孖寶兄弟長大了!

最近, 覺得佢地突然間長大咗好多!

(1) 樣子

我同爸爸都覺得然然個樣大個咗 (我覺得佢對眼尾戚起咗, 塊面再尖咗, 緊係啦! 都唔食野, 練仙的!), 佢個樣已經冇以前咁BB, 冇咁可愛, 不過, 佢笑起上黎, 仍然係天真無邪咁樣, 加上有時D古靈精怪表情, 好想咀爆佢! 至於佢個扭計喊樣, 爸爸媽媽仍然係勁想車巴佢!

逸逸越大越靚仔, 雖然佢絶對唔係眼大大, 男生女相果種靚仔, 但媽媽就係鍾意佢個頭圓碌碌, 眼細細, 個負離子頭又直又貼服又立立令, 爸爸最近幫佢剪咗個冬菇頭, 搞到佢更加可愛, 再加埋佢講野好老積, 爸爸媽媽呢排簡直愛爆佢! 就算佢個喊樣都係好可憐, 好委屈咁, 點捨得鬧佢?!

(2)  說話

然然雖然有時九唔搭八, 媽媽問佢尋日點解唔駛返學既? (紅雨) 佢答: 因為卡住咗, 俾咩卡住咗？俾會所...卡住咗, 所以走唔到... 媽媽聽到O晒咀, 不過, 佢有時講野又好醒, 食飯前識得帶禱告, 又識得講想去邊度玩, 仲識得報寸細佬打佢(唔知真定假), 但佢最叻仍然係大喊, 我要你抱我, 快D, 咁耐既? 等唔到!

逸逸講野好勁, 簡直可以當佢大人咁正常交談, 佢會話你聽佢係學校做咗咩, 今日去咗邊, 哥哥頭先講個"死"字, 哥哥頭先曳咗, 同埋報寸俾阿嫲聽, 我地6月一家四口去旅行, 唔帶嫲嫲去!  佢又識得話哥哥唱錯歌, 首歌唔係咁唱, 係咁唱架嘛! 又話媽媽唔記得呢樣果樣, 唉! 要我提你! hoho... 佢仲好多提意, 成日話不能(如)我地XXX, XXX或者XXX!

(3)  畫畫

特別要提呢樣野, 因為實在係今個月睇到180度改變, 以前佢地畫畫只係塗鴉, 但自從今個月開始, 細佬識得畫巴士, 太陽, 爸爸, 媽媽個樣, 唔評論畫得靚唔靚, 但起碼睇到佢畫咩, 唔駛估, 呢個真係好大進步!

至於哥哥, 好似都識識地, 但仍然大部份時間係度塗鴉, 或者直頭唔畫畫, 發脾氣, 要工人姐姐幫佢畫!

另外, 佢地對油顏色都開始明白個concept, 知道唔好油出界, 同埋每一part都可以油唔同顏色, 唔似得以前咁, 成幅圖亂油, 撈埋晒所有顏色!

(4)  兄弟感情

雖然都係經常因為爭玩具鬧交, 你打我, 我打返你, 然後打人果個自己爆喊, 但有時又好friend, 尤其哥哥, 有時會無啦啦主動攬住細佬, 細佬又會掛住哥哥, 老師話細佬成日走去哥哥班房搵哥哥一齊去廁所, 前日哥哥去睇醫生冇返學, 細佬放學返黎見到哥哥即話好掛住哥哥

(5)  安全意識/安全感

細佬一向注重安全意識, 唔駛講, 爸爸話哥哥呢排都開始有喇! 佢知道係停車場唔好亂走, 有車架! 會車死架! 至於安全感, 細佬仍然非常需要, 佢會唔捨得爸爸媽媽返工, 成日都話唔想我地返工 (唔返工冇飯食架喎!), 返教會兒童崇拜, 佢又要媽媽陪, 唔俾媽媽走, 反而哥哥OK唔駛陪, 不過, 如果係爸爸陪的話, 中途走開又冇事喎!

後記@5月25日

上星期六第一次帶孖寶去參加興趣班 (3歲半先至參加? 係香港, 正常係6個月大就要開始喎!) 因為媽媽唔可以陪, 只可以係課室出面等, 初頭都擔心細佬扭計爆喊唔入去, 但又冇事喎, 兩個好乖, 入到課室自動波搵位坐低, 媽媽幫佢兩個著完圍裙手袖就走喇, 一個鐘後, 兩個都係笑住口行出課室, 老師話佢地好乖, 好專心, 只係堅持要坐埋一齊啫! 冇媽媽陪都唔喊, 真係大個仔喇!

2星期前開始唔用盤俾佢地沖涼, 改用花灑, 哥哥貪玩, 所以OK冇問題, 細佬雖然無反抗, 但有保留, 有幾次指定要媽媽同佢沖, 然後鎖埋廁所門, 叫媽媽用盤俾佢沖涼, 唔好俾爸爸見到 (識鎖門好醒!)

改變心態

自從孖寶出世之後, 我同老公就過住痛苦的艱辛歲月, 當身邊所有人都覺得能夠生一對孖仔係上天所賜的福氣時, 我同老公就覺得呢個係一個折磨, 講得唔好聽, 簡直就係上天對我地的咒詛!

係呢3年幾時間裏面, 痛苦的時間佔大部份 (雖然有人話孩子的一個天真笑臉已經可以將父母的心融化, Sorry, 3年幾入面的天真笑臉合共唔知有幾多秒, 但我長期生活係痛苦之中, 係肯定的!) 痛苦源自包括照顧孩子對體力上, 精神上, 情緒上, 心靈上的折磨, 以及管教孩子所面對的種種壓力, 失落, 無助, 沮喪, 絶望,(我仲要係打孖黎, 所以痛苦係x2), 曾經有段時間, 兩夫妻的關係變得好差, 可能大家係面對家庭角色轉變上, 對對方的期望有落差, 加上孩子未懂事, 經常無故哭鬧, 扭計, 搞到兩夫妻的心情經常處於惡劣的狀態, 以至好容易就會鬧交, 甚至暗示不如分開吧!

最近, 呢個困局好似有少少出路, 一方面可能因為孖寶漸漸長大, 開始懂事, 哭鬧的情況少咗 (細佬only), 對比以往一放工返到屋企就家嘈屋閉, 永無寧日(所以當時寧願係公司OT都唔想返屋企), 而家的情況確係有改善。另一方面, 參加咗孖寶學校搞的家長講座, 加上兩夫妻經常的檢討, 討論, 嘗試唔同方法, 摸索孩子接受邊套教法, 同埋係主面前的反省, 交托, 祈求, 我倆係心態上都有少少的轉變:

(1)  首先要父母情緒穏定, 先至能夠教導孩子/令孩子的情緒能穏定落黎 (不過, 要情緒穏定, 先決條件係要有足夠的休息, 我同老公都長期缺乏睡眠, 所以EQ經常都處於低水平), 不過, 感謝主, 最近我的情緒穏定咗好多 (半年前都仍然係經常失控, 大聲鬧孩子, 甚至掟野恐嚇佢地, 然後呢埋係房喊, 甚至想過焗死兩個孩子, 或者自己跳樓死咗佢) 雖然而家仍然有時會忍唔住發顛, 但我會係未失控前行開, 等自己冷靜一下

(2)  父母要覺得你的孩子很可愛! 呢樣好有難度, 因為經歷咗呢3年幾的折磨, 加上我同老公本身其實唔太鍾意小朋友, 我地經常形容孖寶為計時炸彈, 因為唔知邊步行錯咗, 就會觸發炸彈爆炸, 仲要係一發不可收拾, 出咗街都要即時折返屋企, 取消行程, 係屋企就喊到天翻地覆, 死去活來, 可以用音波功轟炸你一個鐘, 我好肯定係前世欠佢地o既, 我可能前世作孽太深, 今世要還債,所以, 要我覺得孖寶好可愛真係要掩住個良心先! 不過, 最近同一個姊妹禱告, 俾我有好大的提醒同開啓 -- 神造每一個小孩子都係好獨特! 你的孩子係「神造」的!  雖然我唔明白神點解造到佢兩個咁扭計, 咁難湊 (人家孩子就係開心果, 食飽瞓, 瞓飽食), 但既然係神造的, 神看祂所造的都是美好, 我怎能嫌棄神所造的呢? 於是我開始諗吓, 其實孖寶都有好多優點, 感謝神! 至於我眼中所認為的缺點, 我諗神係特登設計到冇一個人係完美, 咁樣先至留有空間俾我地互相欣賞, 互相補足!  你的孩子係「好獨特」! 呢個詞語真係可圈可點, 一向負面意想的我, 即時諗, 的確, 咁樣扭計法都係好獨特的! 不過, 我知道姊妹所講的好獨特, 係佢心底裏對神創造的美善的讚美, 是的!  孖寶雖然係孖生, 但睇到佢地性格好唔同, 我就明白到獨特係點解, 我開始獨立去睇佢地, 唔好比較, 並且為佢兩個的獨特之處感恩!

(3)  放過孩子, 放過自己! 諗返起呢3年幾的痛苦歲月, 好多時間都係因為自己過份執著, 希望自己做好父母的角色, 希望孩子能夠有自理能力, 有良好品格, 避免不良生活習慣...等等, 心態係好, 但太過執著, 只會辛苦孩子, 辛苦自己, 例如:

- 希望孩子自己畢飯食同埋食晒D飯, 但就經常要鬧/恐嚇佢地, 結果子孩子喊住離枱, 最後都係食唔晒D飯

- 唔想孩子經常睇電視, 惟有自己時時刻刻陪伴孩子, 搞到連休息時間都冇, 心情煩躁, 隨時都會發顛

- 好想帶孩子外出, 多D親子時間, 亦希望佢地多D唔同的經歷, 接觸唔同的人同事, 但孩子冇得/唔夠午睡就哭鬧, 發顛, 自己亦體力透支好辛苦

諗通咗, 算吧!

自己唔畢飯? 算啦! 你唔好食, 唔迫你! 食唔晒飯? 算啦! 你走啦! 唔迫你! 你想睇電視? 睇啦! 我乘機抖吓! 出唔到街? 算啦! 係屋企抖吓, 或者落平落公園玩吓, 對佢地兩個黎講, 去平台公園同海洋公園係冇分別!

孖寶兄弟3歲5個月喇!

今日係孖寶兄弟3歲5個月。

上星期五同老公一齊請假, 連埋一連3日的公眾假期, 自製咗4日假期, 假期的頭一日, 當然要同老公拍吓拖仔啦! 一早落樓下食早餐, 然後去睇早場 (Iron Man Vs Captain America - 3D), 再去Hotel Icon 的Green餐廳食咗個豐富三道菜午餐(已經係一個月內第二次去食喇!) , 食物質素好, 外國waitress service好好, 又有免費侍客泊車, 好滿足, 好很飽! hea吓hea吓就到3點, 4點就返屋企附近接孖寶兄弟放學, 佢地見到爸爸揸車去接放學, 興奮到呢......

星期六帶咗孖寶去搭纜車, 由於一早計劃好, 所以好順利泊車, 然後行去車站排隊, 由於時間尚早(10:30am), 唔算多人, 排咗約30分鐘已經買到飛入閘喇 (而家買一張正價大人飛, 加$1有一張小童飛, 所以我地一家四口盛惠$82)! 不過, 原來外國人同強國人冇分別 -- 係會打尖的! 我同老公一人湊住一個小朋友, 行又行得慢過人, 上唔到車結果要等下一班, 雖然排頭位, 但俾人打晒尖, 差D連第二班車都上唔到 (心入面不停講粗口)。孖寶兄弟對坐纜車冇乜特別興奮, 爸爸媽媽惟有製造氣氛, 不停講: 嘩! 嘩! 架車咁斜既?! 出面D樓咁斜既? 好高呀! 我地越上越高喇! 高過D屋頂喇! (下刪一千字廢話) 但孖寶兄弟都唔算太雀躍, anyway, 叫做帶過佢地搭纜車啦! 想當年(30年前), 我老豆都有帶過我地搭纜車! 上到山頂, 好大風呀! 即刻呢埋係山頂廣場入面, 然後搵到熟識的M字頭, 於是就食咗餐junk food, 食完行返出去, 嘩! 仲係好大風喎, 算喇! 唔行喇! 走喇! 於是又排咗20分鐘, 搭返纜車落山走人! 落咗山, 諗住去攞車, 見到個牌寫住香港公園, 不如入去行吓啦! 原來有個觀鳥園, 問孖寶邊個想去睇雀仔, 兩個都話想, 行行吓, 哥哥冇晒聲既? 原來已經瞓咗, 仲口吐白泡添! (笑死我地), 於是爸爸同細佬睇雀仔 (有D雀仔唔驚人, 企得好近, 可以近距離睇), 不過, 可能細佬都係有少少陰影 (沖繩果次), 行得太近細佬都驚驚地!  睇完雀仔去咗兒童遊樂場, 哥哥有野玩就醒返lu... 3:30pm回程

星期日返Church, 然後去食Lunch, 哥哥手多多搞杯凍朱古力, 結果倒瀉晒, 媽媽尖叫, 全餐廳都聽到, 哥哥就一於傻笑, 好似唔關佢事, 咩都唔知, 唔好問我咁樣! 媽媽嬲到連細佬都feel到果股殺氣, 兩個都話唔想同媽媽坐, 要同爸爸坐, 於是佢地三父子就迫埋係一邊卡位度坐。之後買蛋撻上去探阿爸阿媽, 3:30pm回程, 行西貢, 唔知點解要6pm先至返到屋企, 勁!

星期一係公眾假期, 冇預先計劃去邊度, 天氣又差 (好大霧), 去西貢鹽田仔? 咁大霧搭船好危險喎! 去Megabox行IKEA? 難得放假, 孖寶已經好少落公園, 唔好行商場啦, 應該要去Outing! 最後諗唔到去邊, 但都換咗衫, 開咗車, 出咗街先! 一路揸車入西貢, 越揸越唔對路, 好大霧喎! 連前面架車都睇唔到, 去坐船會唔會好似前年十一海難咁架?! 惟有揸車出返彩虹, 見到個牌寫住坪石公園喎, FB呢排勁吹話係咩隠世公園, 有Dinosaur喎! 泊好架車係對面個公屋爛鬼停車場, 攞埋兩架滑板車, 行到出去公路邊, 呆咗! 點過去呀? 周圍都冇得過對面 (老公已經不停咒罵康文署同運輸署), 邊個會行到去個公園呀? 仲要個公園係公路邊個山坡上面, 結果都係決定走人 (30分鐘內出閘唔駛俾錢), 於是老公話都係去海運大廈睇車展, 一家人食返餐好既! 難得老公自投羅網, 話要食好野, 我當然話好啦! 去到海運, 有BMW車展, 孖寶兄弟超級奮興, 孖寶兄仲尖叫咗出黎, 狂奔咗去堆車度! 孖寶弟就邀請媽媽陪佢試坐每一架車 (求命呀!), 佢坐駕駛座, 媽媽指定要坐隔離!

細佬: 媽媽, 快D坐隔離! 快D!
媽媽: (已上車) 你大個買架車, 會唔會邀請我坐你隔離架?
細佬: 會架!
媽媽: 咁你女朋友呢? 佢坐邊?
細佬: 佢坐後面囉!
媽媽: 佢會唔開心, 喊喎!
細佬: 咁媽媽你坐後面囉!
媽媽: (心諗: 好在都仲有位坐, 唔係叫我落車!)

睇完車, 爸爸話去搭船, 媽媽驚搭完船太晏, 會肚餓面黑, 提議食咗野先, 由於係媽媽提議食野 (佢地三父子冇人話肚餓想食野), 所以媽媽自動自覺話去姆明餐廳攞飛, 4人枱叫緊B10, 媽媽攞張飛係B12, 2張枱, 應該唔難等, 於是就等...等...等... 等咗1個鐘, 爸爸已經開始有怨言, 媽媽都唔好意思 (其實媽媽唔係姆明Fans), 於是諗住過隔離食拉麵, 點知間野真係只得拉麵, 冇飯食 (哥哥嚷著要食飯, 於是死死地氣又去返等姆明餐廳, 點知原來就係我地離開的5分鐘, 叫咗我地個號碼, 過咗, 俾咗另一個遲過我地既入咗去 (條氣當場頂到上心口), 又等多10分鐘, 終於有枱俾我地喇! 由於佢地唔食兒童餐入面D野, 所以放棄叫兒童餐, 只係叫咗2個Set Lunch, 個set包餐湯, 沙律, 飲品, 應該夠食, 另外加$15配多個是日甜品 (果撻), 哥哥練仙唔食要媽媽餵, 細佬眼瞓釣緊魚, 想食都食唔到, 好在待應哥哥好人, 幫我地拎咗個史力奇公仔過黎, 細佬即時醒神, 哥哥掛住玩, 就唔埋媽媽餵佢食咩, 飯來張口! (唉)  跟住又叫待應哥哥換另一個公仔, 好似係姆明個阿媽, 是但啦! 白色一團, 兩兄弟見到好開心, 尤其哥哥, 攬住個公仔, 鍾個頭埋去, 跟住又扮餵佢食野, 媽媽心諗: 個價錢包埋有不同公仔坐枱陪食, 都OK啦! 今餐盛惠$300。食完野, 哥哥突然話要去poo poo, 吓? 商場黎喎! 仲要商場個女廁排晒長龍, 你忍唔忍到呀? 忍唔到! 好急! 即刻急call爸爸 (爸爸同細佬行咗先), 由爸爸帶哥哥去便便, 好在冇賴到, 嚇C我! 跟住去搭船, 回程有D落雨, 兩兄弟企係船邊, 任由D雨打落塊面上, 身上, 手上, 好興奮, 孖寶哥又黎狂人的笑聲, 成架船都聽到! 3:30pm回程 (由於是日消費太低, 冇泊車優惠, 泊車費盛惠$92)

可能呢幾日對孖寶兄弟黎講, 實在太開心, 太充實, 孖寶弟今朝7:30喊醒, 同媽媽講: 我唔想你返工呀! 我想你陪我! 我唔想你同爸爸返工! (N次) 孖寶哥就半夜喊醒, 大叫鼻塞!