諗都諗唔到民生幼稚園竟然收咗孖寶兄弟, 係兩個都收喎! 雖然又係下午班, 但我上網睇到, 好多媽媽係收到reject信, 所以佢兩兄弟都同時入到去讀書, 唔理上午或下午班, 做媽媽的, 實在係好開心, 好感恩!
我相信都有主的安排, 因為自從11月頭interview後, 我已經忘記咗呢間學校, 亦冇諗過會收孖寶, 常言道: 「希望越大, 失望越大」, 我今次係完全冇希望過, 甚至已經唔記得咗件事, 直至老公上星期六晚收到信, 話民生有offer, 我先至記得佢地係in過民生, 我上返網search, 原來有家長一直等緊封信, 食唔安, 坐唔樂, 主啊! 感謝你! 唔係因為民生收咗佢地, 係你叫我一無掛慮!
當知道民生收咗孖寶, 我呢個做媽媽, 先至識得開始上網搵吓學校的資料, 主要係學校的教學模式 (好谷抑或活動教學)、老師有冇愛心, 小朋友返學開唔開心, 多唔多功課, 多唔多課外活動, 係唔係可以100%直上小學......等等。睇完之後, 都心大心細, 又驚好谷, 好辛苦, 搞到孖寶唔鍾意返學 (佢地而家返學好開心), 又驚只得60%可以直上小學, 孖寶會唔會就係剩低果40%? 不過, 都有正面的信息, 讀完民生出黎都唔會太差, 佢係用聖經教小朋友, 所以小朋友德育都好好, 最緊要係有基督教background, 因為呢個係我同老公的期望, 想佢地從小認識主! 加上佢每月學費三千幾, 唔算貴, 但每班都有一個Native English-speaking Teacher, 係出面D咩維記、學之園, 都要咁既價錢啦! 上網搵資料的過程, 亦見到有討論區分析有offer的原因, 其實大部份小朋友interview表現都咁上下, 所以interview表現只佔一部份分數, 其他考慮因素包括大B細B問題(我對孖寶今年變咗超大B), 家長職業(我同老公都係公務員, 可能有優勢掛), 問卷填得好唔好(自問好俾心機填問卷, 好似作文同書法比賽咁), 所以雖然唔係舊生, 又冇兄姊讀緊, 都有offer俾佢地!
剛過去的星期六, 去民生註冊, 再一次入去個校舍, 有跑道的球場, 課室全部落地玻璃, 校園環境一流, 冇咩幼稚園可以咁!
上星期六in咗培正, 睇返佢張回條, 原來要1月30日先至會收到通知, 即係仲要等個幾月, 呢間我反而有少少期望, 等待的心態, 因為老公知道培正係100%直上小學, 即係話有9年唔駛煩, 如果培正收佢地, 一定會讀培正, 所以有少少期望。
後記@26.1.2016
1. 尋日收到培正通知, 未被取錄, 連後補資格都冇, 都預咗! 叠埋心水讀民生啦!
2. Greenfield竟然都唔收佢地讀全日, 只係後補, 明明in得好好, 哥哥仲主動拖住個NET隻手, 又攬住另一個老師!
3. 力勤都冇全日offer, 只係offer下午班, 連上午班offer都冇, 可能佢知我地本身都讀緊K1, 唔想嘥咗2個位, 所以我收到通知信都即時撕爛佢算喇!
4. 茵怡上星期打黎話下學期可以轉上午班, 但由於唔想佢地2個重新適應(包括同學仔, 作息時間, 同埋下年可能讀民生下午班...等等), 所以同老師講呢幾個月都係唔轉住喇, 下年K2睇吓有冇機會轉啦!
