走喇!

老公揀多咗幾架Tomica車仔(佢話買俾自己), 我同細佬去Cashier俾錢, 爸爸繼續同哥哥係店內搏鬥, 爸爸已經車咗哥哥幾巴! 佢仍然lur要買車車, 爆喊, 唔肯走, 仲大叫媽媽(其實媽媽都唔想理佢)。媽媽入到去, 佢仍然係大喊大叫, 唔想走, 我話: 咁媽媽走先! 佢又唔俾媽媽走! 又話要一齊走! OK! 咁而家走啦! 佢又話要坐返架車車! OK! 咁你坐! 佢又話唔得! 要抺眼淚先! 媽媽終於忍無可忍, 連人帶車推佢返出店外, 然後的起佢, 想車巴佢但俾爸爸阻止!
搞咗一大輪, 下晝1:20, 真係要開車出機場喇! 仲係落緊毛毛雨, 無停過!

上到車, 哥哥喊到眼瞓瞓著咗! 開車無幾耐, 轉咗個彎, 吓?! 塞車? 唔係咁大鑊呀嘛?! 我地趕時間喎! 和歌山去機場最快都要50分鐘! 老公用google map發現好似有條小路 (媽媽唔想抄小路), 結果, 入咗條小路一陣, 已經發現係死路一條, 又要扭一大輪先至調到頭, 出返大路, 之前D車已經走晒, 又要再排過隊!

真係好塞車, 行車好緩慢, 以為塞燈位, 原來過咗燈位都係塞, 都唔知塞乜, 後尾(塞咗30分鐘後)見到有架壞車係路邊, 唔係呀化?! 你好壞唔壞, 壞係呢度?! 條! 過咗架壞車, 行車好似暢順咗D, 但車速都長期維持50-60km(公路黎架喎!), 仲要去油站入油(4000円有找, D油費好平啊!) 下晝2:40去到機場, 好在都唔算遲好多, 不過, 又係未食飯既(呢個旅程成日都食無定時)! 好在之前係西松屋買咗2盒餅俾佢地, 另外, 仲有之前食剩咗少少包同一隻蕉, 係車度食咗, 都頂得吓肚餓!

3點去到機場Counter Check-in, 班機又delay咗, 最新起飛時間係17:10, 地勤姐姐話好大機會再遲D, 叫我預6點啦!

告示牌

算啦! 可以多D時間食野同埋去免稅店買埋D手信俾同事同學校老師, 係離境大堂落返一層去搵野食, 搵到間食烏冬, good! 我叫咗個咖喱烏冬俾自己, 老公叫咗個烏冬加滑蛋牛飯, 另外加多兩件腐皮壽司, 等咗好耐先至有得食, 食完野, 我去買手信, 爸爸睇住孖寶, 原來所謂的免稅店都係要俾稅, 好在只係買咗756円啫!

個咖喱烏冬幾好味!

睇吓隻錶, 原來已經4:50, 唔知點解D時間咁快過, 那那林過海關, 過關之後, 見到有免稅店, 今次真係免稅喇! 老公睇住孖寶, 我飛奔入去, 隨手納起3份1000円手信, 排隊期間, 再拎多份手信送俾姑媽, 俾錢期間, 老公同孖寶又走埋入黎, 老公納多1份1000円手信(俾我地自己食既), 俾錢, 走人! 一家四口狂奔去搭無人駕駛去閘口, 去到閘口, 坐晒人, 咁即係未入得啦! 好在啫! 又唔知delay到幾時, 預佢6點啦! 於是帶孖寶去playground玩, 我同老公輪流去免稅店睇野, 有Shiseido呀! 不過, 唔係我用開的True Liquid, 而係咩Dramatic Film, 3500円 (~HKD245, 香港一支粉底要HKD320, 又真係平好多喎, 有我個色OC20喎, 心郁郁, 買唔買好呢?!) 最後都係決定唔買, 因為其實啱啱都係香港買咗支粉底喇! 留返半年後去福岡先買啦! hoho...

等到17:50, 終於入閘喇! 我地仲要係最後一個入閘, YEAH! 最後一個上機的好處係唔駛排隊, 但壞處就係, 頭頂個行李箱俾人霸晒D位, 喂! 你地都唔係坐呢行, 做乜霸埋我個行李位呀?! 我發覺坐簾航特別多手提行李!

個閘口得返我地一家咋!

哥哥又霸住個窗口位黎坐, 好在細佬都冇乜所謂, 兩個係咁問飛機起飛未? 幾時起飛? 咁耐既? 好似等咗30分鐘, 終於起飛喇! 佢兩個次次坐飛機都瞓著咗, 今次應該係佢地第一次感受咩叫做加速, 起飛!

由於3:30先至食午餐, 所以起飛頭果兩個鐘, 都唔覺肚餓, 到咗夜晚9點, 可能心理作用啦! 突然感覺肚餓, 係咁拎D零食, 薯片, 餅乾, energy bar, 栗子, 但只係頂到一陣! 孖寶瞓唔著, 開始扭, 咁耐既? 幾時到呀? 我話: 咁你地自己問吓空姐或者哥哥喇! 最後哥哥好勇感咁走出黎, 問咗個空中哥哥, 哥哥話要10點先至到香港呀! 吓?! 仲有成個鐘?! OMG! 最後終於10點落機, 過關唔可以用E道, 要排隊, 好在香港人做野D效率好高, 好快就過咗關, 出去拎行李, 等咗好耐都未有行李出, 媽媽有D頂唔順, 開始黑面同想發顛, 爸爸好驚! 即刻叫媽媽推孖寶出去搵野食先, 爸爸留係度等行李。

出到去, 嘩! 多人過旺角! 所有食肆都係人, 想去M記買個餐, 拎走食都要排餐死既! 我推住孖寶, 更加冇可能! 惟有call老公, 我行去T2搵野食, T1淪陷咗喇!

由於已經夜晚10:15, 哥哥好眼瞓, 開始唔耐煩, 細佬好少少, 都仲頂得順。媽媽提醒佢地: 唔好瞓著呀! 唔係就會碌咗落車(行李車)架喇! 細佬呀! 你幫我睇住哥哥, 唔好俾佢碌落車呀! 哥哥聽到我講"碌落車"呢三個字, 唔知發咩神經, 向細佬大吐口水, 我即時車巴哥哥! 抱起細佬安慰, 爸爸都係呢個時候趕到! 佢見到哥哥爆喊, 又抱起哥哥, 於是我地一人抱住一個, 仲要推住架行李車, 好在有好心人幫手, 遞紙巾俾哥哥抹眼淚。

上到T2, 仲有食肆未閂門, 但已經打烊, 唔再落order, 我心死喇! 返屋企啦! 唔食喇! 今日係我生日, 竟然落得如此下場, 坐簾航, 係饑荒中度過, 真係好難忘啊! 多謝晒你呀! 老公!

老公可能聽到我的心聲, 所以鍥而不捨, 繼續搵野食, 終於搵到一間收11點, 而家(10:30)仲可以落order的, 亦係佢最唔鍾意, 認為超級難食的果間, 是但啦! 哥哥瞓咗, 細佬都開始頂唔順, 食龍肉都冇味! 求其叫咗兩碗台灣牛肉麵, 我勁口乾, 所以叫多咗杯蘋果汁(斷估都唔會好難飲掛, 都係現成咩咩先生既啫!) 點知, 嘩! 成世人都未飲過咁難飲的蘋果汁, 冇味, 但杯野啡啡地色, 有D漂浮物(我估係果肉掛), 好似飲緊浸雞皮紙D水咁! SHIT!  果兩碗牛肉麵都叫做入得口啦! 但細佬扭眼瞓, '畢'咗俾佢, 又話熱, 又話食唔到, 最後要餵佢食, 佢都只係食咗幾啖!

哥哥頂唔順瞓咗

唉! 返去喇! 去停車場攞車, 泊咗6日盛惠570蚊, 同call的士冇乜分別, 但緊係舒服好多啦! 老公揸車唔似的士咁chok!  返到屋企已經11:30, 工人都瞓咗喇! 老公堅持要幫孖寶抺身(唔沖涼都要抺吓個身), 仲要用凍水, 兩個瞓著咗俾人搞醒, 發晒顛, 最後又係要媽媽收拾個殘局! 12點, 兩個都瞓晒喇! 我地終於可以沖涼, 執返D野出黎, 最後搞到1:30先至瞓!

旅程完結

(但我生日...... 老公今日連一句生日快樂都冇同我講過囉!)

關西親子之旅2016 - Day 5

2016.10.21 (星期五)

今日香港朝早6點掛8號風球, 但京都風和日麗, 好好天啊!

可能連日以黎都係嚴重睡眠不足, 孖寶今朝都瞓到8點幾, 叫醒佢地, 刷牙, 換衫, 9:15先至落去食早餐, 就黎俾人食晒D早餐喇!

孖寶仲未起身, 好好瞓!

哥哥今朝冇扭計, 個早餐得以順利食完。上房, 執埋D行李, 10點出發喇! 今晚去和歌山浸溫泉, YEAH!

要同呢間酒店講再見喇!

由於時間尚早, 媽媽想去好多紅色框(鳥居)果度 -- 伏見滔荷大社, 其實只係酒店過兩條街, 去到發覺周圍都冇得泊車, 仲有幾架旅遊巴, OH! NO! 都係走人喇! 去奈良吧!

接近12點, 去到奈良喇! 孖寶瞓到如火如荼, 媽媽惟有落車去買兩pack鹿餅先, 然後爸爸搵返上次餵鹿個湖邊 (果度可以停一陣車), 細佬第一個醒咗, 媽媽同佢著返件褸, 雖然有太陽, 但都凍凍地, 細佬唔算太驚, 係媽媽的幫助同保護下, 佢嘗試近距離餵鹿仔, 佢餵到鹿仔, 好開心! 一陣間, 哥哥都醒埋, 佢又落車餵鹿仔, 以佢的性格, 佢完全唔驚D鹿! 之後又搵其他鹿去餵, 我地上咗條橋, 有兩隻鹿仔迎面過黎, 兩隻鹿仔見孖寶矮過佢地, 就兇佢地, 爸爸即時上前阻止, 仲兇返兩隻鹿, 孖寶見原來鹿仔都唔係咁善良, 開始唔敢餵, 叫爸爸餵, 爸爸都有抱住佢兩個餵, 媽媽全程負責拍video。

細佬餵到鹿仔好開心

哥哥又餵鹿仔

餵完鹿仔, 爸爸提意行吓山 (其實只係一個小斜坡), 難得爸爸媽媽可以拍吓拖仔, 享受一吓咁寧靜同舒服的環境, so relax! (但差D俾日本警察抄牌)

難得同老公可以合照

下午1:30喇! 又係時候要食飯喇! 揸車走人, 奈良去和歌山要行IC喎, 要係上IC前搵間餐廳食咗飯先, 搵咗好耐, 最後決定去食steak, 希望同上次間Volks咁上下水準啦! 入到餐廳, 冇上次咁靚, 算啦! 睇吓餐牌, 好肉吓喎! 是但啦! 叫咗兩個雞扒鐵板餐同一個兒童餐, 餐湯係自己出去拎既, 冇沙律, 另加150円有餐飲無限添飲加送兒童餐飲, 爸爸叫咗一個, 都OK啦! 叫做一家人可以坐得舒舒服服, 又食得飽! 餐廳仲送咗2個代幣俾佢地去扭蛋機度扭玩具, 兩個都好開心!

兩個都食得津津有味

下午2:50出發上IC, 去和歌山喇! 由於媽媽尋晚又係冇乜點瞓, 加上飯氣攻心的情況下, 好快就同孖寶一齊瞓著咗喇! 可憐的爸爸, 要揸車, 冇得瞓啊! 3:50pm, 俾人叫醒咗, 原來到咗道之駅, 又係時候去一去廁所, 由於係山頂, 所以好大風, 都幾凍吓, 同孖寶出去展望台影咗兩幅相就即刻上返車, 走人!

山下面就係和歌山市

下晝5點, 終於見到路牌寫住和歌山喇! 我地差不多到酒店喇! 由於今晚住温泉酒店, 要浸溫泉同食酒店提供的豐富晚餐, 所以返咗酒店就應該唔會出返黎, 爸爸提意去超市買返D乳酪, 益力多同生果先, 5:45終於趕得切係食飯前到酒店喇!

Check-in, 我地個plan係包咗50分鐘的貨切風呂同女士的浴袍, 我當然簡我最愛的粉紅色啦! 有職員幫我地拎行李上房同講解, 上到房打開門, 原來唔係瞓地下, 係有床既, 同埋, 間房咁細既?! 再打開房內的門, 原來仲有個廳既, 咁就差唔多, 不過, 比較殘舊, 同上次白濱果間相差好遠喎!

唔該晒哥哥幫我地揸相機影相

Book咗6:30去浸貨切風呂, 7:40食晚飯, 一家四口換上浴袍, 影吓相, 落去沖涼喇! 孖寶超級興奮, 不過, D水對孖寶黎講, 的確幾熱, 所以只係叫佢地浸吓腳仔, 同埋唔好浸咁耐, 兩個對於個膠筒好有興趣, 係咁'畢'D水黎玩!

D燈光好迷幻

雖然可以浸50分鐘, 但其實浸20分鐘已經覺得呼吸困難同心跳加速。沖吓個身, 幫孖寶抹身, 著返衫, 一家人又返上房喇! 等食飯期間, 老公突然話個胃唔舒服, 仲有D肚痛, 想嘔, 吓? 一陣間食好野喎, 你而家黎胃痛?! 好慘啊! 那那林叫老公食D止痛藥頂住先!

7:30落去食飯, 餐廳門口個待應問我地飲咩, 我叫咗凍烏龍茶(280円), 老公叫咗清茶(免費), 我地被安排坐地下食, 孖寶當然勁開心啦!

啱啱開始食, 孖寶已經坐唔定周圍走

醒目的待應俾咗盒顏色筆同紙佢地畫畫, 讓爸媽可以輕鬆食飯

原來佢地都有安排兩碗白飯俾孖寶, 老公食飯期間, 突然話好返好多, 冇事喇! 恭喜佢呀! 呢餐飯俾我想像中冇咁豐富, 而且所謂的海之味全部都係魚, 只有兩隻蝦, 差咗少少喎!

食完飯返上房, 睇新聞, 原來今朝鳥取發生地震, 老公話佢好似feel到, 真唔真呀?!

新聞報告

食完餐飯完全冇好飽的感覺, 好在頭先買咗生果同乳酪, 可以繼續食!

媽媽最愛 - 香濃幼滑的乳酪 (點解香港搵唔到?)

今晩終於都可以早D瞓, 不過, 細佬仲係鼻塞, 要洗鼻同噴鼻, 爸爸要同佢搏鬥一番! 臨瞓前執行李, 老公見到牆上有隻大曱甴, 好黑, 好恐佈! 我對呢間酒店, 跌到只有40分! (唔合格)

老公殺死咗小強之後, 我個心都係猶有餘悸, 成晚都好驚瞓瞓吓有大曱甴跌落黎, 瞓得唔係幾好!

Day 5 完

關西親子之旅2016 - Day 4

2016.10.20 (星期四)

今朝天氣繼續係非常好, 陽光普照。

由於今日的行程都非常緊密, 所以都係未夠8點就起身, 仲要叫醒埋孖寶, 佢地自從去旅行呢四日以黎, 都係睡眠不足, 其實對佢地黎講, 都幾辛苦!

晴朗的一天

孖寶早餐只肯飲橙汁, 唔肯飲鮮奶

刷牙, 換衫, 落去食早餐, 食早餐的地方係G/F, 好decent, 有陽光由落地大玻璃射入黎, 感覺好舒服, 而且個自助早餐選擇都幾豐富, 有西式, 有日式, D麵包又好食! 食食吓, 哥哥倒瀉咗橙汁落條褲度, 佢即時講咗兩聲: 我唔小心架咋! 我唔小心倒瀉咗! 見佢咁有悔意, 當然冇鬧佢啦! 仲安慰佢, 唔緊要啦! 食完早餐上去換過條褲! 誰不知佢突然發爛, 我要換褲呀! 我要而家換! 雖然爸爸已經解釋咗, 你而家走開咗, 個應待姐姐會收咗你份早餐, 冇得食架喇! 佢一聽到人地收佢D野, 更加發爛, 唔准收! 你叫佢唔好收! 為免影響到其他人, 媽媽惟有拿拿林, 抱起佢返上房換過條褲, 再落過黎! 爸爸以為媽媽會車巴佢, 話者鬧佢一餐, 佢見我地咁快落返黎, 都好意外! 我話: 冇呀! 冇鬧佢! 但我唔出聲! 唔想同佢講野!

食完早餐, 返上房執埋D野, 一家四口行去前面街口攞車, 突然醒起唔記得拎止痕膏, 細佬個pat pat係動物園門口個廁所俾蚊釘咗, 仲係好痕, 於是媽媽拿拿林返去酒店上房拎, 爸爸就同孖寶上車, 駛返去酒店前面個街口接返媽媽!

搞咗一大輪, 正式出發喇! 好在酒店好近京都鉄道博物館(只係10分鐘車程), 泊好車係對面停車場, 10:30買飛入去參觀(大人1200円, 小童200円), 一家四口盛惠2800円(~HKD200), 少少貴, 但值得睇!

每張飛都印有唔同的火車

入到去, 好多火車呀! 爸爸不停咁幫孖寶同D唔同型號的火車影相, 但係睇咗15分鐘, 孖寶就開始覺得悶, 周圍走。我同老公都好欣賞日本人咁有心機整個火車博物館, 真係好多火車, 仲可以睇埋車底, 車頂, 拆埋個engine出黎俾你睇, 又有得撳吓D制郁郁吓!

多謝有位日本太太幫我地揸機

啱晒手多多的孖寶

媽媽最想睇係佢個turning table, 搵咗好耐都搵唔到, 睇埋地圖, 覺得應該係果度, 都係搵唔到, 最後上咗三樓, 行咗出去個平台, 望落去, 嘩! 原來係呢度! 問一問工作人員, 原來Today No moving, 平時都會架! Oh! 有D失望! 算啦! 都叫做見過啦!

就係呢個Turning Table, 搵咗好耐

再望遠D, 見到有架蒸氣火車噴晒煙, 我話好似係坐得架喎! 落去睇吓, 原來可以俾錢坐, 好似每人600円, 我同老公不約而同, 都好想坐吓, 於是去問職員, 原來仲有30秒就開車喇! 一家四口拿拿林俾錢, 上車!

蒸氣火車開動喇! Beep Beep! 爸爸媽媽都好興奮, 孖寶都被我地的興奮心情感染, 全程來回10分鐘, 車速好慢, 隔離有時會有火車經過, 沿途經過公園, 同遊人揮手, 好得意呀! 落車後當然要同架火車頭影相啦!

真蒸氣火車

原來影唔到個車頭

然後去埋車庫入面睇火車, 全部都黑蚊蚊, 好大架, 可以爬上去睇, 坐係司機位扮揸火車, 不過, 孖寶似乎睇得太耐火車, 已經冇乜興趣。

哥哥扮揸火車

原來已經12:30喇! 去埋Souvenir Shop買咗幾盒糖俾佢地同侄仔, 爸爸買咗盒火車車牌的餅, 走lu! 要趕住去下一個行程, 嵐山小火車!

買完手信

返停車場攞車期間, 哥哥突然起跑(可能佢見到爸爸架車就係前面), 成個人仆咗係地下, 好在佢有用雙手撐住個人(冇仆親塊面), 不過, 左邊膝頭擦損咗(好在著咗長褲), 佢當然大喊啦! 爸爸媽媽惟有安慰佢, 下次小心D, 唔好跑喇! 貼完膠布, 請佢食咗粒止痛藥(頭先買果盒糖), 開車走人!

我地要去嵯峨野駅搭小火車, 老公話泊車地點行去車站都要15分鐘, 而GPS 顯示到達目的地要30分鐘, 嘩! 好趕喎! 飯都冇得食, 媽媽提意去Family Mart買D麵包, 餅乾, 到時上小火車食。原來京都都好多燈位, 行車緩慢, 睇住GPS顯示到達的時間越推越遲, 媽媽惟有心入面禱告, 希望趕得切2:07開果班啦! 如果趕唔到, 惟有問吓有冇得換下一班。

經過渡月橋, 上次係竹林行返出黎果度, 同食野條街, 差不多喇! 就到喇! 好似見到個站, 係附近睇吓有冇得泊車, 見到有Times, 但俾前面架車泊咗最後一個位, 惟有駛前D, 仲有個停車場, 仲平D, 全日最大600円咋, 抵呀! 拿拿林泊低架車, 一人抱住一個(佢地瞓咗, 唔敢叫醒佢地), 狂奔去個站度, 2點去到, 好在趕得到! 架車都未黎, 只係見D人係度排隊, 劃咗位架喎, 點解仲要排隊?

叫醒佢兩個去廁所, 哥哥初頭唔肯去, 但小火車來回要1個鐘, 車上冇廁所架喎! 最後佢都肯去! 去完廁所, 出黎, 上得車喇! 由於太多人, 惟有求其同架車影咗一幅相就俾人趕上車喇! (小插曲: 老公想坐富貴卡, 見冇人去咗坐, 原來之後有人上車, 於是俾人趕返去坐返1號車箱)。

嵐山小火車呀! 4年前你地係媽媽個肚入面時搭過!

其實小火車係設有企位, 好多人企係度睇風景, 原來我地去程係雙數座位, 所以睇盡晒所有風景, 佢兩個都好興奮, 以為入山洞佢地會驚, 點知冇喎! 仲好雀躍添! 佢地見到下面條河有急流, 又好有興趣, 好開心!

孖寶的小手

到咗龟岡站, 大部份人都落車, 我地就跟返張飛, 坐返回程個座位, 回程坐單數lu... 冇所謂啦! 頭先都睇晒! 趁火車未開, 一家四口食吓包包同曲奇先, 順便幫佢三父子影相, 過咗10分鐘左右, 火車開動喇! 原來冇乜人, 我地又自動坐返雙數座位, hoho!

媽媽好鍾意呢張相

好多人都係嵐山駅落車, 行竹林, 但我地湊住孖寶, 驚佢地唔行得, 架車又泊得唔近竹林個出口, 都係算喇! 坐返去嵯峨野! 火車到站, 我拖住細佬落火車, 哥哥突然大喊, 媽媽! 媽媽! 然後甩開爸爸隻手, 衝上前搵我, 係月台上面D人都驚佢會跌落路軌, 全部人望住晒我地一家......

今次實在要鬧, 因為好危險, 佢咁樣甩開爸爸隻手, 真係有機會差錯腳跌落路軌! (爸爸媽媽只係緊張佢, 唔想佢有意外!)

係車站門口影咗幾張相, 已經3點幾喇!

孖寶話要擺D古怪Post影相

仲未食lunch, 睇吓車站附近有冇野食, 原來只係得幾間cafe, 我想食野, 唔係飲coffee喎! 於是決定攞車走人, 去第二度搵吓。上車後, 調查發現原來大家都唔肚餓, OK! 咁不如去衹園果間抹茶舖(上次去過)睇吓有冇下午茶甜品食。

唔知點解30分鐘車程要揸成個鐘, 4:45pm終於去到舖頭門口, 但周圍都冇得泊車, 加上樓上食甜品勁多人排隊, 咁即係唔駛諗啦! 爸爸惟有停低架車, 由媽媽落去買個雪糕, 一家四口share一個甜筒(係呀! 我地減肥!) 食完雪糕, 再入去買兩盒手信, 叫做黎過喇! 走人!

孖寶對抹茶味雪糕冇興趣

今日的行程已經按計劃完成, 而家去邊好? 緊係去返AEON MALL啦! (爸爸太鍾意行商場!) 不過, 原來呢個時間好塞車, 由衹園去AEON MALL, 竟然用咗1個鐘!

6點, 終於都到喇! 係停車場落一層, 媽媽見到D野呀! 原來尋晚miss咗, 係森林家族專門店呀! 媽媽二話不說, 帶埋細佬衝咗入去間舖頭, 爸爸就自動波睇住哥哥, 我同細佬相量吓要買D咩, 有間Starter House, 原價3980円, 半價1990円(~HKD140咋), 媽媽唔買實在對唔住自己, 同細佬相量後, 決定買多一對袋鼠BB, 同BB房傢俬套裝, 盛惠4XXX円! YEAH! 媽媽又有禮物喇!

媽媽收鑊好豐富呀! 個袋幾大!

由於未食午餐, 所以都係唔好再shopping喇! 去搵野食先, 搵咗間食西餐, 是但啦! 叫咗個意粉同咖喱漢堡飯, 仲有甜品 -- 巴菲。食完飯, 孖寶好想玩Thomas火車, 200円一次, 兜幾個圈, 哥哥爭住要坐前面, 玩完一次, 佢地話要玩第二次, 由細佬坐前面, 好啦! 玩多一次要走喇!

終於有野食喇!

今日的活動主題係 -- 小火車

媽媽見到爸爸買唔到野, 有D心痛, 於是提意帶孖寶去反斗城, 等爸爸一個人可以行吓商場, 希望佢買到野啦! 最後, 爸爸都係買唔到野既!

今晚早D返酒店休息, 幫孖寶沖完涼, 佢地要拆開尋日買個油站黎玩, OK! 突然收到好友電話, 聽日香港8號風球呀! 雖然我地唔係聽日返香港, 但小心班機會Delay或取消, 記住上網留意住航班安排呀! 收到!

孖寶急不及待要拆個油站場景出黎玩喇! 

剛好之前買咗2架Tomica車仔, 可以玩入油同洗車

媽媽之後想去雪櫃拎返D乳酪同益力多出黎做宵夜, OMG! 執房D人熄咗個雪櫃呀! D乳酪暖晒! 點食呀?! 諗咗好耐, 爸爸覺得要向酒店投訴, 打去front desk, 佢地話可以去買返D乳酪同益力多, 俾返張單佢地, 佢地俾返錢我地喎! 於是爸爸拿拿林換過件衫去街口間SEVEN買過, 酒店真係即時俾返錢佢! YEAH!

拎出黎暖笠笠的乳酪同益力多

細佬今朝已經有D流鼻水, 臨瞓, 佢話鼻塞瞓唔到, 叫佢吸鼻又發顛, 結果12點前已經醒咗兩次, 第二次仲喪喊, 爸爸忍無可忍想車巴佢, 但媽媽反而覺得佢好慘, 抖唔到氣真係好辛苦, 於是媽媽化身人肉cushion, 攬住細佬, 等佢可以斜斜地瞓。等佢瞓著, 墊起佢個枕頭, 但細佬都係每隔兩個鐘醒一次, 加上爸爸的747客機聲, 媽媽實在瞓唔到(試過用沖涼海綿, 紙巾, 毛公仔塞住對耳, 都係聽到飛機引擎聲 (下次記住要戴埋耳塞去旅行)!

Day 4 完

關西親子之旅2016 - Day 3

2016.10.19 (星期三)

今朝又係俾D火車聲隆醒咗, 下次都係唔好揀咩咩駅前果D酒店!  尋晚瞓得好差, 但一朝早望出窗外, 見到咁好天, 心情都好返D!

孖寶可能俾我D執野聲嘈醒, 但冇喊, 都算乖, 刷牙(但唔鍾意洗面), 換衫, 又落去食早餐喇! 我今朝繼續揀西式, 老公話佢想試吓日式, 要做吓日本人, 今日D早餐唔再係凍冰冰, 起碼係廚房拎出黎, 暖既, 都OK啦! 心情又好返D! 細佬繼續食蛋同腸仔, 然然肯食飯同紫菜, 見到然然肯食野, 媽媽心情又好返D!

好似好豐富的早餐

食完早餐, 返上房, 執埋D行李, 10:15am Check-out, 今晚去京都, 老公負責拎行李上車同安頓兩隻豬仔, 我就去換散紙俾停車場費。準備出發, 今朝的行程安排咗去Osaka Kids Plaza, GPS 話要30分鐘, OK! 老公話今日已經係行程的一半喇! 吓? 但我仲係好似唔係去緊旅行咁喎, 咁就已經一半?! 唔得, 我要enjoy吓先, 心情又再好返好多!

出車冇幾耐, 發覺好多燈位, 好多車, 行車超級緩慢, 由於我尋晚實在係冇乜點瞓過, 不知不覺就瞓著咗, 半夢半醒感覺好似坐咗好耐車咁, 冇錯! 已經超過1個鐘, 再加上老公miss咗個停車場入口, 又要兜多個圈, 去到已經11:20, 買飛入場(大人1400円, 3歲以上小童500円), 一家四口盛惠3800円 (~HKD280), 好很貴呀!

剛睡醒, 企唔穏

張飛都幾靚

係入口諗住影兩幅相先至搭lift上去, 見到後面有一大堆日本小學生, 好驚呀! 尋日係天王寺動物園已經係咁既場面! 拿拿林搭lift上去先喇!

上到去, OMG! 又係好多好多好多小學生, 天呀! 細佬見到咁多人, 有D怯! 哥哥就話之你, 照玩! 去玩吊索橋, 細佬有少少驚, 但都成功行咗過去, 哥哥見到面前就好似一個城堡一樣, 有樓梯, 有秘道, 有塔, 有密室, 就開始周圍走, 唔見咗人喇! 但細佬可能因為太多人, 好驚, 唔敢玩! 媽媽惟有陪佢玩其他野, 靜態D的遊戲, 哥哥叫媽媽陪佢玩吊索橋, 行到最尾, 佢突然發難, 話要細佬過黎, 我提意不如一齊去搵細佬, 佢唔制, 企係度塞住D人, 我惟有抱起佢, 佢又做扒地熊, 即場爆喊! 我惟有走去搵爸爸黎搞掂佢, 我唔想當眾車巴佢!

好似城堡

爸爸成功搞掂咗哥哥, 冇車巴佢! 下晝差不多1點, D小學生終於散去, 個場係我地架喇!

誤打誤撞, 走咗去模擬電視台, 媽媽同孖寶扮新聞主播, 爸爸扮天氣先生, 錄影完仲會播返俾你睇, 可以用手機錄低段片, 睇返好搞笑。

兩位小主播

之後落去下層玩吓角色扮演遊戲, 包括去超市買野, 自己doo barcode打飛仔, 扮小販賣三文治, 湯麵, 仲有一個日式家居場景, 佢地玩到唔捨得走。由於媽媽今早狂隊麵包, 所以未肚餓, 冇面黑, 反而爸爸話肚餓要走喇! 睇吓個鐘, 原來已經2點幾, 真係要走喎!

哥哥玩自助收銀機

細佬仔扮麵檔老闆

落到停車場, 爸爸入咗10000円入去付款機, 點知架機只係找返3000円，泊車要7000円? 唔係呀化? 即刻撳制call人黎，雞同鴨講咗一輪, 個職員終於都開返部機, 數返d錢俾我地。

附近唔知有咩食, 又揸住架車停唔到, 於是決定set GPS去京都先, 沿途搵野食, 誤打誤撞, 去咗一間去VOLKS的餐廳, 爸爸初頭都有D擔心唔知食乜, 因為個餐牌好似寫住放題, 但我地唔係想食放題喎! 於是派媽媽落車入去睇吓咩環境先, 同門口個待應雞同鴨講咗一輪, 原來有餐叫, 唔一定食放題, 於是打手勢叫老公泊好車, 我地去呢間食。

入到去, 待應安排我地坐Non-smoking area, 但都聞到少少煙味, 是但啦! 已經3點喇! 就黎餓死! 叫咗個意粉, 漢堡鐵板同一個兒童餐, 沙律同湯係自己出去個bar度拎既, 個粟米湯超好味, 沙律款式好多, 竟然有秋葵! 佢地個兒童餐係消防車造型, 佢兩個見到都好開心, 未見過佢地食咁多野, 仲要食埋爸爸碟飯同媽媽碟意粉! 我同老公都覺得, 今餐係黎日本咁耐, 最滿足的一餐!

好多野食呀!

就係呢間喇! 好滿足的一餐!

食飽飽, 又要繼續上路喇! 我地希望可以係日落之前去到京都, 因為仲未買聽日的嵐山小火車飛呀! 由於飯氣攻心, 我同孖寶都瞓著咗, 老公要揸車冇得瞓, 好慘啊! 瞓咗冇幾耐, 突然俾老公叫醒, 佢話見到個MALL, 好想入去行, 我話咁你行啦! 我好眼瞓, 我地三母子係車度瞓啦!

老公行咗一陣就whatsapp我, 佢話見到超級靚的手推車仔, 於是媽媽就冒著生命危險叫醒孖寶, 佢兩個聽到有靚車坐, 都慢慢醒咗, 爸爸不容有失, 一手納咗2架車先, 媽媽見到, 嘩! 真係好靚喎! 孖寶超級興奮!

爸媽都覺得超級靚的手推車

已經第三日, 但爸爸仲未買到野, 爸爸話係ABC Mart見到對Nike好靚, 媽媽即刻鼓勵佢買, 同爸爸一齊睇鞋期間, 媽媽見到對粉紅色的adidas boots呀! 好似我係香港見到果對咁, 爸爸即時話, 媽媽! 買啦! 於是, 我同老公就一人買咗一對波鞋喇! 係我地今次旅程第一件的戰利品! YEAH!

買完鞋, 行咗一陣(爸爸好積極咁幫我搵Shiseido, 但冇), 天開始黑(4:30就收晒太陽, 5點就開始天黑), 係時候要上路喇! 揸咗好耐車, 終於都見到路牌有京都兩個字喇! 夜晚差不多7:15, 終於見到京都車站喇!

轉彎就係京都駅

爸爸派媽媽上去買小火車飛, 佢俾咗個3D車站樓層圖我睇, 話我知個JR counter係三個地方都有, 唔好玩啦! 你老婆雖然大學主修地理, 但睇地圖最差, 仲要係3D, 算啦! 我上到去問吓人啦! 個JR counter都唔算難搵, 我入到去都唔算多人, 排第3個, 埋到counter, 指住小火車, 同個肥佬售票員講, Tomorrow! 問咗10:07同11:07班車, 都爆滿(都唔係睇紅葉旺季!), 得返唔係雙連位, 吓? 我一家四口, 唔通坐一頭一尾咩?! 本來想打俾老公問吓, 但見到後面突然多咗10幾人排隊, 個心好慌好亂! 我最唔叻係緊張關頭做決定! 唉! 是但啦! 咁買下晝2:07果班啦! 來回一個鐘, 3點鐘, 孖寶剛好係午睡時間!

我排第三

買完飛落返地面, 老公話佢架車駛前咗50米, 冇喎! 行前咗50米都唔見佢地喎! 原來係前面條橋再行前50米, 唔好玩啦! 京都駅900萬條橋, 我鬼知你邊條橋咩?!

買完飛喇! 總算鬆咗口氣, 因為坐小火車係今個旅程的重點節目, 不容有失! 雖然俾老公埋怨點解唔買4:07果班, 但我話我驚佢兩個眼瞓喎! 差不多夜晚8點喇! 又係時候要食飯 (雖然唔肚餓), 去咗AEON MALL(老公最愛)。

見到有間舖頭仔賣火車紀念品, 孖寶最like, 入去買咗兩對襪, 4條毛巾做手信, OK喇! 今晚泊車唔駛錢喇! 孖寶見到有反斗城, 嚷著要入去, 好啦! 兩個玩lego玩到唔捨得走, 爸爸睇住佢兩個, 媽媽又去睇吓兒童衫褲鞋襪先! 由於爸爸媽媽都有禮物, 好似都應該買D野俾孖寶, 爸爸提意買個Tomica油站場景, 媽媽見佢地咁鍾意砌Lego提意買Lego, 最後孖寶都係揀咗油站。

兩個好似學校頒奬典禮咁!

由於真係唔太肚餓, 所以諗住去supermarket買D壽司, 生果, 乳酪返去酒店食, 可能因為已經過咗9點, 得返一盒細的雜錦壽司, 我另外揀咗盒腐皮壽司(我最愛), 買咗袋蕉, 另外買袋麵包俾孖寶, 2個杯麵(以防食壽司唔夠飽), 返酒店喇!

酒店只係過幾條街, 好近, 老公放低我地三母子同埋D行李係酒店, 自己揸去前面街口泊車 (日泊最大800円), 好扺啊! (酒店泊車要1500円, 仲要行遠好多)

Check-in完上到房, 媽媽已經好肚餓喇! 即時開餐, 孖寶好like個腐皮壽司同埋個杯麵 (媽媽覺得日清合味道杯麵的海鮮味係最好味架!) 哥哥想飲埋個湯, 好在俾爸爸阻止咗!

已經夜晚9點喇! 好肚餓!

食完野, 沖完涼, 已經11點幾, 孖寶瞓落床冇幾耐就瞓著咗, 我執野, 老公煲水, 又係搞到12點幾先至瞓! 不過, 聽日都係要早起身, 因為行程有D更改, 朝早要去咗火車博物館先, 然後下晝去搭小火車, 所以都趕趕地!

是日戰利品 - 我同老公每人一對波鞋!

Day 3 完