孖寶兄弟語錄(1)

話說兩兄弟一齊坐係飯枱食蘋果, 哥哥叉住塊蘋果, 隻手一fing, 塊蘋果就飛咗落地下, 俾Nick Nick食咗

媽媽: 冇喇! 冇晒蘋果喇! 你玩嘛! 咪跌咗個蘋果落地下囉! 俾Nick Nick食咗喇!
(哥哥本來仲係度傻笑, 後尾諗諗吓冇咗個蘋果就開始唔開心!)
哥哥: 我想食蘋果!
媽媽: 冇喇! 媽媽同細佬都咁啱食完! 聽日再食過啦!
哥哥: 我想食蘋果! (開始扁咀, 喊!)
媽媽: 真係冇晒蘋果, 不如我請你食粒Nut喇!
(哥哥食完Nut仲喊!)
哥哥: 我好唔開心!
(媽媽已經抱住佢, 俾佢坐係媽媽大脾)
媽媽: 咁你同細佬講! 細佬呀! 哥哥唔開心, 你安慰吓佢啦!
(哥哥自己落地, 對住細佬, 細佬即時收起笑容, 配合哥哥慘慘豬的表情)
哥哥: 細佬! 我唔開心! 跌咗個蘋果!
細佬: 咁你同媽媽講對唔住啦! (超級同情哥哥的樣子)
(哥哥面向返媽媽)
哥哥: 媽媽, 對唔住!
細佬: 媽媽, 我叫哥哥同你講對唔住呀!
媽媽: 啊! 咁細佬你攬返哥哥, 叫佢唔好唔開心啦!
(兩兄弟攬作一團)
(媽媽忍笑忍得好辛苦)

孖寶兄弟3歲4個月19日喇!

四年前的今日, 我用驗孕棒check到有了BB, 當時不敢太肯定, 亦不敢太興奮, 因為懷孕的路實在有太多意外以及未知之素... 更未知所懷的是孖胎!

四年後, 即今日, 我有兩個超級可愛的寶寶, 實在要感恩!

3歲4個月19日了, 孖寶兄弟的成長越來越快, 很多時都超乎我的想像...

孖寶哥:

體格/體質 - 仍然是一隻瘦奀豬! 身高91cm, 體重27.8 lbs, 抱上手的感覺越來越輕, 經常鼻塞, 半夜或早上哭醒

性格/情緒 - 仍然是個大情大性的小男孩, 不拘小節 (所以會睡地上, 玩鞋底, 舔玩具等等), 愛冒險及挑戰新事物, 同時又對所有人充滿愛, 喜歡結交朋友, 對人沒有機心, 經常向爸媽撒驕, 會突然整個人緊抱媽媽的大腿, 輕聲叫媽媽! 媽媽! (媽媽的心都被融化了!)  不過, 仍然是情緒起伏很大, 喜怒無常, 可無故/因小事哭鬧半小時以上, 性格很固執, 堅決不認錯! 不過, 爸爸媽媽已經沒有像以往般強硬對付 (恐嚇/打)哭鬧中的哥哥, 反而用比較和平理性、溫柔的方式 (是幼稚園校長教的), 先抱起哭鬧中的孩子, 然後用說話形容孩子現時的情緒, 例如: 不開心, 很嬲, 好凄涼, 不喜歡這樣子, etc., 孩子會因為感覺被理解/同情而慢慢平靜下來, 這一招對哥哥蠻有用的!

家人關係 - 近來比較黏爸爸 (已經忘記了爸爸曾經浸他的頭落水!) 仍然很喜歡媽媽, 喜歡坐在媽媽的大腿上, 媽媽替他洗澡後, 喜歡媽媽用毛巾包著他, 然後整個人投入媽媽的懷抱撒驕, 現在會跟弟弟閒談/討論及互相交換玩具 (會先禮貌地徵得對方同意), 但仍然時常出現爭執/打鬥的情況

孖寶弟:

體格/體質 - 體重30.2lbs, 但抱上手的感覺越來越重, 洗澡時有小肚腩, 大腿也較以前粗壯, 身高92cm, 仍然是全班最矮! 很容易出汗的體質, 冬天也會出熱痱, 經常滿頭大汗, 近來半夜比較少哭醒的情況

性格/情緒 - 性格比較內向及保守, 不喜歡冒險, 不敢接受挑戰, 不善於與陌生人或新朋友接觸, 但情緒穏定, 肯認錯, 接受別人意見, 明白別人感受也善於表達自己 (說話很老積!), 記憶及專注能力很強, 很喜愛閱讀, 寫字, 繪畫及砌圖等比較靜態的活動, 同時也很喜歡玩滑板車及跟爸爸踢足球。近來發覺他開始因為很小的事情哭鬧 (扁咀 --> 扮哭 --> 放聲大哭), 應該是學哥哥, 因為他觀察到哥哥這樣做, 或會得到某程度上的好處, 例如: 爸媽會停止駡他, 甚至關心, 擁抱, 溫柔的安撫, etc., 於是, 他也嘗試用這一招來挑戰爸媽的底線!

家人關係 - 經常無緣無故不喜歡爸爸 (但早上起床發覺爸爸不在家時嚷著要找爸爸), 仍然很喜歡媽媽, 每晚當媽媽講完故事, 熄房燈後, 就會對媽媽說: 媽媽! 我要你呀! 我想你陪我!  最近還經常對媽媽說: 媽媽! 我想同你結婚呀! 弄得媽媽哭笑不得!  雖然經常跟哥哥吵架/大打出手, 但心底裏又很愛哥哥, 把心愛的鞋子讓給哥哥, 總是要求媽媽留一份食物給哥哥

媽媽感言:

好好珍惜當他們還需要你的時候, 你是他們的全世界
好好記著個子矮小的他們曾經用一雙小手緊緊的抱著你的大腿
好好感受他們的小屁屁坐在你大腿上的溫暖
好好記著你曾經用雙手將細小的他們擁入你懷中撒驕
好好享受每次跟他們的親密擁抱, 然後忍不住親親他們的小臉蛋
好好記著當他們還是小孩子時那份親子之間密不可分的親密感覺

帶住孖寶去旅行@2016 (序幕篇)

工作可以困住我的驅殼, 但困不住我想去旅行的靈魂, hoho...

仲記得舊年10月第一次帶孖寶兄弟去旅行(沖繩), 第一晚係酒店, 我已經好後悔, 好想返香港, 至於老公, 佢返香港落機後即講唔好有下次, 帶佢地去旅行真係好辛苦, 好似帶埋office D野去旅行做咁, 完全冇放假感覺!

但唔夠半年, 我同老公又心郁郁想去旅行 (其實係我想去)。其實老公舊年去完旅行執相期間, 已經唔記得自己呻過辛苦, 仲話帶佢地去旅行又幾開心喎! (緊係啦! 相片係最唔真實的記錄工具, 因為你只會影D開心野, 所以你就會有錯覺, 以為帶孖寶去旅行好開心... wakaka!)

好多人都話帶小朋友去旅行可以為一家人製造一D共同的經歷, 讓子女留下難忘的童年回憶, 又可以增進親子感情, 兄弟之間都會因為旅行時的經歷變得親密... (下刪一千字廢話)。講真, 我細個時, 阿爸每年暑假都帶我地一家人去旅行, 由初時去東南亞, 再衝出亞洲, 去歐洲, 北美洲, 澳洲, 到後尾去到冇地方好去, 去埋北歐 (當年唔太多人識去)。但到我長大之後, 我已經冇乜當年一家人去旅行的開心回憶, 親子關係又唔見有咩幫助, 我同細佬都冇兩句, 一句講晒, 我而家去旅行的目的只係自己想去, 但又唔忍心/放心/捨得掉低佢兩個, 惟有帶埋佢去, 同埋希望為自己同老公將來老咗, 留返一D開心回憶咋! 我都同老公講: 我地而家為自己製造緊D回憶呀, hoho!

雖然係第二次帶孖寶去旅行, 但就係第一次得我地兩公婆帶佢兩個3歲的甩繩馬騮去旅行, 二對二, 只能一人湊一個, 冇人幫手, 所以係一項高難度挑戰!

為咗降低呢項挑戰的難度, 都係去返D熟識的地方好D, 所以, 又係沖繩, 吓? 又黎? 你地悶唔悶呀? 沖繩 = 日本 = My favorite! 加上機場租車還車, 又有接送往返租車公司同機場客運大樓, 基本上同落樓下停車場攞車, 揸車去海洋公園冇咩分別, 只係多兩程飛機啫! 同埋去四日, 短短地, 就算痛苦經歷, 都係捱四日啫! hoho...

今次格晒價, 留意咗好耐, 諗咗好耐, 先至買機票, 先至發覺上次原來買貴咗好多, 上次一家四口機票連稅over 10,000, 當時仲以為價錢合理, 今次同一間航空公司, 同樣係一家四口, 同樣係淡季, 機票連稅只係6048, 知道上次俾貴咗4000蚊, 簡直係心如刀割!

Anyway, 終於有期去旅行喇 -- 6月5號至8號, Go! 沖繩!

其實, 初頭上網搵機票係想搵去大阪, 因為大阪有好多適合兒童去的景點, 包括環球影城, Legoland Discovery Centre, Kids Plaza Osaka, 但因為諗唔掂機場去市區的交通, 同埋我未克服到要搭簾航的心理關口, 所以改為買去沖繩的機票, 但其實我同老公仍然好想帶孖寶去大阪 (犯賤!) 所以又心郁郁, 諗住10月再帶孖寶去旅行, 經過一個月以黎隔日留意航空公司的機票價格, 尋日終於以「非最抵價」買咗4張10月17號至22號(6日)來回大阪的HK Express機票, 唔係最抵因為最抵果時憂柔寡斷冇買到 (我地除咗買樓之外, 買乜都係憂柔寡斷), 越睇越貴, 心都離埋, 再唔買可以唔駛去喇, 所以就買咗俾之前稍貴的機票, 盛惠6888, 算啦! 止蝕咗!

順帶一提:
早幾個星期, 老公睇新聞"嘩"咗一聲, 同我講日元升到6.8喇! 我跟住"嘩"咗一聲, 仲唔識醒水, 拿拿林就去換日元 (明知6月同10月都會去日本), 到上星期我如夢初醒時, 日元已經升到7蚊, 於是拿拿林上網換咗D日元, 今日, D日元已經升到7.2, 好在換咗啫, 加埋舊年6.2時換果D, 都夠6月同10月去日本!

暑期班

而家先至4月咋喎, 距離7月中放暑假, 仲有3個月, 咁快報暑期班? 阿媽媽, 你會唔會"怪獸"咗D呀?

雖然媽媽自問唔係怪獸, 但由於坊間實在太多怪獸家長, 所以惟有4月就幫佢地報定暑期班, 恐防諗多幾日, 遲咗俾班怪獸家長報晒!

至於報咩班? Phonics? 劍橋英語? 西班牙文? 普通話? 奧數? 小一面試班? No! No! 本來有諗過報Jolly Phonics, 因為佢地學校都有學, 可以趁暑假繼續學, 費是放完2個月暑假乜都唔記得晒, 不過, 又真係唔想咁"怪獸"喎!

結果, 媽媽只係幫佢地報咗2個暑期班 -- 「英語智叻星Smart English Kids」同埋「好行為繪畫樂」, 英語班其實唔係教英語, 只係由外籍導師用英語同小朋友講故事, 玩遊戲之類, 提供一個英語的環境, 等佢地有機會聽同講, 學術性唔高。至於繪畫班, 係媽媽之前問過佢地鍾意學咩, 細佬話鍾意畫畫, 哥哥又跟住話鍾意, 所以都係佢地興趣行先。

暑期班由7月中至8月中, 逢星期三, 五, 早上11:45至12:45 (1小時), 其餘時間都係孖寶兄弟的遊戲時間, 至於星期六, 日, 就係爸爸媽媽同孖寶兄弟的親子時間, 所以避咗冇揀星期六上堂的暑期課程。

由於孖寶兄弟未去過呢間社區中心上堂, 為咗等佢地易D適應, 媽媽另外報咗5月至6月的親子綜合藝術班, 逢星期六早上10:15至11:15 (1小時)。

報咗3個班 $900 + $ 475 + $760 + $50(入會費) x 2個小朋友 = $4370

養一個小朋友真係唔容易, 我仲要打孖黎, 乜都要俾兩份, 真係好金!

細佬仔第二次入急症!

繼去年8月某一個夜晚, 細佬仔無啦啦係一個鐘之內嘔咗6次, 我同爸爸嚇到即刻同佢入急症, 細佬今次又出事!

1.4.2016 (星期五)
話說當日去海洋公園, 細佬仔係排隊等吊車時, 俾隻衰蚊針咗左眼皮, 我見到撥走隻衰蚊時, 已經太遲, 針咗喇! 跟住細佬隻睇就開始紅腫, 我醒唔起要同佢搽類固醇 (因為佢一向對蚊叮都有嚴重過敏反應), 只係幫佢搽咗D普通止痕膏, 結果緊係出事啦!

細佬仔半夜發惡夢爆喊時, 我已經發覺佢隻眼皮腫晒, 我已經好冷靜咁同老公講, 聽朝一早要同佢睇吓醫生喎! 老公即時反應: 有冇咁誇張呀! (都估到佢咁既回應, 因為佢次次都係咁)

2.4.2016 (星期六)
好啦, 到咗第二朝天光, 老公都睇到熟睡中的細佬, 隻左眼皮腫晒, 佢終於都同意帶細佬去睇醫生, 仲話佢落去排隊登記先 (都叫做負返少少責任), 細佬9點起身, 隻眼腫到得返一條線, 佢同媽媽講睇唔到野, 媽媽惟有安慰佢, 唔駛驚, 睇到野架, 隻眼冇事架, 只係眼皮腫咗咋... (其實媽媽都好擔心, 只係扮鎮定!)

睇完醫生, 攞咗藥水同藥膏, 每日一次, 即時幫佢搽藥膏同餵佢食藥, 諗住會好轉, 成個早上同下午, 細佬都話隻眼好痕, 好痛, 但醫生話唔好抓佢, 細佬記住醫生的說話, 唔敢抓, 但個人就好躁, 心情極度惡劣!

細佬由下晝4:15瞓到差不多晚上7點, 起身, 大鑊! 隻眼冇好轉, 反而仲腫到擘唔大, 細佬好驚, 大喊, 我都好驚, 我用最冷靜的聲線同老公講: 不如去睇急症! 老公又照例話: 去到都要等好耐, 佢實話你唔係急症, 同埋睇完都係咁, 咁細個, 唔通打支針落眼皮咩?.... (一大堆理由唔想去急症) 我堅持要帶細佬去, 自己個仔搞成咁, 我唔通乜都唔做, 坐係度咩? 雖然我都知睇急症都冇咩用, 但帶咗佢去睇, 起碼個心安樂D!

於是8點去登記, 回家, 沖涼, 食水果, 飲奶, 9:30再去等, 等到10:15終於等到醫生叫名。醫生見到佢隻眼腫到雞蛋咁, 都話細佬的過敏反應比較嚴重, 要打針 (原來真係有針打, 但唔係打眼, 唔駛驚, 打pat pat啫), 醫生叫我地出返去大堂度等叫名, 等候期間, 細佬問: 我地等咩? 見咗醫生喇喎! 一陣要做咩架? 我同爸爸惟有互打眼式, 同佢講: 醫生話叫我地等吓, 一陣叫返我地入去喎! (答咗等於冇答, 但我地估其實細佬知道要打針, 想我地confirm)

又等咗10分鐘, 叫佢個名喇, 個護士好冷漠咁用機械人的腔調講: 坐上床, 除褲! 爸爸抱住細佬, 除低少少佢條褲仔, 露咗個pat pat出黎, 其實細佬已經知咩事, 但佢扮冇事, 仲問我地係唔係有fire engine睇, 我地就繼續扮冇事, 直至護士一野吉落細佬個pat pat度, 實在好痛, 細佬大喊咗出黎! (佢知道要打針都冇扭計, 好合作, 已經好叻仔!)

打完針, 媽媽同細佬去攞藥 (醫生竟然開咗隻收鼻水藥, 唔知搞邊科, 冇藥膏搽, 連配藥員都覺得好奇怪) 爸爸去攞車, 返到屋企已經11點幾喇! 細佬好攰, 好快就瞓咗!

3.4.2016 (星期日)
到咗第二朝, 奇蹟冇發生! 細佬隻眼仍然係腫到擘唔大, 但叫做冇惡化, 冇起水泡流膿, 惟有食住醫生D收鼻水藥, 媽媽提議幫細佬仔搽D類固醇 (因為私家醫生開果隻藥膏冇料到)

到咗夜晚, 細佬隻眼有D起色, 有返一條線, 感恩!

4.4.2016 (星期一)
細佬隻眼仍然腫, 但已經可以開到半隻眼喇!

5.4.2016 (星期二)
細佬隻眼好返好多, 但都係比平時細, 變咗大細眼! 眼皮上明顯見到有2點深紅色, 應該就係俾隻蚊 / 昆蟲咬到的位置!

孖寶兄弟第二次去海洋公園

1.4.2016 (星期五)

今日我同老公請咗假, 帶孖寶兄弟去海洋公園, 因為佢地放咗2星期復活節假期, 我同老公都冇帶佢地去過邊度玩...

今次係繼去年10月10號(老公生日), 半年內第二次帶孖寶兄弟去海洋公園!

汲取咗上一次的教訓, 我地今次作出咗好多改善:

1) 只限一家四口去 (唔駛接送其他人, 直接去, 直接走, 多D時間留係公園入面玩)

2) 帶2架士的車, 我同老公一人推一個仔 (萬一扭眼瞓, 可以坐係車入面瞓, 唔駛抱到手軟, 我同老公又可以繼續行程, 不受影響)

3) 唔去公園入面買麥當當, 自己偷運野食入去, 包括大量的Energy Bar、 麵包、提子乾、Nuts、香蕉、鈣C寶, (全部都係補充能量的食物, 肚餓即食, 防止媽媽黑面)

4) 一入場趁人未多即去「威威天地」(即兒童王國) (上次唔知有呢part, 冇玩到)

5) 唔好去睇海豚表演, 嘥時間, 孖寶兄弟又冇興趣

由於我地作出咗好多改善, 所以今次係可以由10:30玩到5:30, 好盡興, 同埋感覺好抵玩, 我地今次玩咗D咩?

- 3次兒童旋轉木馬 (仲以為細佬會驚, 佢又冇野喎, 兩個都好開心, 玩完仲話要玩多次)
- 2次小火車
- 1次跳彈床 (只有哥哥玩, 細佬有心理陰影)
- 1次摩天輪
- 3次轉轉轉飛天小甲蟲 (孖寶一人一部, 仲以為細佬會驚到喊住話要停機, 要落返黎, 點知又冇野喎, 爸爸話佢大個仔喇!)
- 玩咗好耐的兒童遊樂設施
- 2次同熊貓盈盈造型人物合照 (冇乜人排隊, 只係路過見到冇人咪走埋去影囉!)
- 睇咗樂樂個pat pat同盈盈個頭 (好過上次乜都睇唔到)
- 睇咗雀鳥表演 (隻麻鷹近距離係頭頂飛過)
- 搭咗1次海洋快線上山頂
- 參觀咗2次企鵝館
- 參觀咗海豹館、雪狐館、鯊魚館
- 搭咗1次吊車落山
- 1次大型旋轉木馬

果朝早2個都好早(08:00)起身, 9:30出門口 (好叻, 如果去旅行都係咁就好喇!) 10:00 出到TST買入場券(成人$285), 10:30到達公園, 例牌係門口影張全家福!

然後入場, 即時俾孖寶兄弟一人食一隻蕉, 食飽咗先!

事不宜遲, 乜都唔睇, 一心就係去兒童王國俾佢地玩餐飽先! 可能時間尚早, 冇乜人排隊, 所以好多遊戲都可以玩多幾次, YEAH!  原來呢度都有得跳彈床, 哥哥二話不說已經走咗去排隊 (仲有得分開大中細小朋友玩, 唔會怕小B俾人撞親), 但細佬好驚, 堅持唔玩! 媽媽於是帶細佬坐埋一邊, 食吓野, 爸爸就睇住哥哥! 哥哥跳彈床跳得好開心, 哥哥的性格就係有呢方面的好處, 愛玩, 愛笑, 愛冒險!

之後一齊去玩摩天輪, 然後搵個位食野, 媽媽狂隊Energy Bar同麵包, 費是肚餓變咗黑面(爸爸最驚), 食完野冇咗肚餓感覺, 又可以繼續作戰!  孖寶兄弟去玩轉轉轉飛天小甲蟲, 哥哥自動走去揀隻甲蟲, 仲自己爬埋入個座位度, 基本上出去玩可以唔駛理哥哥, 佢玩就最叻! 媽媽抱細佬上甲蟲, 心諗: 一陣飛起唔好喊話要停機呀! 我都救你唔到! 最後, 兩個都冇喊, 雖然細佬初頭有少少緊張, 但玩玩吓都好開心, 仲要排隊玩多2次!



諗住離開兒童王國去睇熊貓, 見到雀鳥表演仲有3分鐘開場, 又走入去睇吓, 又幾好睇喎, 估唔到D雀仔會飛得咁近, 但可能上次去沖繩有陰影 (咁多陰影? 係!), 佢地好驚D雀仔咁近, 縮埋一舊, hoho...



去睇熊貓, 今次終於都冇呢埋到, 雖然都係瞓咗唔郁既... 之後本來想搭吊車上山, 但太多人 (因為中午過後多咗好多人), 條人龍好誇張, 於是決定搭海洋快線上山, 唔駛10分鐘已經到咗, 孖寶兄弟亦都瞓晒! Oh! 仲諗住帶佢地睇企鵝, 惟有推埋佢地入去冰天雪地, 真係好很凍, 但d企鵝好得意! 睇完企鵝出返去廣場d凳坐吓, 又食吓野補充體力同補搽防晒 (呢個好緊要! 因為啱啱打咗1064美白去斑)



好在有2架bb車, 一人推一個, 我同老公可以輕輕鬆鬆繼續參觀, 慢慢欣賞一下d海洋生物 (真係好慘, 咁大隻, 個水池咁細, 只可以重複打圈, 係唔係應該杯葛海洋公園, 唔好再黎? 我地而家好似支持緊佢虐待d動物)

仲以為佢兩個要瞓2個鐘, 點知瞓咗45分鐘左右就醒咗, 哥哥一醒咗就話要去廁所, 好急, 嚇到媽媽抱住佢狂奔咗200米去廁所, 好在佢忍到, 冇賴濕到, 叻叻! 之後細佬都醒咗, 於是又去多一次睇企鵝, 不過現場環境實在太凍, 孖寶嚷著要走, 唔睇企鵝...

跟住就去搵鯊魚館, 行咗好耐, 兜咗好多個圈, 原來就係以前的海洋館, 但其實冇咩鯊魚睇, 2兄弟係度睇魚, 間中有一條鯊魚游過, 原來鯊魚好多牙, 好尖, 好似倒勾咁, d牙多到個口都合唔埋...

睇完鯊係時候落山喇! 吊車站唔算多人, 條隊都係moving的, 等得過, 邊等邊食snack, 都好快, 但就係等的過程, 細佬隻左眼俾隻衰蚊(昆蟲)叮到, 雖然媽媽見到已即時撥開, 但太遲喇! 已經叮咗, 起咗粒蚊癩! 兩個都好鍾意坐吊車, 好雀躍, 仲話自己好緊張! (太搞笑)

落咗山, 見到纜車站下面個大型旋轉木馬, 見到冇乜人排隊, 媽媽提議玩理呢個先至走, 原來哥哥已經行咗入去排隊, 排隊期間, 哥哥又話急尿, 好在都趕得切返黎玩!



玩完旋轉木馬, 5:30真係要走喇!

孖寶兄弟一上車就瞓著咗...